“Funa Yahova Mulungu Wako”
“Funa Yahova Mulungu wako na ntima wako onsene, na umaso wako onsene, na ndzeru zako zonsene.”—MAT. 22:37, Tradução do Novo Mundo.
MBAMUDATAWIRA TANI?
Pisabvekanji kufuna Yahova?
Thangwi yanji tisafunika kufuna Yahova?
Tinapangiza tani ufuni wathu kuna Yahova Mulungu?
1. Ninji cidacitisa kuti ufuni wa Mulungu na Mwanace ukhale wakuwanga?
MWANA wa Yahova, Yezu Kristu alonga: “Ine ndisafuna Baba.” (Jwau 14:31) Yezu alonga pontho: ‘Baba asafuna Mwanace.’ (Jwau 5:20) Pyenepi nee pisafunika kutidzudzumisa. Thangwi mu pyaka pizinji mbadzati kubwera pa dziko yapantsi, Yezu aphata basa pabodzi na Babace. (Mis. 8:30) Mu ndzidzi unoyu, Mwana apfundza pizinji thangwi ya makhaliro a Babace, natenepa, akhali na mathangwi mazinji toera kunfuna. Mwandimomwene, kukhala kwawo pabodzi kwacitisa kuti ufuni wawo ukhale wakuwanga.
2. (a) Kodi ufuni usaphatanizanji? Tisafunika kucitanji toera kufuniwa na Mulungu? (b) Ndi mibvundzo ipi inafuna ife kudzadinga?
2 Munthu angafuna ndzace, iye asakhala na mabvero akuwanga kwa munthu unoyu. Nyamasalmo Dhavidhi aimba: “Ndinakufunani imwe [Yahova], mphambvu zanga” (Sal. 18:1) Tisafunika kukhala na mabvero anewa kuna Yahova, thangwi iye asatifuna. Tingabvera Yahova, iye anadzapangiza ufuni wace kwa ife. (Lerini Deuteronomyo 7:12, 13.) Nakuti ife nkhabe kwanisa kuona Mulungu, tinakwanisa tani kunfuna? Pisabvekanji kufuna Yahova? Thangwi yanji tisafunika kunfuna? Na tinapangiza tani ufuni wathu kwa Mulungu?
THANGWI YANJI TINAKWANISA KUFUNA MULUNGU?
3, 4. Thangwi yanji tinakwanisa kufuna Yahova?
3 “Mulungu ndi nzimu”; natenepa, ife nkhabe kwanisa kumuona. (Jwau 4:24) Ngakhale tenepo, tinakwanisa kufuna Yahova, pontho Bhibhlya isatikulumiza toera kupangiza ufuni wathu kwa iye. Mwacitsandzo, Mose apanga Aisraele: ‘Funani Yahova Mulungu wanu, na ntima wanu onsene, na umaso wanu onsene, na mphambvu zanu zonsene.’—Deut. 6:5.
4 Thangwi yanji tinakwanisa kufuna Mulungu? Thangwi iye aticita na cifuno cauzimu, pontho atipasa luso yakupangiza ufuni. Tingakwanirisa cifuno cathu cauzimu munjira yadidi, ufuni wathu kwa Yahova usakula, natenepa tisakhala na mathangwi adidi toera kukhala akutsandzaya. Yezu alonga: “Anyakutsandzaya ndi ale anadzindikira pifuno pyawo pyauzimu, thangwi Umambo wakudzulu ngwawo.” (Mat. 5:3, NM) M’bukhu yace, A.C. Morrison alonga kuti mphyakudzumisa kudziwa kuti ndzidzi onsene anthu asasaka kukhulupira Mulungu. Ninga nyakulemba unoyu, azinji asatawira kuti anthu asabalwa na cifuno cakudziwa Mulungu.
