Ciphedzo Kuna Mabanja

1. Kodi Sabudu ikhaphindulisa tani mabanja a Israele?

¹ Kukoya Sabudu kukhali masasanyiro a ufuni a Yahova toera kuphedza mabanja. Aisraele akhapuma ku mabasa awo a ntsiku zonsene na akhali na ndzidzi wakunyerezera udidi wa Yahova na uxamwali wawo na iye. Anyakubala akhakwanisa kuphatisira mwai unoyu toera kukhomera Mwambo m’mitima ya anawo. (Deut. 6:6, 7) Sabudu ikhapasa ndzidzi mbumba ya Yahova masumana onsene toera kuikha manyerezero ku uzimu wawo.

2. Kodi Sabudu isatipfunzisanji thangwi ya Yahova?

² Mwandimomwene, Yahova nkhabebve kuphemba mabanja toera kukoya Sabudu. Mbwenye, mwambo unoyu usatipfunzisa cinthu thangwi ya Mulungu wathu. Iye ndzidzi onsene asapangiza cifuno cikulu kakamwe ca ukhali wadidi wauzimu wa anthu ace. (Iza. 48:17, 18) Lero, njira ibodzi inapangiza Yahova citsalakano cace caufuni ndi kubulukira ku masasanyiro a Kulambira Kwa Banja namaulo.

3. Kodi ndi cipi cifuniro ca Kulambira Kwa Banja namaulo?

³ Kodi ndi Cipi Cifuniro ca Kulambira Kwa Banja Namaulo? Kutomera pa nthanda ya Thongwe ya 2009, Pfunziro ya Bukhu ya Mpingo yatoma kucitwa pabodzi pene na Xikola Ya Utumiki Wa Mulungu na Nsonkhano Wa Basa. Thangwi ibodzi yakucinja kweneku ikhali toera kupasa mabanja mwai wakuwangisa uzimu wawo mu kusankhula ntsiku ibodzi pa sumana toera kucita kulambira kwa banja. Mabanja onsene awangiswa kucinja pfunziro yawo ya banja toera kuicita pa ndzidzi ukhaphatisira iwo pfunziro ya bukhu, pingakhala pyakuphata basa, na kuphatisira ndzidzi unoyu toera kudinga Bhibhlya mwakukhonda kucimbiza mbakanyerezera mphangwa zakuti zinaphedza banja.

4. Kodi banja isafunika kuphatisira ndzidzi ubodzi basi toera kucita Kulambira Kwa Banja namaulo? Fokotozani.

⁴ Toera kugumanika pa Pfunziro ya Bukhu ya Mpingo, tikhafuna ndzidzi toera kukhunganyika, kucita ulendo, na pinthu pinango. Kwa azinji a ife, tikhaphatisira ndzidzi uzinji toera kugumanika pa nsonkhano unoyu wa ndzidzi ubodzi. Thangwi yakucinja kwa ndandanda wathu wa nsonkhano, cincino tiri na ndzidzi unoyu wa cakumaulo toera kulambira Yahova ninga banja. Natenepa, kulambira kwathu kwa banja namaulo nee kusafunika kucepeswa mu ndzidzi ubodzi basi tayu. Mbuto mwace, tisafunika kunyerezera thangwi ya pyakufuna na makhaliro a banja yathu, mbatikhazikisa ndzidzi unafuna ife kuphatisira pa Kulambira kwathu kwa Banja.

5. Kodi tisafunika kuphatisira ndzidzi onsene mu kupfunza ninga nsoka? Fokotozani.

⁵ Kodi Tisafunika Kuphatisira Ndzidzi Onsene mu Kupfunza Ninga Nsoka? Anyakumanga banja na mabanja akuti ali na ana angacedza pabodzi pya ntsonga za m’Bhibhlya asawangisana m’bodzi na nzace. (Arom. 1:12). Mabanja anewa asakhala akufendedzerana unango na nzace. Natenepa, kucedza pya m’Bhibhlya kusafunika kukhala cinthu cakufunika kakamwe pa Kulambira Kwa Banja namaulo. Mbwenye, munthu m’bodzi na m’bodzi pa banja mbadakwanisambo kuphatisira khundu ya ndzidzi unoyu toera kucita pfunziro ya munthu paekha. Mwacitsanzo, pakumala kucedza ninga nsoka, banja ingakwanise kupitiriza pabodzi pene maseze munthu m’bodzi na m’bodzi mbakapfunza paekha, panango mbakamalisa kukhunganyika misonkhano peno kuleri marevista. Mabanja anango asatonga ntsiku ineyi kuthimisa televizau ndzidzi onsene wakumaulo.

