Khalani Akutsanzaya M’kupfunza Bukhu Yakuti Kodi Mwandimomwene Biblya Isapfunzisanji?

¹ Cinthu cakukomeresa kakamwe ca Misonkhano ya Gawo yakuti “Kubvera Mulungu” ndi kubuluswa kwa bukhu yakuti Kodi Mwandimomwene Biblya Isapfunzisanji? Mokhonda dembuka tinadzaiphatisira kakamwe m’utumiki wathu wa m’munda, makamaka m’kucitisa mapfunziro a Biblya apanyumba. Natenepa, tisafunika kuidziwa mwadidi bukhu ineyi ipswa. Pyenepi pinadzakwanisika thangwi tinadzaipfunza pa Pfunziro ya Bukhu ya Mpingo kutomera pa sumana inatoma pa 17 ya nthanda ya Bwinja ya 2006.

² Muyang’aniri wa Pfunziro ya Bukhu ya Mpingo anadzacita mabvunzo anagumanika pakutoma pa nsolo ubodzi na ubodzi. Buluka penepo pfunziro inadzacitiswa m’kuphatisira mabvunzo anagumanika pantsi pa tsamba. Malemba akufunika anadzalerwi na kufokotozwa. Bokosi yakuti “Pipfunziso Pya Biblya” inagumanika kunkhomo kwa nsolo ubodzi na ubodzi inadzaphedza kubwerezera mphangwa zidapfunzwa thangwi bokosi ineyi ina matawiro akubuluswa m’Malemba a mabvunzo akutoma a nsolo. Munadzatsanzaya na kutawira nakuti bukhu ineyi isalonga pinthu m’njira yakubveka mwadidi, yakukhonda nensa na yakukomeresa.

³ Nthimiziro unagumanika m’bukhu ino usapasa unyomonyomo wa ntsonga zikulu zakusiyana-siyana. Mphangwa zenezi zinadzaphatisirwa anyakupfunza a Biblya angafuna kudziwa mphangwa zakuthimizirika za nsolo unadingwa. M’midzidzi inango maphindi a nthimiziro anadzadingwa nkati mwa Pfunziro ya Bukhu ya Mpingo. Mphangwa zonsene za nthimiziro zisafunika kulerwi na nyakuleri wa pfunziro ya bukhu, na misolo yakulapha ingakwanise kudingwa m’maphindi. Nthimiziro nkhabe mabvunzo a pfunziro. Mbwenye muyang’aniri angakwanise kuphemba matawiro kwa anyakugumanika m’kucita mabvunzo anagomezera ntsonga zakufunika.

⁴ Kupfunza kwathu bukhu yakuti Biblya Isapfunzisanji pa Pfunziro ya Bukhu ya Mpingo kunadzakhala kwakucimbiza. Mbwenye munacitisa ife pfunziro ya Biblya yapanyumba ife nkhabe funika kuicitisa mwakucimbiza, makamaka khala nyakupfunza ali na cidziwiso cakucepa basi ca Biblya peno khala iye nkhabe. (Mach. 26:28, 29) Nkati mwa mapfunziro a Biblya apanyumba, tisafunika kudinga malemba mwacidikhodikho, kufokotoza misanje, na pinango. Natenepa tongani kugumanika na kutawira mwakukwana masumana onsene pa pfunziro yathu ya bukhu yakuti Kodi Mwandimomwene Biblya Isapfunzisanji?