5. Tisadziwa tani kuti tinakwanisa kugumana Mulungu?
5 Tinakwanisadi kugumana Mulungu? Inde, iye asafuna kuti tikhale na uxamwali na iye. Mpostolo Paulu apangiza pyenepi mudapereka iye umboni kwa anthu akhadagumanyikana mu Areopago ku templo yakale ku Atena. Azinji a iwo akhaenda ku templo toera kulambira mulungu wankazi wa dziko ya Atena. Nyerezerani kuti muli penepo mudalonga Paulu kuti ‘Mulungu adacita pantsi na pyonsene piri mwenemu, ndiye mwanacinthu wa kudzulu na wa pantsi pano. Iye hanakhala n’nyumba zidamangwa na manja a anthu tayu.’ Mpostolo Paulu athimiza kulonga kuti: ‘Ndiye Mulungu adacita midzidzi na migano munakhala anthu, toera anthu ansake, ayesere kunfendedzera, asakembo kungumana, maseze iye hali kutali na ife tonsene tayu.’ (Mach. 17:24-27) Inde, anthu anakwanisa kugumana Mulungu. Mwandimomwene, anthu akupiringana mamiliyau manomwe na hafu akuti ndi Mboni za Yahova ‘agumana Mulungu’—mwakukhonda penula iwo asafuna Mulungu.
PISABVEKANJI KUFUNA MULUNGU?
6. Ndi api “matongero makulu na akutoma” adalonga Yezu?
6 Ufuni wathu kwa Yahova usafunika kubulukira muntima. Yezu apangiza pyenepi mudabvundzwa iye na Nfarisi kuti: ‘Mpfundzisi matongero makulu a mwambo mbanji?’ Yezu antawira: ‘Funa Yahova Mulungu wako, na ntima wako onsene, na umaso wako onsene, na ndzeru zako zonsene. Anewa ndi matongero makulu na akutoma.’—Mat. 22:34-38.
7. Kodi pisabvekanji kufuna Mulungu na (a) ‘ntima wathu onsene’? (b) ‘umaso wathu onsene’? (c) ‘ndzeru zathu onsene’?
7 Kodi Yezu akhafuna kubvekesanji mudalonga iye kuti tisafunika kufuna Mulungu na ‘ntima wathu onsene’? Iye akhafuna kubvekesa kuti tisafunika kufuna Yahova na ntima wathu onsene wakuphiphirisa, kuphatanizambo pifuno pyathu, mabvero athu na manyerezero athu. Tisafunikambo kunfuna na umaso ‘wathu onsene’ peno uunthu wathu. Kusiyapo pyenepi, tisafunika kufuna Mulungu na ‘ndzeru zathu zonsene’ peno maluso a manyerezero athu. Mwa pyonsene, tisafunika kufuna Yahova mwakukwana, na mwakusowa madire.
8. Kodi kufuna Mulungu mwakusowa madire kunatikulumiza toera kucitanji?
8 Kufuna Mulungu na ntima wathu onsene, na umaso wathu onsene, na ndzeru zathu zonsene kunadzatikulumiza toera kupfundza Mafalace mwakukhonda phonya, kucita pyonsene pinatiphemba iye, na kukhala aphinga mu kumwaza mphangwa zadidi za Umambo. (Mat. 24:14; Arom. 12:1, 2) Ufuni wandimomwene kwa Yahova unadzaticitisa kunfendedzera. (Tgo. 4:8) Nkhabe kwanisika kulonga mathangwi onsene anaticitisa kufuna Mulungu, mbwenye tendeni tidinge mangasi a iwo.
THANGWI YANJI TISAFUNIKA KUFUNA YAHOVA?
9. Thangwi yanji tisafuna Yahova?
9 Yahova ndi Nciti wathu, na asatipasa pyonsene pinafuna ife. Paulu alonga: “Mwa iye tiri na moyo, tinafamba, mbatikhala.” (Mach. 17:28) Yahova atipasa dziko yapantsi, mudzi wathu wakubalika kakamwe. (Sal. 115:16) Iye asatipasambo cakudya na pinthu pinango pinafuna ife toera kutsalakana umaso. Natenepa, Paulu akwanisa kupanga alambiri a alungu apezi a ku Listra kuti Mulungu ‘hadaleka tayu kudziwisika: apasa anthu pinthu pyadidi pyakubuluka kudzulu, aabvumbisira, aapasa nthawi za kubvuna, adzalisambo mitima yathu na cakudya na kusekera.’ (Mach. 14:15-17) Mwandimomwene, ineyi ndi thangwi yadidi toera kufuna Nciti wathu Wankulu na Nyakutitsalakana waufuni!—Koel. 12:1.
