Towezerani Citsandzo Ca Kristu Mbamukhala Wakukola Mwauzimu

‘Khalani . . . na thunga yakukwana ninga ya Kristu.’​—AEF. 4:13.

NYIMBO: 11, 42

MUNATAWIRA TANI?

Kodi Akristu akukola asaphindula tani thangwi yakukhala na cidziwiso candimomwene?

Akristu akukola asaphedzera tani toera mpingo upitirize kukhala wakuphatana?

Kodi axamwali adidi anatiphedza tani toera kukhala Akristu akukola?

1, 2. Ndi kukula kwanji kwakuti Nkristu onsene asafunika kuwangisira toera kukhala nako? Perekani citsandzo.

NKAZI waluso wa pabanja angagula misapo pa nsika, kazinji kene nee asasankhula misapo mikulu peno yakutcipa. M’mbuto mwace, asasankhula misapo yakutokota. Iye asafuna misapo yakukoma, yakununkhira na yakupasa ungumi. Inde, iye asasankhula misapo yakukola idatokota mwadidi.

² Munthu angapfundza pya Yahova mbabatizwa, iye asapitiriza kukula. Cifuno cace ndi cakukhala ntumiki wakukola wa Mulungu. Kukola kunalonga ife si kwakumanungo tayu, mbwenye ndi kwauzimu. Mpostolo Paulu alembera Akristu a ku Efeso toera kukula mwauzimu. Iye aakulumiza kuti awangisire toera ‘kukhala akuphatana mu cikhulupiro na kukhala na cidziwiso candimomwene ca Mwana wa Mulungu, mpaka kukhala na thunga yakukwana ninga ya Kristu.’​—Aef. 4:13.

3. Ndi makhaliro api a mpingo wa ku Efeso akuti asagumanikambo lero pakati pa atumiki a Yahova?

³ Pidalemba Paulu tsamba ineyi, pikhadapita pyaka pingasi mpingo wa ku Efeso mbudamala kale kukhazikiswa. Anyakupfundza azinji a kweneko akhadakola mwauzimu. Mbwenye anango akhafunika kupitiriza kuwangisira toera kukola mwauzimu. Pyenepi pisacitikambo pakati pa Mboni za Yahova lero. Abale na alongo azinji asatumikira Mulungu mu pyaka pizinji, pontho ndi akukola mwauzimu. Mbwenye si onsene tayu akuti ndi akukola. Mwacitsandzo, pyaka pyonsene pikwi pya anthu apswa asabatizwa, natenepa anango asafunika kupitiriza kuwangisira toera kukola mwauzimu. Ndiye tani kwa imwe?​—Akol. 2:6, 7.

KODI NKRISTU ANAKULA TANI?

4, 5. Ndi munjira ipi Akristu akukola asasiyana unango na ndzace, mbwenye ndi makhaliro api akuti onsene asaapangiza? (Onani cithundzithundzi cakutoma.)

⁴ Pakusankhula misapo yakutokota pa nsika, munakwanisa kuona kuti ndi yakusiyana. Mbwenye yonsene iri na makhaliro anapangiza kuti ndi yakutokota. Munjira ibodzi ene, Akristu akukola ndi akusiyana unango na ndzace m’makhaliro awo, makuziro, dziko idabalwa iwo, ungumi, thunga na maluso mu umaso. Mbwenye Akristu onsene adakula mwauzimu ali na makhaliro anapangiza kuti ndi akukola. Munjira ipi?

⁵ Ntumiki wakukola wa Yahova asatowezera Yezu wakuti atisiyira citsandzo toera ‘kulonda manyalo ace.’ (1 Ped. 2:21) Ninji pidalonga Yezu pyakuti ndi pyakufunika kakamwe? Ndi kufuna Yahova na ntima onsene, moyo onsene, ndzeru zonsene na kufuna ndzako ninga iwe ene. (Mat. 22:37-39) Nkristu wakukola mwauzimu asawangisira toera kukhala maso mwakubverana na uphungu unoyu. Iye asakhala na umaso unapangiza kuti asaikha uxamwali wace na Yahova pa mbuto yakutoma mbapangiza ufuni wakudzimana kuna anango.

6, 7. (a) Ndi makhaliro api anango anapangiza Nkristu wakukola mwauzimu? (b) Ndi mbvundzo upi usafunika ife kucita?

