Khalani ‘Wakubvera Ntsisi’

1. Kodi anthu akuti ali m’makhaliro akunentsa asafunanji lero?

¹ Lero, kuna anthu akunjipa akuti ali m’makhaliro akunentsa akuti asafuna kakamwe kubverwa ntsisi kupiringana kale. Kufudzika kwa makhaliro a pa dziko yapantsi kusacitisa kuoneka kukhonda tsandzaya, kutsukwala na kukhonda khala na cidikhiro. Anthu pikwi na pikwi asafuna ciphedzo. Ife Akristu tinakwanisa kupangiza citsalakano cadidi kwa anyakuendekana athu. (Mat. 22:39; Agal. 6:10) Tinakwanisa tani kupangiza citsalakano ceneci?

2. Ndi njira ipi yadidi kakamwe kwa ife toera kupangiza ntsisi?

² Basa Inapangiza Ntsisi: Basi ene Mulungu ndi phata ya undimomwene, nyakubalangaza wa kwenda na kwenda. (2 Akor. 1:3, 4) Yahova asatikulumiza toera tisangizire iye mukukhala ‘akubvera ntsisi’ anango, pontho iye atipasa basa toera kucedza na anyakuendekana athu pya mphangwa zadidi za Umambo. (1 Ped. 3:8) Kucita pyonsene pinakwanisa ife m’basa ineyi ndi njira yadidi kakamwe kwa ife toera kubalangaza “anyakutsukwala,” thangwi basi ene Umambo wa Mulungu ndi cidikhiro candimomwene kwa anthu anathabuka. (Iza. 61:1) Thangwi ya ntsisi kwa anthu ace, mwakukhonda dembuka Yahova anadzafudza anthu akuipa mbakhazikisa dziko ipswa yaulungami.—2 Ped. 3:13.

3. Tinakwanisa tani kuona anthu ninga pidacita Yezu?

³ Onani Anthu Ninga Pidacita Yezu: Ngakhale pakumwaza mphangwa kwa nsoka ukulu, Yezu nee akhaona basi anthu ninga nsoka. Iye akhaapfundzisa ninga akupfundzisa munthu m’bodzi na m’bodzi. M’bodzi na m’bodzi akhafuna ciphedzo toera kukhala na uxamwali wadidi na Yahova. Iwo akhali ninga mabira akusowa nkumbizi. Ntima wa Yezu wakhuyiwa na pinthu pikhaona iye, mwacitsalakano atoma kuapfundzisa. (Mko. 6:34) Kuona kwathu anthu mu njira ibodzi ene ninga pidacita Yezu kunadzatiwangisa toera kubvera ntsisi munthu m’bodzi na m’bodzi. Pyenepi pinadzaoneka pakweca m’malongero athu na mapangiziro a nkhope yathu. Kumwaza mphangwa kunadzakhala basa yathu yakutoma, tinadzacinja mafala athu toera kutsalakana pinthu pinadzudzumisa munthu m’bodzi na m’bodzi.—1 Akor. 9:19-23.

4. Thangwi yanji tisafunika kupangiza ntsisi?

⁴ Mwinji ukulu wa anthu a madzindza onsene usatawira mphangwa za Umambo na cibalangazo cinapaswa iwo. Tingapitiriza kubvera ntsisi, tinadzapasa mbiri na kutsandzayisa Yahova, Mulungu wathu wa ntsisi.—Akol. 3:12.