Phedzani Anango Kuti Aphindule Na Ciomboli
Cikumbuso Ca Kufa Kwa Kristu Cinafuna Citwa Pa 12 Ya Nthanda Ya Bwinja
1 “Tichite takhuta Mulungu thangwi ya pyonsene pidatipasa [iye] pinachimwanika kulongwa.” (2 Akor. 9:15) Mafala anewa asapangiza mwadidi pinabva ife ku udidi na kufuna kwakukhulupirika kunapangiza Mulungu kwa anthu kubulukira mwa Mwanace Yezu Kristu. Kupereka takhuta kweneku kunadzapangizwa mwadidi munafuna ife kudzagumanyikana pa ntsiku 12 ya nthanda ya Bwinja towera kucita Cikumbuso ca kufa kwa Kristu.
2 Cifupi na anthu mamiliyau khumi asagumanyikana na anzakazi a Yahova pa Cikumbuso caka na caka. Munacita iwo pyenepi, asapangiza kupereka takhuta kukulu thangwi ya ntsembe ya Kristu. Natenepa, kuti iwo aphindule na ntsembe ineyi, asafunika kuikhulupira. (Jwau 3:16, 36) Kodi tinakwanisa tani kuaphedza kukulisa cikhulupiro ceneci? Nkati mwa nzidzi unoyu wa Cikumbuso, tingakwanise kuawangisa kukhala na pfunziro yawo ene ya Biblya na kugumanika pa misonkhano ya mpingo masumana onsene. Dingani maonero awa anatowerera.
3 Pfunziro Ya Biblya: Munacemerera imwe anthu akufuna ku Cikumbuso, thangwi yanji nkhabe kuyesera kutoma nawo pfunziro ya Biblya m’bukhu yakuti Biblya Isapfunzisanji? Sakani njira ya kufokotoza Cikumbuso kwa munthu m’kufungula tsamba 206-8 na kudinga nsolo wakuti: “Cakudya Cancidodo Ca Mbuya—Cikumbuso Cinalemedza Mulungu.” Mungakwanise kudinga mphangwa zenezi kabodzi peno kawiri, panango ninga pfunziro ya Biblya pansuwo. Munamalisa imwe nsolo unoyu, panango munthu unoyu angafune kupfunza nsolo 5, “Ciomboli—Muoni Ukulu Kakamwe Wa Mulungu.” Mungamala kukhazikisa pfunziro ya Biblya yakukhonda phonya, bwererani nduli na dingani misolo minai yakutoma ya bukhu.
4 Kodi mbani anafunika kutoma na ife pfunziro ya Biblya m’kuphatisira njira idalongwa padzuluapa? Panango angasi a anzanu a pa basa, anzanu a ku xikola, peno anyakuendekana anu angakwanise kutawira kuceza kweneku. Abale angakwanise kufikira amuna okhonda khulupira a alongo a m’mpingo. Mbwenye lekani kucalira kupasa pfunziro acibale anu ene okhonda khala Amboni. Mwakuthimizira, tinadzafuna kuwangisira kakamwe kugawira ncemerero wa Cikumbuso kwa ale akuti akhagumanyikana mwakukhonda phonya na mpingo. (Luka 15:3-7) Tendeni tisake njira ya kuphedza anthu anewa onsene kuti aphindule na ciomboli.
5 Misonkhano Ya Mpingo: Cikumbuso ndi nsonkhano wakutoma unaona anyakupfunza azinji a Biblya na anthu anango akufuna. Kodi tinakwanisa tani kuawangisa kuti aphindule na misonkhano yathu inango ya mpingo? Nosso Ministério do Reino wa Abril de 2005, tsamba 8, usapasa maonero awa: “Longani nsolo wa nkhani yapakweca inafuna kudza. Apangizeni nsolo unafuna kupfunzwa pa pfunziro ya a Sentinela na unafuna kupfunzwa pa Pfunziro ya Bukhu ya Mpingo. Fokotozani Xikola Ya Utumiki Wa Mulungu na Nsonkhano wa Basa. Mungakhala na nkhani pa xikola, panango mungakwanise kuyesera nawo mwakugaluza. Gawanani nawo ntsonga zakufunika zidapfunzwa m’misonkhano. Phatisirani pithunzithunzi pinagumanika m’mabukhu athu towera kuaphedza kuona kuti pyenepi pisacitika tani. Acemerereni ku misonkhano kutomera pa pfunziro yakutoma.”
6 Munakhala anyakuona ntima na pfunziro ya Biblya yokhonda phonya na kugumanika pa misonkhano ya mpingo mokhonda phonya, kazinji kene iwo asaenda kutsogolo mwauzimu mwakucimbiza. Natenepa, tingakwanise kuwangisa anango kuphindula na masasanyiro awa auzimu na ntukwa ukulu wa Mulungu wa ciomboli.
[Study Questions]
1. Kodi ndi njira ipi ibodzi yakuti mbumba ya Mulungu isapereka takhuta ku ciomboli?
2. Kodi mbani anagumanyikana na anzakazi a Yahova pa Cikumbuso, na asafunika kucitanji towera aphindule na ciomboli?
3. Kodi tinakwanisa tani kutomesa pfunziro ya Biblya munacemerera ife anthu ku Cikumbuso?
4. Kodi mbani anafunika kutoma na ife pfunziro ya Biblya nkati mwa nzidzi wa Cikumbuso?
5. Kodi tinakwanisa tani kuwangisa anyakupfunza a Biblya na anthu anango akufuna kuti agumanike pa misonkhano ya mpingo ya sumana na sumana?
6. Kodi ndi m’njira zipi ziwiri zakuti tingakwanise kuphedza anthu akuona ntima kuphindula na ciomboli?