MUSAKUMBUKA?

Kodi mwaleri mwacidikhodikho misolo ya cincino ya Ncenjezi? Khala mwaileri, onani khala munakwanisa kutawira mibvundzo inatowerera:

Kumala kwa dziko kungafika, ndi pinthu pipi pingasi pinafuna kufudzwa?

Ndi kufudzwa kwa mautongi a anthu, nkhondo na kusowa ulungami, mauphemberi akukhonda lemedza Mulungu na akupeusa anthu na anthu anacita khundu na kuphedzera pinthu pya dziko.—1/5, tsa. 3-5.

Mbani Goge wa Magoge analongwa m’bukhu ya Ezekyele?

Mbuto mwakulonga Sathani, pisaoneka pakweca kuti Goge wa Magoge nee ndi Sathani, mbwenye ndi kuphatana kwa madzindza anafuna kudzayesera kufudza atumiki a Mulungu pakumala kutoma kwa nyatwa ikulu.—15/5, tsa. 29-30.

Ndi pinthu pipi pitanthatu pyakuti pinakwanisa kuphedza munthu toera kukalamba munjira yadidi?

Bhibhlya isatiphemba toera tikhale (1) akucepeseka, (2) a maonero akulinganira, (3) a maonero adidi, (4) a kupasa mwakudzala manja, (5) auxamwali, na (6) akupereka takhuta. Kunyerezera mwacidikhodikho makhaliro anewa pinakwanisa kuphedza munthu toera kukalamba munjira yadidi.—1/6, tsa. 8-10.

Pirengo pidacita Yezu pisapangiza tani kupasa kwace mwakudzala manja?

Pa phwando yakumanga banja ku Kana, mwacirengo Yezu asanduza malitru 380 a madzi mbadza vinyu. Pa ndzidzi unango, mwacirengo iye adyesa amuna cifupi na 5.000. (Mat. 14:14-21; Jwau 2:6-11) Midzidzi ineyi miwiri, iye akhatowezera kupasa mwakudzala manja kwa Babace.—15/6, tsa. 4-5.

Thangwi yanji tiri na cinyindiro cakuti tinakwanisa kukomeresa Mulungu, maseze ndife anthu akusowa ungwiro?

Amuna anewa ninga Yobe, Loti na Dhavidhi acita madawo. Ngakhale tenepo, iwo akhafuna kutumikira Mulungu, iwo atcinyuka mbacinja makhaliro awo. Iwo akhala akutawirika pamaso pa Mulungu, ife tinakwanisambo kukhala akutawirika.—1/7, tsa. 12-13.

Kodi anthu onsene a mauphemberi aunthawatawa anadzaphiwa pakufudzwa kwa Bhabhilonya Wankulu?

Panango nkhabe. Lemba ya Zakariya 13:4-6 isalonga kuti atsogoleri anango a mauphemberi anadzasiya uphemberi wawo mbakhonda kuti cipo acita khundu ya mauphemberi anewa aunthawatawa.—15/7, tsa. 15-16.

Thangwi yanji Bharaki basi ene atawira kumenya nkhondo, khala Dhebhora mbadaenda na iye?

Bharaki akhali mamuna wacikhulupiro. Mbuto mwakuphemba Yahova pida pya nkhondo pizinji, iye aona kufunika kwakukhala na muimiriri wa Mulungu—Dhebhora—toera kumpasa cipapo pabodzi na anyankhondo ace. (Aton. 4:6-8; 5:7)—1/8, tsa. 13.

Kodi ndi pinthu pipi pingasi pyakuti Nkristu anakwanisa kupinyerezera mwacidikhodikho?

Pinango mwa pinthu pyenepi ndi: Pinthu pidacita Yahova, kupasa ntengo mafalace akupumirwa, mwai wathu wa phembero na masasanyiro ace aufuni a ciomboli.—15/8, tsa. 10-13.

Thangwi yanji kucalira uxamwali wakuipa kusaphatanizambo pa nkhani yakubanyirana?

Ife tisatsalakana mwadidi anthu anakhonda khulupira. Mbwenye mphyakukhonda kubverana na citsogolero ca Mulungu kubvundzirana na munthu wakukhonda batizwa na wakukhonda kubvera midida ya Mulungu. (1 Akor. 15:33)—15/8, tsa. 25.

Thangwi yanji cikhulupiro ca Pedhro cafewa, na akwanisa tani kuciwina pontho?

Thangwi ya cikhulupiro mpostolo Pedhro afamba padzulu pa madzi mbaenda kuna Yezu. (Mat. 14:24-32) Mbwenye thangwi ya kuyang’ana condzi, Pedhro atoma kugopa. Buluka penepo, iye aikha manyerezero ace kuna Yezu mbatawira ciphedzo cace.—15/9, tsa. 16-17.

Lemba ya Machitiro 28:4 isalonga kuti anthu a ku Malta akhanyerezera kuti mpostolo Paulu akhali phanga. Thangwi yanji?

Pidalumwa Paulu na nyoka ya m’bobo, iwo anyerezera mwakuphonyeka kuti Dike, mulungu waulungami akhantcinyusa.—1/10, tsa. 9.

Tisapfundzanji thangwi ya kudzudzumika kwa Marta na mabasa mazinji?

Ntsiku inango, Marta akhadzudzumika na basa toera kukhunganya cakudya cadidi kakamwe. Yezu alonga kuti Mariya asankhula phindi yadidi kakamwe mu kubvesera pipfundziso pyace. Tisafunika kucita mpholemphole toera pinthu pyakukhonda kufunika pikhonde kudzudzumisa mabasa athu auzimu.—15/10, tsa. 18-20.