‘Citani Mwakukwana Umboni Wa Mphangwa Zadidi’
1 M’mbuto zinango za dziko zakuti mphangwa zadidi nee zisalongwa maka, ife tiri na mwai wa kucita mwakukwana “umboni [wa] mphangwa zadidi za pya nkhombo [‘udidi wakukhonda kutithema,’ Tradução do Novo Mundo] za Mulungu.” (Mach. 20:24) Pyenepi pisaphataniza kudziwisa anthu kuti “ntsiku zakumalisa” zinadzapitirwa mbuto cincino na dziko ipswa yakulungama ya Yahova, yakuti pinthu “pya kale [pinadzamala].” (2 Tim. 3:1-5; Apok. 21:4) Mu ndzidzi unoyu kuduwala nee kunadzaonekabve tayu. (Iza. 33:24) Anyakufunika athu akufa anadzabuluka mu nthumbi zakuti zisakumbukirwa mbagumanyikana pontho na acibale na axamwali. (Jwau 5:28, 29) Dziko yonsene yapantsi inadzacitwa paradizu wakubalika. (Iza. 65:21-23) Zenezi ndi zingasi basi mwa mphangwa zadidi zinafunika ife kugawana na anango!
2 Nthanda ya Murope, Bwinja na Gonkho inadzapasa miyai yadidi kakamwe towera kumwaza mphangwa zenezi zadidi. Nkati mwa nthanda zenezi makhaliro a ntsiku na midzidzi yakulapha ya ntsiku m’mbuto zizinji za dziko ndi akuthema towera kubvunga ndzidzi uzinji mu utumiki. Kusiyapo pyenepi, cinthu cakufunika kakamwe ca caka, Cikumbuso, cinadzacitwa kuzungulira dziko yonsene N’sabudu 22 ya nthanda ya Murope, dzuwa ingabira. Uno ndi ndzidzi wakutoma kucita masasanyiro a kuthimizira utumiki wathu.
3 Upainiya Wakuphedza: Kodi mungakwanise kusasanyira ndandanda wanu towera mutumikire ninga mpainiya wakuphedza nthanda ibodzi, ziwiri, peno zonsene zitatu? Thangwi yanji nkhabe kukoya ndzidzi pang’ono pa pfunziro yanu ya banja towera kudinga ntsonga ineyi? Mungabverana mwadidi, munthu m’bodzi peno azinji m’banja angakwanise kutumikira ninga apainiya akuphedza. (Mis. 15:22) Longani pyenepi m’phembero na onani kuti Yahova anapasa tani nkhombo kuwangisira kwanu. (Mis. 16:3) Ngakhale kuti nkhabe m’bodzi m’banja wakuti anakwanisa kutumikira ninga mpainiya wakuphedza, onsene m’banja angakwanise kukhala na pifuno pya kuthimizira kucita kwawo khundu mu utumiki munaphata iwo basa na ale adakwanisa kukhala apainiya.
4 Khala muli na basa ya ndzidzi onsene, ndandanda wadidi unakucitisani kutumikira ninga mpainiya wakuphedza. Panango mungakwanise kuphatisira khundu ya ndzidzi wanu wakudya towera kumwaza mphangwa. Peno mungakwanise kukhala na cisa canu cene paduzi na nyumba yanu peno mbuto yanu ya basa mbumucita khundu mu utumiki ndzidzi onsene unafuna imwe, mbamusati kutoma basa peno pakumala. Imwe mungakwanise kukhala na ndzidzi wakuthimizirika mu ndandanda wanu mungatonga kucita mabasa anango akukhonda funika maka nthanda inango na kumala ntsiku zamumphu mu utumiki m’masabudu na m’madimingu. Anango asakwata ntsiku ibodzi peno ziwiri za ferya towera kucita basa ya m’munda.
5 Khala ndimwe wakugwesera peno wakuduwala peno wakusowa mphambvu, panango mungakwanise kutumikira ninga mpainiya wakuphedza mu kubvunga ndzidzi wakucepa ntsiku na ntsiku mu utumiki. Phembani Yahova kuti akupaseni ‘mphambvu zikulu maningi.’ (2 Akor. 4:7) Mulongo unango wa piaka 106 pyakubalwa akwanisa kutumikira ninga mpainiya wakuphedza! Na ciphedzo ca acibale ace Acikristu na ca anango m’mpingo, iye amwaza mphangwa ku nyumba na nyumba, acita maulendo akubwereza, aenda ku mapfunziro a Biblya na acita makhundu anango a utumiki. Iye aphedzwa kutomesa mapfunziro a Biblya na anthu khumi. Iye asalonga: “Munanyerezera ine pya mwai wadidi kakamwe udakhala na ine wa kutumikira ninga mpainiya wakuphedza, ntima wanga usadzala na ufuni pabodzi na kupereka takhuta kwa Yahova, Mwanace na gulu Yace ya ufuni. Mwandimomwene ‘ndikupereka takhuta wankulu kwa Yahova!’”