⁶ Tisadziwa kuti ufuni ndi n’khaliro ubodzi wa misapo ya nzimu wakuti Nkristu wakukola mwauzimu asaupangiza. (Agal. 5:22, 23) Mbwenye makhaliro anango ninga kupfulika, kudzitonga na kupirira ndi akufunikambo. Iwo anakwanisa kumphedza toera kuthimbana na pinentso mbakhonda kuipirwa, kupirira kuphatiswa mwala mbakhonda kuluza cidikhiro. Mu pfundziro yace paekha, iye asapitiriza kufufudza midida ya Bhibhlya yakuti inamphedza toera kusiyanisa cadidi na cakuipa. Buluka penepo, pakucita pisankhulo, iye asapangiza kuti ndi wakukola mwauzimu. Mwacitsandzo, iye asabvera cikumbuntima cace cakupfundziswa na Bhibhlya. M’mbuto mwakunyindira maonero ace, Nkristu wakukola ndi wakucepeseka mbadzindikira kuti ndzidzi onsene njira za Yahova na midida yace ndi pyadidi kakamwe.a Iye asamwaza mphangwa mwaphinga mbaphedza mpingo toera kukhala wakuphatana.

⁷ Mwakukhonda tsalakana kuti tatoma kale kutumikira Yahova, m’bodzi na m’bodzi wa ife anakwanisa kubvundzika: ‘Kodi alipo makhundu anango anafunika ine kusasanyira toera kutowezera Yezu mbandipitiriza kuthambaruka mwauzimu?’

‘CAKUDYA CAKUUMA NDI CA ANTHU AKUKOLA’

8. Ndi munjira ipi ikhadziwa Yezu Malemba na kuabvesesa?

⁸ Yezu akhadziwa mwadidi Mafala a Mulungu. Pikhali iye na pyaka 12 pyakubalwa akwanisa kufokotoza Malemba kwa apfundzisi mu templo. ‘Onsene akhambvesera, adzuma ndzeru zace na matawiro ace.’ (Luka 2:46, 47) Mukupita kwa ndzidzi, mu utumiki wace pa dziko yapantsi, Yezu aphatisira Mafala a Mulungu mwaluso toera kupokanya apingizi ace.​—Mat. 22:41-46.

9. (a) Kodi munthu anafuna kukula mwauzimu asafunika kupfundza tani Bhibhlya? (b) Ndi cipi cifuniro ca kupfundza Bhibhlya?

⁹ Mwakubverana na citsandzo cidapereka Yezu, Nkristu wakuti asafuna kukula mwauzimu nee anadzakomerwa basi ene na cidziwiso cakucepa ca Bhibhlya. Ndzidzi onsene anadzafufudza Malemba mwakukwana mbadziwa kuti ‘cakudya cakuuma ndi ca anthu akukola.’ (Aheb. 5:14) Mwandimomwene, Nkristu wakukola mwauzimu asafuna kukhala na ‘cidziwiso candimomwene ca Mwana wa Mulungu.’ (Aef.  4:13) Kodi musaleri Bhibhlya ntsiku zonsene? Kodi musacita pfundziro yanu pamwekha mwakukhonda phonya, peno kuwangisira toera kucita kulambira kwa banja m’masumana onsene? Mungadinga Mafala a Mulungu, sakani midida ya Malemba yakuti inakuphedzani toera kubvesesa mwadidi manyerezero na mabvero a Yahova. Buluka penepo, phatisirani midida ineyi pakucita pisankhulo. Mungacita pyenepi, munawangisa kakamwe uxamwali wanu na Yahova.

10. Kodi Nkristu wakukola asakhuyiwa tani na cidziwiso cace ntsiku zonsene?

¹⁰ Nkristu wakukola asafunika kucita pizinji kupiringana kudziwa pinalonga Bhibhlya. Iye asafunika kufuna uphungu wa Mulungu na midida yace. Njira ibodzi yakupangiza ufuni unoyu ndi kucita cifuno ca Yahova m’mbuto mwakucita pinafuna iye. Kusiyapo pyenepi, Nkristu nee asanyinyirika toera ‘kusiya’ umaso wace wakale. Mu ndzidzi unacita iye macinjo anewa, asakhala na umaso upswa Wacikristu wakuti ‘usacitwa mwakubverana na cifuno ca Mulungu mu ulungami wandimomwene na kukhulupirika.’ (Lerini Aefesi 4:22-24.) Bhibhlya yalembwa mukutsogolerwa na nzimu wakucena wa Mulungu. Mu ndzidzi unathimizira Nkristu cidziwiso cace na kufuna kwace midida ya Bhibhlya, nzimu wakucena usakhuya ntima wace na manyerezero ace. Pyenepi pisamphedza toera kukula mwauzimu.

