Tipangizeni Kupereka Kwathu Takhuta
Ku Cikumbuso Cinafuna Kudzacitwa pa Ntsiku 17 ya Nthanda ya Bwinja
1. Kodi ndi mabvero api a nyamasalmo akuti ndi akuthema kakamwe mu ndzidzi wa Cikumbuso?
1 Mukukhuyiwa na mabasa mazinji a ntsisi za Yahova na cipulumuso cace nyamasalmo abvunza: “Ndinabwezera tani Mbuya pyonsene pidandichitira Iye?” (Sal. 116:12) Lero, atumiki a Mulungu ali na mathangwi mazinji toera kupereka takhuta. Pakumala kupita pyaka madzana pya kulembwa kwa mafala anewa akupumirwa, Yahova apasa anthu muoni ukulu kakamwe—ciomboli. Munakhunganyika ife toera kukumbuka kufa kwa Kristu pa ntsiku 17 ya nthanda ya Bwinja, tiri na thangwi yadidi toera kupereka takhuta.—Akol. 3:15.
2. Kodi ndi mathangwi api mangasi anaticitisa kupereka takhuta ku ciomboli?
2 Nkhombo za Ciomboli: Kubulukira ku ciomboli, tinakwanisa ‘kulekererwa madawo athu.’ (Akol. 1:13, 14) Pyenepi pisaticitisa kulambira Yahova na cikumbuntima cakucena. (Aheb. 9:13, 14) Tiri na ufulu wa kulonga na Yahova munanfendedzera ife kubulukira mu phembero. (Aheb. 4:14-16) Ale onsene anapangiza cikhulupiro ku ciomboli ali na cidikhiro cakukhala na umaso wa kwenda na kwenda!—Jwau 3:16.
3. Kodi tinakwanisa tani kupereka takhuta kuna Yahova thangwi ya ciomboli?
3 Tinapereka tani Takhuta: Njira ibodzi yakupereka takhuta kakamwe ndi kudinga ntsiku na ntsiku malemba a Bhibhlya analonga pya Cikumbuso na kuanyerezera mwacidikhodikho. A Sentinela 1.° de Fevereiro de 2011, ya nsolo wakuti “Você está preparado para o dia mais importante do ano?” yacitwa toera kutiphedza kucita pyenepi. Tinakwanisambo kulonga na Yahova mu kucita phembero yakubulukira mu ntima mbatipangiza kuti tisafuna tani ciomboli. (1 Ates. 5:17, 18) Kugumanika kwathu pa Cikumbuso mukubvera kwathu ntemo wa Yezu kusapangiza kupereka takhuta. (1 Akor. 11:24, 25) Mwakuthimizira, tinakwanisa kusangizira ufuni ukulu wa Yahova mu kucemera onsene anakwanisa ife toera agumanike pabodzi na ife pa Cikumbuso.—Iza. 55:1-3.
4. Kodi kutonga kwathu kusafunika kukhale kupi?
4 Atumiki a Yahova anapereka takhuta nee anadzaona Cikumbuso ninga nsonkhano unango. Cikumbuso ndi nsonkhano wakufunika kakamwe wa pa caka! Munafendedzera ife ndzidzi wa Cikumbuso, kutonga kwathu kukhale ninga kwa nyamasalmo adalemba: ‘Nzimu wanga, usimbe Yahova; uleke kuduwala pyonsene pidacita iye.’—Sal. 103:2.