6. Kodi kupfunza kweneku kusafunika kutsogolerwa tani?

⁶ Kodi Kupfunza Kweneku Kusafunika Kutsogolerwa Tani? Kupfunza kweneko nee kusafunika kucitwa ndzidzi onsene na mibvunzo na matawiro. Toera Kulambira Kwa Banja namaulo kukhale kwakuwangisa na kwakukomeresa, mabanja mazinji asacita masasanyiro akulandana na a misonkhano yathu inango. Mabanja anewa asagawana makhundu akusiyana-siyana na asacita makhundu anewa mu njira zakusiyana-siyana. Mwacitsanzo, iwo asaleri Bhibhlya pabodzi pene, asakhunganya makhundu a misonkhano, na asayesera makhundu toera kucita utumiki. Tsamba 6 isapereka maonero anango.

7. Kodi ndi makhaliro api anyakubala asafunika kuakhazikisa?

⁷ Kodi ndi Makhaliro Api Anyakubala Asafunika Kuakhazikisa? Banja yanu inadzapfunza mwadidi pangaoneka makhaliro a ufuni na akusudzuka. M’midzidzi inango munakwanisa kupfunza kunja khala makhaliro akudambo ndi adidi. Khalani akusudzuka toera kupuma pingakhala pyakufunika. Mabanja anango asakhunganya cakudya toera kudya pabodzi pene pakumala kupfunza. Nakuti anyakubala asafunika kucalira kuphatisira Kulambira Kwa Banja namaulo toera kupokera peno kusandika, iwo panango anafuna kuphatisira ndzidzi unango toera kulonga thangwi ya nsambo peno nyatwa inaoneka yakuti isafunika kutsalakanwa. Natenepa, pinakhala pyadidi kakamwe kulonga na mwana pakhundu thangwi ya pinthu pinandzudzumisa pa ndzidzi unango pakati pa sumana toera kucalira kumpasa manyadzo pakati pa abale ace. Kulambira Kwa Banja namaulo nee kusafunika kuti ndzidzi unango kukhale kwa makhuzi peno kwakukhonda kutsanzayisa, mbwenye kusafunika kupangiza kutsanzaya kwa Mulungu ule analambira ife.—1 Tim. 1:11.

8, 9. Kodi ndi kukhunganyika kupi kunaphembwa misolo ya banja?

⁸ Kodi Nsolo wa Banja Unakhunganyika Tani? Banja inadzaphindula kakamwe khala nsolo wa banja usakhunganyika mwanyapantsi Kulambira Kwa Banja namaulo mu kusankhula pinthu pinafunika iwo kupfunza na njira yadidi ya kupipfunza. (Mis. 21:5) Mamuna anacita mwadidi angabvunzisa nkazace thangwi ya pyenepi. (Mis. 15:22) Misolo ya banja, thangwi yanji midzidzi inango nkhabe kubvunzisa ananu maonero awo? Mungacita tenepa, munadzadziwa mwadidi pifuno pya ananu na pinthu pinaadzudzumisa.

⁹ Masumana mazinji nsolo wa banja panango nee unadzafuna kubvunga ndzidzi uzinji toera kukhunganyika. Panango, banja inadzatsanzaya ingacita pinthu pidadzoloera iyo masumana onsene, na nsolo wa banja nee unadzafunika kubweresa mphangwa zipswa ndzidzi onsene. Iye anadzaona kukhala kwakuphindulisa kukhunganyika pakumala kwa pfunziro ibodzi na ibodzi ya Kulambira Kwa Banja namaulo nakuti pyakufuna pyauzimu pya banja yace piciri m’manyerezero. Misolo inango ya banja isalemba mwacigwagwa ndandanda na asaikha pa mbuto yakuti onsene pa banja anakwanisa kuiona. Pyenepi pisacitisa kutsanzaya, kunyerezera mwanyapantsi na pisapasa banja ndzidzi wakukhunganyika pingafunika.

