Munakhunganya Tani Upereki Umboni Wa Marevista
1 Panango mungabvunzike kuti: ‘Thangwi yanji tisafunika kukhunganya maperekero umboni a marevista nakuti iwo asagumanika kale m’Utumiki Wathu Wa Umambo ubodzi na ubodzi?’ Maseze anthu azinji asaona pitsanzo pyenepi pya maperekero umboni kukhala pyakuphedza kakamwe, kukhunganyika kwa munthu ekha kuciri kwakufunika. Upereki umboni wakuti ndi wadidi kakamwe m’cisa cibodzi panango nkhabe khala wakuphata basa m’cisa cinango. Natenepa, nee tisafunika kukakamizika kugawira marevista mwakubverana kakamwe na pitsanzo pya maperekero umboni. Ngakhale tasankhula kuphatisira pitsanzo pya maperekero umboni, mphyadidi kulonga m’mafala anthu ene.
2 Sankhulani Nsolo Ubodzi: Pakumala kuleri revista, sankhulani nsolo ubodzi wakuthema m’cisa canu na unakomerwa na imwe makamaka. Kukhulupira na kugalamuka kwanu pa kupangiza nsolo kungacitise mwanaciro nyumba kufuna kuulerimbo. Maseze imwe mungafune kuphatisira nsolo ubodzi wakuti ndi wadidi kakamwe m’cisa canu, musafunika kudziwa mwadidi misolo inango ya m’revista. Pyenepi pinadzakucitisani kucinja upereki umboni mungagumana munthu wakuti anacifuno cikulu m’nsolo unango.
3 Citani Mbvunzo: Buluka penepo, khunganyani mwacidikhodikho mafala akutoma. Mafala anu akutoma ndi akufunika. Panango kunakhala kwakuphedza kakamwe kucita mwanaciro nyumba mbvunzo wakufuna kudziwa pinanyerezera iye towera kuncitisa kufuna nsolo udasankhula imwe kupangiza. Kazinji kene mabvunzo akufuna kudziwa maonero a munthu ndi adidi kakamwe. Calirani kubvunza pinthu pyakuti pinapasa manyadzo na kucitisa mwanaciro nyumba kuipirwa.
4 Lerini Lemba: Pakumalisira, sankhulani lemba towera kuleri khala makhaliro a mwanaciro nyumba mbakutawirika, panango sankhulani nsolo ubodzi unafuna imwe kulonga. Kuleri lemba kunadzaphedza mwanaciro nyumba kuona kuti mphangwa zathu ndi zakubuluka m’Mafala a Mulungu. (1 Ates. 2:13) Lemba ineyi inadzampasambo umboni ngakhale akhonde marevista. Anango acitisa mwanaciro nyumba kufuna m’kuleri lemba mbasati kucita mbvunzo wakuthonyeka. Mungakwanise kutomesa lemba m’kulonga tenepa: “Ndisafuna kudziwa maonero anu pa pinalongwa pa vesi iyi ya Biblya.” Buluka penepo tsogolerani munthu ku ntsonga inagumanika m’revista na kulonga mwacigwagwa towera kuncitisa kufuna mbamusati kugawira revista.
5 Nkhabepo mitemo wakuwanga ya pinafunika kulongwa pa kugawira marevista. Kazinji kene, mphyadidi kucita upereki umboni wanu kukhala okhonda nensa na wacigwagwa. Phatisirani upereki umboni wakuti unakucitisani kukhala mwaufulu na wakubweresa maphindu. Ikhani manyerezero pa ntengo wa marevista, na khalani wakugalamuka. Khala muli wakukhunganyika, mungakwanise kugawira mwadidi A Sentinela na Despertai! kwa ale “adasankhulirwa moyo wakukhonda kumala.”—Mach. 13:48.
[Study Questions]
1. Thangwi yanji ndi pyadidi kukhunganya upereki umboni wa marevista athu mbuto mwa kukoya m’manyerezero pitsanzo pya maperekero umboni pinagumanika m’Utumiki Wathu Wa Umambo?
2. Kodi ndi ninji pidaphatanizwa m’kusankhula nsolo unafuna imwe kugomezera?
3. Kodi ndi mafala api akutoma anaphatisira imwe anabweresa maphindu adidi?
4. Kodi ndi maphindu api anabwereswa m’kuleri lemba kwa mwanaciro nyumba makhaliro angatawirika?
5. Kodi ndi pitsogolero pipi pinafunika imwe kunyerezera pakukhunganya upereki umboni wa marevista?