Kulambira Kwa Banja—Munacitanji Toera Kukhale Kwakutsandzayisa Kakamwe?

Baba unango ku Brazil alonga: “Tisakomerwa kakamwe na kucedza nkati mwa Kulambira Kwa Banja namaulo, kwakuti kazinji kene tisapiringana ndzidzi ndingakhonda kulimirisa banja yanga.” Nsolo wa banja ku Japau alonga kuti mwanace wamamuna wa pyaka 10 pyakubalwa nee asatsalakana ndzidzi, iye asafuna tipitirize. Thangwi yanji? Babace alonga, “Iye asakhuyiwa kakamwe, pyenepi pisamphedza toera kukomerwa.”

Mbwenye si ana onsene tayu anakomerwa tenepo, mwandimomwene, anango nee asakomerwa na kulambira kwa banja. Thangwi yanji? Baba unango ku Togo alonga, “Kulambira Yahova nee kusafunika kukhala kwakunetesa.” Khala kusanetesa, kodi ndi thangwi ya njira inatsogolerwa kulambira kwa banja? Mabanja mazinji asaona kuti kulambira kwa banja ndi ninga mudalonga Izaiya thangwi ya Sabudu, ‘phwando yakutsandzayisa.’​—Iza. 58:13, 14, NM.

Ababa Acikristu asadziwa kuti toera mabanja awo akomerwe na kulambira kwa banja, anthu asafunika akhale akusudzuka. Ralf, baba wa ana atatu acikazi na m’bodzi wacimuna, alonga kuti kulambira kwawo kwa banja ndi ninga kucedza tayu ninga pfundziro; onsene asacita khundu. Mbwenye midzidzi inango pisanentsa kucitisa munthu onsene kukomerwa na kucita khundu mu mphangwa zinadingwa. Mama unango alonga: “Midzidzi inango nee ndisakhala na mphambvu toera kucitisa kulambira kwa banja kukhale kwakutsandzayisa ninga munafunira ine.” Munathimbana tani na cinentso ceneci?

KUCIMBIZA NA KUCINJA

Baba wa ana awiri acitsikana ku Alemanya alonga: “Tisafunika kucinja.” Natalia, mama wa ana awiri acitsikana alonga: “cinthu cakufunika kakamwe ndi kucinja, kucinja, kucinja.” Mabanja mazinji asagawa kulambira kwawo kwa banja m’makhundu akusiyana-siyana. Cleiton, baba wa ana awiri ku Brazil alonga: “Pyenepi pisacitisa pfundziro kukhala yakugalamuka, anthu onsene mbacita khundu.” Mu kugawa ndzidzi wa pfundziro, anyakubala anakwanisa kutsalakana pyakufuna pya ana onsene, khala ndi a mathunga akusiyana-siyana. Anyakubala anakwanisa kutsalakana pyakufuna pya m’bodzi na m’bodzi pa banja, mbabverana kusankhula ntundu wa mphangwa zinafuna kudingwa.

Mabanja anango asacitanji toera kudinga pinthu pyakusiyana-siyana? Anango asatoma kulambira kwa banja mu kuimba nyimbo za Umambo. Juan wa ku Mexiko, alonga: “Pyenepi pisatiphedza toera kukhazikisa makhaliro adidi, na kukhunganya manyerezero athu ku pinthu pinafuna ife kudinga.” Banja yace isasankhula nyimbo zakubverana na mphangwa zinafuna iwo kudinga pa ntsiku ineyi cakumaulo.

Mabanja mazinji asaleri pabodzi pene malemba a Bhibhlya. Toera kucinja, acibale pabanja asaleri makhundu a anthu akusiyana-siyana analongwa m’Bhibhlya. Baba unango ku Japau alonga kuti kwa iye “pakutoma pikhanentsa pang’ono kuleri mu njira ineyi.” Mbwenye anace awiri acimuna akhakomerwa kuona anyakubalawo mbakacita pyenepi pabodzi na iwo. Mabanja anango asasangizira mbiri za anthu analongwa m’Bhibhlya. Roger, baba wa ana awiri acimuna ku Afrika Wakubangwe alonga: Anapiana, “kazinji kene asaona pinthu m’mbiri za Bhibhlya pyakuti ife ninga anyakubala nee tisapiona.”

