Bvekesani Pinthu Pya Mbiri Ya Yahova
1 “Kuli imwe Mbuya ukulu na ufuni na mbiri na utongi thangwi pyonsene pire kudzulu na pantsi mphyanu.” (1 Pya dziko. 29:11) Kodi kufuna na kupereka kwathu takhuta kwa Yahova kusatikhuya tani? Kusatikulumiza ‘kubvekesa pinthu pya mbiri pya uyu adatichemera, kubuluka chidima, towera tione cheza chache chakudzumisa.’ (1 Ped. 2:9) Ife nkhabe siya kulonga kwa anango pya Mulungu wathu wankulu! Tinadzakhala na miyai yakupambulika towera kubvekesa pinthu pya mbiri ya Yahova nkati mwa nthanda ya Murope, Bwinja, na Gonkho.
2 Ugawiri Wakupambulika Unathangira Cikumbuso: N’ciposi, ntsiku 2 za nthanda ya Bwinja, tinadzagomezera pinthu pya mbiri ya Yahova m’kukumbuka ntsiku ya Cakudya Cancidodo Ca Mbuya. Ugawiri wakupambulika wa cakucitika ici cakufunika unadzacitwa pa dziko yapantsi kutomera pa 17 za nthanda ya Murope mpaka ntsiku 2 za nthanda ya Bwinja. Onsene ali kuwangiswa kucita nkhundu mwakukwana. Unoyu unakhala nzidzi wadidi towera anthu apswa atome kumwaza mphangwa zadidi angakhala akuthema. Khala muli na anyakupfunza peno anapiana akuti panango anakhala akuthema, tomani kulonga na akulu a mpingo.
3 Ugawiri uyu unadzakhala sawasawa na udacitwa mwakubverana na Nsonkhano wa Gawo wakuti “Kupulumuswa Kuli Cifupi!” Mipingo inadzatumizirwa micemerero towera mmwazi mphangwa mbodzi na mbodzi akwanise kutambira micemerero yakukwana 50 na mpainiya m’bodzi na m’bodzi anakwanisa kutambira micemerero yakukwana 150. Citani upereki umboni wanu kukhala wacigwagwa, panango m’kulonga kuti: “Uyu ndi ncemerero wanu wa cakucitika cinafuna kudza cakufunika ca caka. Imwe munadzatambirwa na ntima onsene. Pinafuna kucitika pyonsene piri pa ncemerero.” Mwandimomwene, khala mwanaciro nyumba ali na mabvunzo, khalani na nzidzi wa kuatawira. Nsolo wa nthimiziro wa Cakudya Cancidodo Ca Mbuya unagumanika m’bukhu yakuti Biblya Isapfunzisanji unatoma pa tsamba 206 panango unakhala wakuphedza ku khundu ineyi. Kumala kwa sumana, tinadzagawira marevista mapswa pabodzi na ncemerero wakupambulika. Onani kufuna kunapangizwa na citani masasanyiro a kucita ulendo wakubwerezera.
4 Pingakwanisika, ncemerero uyu wakupambulika usafunika kupaswa m’manja mwa mwanaciro nyumba m’bodzi na m’bodzi. Natenepa, lembani nyumba zakukhonda gumanika anthu, na citani masasanyiro a kubwerera pa nzidzi unango. Mipingo idasala na micemerero mizinji panango inatoma kusiya micemerero m’nyumba zakukhonda gumanika anthu nkati mwa sumana yakumalisa Cikumbuso mbicisati toma, mbwenye tayu ntsiku ineyi mbidzati fika. Citani pyonsene kuti anacitira imwe maulendo akubwerezera, anyakupfunza a Biblya, acibale, anyakuendekana na akudziwa anango atambirembo ncemerero.
5 Upainiya Wakuphedza: Kodi munakwanisa kubvekesa pinthu pya mbiri ya Yahova mwakukwana kakamwe m’kukhala mpainiya wakuphedza nkati mwa nthanda ya Murope, Bwinja, na Gonkho? Kucita pyenepi panango kunaphemba kucita macinjiro m’ndandanda wathu wa ntsiku na ntsiku. (Aef. 5:15-17) Munakwanisa kukhala na cibaso cakuti kuwangisira kucita pizinji m’basa ya Yahova kunadzabweresa kutsanzaya na nkhombo za Yahova. (Mis. 10:22) Nakuti nzidzi wa Cikumbuso uli kufika paduzi, uno ndi nzidzi wa kutoma kucita masasanyiro.—Mis. 21:5.
6 Mulongo unango wa piaka 90 pyakubalwa atsanzaya na mwai wa kutumikira ninga mpainiya wakuphedza m’caka cidamala. Iye alonga: “Ngakhale kuti ndakomerwa kakamwe kulima munda na ndikhafuna kutoma kudzwala, ndadzindikira kuti ndikhafunika kuikha pinthu pyanga pa mbuto yakuthema. Na cifuno ca kuikha pifuno pya Umambo pa mbuto yakutoma, ndatonga kutumikira ninga mpainiya wakuphedza m’nthanda ya Murope.” Kodi iye atambira nkhombo thangwi ya kuwangisira kwace? Iye alonga: “Ndisapibva kakamwe kucita khundu ya mpingo, na pyenepi pyandifendedzeresa kwa Yahova.” Kodi tinakwanisa kudinga pinaikha ife pa mbuto yakutoma na kucita macinjiro akulandana pingafunika?