10. Tisafunika kucitanji thangwi ya masasanyiro a Mulungu toera kumalisa madawo na kufa?
10 Mulungu acita masasanyiro toera kumalisa madawo na kufa kudatambira ife kubulukira kwa Adhamu. (Arom. 5:12) Inde, ‘Mulungu ationesa kutifuna kwace, thangwi pa ndzidzi ukhali ife anyakudawa Kristu atifera ife pano.’ (Arom. 5:8) Mwakukhonda penula, mitima yathu isadzala na kufuna Yahova thangwi iye acitisa kuti tilekererwe madawo athu tingatcinyuka na kukhulupira ntsembe ya ciomboli ca Yezu.—Jwau 3:16.
11, 12. Ndi munjira zipi Yahova asatipasa cidikhiro?
11 Yahova ‘asatipasa cidikhiro cinaticitisa kukhala anthu akutsandzaya na antendere.’ (Arom. 15:13) Cidikhiro ceneci cisatiphedza toera kupirira mayesero a cikhulupiro. Akristu akudzodzwa anapangiza kukhala akukhulupirika mpaka kufa kwawo anadzapaswa nthimba ya umaso kudzulu.’ (Apok. 2:10) Anyakukhulupirika anango ali na cidikhiro cakukhala na umaso wakukhonda mala mu Paradizu pa dziko yapantsi. (Luka 23:43, NM) Ndi api mabvero athu thangwi ya cidikhiro ceneci? Mitima yathu isadzala na kutsandzaya, ntendere, na ufuni kwa Mulungu anatipasa ‘miyoni yonsene yadidi na yakulungama kakamwe.’—Tgo. 1:17.
12 Mulungu atipasa cidikhiro cadidi ca kulamuka muli akufa. (Mach. 24:15) Mwandimomwene, tisatsukwala kakamwe na kufa kwa nyakufunika wathu, mbwenye na thangwi ya cidikhiro ca kulamuka muli akufa, ‘nee tisatsukwala sawasawa ninga anango anasowa cikhulupiro.’ (1 Ates. 4:13) Mu kukulumizwa na ufuni, Yahova Mulungu asafuna kakamwe kulamusa anyakufa, makamaka anthu akukhulupirika ninga nyakulungama Yobe. (Yobe 14:15) Nyerezerani kutsandzaya kunafuna kuoneka anyakufa angadzakhala pontho na umaso pa dziko ino yapantsi. Mitima yathu isadzala na ufuni kwa Babathu wakudzulu, adatipasa cidikhiro cakudzumisa kakamwe ca kulamuka muli akufa.
13. Ninji pinapangiza kuti mwandimomwene Mulungu asatitsalakana?
13 Mwandimomwene Yahova Asatitsalakana. (Lerini Masalmo 34:6, 18, 19; 1 Pedro 5:6, 7.) Nakuti tisadziwa kuti Mulungu wathu waufuni ali dzololo ndzidzi onsene toera kuphedza ale akuti ndi akukhulupirika kwa iye, tisabva kuti tiri akutsidzikizika ninga khundu ya ‘nkumbi wa mabira ace.’ (Sal. 79:13) Kusiyapo pyenepi, ufuni wa Mulungu kwa ife unadzapangizika pakweca mu pinthu pinafuna kudzaticitira iye nkati mwa Umambo Waumesiya. Yezu Kristu ninga Mambo wa Umambo wa Mulungu, anadzamalisa uphanga, kupondererana, na uipi onsene pa dziko yapantsi. Buluka penepo, anthu akubvera anadzakhala na nkhombo ya ntendere na utende wakukhonda kumala. (Sal. 72:7, 12-14, 16) Kunyerezera mwacidikhodikho pya nkhombo zenezi, kusatipasa mathangwi toera kufuna Mulungu wathu wacitsalakano na ntima wathu onsene, umaso wathu onsene, mphambvu zathu zonsene, na ndzeru zathu zonsene.—Luka 10:27.