KUKULISA N’KHALIRO WAKUPHATANA

11. Ndi makhaliro api adaona Yezu pikhali iye na acibale ace na anyakupfundzace?

¹¹ Pikhali Yezu pa dziko yapantsi ninga munthu waungwiro, iye akhali pabodzi na anthu akusowa ungwiro. Iye akuzwa na anyakubala akusowa ungwiro, mbamala pyaka pizinji panyumba pabodzi na abaleace akusowa ungwiro. Atowereri ace apantima akhadakhuyiwambo na nzimu wakudzikuza ukhapangizwa na anthu azinji. Mwacitsandzo, namasiku Yezu mbadzati kuphiwa, ‘iwo atoma kuketesana kuti mbani akhali nkulu kakamwe mwa iwo.’ (Luka 22:24) Mbwenye Yezu akhanyindira kuti anyakupfundzace akusowa ungwiro mbadakula mwauzimu mbakhazikisa mpingo wakuphatana. Namasiku anewa, Yezu aphembera kuna Babace wakudzulu toera apostolo ace akhale akuphata mwaufuni mbalonga: “Iwo onsene akhale m’bodzi basi, sawasawa ninga imwe Baba mwa ine, inembo mwa imwe; iwo akhalembo m’bodzi mwa ife . . . toera akhale m’bodzi ene, sawasawa ninga ife ndife m’bodzi ene.”​—Jwau 17:21, 22.

12, 13. (a) Kodi lemba ya Aefesi 4:15, 16 isagomezera tani pya kuphedzera kuphatana kwa mpingo? (b) Kodi m’bale unango akunda tani cipendamiro cace mbapfundza kuphedzera kuphatana kwa mpingo?

¹² Nkristu wakukola asaphedzera mpingo toera kukhala wakuphatana. (Lerini Aefesi 4:1-6, 15, 16.) Ninga atumiki a Mulungu, cifuno cathu ndi kukhala ‘akuphatana’ na akubverana unango na ndzace. Mwakubverana na Mafala a Mulungu, toera kukhala akuphatana tisafunika kukhala akucepeseka. M’bale peno mulongo wakukola asacepeseka toera kuphedzera kuphatana kwa mpingo, maseze asathimbana na kusowa ungwiro kwa anango. Musacitanji mungaona madodo a m’bale peno mulongo m’mpingo? Ndiye tani khala m’bale peno mulongo m’mpingo akudawirani? Kodi muli na cipendamiro cakusiya kucedza na munthu adakudawirani, peno kupinda mbamukhonda kulonga naye? Nkristu wakukola mwauzimu asawangisira toera kumalisa nkandzo unoyu m’mbuto mwakukoya pinthu muntima.

¹³ Dingani citsandzo ca Uwe. Kale akhali na cipendamiro cakukoya pinthu muntima angadawirwa na m’bale peno mulongo. Mbwenye atonga kuphatisira Bhibhlya na bukhu ya Estudo Perspicaz das Escrituras toera kupfundza pya umaso wa Dhavidhi. Thangwi yanji apfundza umaso wa Dhavidhi? Uwe alonga: “Dhavidhi athimbana na kusowa ungwiro kwa anyakukhulupira andzace. Mwacitsandzo, Mambo Sauli asaka njira toera kupha Dhavidhi, anthu akhafuna kumponyera miyala, nkazace ampwaza. (1 Sam. 19:9-11; 30:1-6; 2 Sam. 6:14-22) Mbwenye Dhavidhi nee atawirisa kuti macitiro a anango afewese uxamwali wace na Yahova. Dhavidhi akhali na ntima wantsisi, n’khaliro wakuti ndikhafunika kuukulisa. Pidapfundza ine pa pfundziro yanga pyacinja maonero anga thangwi yakusowa ungwiro kwa abale na alongo. Ine nkhabebve kukoya ndandanda wa madodo a anango. M’mbuto mwace, ndisawangisira kuphedzera kuphatana kwa mpingo.” Kodi muli na cifuno cibodzi cene ca kuphedzera kuphatana kwa mpingo?