7 Kukwanirisa midzidzi 50 inaphembwa apainiya akuphedza si kwakunensa tayu ninga munanyerezera imwe. Dingani mabasa anu a ntsiku na ntsiku m’phembero, citani ndandanda, na buluka penepo pilembeni m’kalendariu wanu wa basa ya Mulungu. Imwe musadziwa mwadidi makhaliro anu. Khala imwe muna ungumi wakunenseka na mphambvu yakucepa, panango mungacite khundu m’utumiki m’midzidzi yakucepa pa ntsiku ibodzi na ibodzi. Khala musaphata basa nzidzi wamumphu peno musaenda ku xikola, mungakwanise kutumikira ninga mpainiya wakuphedza m’kucita utumiki namaulo peno kumala kwa sumana.
8 Azinji acita basa ya upainiya wakuphedza ninga banja. M’piaka pidamala banja ibodzi yanyinyirika kukwata upainiya thangwi ikhaona kuti makhaliro awo nee mbadaatawirisa kukhala apainiya akuphedza. Kodi iwo acitanji? Iwo alonga: “Taphembera kwa Yahova towera atiphedze kukwanirisa pikhafuna ife kucita kutomera kale.” Na masasanyiro adidi iwo akwanisa kufikira cifuno cawo. Iwo athimizira: “Pyenepi pikhali pyadidi kakamwe. Tatsanzaya pabodzi na nkhombo zizinji. Maonero athu ndi akuti pilesereni. Khala ife takwanisa kupicita, imwe munapikwanisambo.”
9 Thangwi yanji nkhabe kukoya nzidzi nkati mwa pfunziro yanu ya banja inafuna kudza towera kudinga kuti monsene munakwanisa tani kuthimizira basa yanu nkati mwa nthanda zinafuna kudza? Maseze banja yanu yonsene icimwane kucita basa ya upainiya wakuphedza, panango ciwalo cibodzi cingakwanise kutumikira kubulukira ku ciphedzo na kubverana kwa piwalo pinango pya pa nyumba. Khala nkhabe, panango banja yanu inakwanisa kukhala na pifuno pya kubvunga nzidzi wakuthimizirika m’utumiki nkati mwa nthanda zakupambulika izi za basa.
10 Phedzanani: Kugalamuka kusakhuya anango. Longani pya cifuno canu ca kukhala mpainiya wakuphedza. Pyenepi pinakwanisa kuwangisa anango kucita cibodzibodzi. Mwakuthimizira, ale adatumikira kale ninga apainiya panango anakwanisa kukupasani maonero awo akuti anadzakuphedzani kusasanyira pinthu na ndandanda wanu towera kufikira cifuno canu. (Mis. 15:22) Khala munakwanisa kutumikira ninga mpainiya wakuphedza, thangwi yanji nkhabe cemera mmwazi mphangwa unango, panango munthu ali na makhaliro ninga anu, towera kuphata naye pabodzi basa ineyi yakutsanzayisa?
11 Akulu a mpingo azinji akucita masasanyiro akufunika towera kucita khundu m’basa ineyi yakupambulika. (Aheb. 13:7) Mwakukhonda penula, pyenepi pisawangisa mpingo! Akulu a mpingo asakulumizambo anango na makani awo. Mafala adidi akucepa a ciwangiso peno maonero mangasi akuphata basa panango ndi pyenepidi pinafunika towera kukulumiza anango kukhala apainiya akuphedza. Muyang’aniri wa mmunda panango anadzacita masasanyiro akuthimizirika a misonkhano ya utumiki wa mmunda towera onsene akwanise kuenda kapereka umboni ninga nsoka, ngakhale pakukotoka ku basa peno ku xikola. Masasanyiro a pyenepi asafunika kudziwiswa m’nzidzi onsene. Iye asafunikambo kucita pyonsene towera onsene akhale na cisa pabodzi na mabukhu akukwana.
12 Ngakhale makhaliro akucimwaniseni kukhala mpainiya wakuphedza, munakwanisa kupasa ciwangiso ale ali apainiya, na munakwanisa kuaphemberera. (Mis. 25:11; Akol. 4:12) Panango munakwanisa kucita masasanyiro towera kuenda nawo m’utumiki m’kuthimizira ntsiku ibodzi nkati mwa sumana peno kukhala nzidzi uzinji mmunda kupiringana unacita imwe kazinji kene.