10. Kodi ale anakhala okhene anacita tani Kulambira Kwa Banja namaulo?

¹⁰ Ndiye Tani Khala Ndine Basi Mboni pa Panja? Ale akuti asakhala okhene anakwanisa kuphatisira ndzidzi wa Kulambira Kwa Banja namaulo toera kucita pfunziro ya munthu paekha. Ndandanda wadidi wakupfunza kwa munthu paekha usafunika kuphataniza kuleri Bhibhlya, kukhunganyika misonkhano na kuleri A Sentinele na Desperti! Amwazi mphangwa anango asacita masasanyiro akuthimizirika a pfunziro ya munthu paekha. Midzidzi inango, iwo asacemera amwazi mphangwa anango peno banja kuti akhale pabodzi toera kuwangisana mu kucedza pya Malemba.

11, 12. Kodi Kulambira Kwa Banja namaulo ndzidzi onsene kusabweresa maphindu api?

¹¹ Kodi Kulambira Kwa Banja Namaulo Ndzidzi Onsene Kusabweresa Maphindu Api? Ale anaperekeka na ntima onsene ku ulambiri wandimomwene asafendedzera cifupi Yahova. Mwakuthimizira, mabanja analambira pabodzi pene asawangisa uxamwali wawo wa banja. Banja ibodzi yalonga thangwi ya nkhombo zidakhala na iyo: “Ninga apainiya akusowa ana, tisatsanzaya kakamwe na Kulambira kwathu kwa Banja namasiku. Tisapibva kukhala akufendedzerana na tisafendedzerambo Babathu wakudzulu. Cincino tingalamuka namacibese a ntsiku idakhazikisa ife toera kupfunza pabodzi pene, tisabvundzana: ‘Usadziwa kuti tiri nanji masiku ano? Kulambira kwa Banja namasiku!’”

¹² Masasanyiro akukhala na kulambira kwa banja namaulo asaphedzambo mabanja akuti ali na mabasa mazinji. Mama m’bodzi wa nzice anakuza ekha ana awiri na wakuti asatumikira ninga mpainiya wa ndzidzi onsene alemba: Kalene, kupfunza kwathu pabodzi ninga banja kukhali kwakunentsa. Nee tikhapfunza ndzidzi onsene pontho pfunziro yathu nee ikhali yakuwanga tayu thangwi ndikhali wakuneta. Ndikhacimwana kucita pinthu pyonsene. Natenepa ndiri kulemba kwa imwe toera kupereka takhuta wankulu kakamwe thangwi ya Kulambira Kwa Banja namaulo. Cineino tisapembera thangwi ya kukhala na pfunziro ya banja ndzidzi onsene na tisaphindula.”

13. Kodi ndi ninji cinatonga kuphindula kunakhala na banja yathu kubulukira ku masasanyiro anewa?

¹³ Ninga Sabudu, Kulambira Kwa Banja namaulo ndi sagwati yakubuluka kwa Babathu wakudzulu yakuti inakwanisa kuphedza mabanja. (Tgo. 1:17) Njira ikhaphatisira mabanja Aisraele Sabudu ikhatonga kuphindula kwawo kwauzimu. Sawasawa, njira inaphatisira ife maulo akuti tapaswa toera kucita kulambira kwa banja kunatongambo kuphindula kunakhala na banja yathu. (2 Akor. 9:6; Agal. 6:7, 8; Akol. 3:23, 24) Mukuphatisira mwadidi masasanyiro anewa, banja yanu inakwanisa kulonga ninga nyamasalmo: “Mbwenye ine ndinakukhulupirani, Mbuya; kukhala kwa Imwe ntchitsandzayo changa.”—Sal. 73:28.

[Ntsonga ikulu pa tsamba 5]

Kulambira Kwa Banja namaulo nee kusafunika kuti ndzidzi unango kukhale kwa makhuzi peno kwakukhonda kutsanzayisa, mbwenye kusafunika kupangiza kutsanzaya kwa Mulungu ule analambira ife

[Bokosi pa tsamba 6]

KOYANI

Manyerezero Anango A Kulambira Kwa Banja Namaulo

Bhibhlya:

• Lerini pabodzi pene phindi ya kuleri Bhibhlya kwa sumana na sumana. Mphangwa zinango za m’Bhibhlya zalembwa mu njira yakuti munthu m’bodzi akwanise kukhala nyakufokotoza na anango akwanise kuleri mafala a anthu akusiyana-siyana.

