Utumiki Wathu—Basa Yakupangiza Ntsisi
1 Yezu aona kuti mwinji ukhabvesera mphangwa zace ‘ukhaona nyatwa mbukhala mu umphawi ninga mabira akusowa nkumbizi.’ (Mat. 9:36) M’kukoma ntima na kufuna, iye aapfunzisa njira za Yahova, aapasa cithonthoso na mwantsisi akwanirisa pyakufuna pyawo pyauzimu. Munanyerezera ife njira zace, tisapfunza kunyerezera na kupibva ninga Yezu, na nkhaliro unoyu wa ntsisi usaoneka m’utumiki wathu.
2 Nyerezerani basi kuti Yezu acitanji mukhanfededzera anthu akuti akhafuna kakamwe ciphedzo. (Luka 5:12, 13; 8:43-48) Iye akhaatsalakana mwakubverana na pyakufuna pyawo. (Mko. 7:31-35) Iye akhadziwa mabvero a anango na akhaatsalakana. Iye nee akhayang’ana nkhope basi tayu. (Luka 7:36-40) Inde, Yezu apangizadi ntsisi za Mulungu wathu.
3 Akulumizwa Na “Ntsisi”: Yezu hadacita utumiki wace ninga basa idatumirwa iye basi tayu. Iye akhakulumizwa na “ntsisi” kwa anthu. (Mko. 6:34) M’njira ibodzibodzi lero, ife nee tisamwaza mphangwa basi tayu mbwenye tisayesera kupulumusa umaso wakufunika. Sakani kudziwa thangwi yanji anthu asacita pinthu m’njira inapiona ife lero. Thangwi yanji iwo ali akudzudzumika? Kodi iwo apwazwa na kuphimbwa maso na atsogoleri auphemberi waunthawatawa? Kutsalakana kwathu kwandimomwene anango kungaacitise kubvesera mphangwa zadidi.—2 Akor. 6:4, 6.
4 Ntsisi zisakhuya mitima. Mwacitsanzo: Nkazi unango alowerwa na khombwani wace wankazi wa miyezi mitatu yakubalwa. Mudamenya mboni za Yahova ziwiri nsuwo wace, iye aapanga kuti apite na cifuno ca kupokanya mafala akakhala na iwo akuti thangwi yanji Mulungu asalekerera pinenso. Mbwenye m’kupita kwa nzidzi nkazi alonga: “Kundibvesera kwawo na ntsisi zikulu kwandicitisa kupibva mbwenye kakamwe mukabuluka iwo, na pyenepi pyandicitisa kutawira kucezerwa kacikawiri.” Kodi musawangisira kupangiza ntsisi kwa munthu onsene anagumana imwe m’utumiki?
5 Kusakulira ntsisi kunadzatiphedza kugawana na anango cithonthoso candimomwene. M’kucita pyenepi, tikusimba “baba anabvera ntsisi anthu,” Yahova.—2 Akor. 1:3.