13 M’nthanda Ya Bwinja Tisafuna Kukhala Na Apainiya Akuphedza Akukwana 5.000: Cilengeso cipswa kupiringana m’nzidzi onsene ca apainiya akuphedza cidakhala na ofesi ya Mosambiki m’caka ca 2000 ndi 3.429. Natenepa, cifuno cakulinganira m’nthanda ya Bwinja inafuna kudza ca apainiya akuphedza ndi 5.000. Tinakwanisa kufikira cilengeso ceneci khala pakati pa medya ya amwazi mphangwa 8 onsene m’bodzi basi apita m’basa ya upainiya pa mpingo ubodzi na ubodzi. Mwandimomwene, mipingo inango inadzakhala na amwazi mphangwa azinji akuti makhaliro awo aatawirisa kucita basa ya upainiya wakuphedza. Cifuno ceneci ca mpingo ndi cakukhonda nensa kufikirwa na mipingo mizinji. Nyerezerani kutsanzaya kunafuna kudzaoneka pa mpingo wanu na phindu yakuwangisa inafuna kudzakhala na imwe m’basa ya kumwaza mphangwa m’cisa canu!
14 Thangwi yanji nthanda ya Bwinja ndi yakuthema towera kukhala mpainiya wakuphedza? Cikumbuso cinadzacitwa m’kutoma kwa nthanda, mbicitipasa mwai ukulu towera kucita maulendo akubwerezera kwa ale adagumanika pa Cikumbuso. Tinadzagawira marevista, na cifuno ca kugawira bukhu yakuti Biblya Isapfunzisanji pa maulendo akubwerezera na kutomesa mapfunziro a Biblya. Natenepa, kukhala mpainiya wakuphedza m’nthanda ya Bwinja kunadzapasa miyai mizinji ya kutomesa mapfunziro a Biblya. M’dziko ino makhaliro akudambo kazinji kene mbadidi. Mwakuthimizira, nthanda ya Bwinja iri na masabudu na madimingu maxanu pabodzi na firiyadu, mbicitisa kukhala kwakukhonda nensa kwa ale anaphata basa kudziko na ale anapfunza kukhala apainiya akuphedza.
15 Kupita kwa nzidzi wa Cikumbuso cibodzi na cibodzi kusatibweresera paduzi caka cibodzi ca kumala kwa makhaliro ano a pinthu. Nzidzi udasala towera kupanga anango pya Mulungu wathu wankulu ndi wakucepa. (1 Akor. 7:29) Cikumbuso ici cingamala, tapaswa miyai yadidi kakamwe ya kukuza Baba wathu wakudzulu kuenda na kuenda. Tendeni titome cincino kucita masasanyiro towera ticite pyonsene pinakwanisa ife towera kubvekesa pinthu pya mbiri ya Yahova nkati mwa nthanda ya Murope, Bwinja na Gonkho.
[Study Questions]
1. Kodi ndi ninji cinatikulumiza kubvekesa pinthu pya mbiri ya Yahova?
2. Kodi ndi ugawiri upi wakupambulika unakhunganywa towera kuthangira cikumbuso, na mbani wakuti anakwanisa kucita khundu?
3. Kodi tinakwanisa kulonganji towera kucemerera anthu ku Cikumbuso?
4. Kodi unadzagawirwa tani ncemerero wakupambulika wa Cikumbuso?
5. Thangwi yanji tisafunika kutoma cincino kucita masasanyiro athu a kukhala mpainiya wakuphedza?
6. Kodi tinapfunzanji bulukira ku citsanzo ca mulongo wa piaka 90 pyakubalwa adatumikira ninga mpainiya wakuphedza m’caka cidamala?
7. Kodi ndi pyakunensa kutumikira ninga mpainiya wakuphedza?
8. Kodi ndi ninji pidacitisa banja ibodzi kucita basa ya upainiya?
9. Kodi musafunika kucitanji nkati mwa pfunziro yanu ya banja inafuna kudza towera kukhunganyikira nthanda zinafuna kudza zakupambulika za basa?
10. Thangwi yanji tisafunika kulonga na anango pya cifuno cathu ca kukhala mpainiya wakuphedza nkati mwa nzidzi uno wa Cikumbuso?
11. Kodi akulu a mpingo anakwanisa tani kukulumiza anango kucita basa ya upainiya wakuphedza m’nthanda zinafuna kudza?
12. Kodi munakwanisa kucitanji khala imwe nkhabe kwanisa kutumikira ninga mpainiya wakuphedza?
13. Kodi ndi cifuno cipi cidakhazikiswa m’Mosambiki, na mpingo wanu unakwanisa tani kuphedza kucifikira?
14. Thangwi yanji nthanda ya Bwinja ndi yadidi towera kukhala mpainiya wakuphedza?
15. Thangwi yanji tisafunika kucita pinthu mwakucimbiza munafendedzera nzidzi wa Cikumbuso?
[Caption on page 4]
Kodi Tinakwanisa Kufikira Apainiya Akuphedza Akukwana 5.000 M’Nthanda Ya Bwinja?
[Caption on page 4]
◼ Onani Pinaikha Imwe Pa Mbuto Yakutoma
◼ Dingani Pinafuna Imwe Kucita Ninga Banja
◼ Longani Na Anango Pinafuna Imwe Kucita