Njira inango toera kucinja ndi kucita mabasa pabodzi, ninga kumanga bote ya Nowa, peno templo ya Salomoni. Mabasa anewa asaphemba kufufudza pinthu pyakukomeresa. Mwacitsandzo, mu sala ya banja inango ku Azya, mukhali ntsikana wa pyaka pixanu pyakubalwa, anyakubalace, pabodzi na mbuyace wankazi. Iwo akhacita masendzekero a kulemba maulendo a Paulu ninga misionaryo. Mabanja anango asacita masendzekero a pyakucitika pinagumanika m’bukhu ya Eksodo. Donald wa ku Togo alonga: Kucinja “kwabweresa umaso upswa kwa ife, na pa kulambira kwathu kwa banja.” Munakwanisa kunyerezera pinthu pyakuti pinadzacitisa kulambira kwanu kwa banja kukhala kwakutsandzayisa kakamwe?

KUKHUNGANYIKA NDI KWAKUFUNIKA

Maseze kucimbiza na kucinja kusacitisa kulambira kwa banja kukhala kwakutsandzayisa, toera kuphindula mwadidi, onsene asafunika akhunganyike. Midzidzi inango anapiana asaneta, natenepa, anyakubala asafunika kunyerezera mwadidi mphangwa zidasankhula iwo na kukhunganyika mwadidi. Baba unango alonga: “Ndingakhunganyika, anthu onsene asaphindula kakamwe na pfundziro.” Baba unango ku Alemanya, asadziwisa banjace mwanyapantsi pinthu pinafuna iwo kudinga m’masumana anafuna kudza. Angasankhula kudinga DVD ya m’Bhibhlya pa kulambira kwawo kwa banja, baba wa ana atanthatu ku Benin asapereka mibvundzo mwanyapantsi. Mwandimomwene, kukhunganyika kusaphedza toera kulambira kwathu kwa banja kukhale kwakuphindulisa.

Banja ingadziwa mwanyapantsi mphangwa zinafuna iwo kudzadinga, onsene anakwanisa kucedza pyenepi nkati mwa sumana, natenepa pinaaphedza kukulisa cifuno cawo. Khala onsene ali na makhundu, m’bodzi na m’bodzi anadzaona kuti akucita kulambira kwace kwa banja.

WANGISIRANI TOERA KUKHONDA PHONYA

Mabanja mazinji asafunika kuwangisira kakamwe toera kucita kulambira kwa banja mwakukhonda phonya.

Ababa azinji asaphata basa mu ndzidzi uzinji toera kutsalakana mabanja awo. Mwacitsandzo, baba unango ku Mexiko asabuluka panyumba pa ndzidzi utanthatu camacibese mbabwerera pa ndzidzi usere camasiku. Kusiyapo pyenepi, midzidzi inango, ndzidzi wa Kulambira Kwa Banja usafunika kucinjwa thangwi ya mabasa anango auzimu.

Ngakhale tenepo, tisafunika kucita kulambira kwa banja mwakukhonda phonya. Loïs wa pyaka 11 pyakubalwa ku Togo alonga kutonga kwa banja yawo: “Maseze midzidzi inango tisafunika kutoma kulambira kwa banja mwakudembuka pang’ono thangwi ya pinango pidacitika pa ntsiku ineyi, ife tisacita kulambira kwathu kwa banja mwakukhonda phonya.” Musaona thangwi yanji mabanja anango asasankhula kucita kulambira kwawo kwa banja mu ntsiku zakutoma za sumana? Pangaoneka mpingizo, iwo asacita kulambira kwa banja pa ntsiku inango nkati mwa sumana ineyi.

Dzina ineyi, kulambira kwa banja, isapangiza kuti ndi khundu ya kulambira kwanu Yahova. Phedzani onsene pabanja yanu toera abwerese “ana ng’ombe a milomo yawo” masumana onsene. (Oze. 14:2, NM) Tisadikhira kuti ndzidzi unoyu ukhale wakutsandzayisa kakamwe kwa onsene pabanja, thangwi kukomerwa kwa Yahova ‘Mulungu ndi kukomerwa kwanu.’​—Neh. 8:9, 10.

[Bokosi pa tsamba 29]

KULAMBIRA KWANU KWA BANJA KUSAFUNIKA KUKHALE:

Kwakusudzuka

Kwakucimbiza

Kwakucinja

Kwakukhunganywa mwadidi

Kwakucitwa mwakukhonda phonya