14. Ndi mwai upi ukulu kakamwe udatipasa Mulungu?
14 Yahova atipasa mwai ukulu kakamwe wakutumikira ninga Mboni zace. (Iza. 43:10-12) Ife tisafuna Mulungu thangwi iye atipasa mwai wakuphedzera utongi wace ukulu na kuphedza anthu toera kukhala na cidikhiro candimomwene mu dziko ino ya nyatwa. Kusiyapo pyenepi, ife tisalonga na cikhulupiro na cinyindiro thangwi tisamwaza mphangwa zadidi za Mafala a Mulungu wandimomwene, wakuti mapikiro ace asakwanirisika ndzidzi onsene. (Lerini Yoswa 21:45; 23:14.) Mwandimomwene, nkhombo na mathangwi ali na ife toera kufuna Yahova nkhabe kulengeseka. Mphapo tinapangiza tani ufuni wathu kwa iye?
TINAPANGIZA TANI UFUNI WATHU KWA MULUNGU?
15. Kodi kupfundza na kuphatisira Mafala a Mulungu kunatiphedza tani?
15 Kupfundza ndzidzi onsene Mafala a Mulungu na kuaphatisira. Kucita pyenepi kusapangiza kuti tisafuna Yahova, pontho tisafunadi kuti Mafalace akhale ‘ceza ca njira yathu.’ (Sal. 119:105) Khala tisathimbana na nyatwa, tinakwanisa kugumana cibalangazo kubulukira ku mafala acinyindiro caufuni ninga awa: ‘Ntima wakutcinyuka na wakucepeseka munaupwaza tayu.’ ‘Yahova, ndinatsidzikizwa na udidi waufuni wanu. Ntima wanga unganjipirwa na pyakugopswa, ndimwe munandibalangaza mbamundisekesa.’ (Sal. 51:17; 94:18, 19) Yahova asabvera ntsisi ale anathabuka, munjira ibodzi ene Yezu asabvera ntsisi anthu. (Iza. 49:13; Mat. 15:32) Kupfundza Bhibhlya kunatiphedza kubvesesa ufuni wa Yahova kwa ife, pyenepi pisatiphedzambo toera kukulisa ufuni wathu kwa iye.
16. Kodi kucita phembero ndzidzi onsene kunakwanisa tani kukulisa ufuni wathu kwa Mulungu?
16 Citani Phembero kuna Mulungu ndzidzi onsene. Maphembero athu asatiphedza toera kufendedzera cifupi ‘Nyakubvesera maphembero.’ (Sal. 65:2) Munaona ife Mulungu mbakatawira maphembero athu, ufuni wathu kwa iye usakula. Mwacitsandzo, ife tisakwanisa kuona kuti iye nkhabe tawirisa kuti tiyeserwe kupiringana mayesero anakwanisa ife kupirira. (1 Akor. 10:13) Khala tisadzudzumika, tingacita phembero yakubulukira muntima, tinakwanisa kukhala na “ntendere wa Mulungu.” (Afil. 4:6, 7) Midzidzi inango tinakwanisa kucita phembero mwaciwerewere—ninga pidacita Nehemiya, mukupita kwa ndzidzi tinaona kuti phembero yathu yatawirwa. (Neh. 2:1-6) Tingapitiriza kucita phembero, mbationa kuti Yahova akutawira maphembero athu, ufuni wathu kwa iye unathimizirika, cinyindiro cathu cakuti iye anadzatiphedza toera kuthimbana na mayesero acikhulupiro cinathimizirikambo.—Arom. 12:12.
17. Khala tisafuna Mulungu, tisafunika kuona tani pya kugumanika pa misonkhano?
17 Khalani na nsambo wakugumanika pa misonkhano Yacikristu, ya cisa na ya gawo. (Aheb. 10:24, 25) Aisraele akhagumanyikana toera kubvesera na kupfundza pya Yahova, pontho toera kumulemedza na kubvera Mitemo yace. (Deut. 31:12) Tingafuna Mulungu na ntima onsene, nee tinaona kukhala kwakunentsa kucita cifuno cace. (Lerini 1 Jwau 5:3.) Natenepa, cipo tisafunika kutawirisa kuti cinthu cinango citicitise kuona misonkhano ninga cinthu cakusowa basa. Mwandimomwene, ife nkhabe funa kuti cinthu cinango cifewese ufuni wathu udapangiza ife pakutoma kwa Yahova.—Apok. 2:4.