• Citani citsanzo ninga ca drama ca phindi ya Bhibhlya idaleri imwe.

• Pasani basa munthu m’bodzi na m’bodzi pa banja toera kuleri makapitulu a Bhibhlya adapaswa iwo mwanyapantsi na lembani mbvunzo ubodzi peno miwiri idakhala na iwo pakuleri mphangwa zenezi. Buluka penepo dingani pabodzi mibvunzo yonsene.

• Sumana ibodzi na ibodzi lembani vesi ya Bhibhlya pa tsamba na yeserani kuinyerezera na kuifokotoza. Koyani malemba anewa, na anyerezereni sumana na sumana toera kuona kuti ndi malemba mangasi anakwanisa imwe kuakumbukira.

• Bveserani mphangwa zakugravarwi za kuleri kwa Bhibhlya mbamukatowezera m’Bhibhlya yanu.

Misonkhano:

• Khunganyikani pabodzi khundu ya misonkhano.

• Yeserani kuimba nyimbo za Umambo za sumana inafuna kudza.

• Khala munthu ali na nkhani pa Xikola Ya Utumiki Wa Mulungu peno citsanzo pa Nsonkhano Wa Basa, cedzani njira zakucita nkhani zenezi, peno yeserani pakati pa banja.

Pyakufuna pya Banja:

• Dingani mphangwa zakubuluswa m’mabukhu Os Jovens Perguntam peno Aprenda do Grande Instrutor.

• Khalani na makhundu akuyesera anapangiza kuti munatsalakana tani pinenso pyakuti pisaoneka ku xikola.

• Khalani na makhundu akuyesera akuti anyakubala na ana asacinjana makhundu. Ana asadinga mphangwa na buluka penepo asanyerezera pabodzi na anyakubalawo.

Utumiki:

• Khalani na makhundu akuyesera toera kukhunganyika maperekero aumboni anafuna imwe kuphatisira pa kumala kwa sumana.

• Longani pifuno pyandimomwene pyakuti banja inakwanisa kupikhazikisa toera kucita khundu mwakukwana mu utumiki mu ndzidzi wa Cikumbuso peno pa ndzidzi wa ferya.

• Pasani ndzidzi munthu m’bodzi na m’bodzi pa banja toera adinge kuti anatawira tani mibvunzo yakusiyana-siyana yakuti inakwaniswa kucitwa mu utumiki, buluka penepo citani makhundu akuyesera.

Maonero Akuthimizirika:

• Lerini pabodzi misolo ya marevista apswa.

• Phembani munthu m’bodzi na m’bodzi toera kuleri mwanyapantsi nsolo wakuti wankomera kakamwe unagumanika m‘marevista apswa, buluka penepo mphembeni toera aulonge.

• M’midzidzi inango cemerani m’mwazi mphangwa peno anyakumanga banja toera adzakhale pabodzi na imwe pa Kulambira kwanu Kwa Banja namaulo, panango mbamuacita mibvunzo.

• Onani na cedzani pya ibodzi ya mavidyu athu.

• Cedzani pabodzi mphangwa za mu Despertai! “Os Jovens Perguntam” peno “Para Considerar em Família.”

• Cedzani pabodzi mphangwa za mu A Sentinela “Ensine Seus Filhos” peno “Para Os Jovens.”

• Lerini na cedzani mphangwa za Anuário upswa peno za bukhu ipswa idabuluswa pa nsonkhano wa gawo udamala.

• Pakumala kuona nsonkhano wa gawo peno nsonkhano wakupambulika na wa cisa, dingani ntsonga zikulu za m’Bhibhlya.

• Yang’anani cinthu cibodzi mu pinthu pidacita Yahova, na cedzani pinapfunza ife thangwi ya Yahova kubulukira ku cinthu ceneci.

• Citani pinthu pabodzi pene, ninga citsanzo, kuona mapa peno bokosi.