Kodi Muli Wakukhunganyika Towera Kuthimbana Na Cidengwa Cacibaliro?

¹ Caka na caka, pikwi pya anthu pa dziko yonsene yapantsi, kuphataniza abale na alongo athu azinji, asacitikirwa na piteketeke, matsunami, mphepo na madzi, conzi cakufudza, mphepo na matalala na kudzala kwa madzi. Nakuti pidengwa pyacibaliro pisacitika mwakudzidzimusa na pingakwanise kucitikira m’bodzi na m’bodzi wa ife, ndi kwanzeru kukhala akukhunganyika mwanyapantsi.—Mis. 21:5.

² Mwanyapantsi: M’midzidzi inango mautongi asakwanisa kucenjeza kufika kwa pidengwa. Ndi pyakufunika kakamwe kubvera macenjezo anewa. (Mis. 22:3) M’midzidzi ineyi akulu a mpingo anadzawangisira kupita ncibverano na anthu onsene a m’mpingo towera kuaphedza kucita makhunganyikiro akufunika. Cidengwa cingapita, akulu a mpingo anadzawangisirambo kupita ncibverano na munthu onsene anagumanyikana na mpingo towera kuaona khala apulumuka na kudinga ciphedzo cakuti cingakhale cakufunika. Nzidzi wakufunika unakwanisa kuluzika khala akulu a mpingo nkhabe mphangwa zipswa za kupita ncibverano. Natenepa ndi pyadidi kwa amwazi mphangwa kupasa mulembi na muyang’aniri wawo wa pfunziro ya bukhu mbuto inakhala iwo na numero ya ntokodzi ya cincino.

³ Khala mpingo usagumanika pa mbuto inacitika cidengwa, akulu a mpingo angakwanise kuphemba amwazi mphangwa towera kupasa dzina na numero ya ntokodzi ya acibale peno ya axamwali anakhonda khala cifupi na ale akuti angakwanise kulonga nawo pangaoneka cidengwa. Pyenepi pinadzacitisa akulu a mpingo kugumana anthu adabuluswa ku mbuto ya cidengwa. Akulu a mpingo angakwanisembo kukhunganya pinafuna kucita mpingo m’nzidzi wa cidengwa pinaphataniza pinthu ninga ndandanda okhonda nensa unafunika kukhala na munthu m’bodzi na m’bodzi, masasanyiro a kubulusa anthu pa mbuto ya cidengwa, na kucita masasanyiro akuphedza anthu ali na pifuno pyakupambulika. Kubvera masasanyiro akufuna anewa ndi kwakufunika.—Aheb. 13:17.

⁴ Cidengwa Cingapita: Kodi musafunika kucitanji cisa canu cingagwerwa na cidengwa? Onesani khala pifuno pyakumanungo pya piwalo pyanu pya banja pyatsalakanwa. Mungakwanisa, perekani ciphedzo cakufunika kwa anango adagwerwa na cidengwa. Pingakwanisika wangisirani kupita ncibverano na muyang’aniri wanu wa pfunziro ya bukhu peno na nkulu wa mpingo unango mwakucimbiza. Pyenepi pisafunika kucitwa ngakhale kuti mwapulumuka na nkhabe funa ciphedzo. Mungafuna ciphedzo, khalani na cibaso cakuti abale anu akuwangisira kucita pyonsene towera kukuphedzani. (1 Akor. 13:4, 7) Kumbukani kuti Yahova asadziwa pinakucitikirani; nyindirani kuti iye anakuphedzani. (Sal. 37:39; 62:8) Khalani maso towera kuona miyai ya kuphedza anango mwauzimu na m’manyerezero. (2 Akor. 1:3, 4) Pingakwanisika citani mwacigwagwa mabasa anu a Mulungu.—Mat. 6:33.

⁵ Ngakhale kugopswa kunabwereswa na cidengwa kucitise nyatwa ikulu m’dziko, ife tinakwanisa kuyang’ana ntsogolo na cinyindiro. Mwakukhonda dembuka pidengwa pyonsene pinadzakhala pinthu pyakale. (Apok. 21:4) M’nzidzi uno, tinakwanisa kukhala na midida yakulinganira towera kukhunganyira midzidzi ya nyatwa na ya pinenso ninga tisapitiriza kukhala na phinga yathu m’kumwaza mphangwa zadidi kwa anango.

[Study Questions]

1. Thangwi yanji ndi kwanzeru kukhunganyika pidengwa mbapisati kufika?

2. Thangwi yanji tisafunika kudziwisa akulu a mpingo mbuto inakhala ife na numero ya ntokodzi ya cincino?

3. Kodi tingakwanise tani kubvera akulu a mpingo khala tisakhala pa mbuto ya cidengwa?

4. Kodi tisafunika kucitanji cisa cathu cingagwerwa na cidengwa?

5. Kodi ife ninga Akristu tisakhuyiwa tani na kugopswa kwa cidengwa?