18. Kodi kufuna Mulungu kusatikulumiza toera kucitanji?
18 Khalani waphinga m’basa yakumwaza undimomwene wa mphangwa zadidi kwa anango. (Agal. 2:5) Ufuni wathu kwa Yahova usatikulumiza toera kulonga pya Umambo Waumesiya wa Mwana wakufunika wa Mulungu, wakuti pa Harmagedoni ‘anadzakwira pa kavalo thangwi ya undimomwene.’ (Sal. 45:4; Apok. 16:14, 16) Ndi kwakutsandzayisa tani kucita khundu m’basa yakucita anyakupfundza kubulukira mu kuphedza anthu kupfundza pya ufuni wa Mulungu na pya dziko ipswa idapikira iye!—Mat. 28:18, 19.
19. Thangwi yanji tisafunika kupereka takhuta thangwi ya masasanyiro a Yahova a kukumbiza mabira ace?
19 Perekani takhuta thangwi ya masasanyiro a Mulungu a kukumbiza mabira ace. (Mach. 20:28) Akulu a mpingo Acikristu ndi masasanyiro a Yahova, wakuti ndzidzi onsene asatsalakana udidi wathu. Akulu a mpingo ndi ‘ninga mbuto yakubisalira pa ntsiku ya condzi, ninga mbuto yakuthawira madzi makulu, ninga madzi adidi a n’thando, ningambo nthundzi wa mwala ukulu pa mataka akuuma.’ (Iza. 32:1, 2) Ndi pyakutsandzayisa kakamwe kukhala na mbuto yakuthawira condzi cikulu peno madzi makulu! Dzuwa ingatipisa kakamwe, tisapereka takhuta tingapaswa nthundzi wa mwala. Mafala anewa akuphiphirisa asatiphedza kuona kuti akulu a mpingo asapereka ciphedzo na cibalangazo cakufunika cauzimu. Mu kubvera ale anatitsogolera, tisapangiza kuti tisapereka takhuta kakamwe ku ‘miyoni ineyi mwa anthu,’ pontho pisapangiza ufuni wathu kwa Mulungu na kwa Kristu, wakuti ndi Nsolo wa mpingo.—Aef. 4:8; 5:23; Aheb. 13:17.
PITIRIZANI KUKULISA UFUNI WANU KUNA MULUNGU
20. Khala musafuna Mulungu, munadzacitanji mwakubverana na Tyago 1:22-25?
20 Khala muli na uxamwali wadidi na Yahova, imwe munadzakhala ‘nyakucita mafala, tayu nyakubva basi.’ (Lerini Tyago 1:22-25.) “Nyakucita” asakhala na cikhulupiro cakuti cisapangizika na mabasa ninga akucita khundu mwaphinga m’basa yakumwaza mphangwa na kugumanika pa misonkhano Yacikristu. Nakuti musafuna Mulungu na ntima onsene, imwe munadzabvera ‘mitemo yaungwiro’ ya Yahova inaphataniza pyonsene pinaphemba iye kwa ife.—Sal. 19:7-11.
21. Kodi maphembero anu akubulukira muntima anakwanisa kulandaniswa nanji?
21 Kufuna Yahova Mulungu kunadzakucitisani kulonga na iye ndzidzi onsene mu phembero yakubulukira muntima. Mwakubverana na ntsembe zakupisa zikhaperekwa ntsiku zonsene pantsi pa cibverano ca Mwambo, nyamasalmo Dhavidhi aimba: ‘Maphembero anga akhale ninga utci wakununkhira kwa imwe Yahova, ndingathukula mikono yanga, ikhale ninga ntsembe yakumaulo.’ (Sal. 141:2; Eks. 30:7, 8) Maphembero anu akucepeseka, kudembetera kwanu, na mafala anu akubulukira muntima akusimba na akupereka takhuta kuna Mulungu akhale ninga kununkhira kwa ntsembe yakupisa yakuti isaphiphirisa maphembero akutawirika.—Apok. 5:8.
22. Ndi ntundu upi wa ufuni unafuna kudzadinga ife mu nsolo unatowerera?
22 Yezu alonga kuti tisafunika kufuna Mulungu, pontho tifunembo andzathu. (Mat. 22:37-39) Ninga munafuna ife kuona mu kudinga kwathu n’khaliro unoyu, kufuna wathu Yahova na midida yace kunadzatiphedza toera kutsalakana mwadidi anthu andzathu na kupangiza ufuni wathu kwa iwo.