CITANI UXAMWALI NA ALE ANACITA CIFUNO CA MULUNGU

14. Kodi Yezu asankhula anthu api toera kukhala axamwali ace?

¹⁴ Yezu akhali wadidi kwa anthu onsene. Amuna, akazi aphale na atsikana, ankhalamba na anang’ono, onsene akhali akusudzuka toera kucedza na Yezu. Mbwenye Yezu asankhula axamwali ace mwacidikhodikho. Yezu apanga apostolo ace: ‘Imwe ndimwe axamwali anga, male mungacita pinakupangani ine.’ (Jwau 15:14) Yezu asankhula axamwali anewa mwa ale akhantowerera mwakukhulupirika akuti akhatumikira Yahova na ntima onsene. Kodi musasankhulambo ale anatumikira Yahova na ntima onsene toera kukhala axamwali anu? Thangwi yanji mphyakufunika?

15. Kodi aphale na atsikana anaphindula tani angacita uxamwali na Akristu akukola mwauzimu?

¹⁵ Mitundu mizinji ya misapo isatokota mwadidi ingapisirwa na khatukatu ya dzuwa. Munjira ibodzi ene, kupisirwa na khatukatu ya ufuni wa abale na alongo kunatiphedza toera kuthambaruka mwauzimu. Khala ndimwe mphale peno ntsikana, panango musanyerezera kuti munaphatisira tani umaso wanu. Natenepa, mphyandzeru kakamwe kucita uxamwali na ale akuti ali na maluso mazinji mu kutumikira Yahova na asaphedzera toera mpingo ukhale wakuphatana! Panango iwo athimbanambo na pinentso mu umaso wawo, ngakhale mu kutumikira Yahova. Kucedza na abale peno alongo anewa kunatiphedza toera kucita pisankhulo pyandzeru na kukola mwauzimu.​—Lerini Ahebere 5:14.

16. Kodi Akristu anango m’mpingo akuti akhali akulu kupiringana Helga amphedza tani?

¹⁶ Mwacitsandzo, Helga asakumbuka ndzidzi ukhamalisa iye mapfundziro kuxikola, andzace a mu kalasi akhalonga pifuno pyawo. Azinji mwa iwo akhalonga pya kuenda ku universidade ninga njira toera kugumana basa yadidi. Helga acedza pyenepi na axamwali ace a m’mpingo. Iye alonga: “Azinji a iwo akhali akulu kupiringana ine, iwo andiphedza kakamwe. Iwo andiwangisa toera kupita m’basa ya ndzidzi onsene. Buluka penepo, ndamala pyaka pixanu mbandikatumikira ninga mpainiya. Papita pyaka pizinji, mbwenye lero ndiri wakutsandzaya thangwi ndaphatisira mwadidi utsikana wanga mu kutumikira Yahova. Nee ndiri na thangwi toera kutsumbikika.”

17, 18. Thangwi yanji Akristu asafunika kuthambaruka mpaka kukola mwauzimu?

¹⁷ Tingawangisira kutowezera citsandzo ca Yezu mu umaso wathu pinatiphedza toera kukhala Akristu akukola mwauzimu. Tinadzakhala na uxamwali wakuwanga na Yahova, pontho tinadzakulisa cifuno ca kuntumikira na ntima onsene. Tingathambaruka mbatikhala Akristu akukola tinakwanisa kutumikira Yahova mwadidi kakamwe. Yezu akulumiza atowereri ace: ‘Ceza canu cioneke pamaso pa anthu toera iwo na kuona macitiro anu adidi, asimbe Babanu wakudzulu.’​—Mat. 5:16.

¹⁸ Mwakubverana na pidalongwa mu nsolo uno, Nkristu wakukola mwauzimu anakwanisa kuphindulisa kakamwe mpingo. Kukola kweneku kusapangizwa munjira inaphatisira Nkristu cikumbuntima cace. Kodi cikumbuntima cathu cinatiphedza tani toera kucita pisankhulo pyadidi? Kodi tinalemedza tani pisankhulo pinacita Akristu andzathu mwakubverana na cikumbuntima cawo? Tinadzadinga ntsonga zenezi mu nsolo unatowerera.

[Cidzindikiro capantsi]