6 Khala imwe ndimwe mphale peno ntsikana wakubatizwa wakuti muciri kuxikola, imwembo mungakwanise kutumikira ninga apainiya akuphedza. Ninga ale anaphata basa ya ndzidzi onsene, imwe panango mungafune kuphatisira makamaka masabudu na madimingu towera kucita basa yanu ya utumiki. Panango mungakwanisembo kubuluka mu ndzidzi ubodzi xikola mbisati toma peno mungakotoka mu ntsiku zingasi. Kodi kuna firiyadu ya xikola yakuti mungakwanise kuiphatisira mu utumiki? Khala musafuna kutumikira ninga mpainiya wakuphedza, longani na anyakubalanu thangwi ya pyenepi.
7 Kulisani Phinga: Akulu a mpingo angakwanise kucita pizinji towera kukulisa phinga ya anthu m’mpingo na citsanzo cawo. (1 Ped. 5:2, 3) Iwo angakwanise kutonga kuthimizira ntsiku za misonkhano ya basa ya m’munda towera kuphedza ale anafuna kucita khundu mu utumiki namacibese kakamwe, pakukotoka ku xikola peno ku basa. Muyang’aniri wa m’munda asafunika kukhala na cibaso cakuti amwazi mphangwa akuthema asankhulwa towera atsogolere misonkhano ineyi na khala pana cisa cakukwana pabodzi na marevista na mabukhu mu nthanda zenezi za basa yakupambulika.
8 M’mpingo unango, akulu a mpingo atoma kupasa cipapo abale kuti acite basa ya upainiya wakuphedza nthanda zizinji mwanyapantsi. Iwo apitiriza kudziwisa mpingo sumana na sumana kuti ndi amwazi mphangwa angasi adatawiriswa tumikira ninga apainiya akuphedza. Pyenepi pyapasa cibaso ale akhafuna kuthimizira kucita kwawo khundu mu utumiki cakuti iwo anadzakhala na ciphedzo cadidi. Misonkhano yakuthimizirika ya basa ya m’munda ikhacitwa namacibese kakamwe na namaulo. Phindu yace yadzakhala yakuti amwazi mphangwa akukwana 53 atumikira ninga apainiya akuphedza mu nthanda ya Bwinja, cifupi na hafu ya mpingo!
9 Phedzani Anango Kuti Amwaze Mphangwa: Anthu apswa na anapiana angathema kukhala amwazi mphangwa, iwo angakwanise kuenda ku basa ya m’munda na amwazi mphangwa a luso. Mwai unoyu ungakwanise kuoneka mu ndzidzi wa Cikumbuso wakuti azinji m’mpingo anadzathimizira basa yawo mu utumiki. Kodi imwe muli na nyakupfunza Biblya wakuti ali kuenda patsogolo wakuti umaso wace usabverana na midida yakulungama ya Yahova? Kodi imwe muli na ana a makhaliro adidi akuti ali kuthambaruka mwadidi mbwenye adzati kukhala amwazi mphangwa? Khala iwo apangiza cifuno cakukhala amwazi mphangwa akukhonda kubatizwa na imwe musaona kuti iwo athema, dziwisani m’bodzi wa akulu a mpingo. Nyakuyang’anira wakutsogolera anadzacita masasanyiro akuti akulu a mpingo awiri acedze na imwe na mwananu peno nyakupfunza wanu.
10 Nthanda zinafuna kudza izi ndi zadidimbo kwa ale adalimira kumwaza mphangwa towera atome pontho mabasa awo pabodzi na mpingo. Ayang’aniri a Pfunziro ya Bukhu ya Mpingo na akulu a mpingo anango asafunika kuti awangisire kakamwe towera acedzere anthu anewa na kuaphemba mu njira yadidi kuti aphate nawo pabodzi basa mu utumiki. Khala iwo alimira kumwaza mphangwa mu ndzidzi uzinji, akulu awiri asafunika kulonga nawo pakutoma towera aone khala iwo athema kumwaza mphangwa peno nkhabe.—km 11/00 tsa. 3.
11 Khunganyikani Kuti Mugumanike Pa Cikumbuso: Ciomboli ndi cipangizo cikulu kakamwe ca ‘nkhombo peno udidi wakukhonda kutithema wa Mulungu.’ (Mach. 20:24) Pikwi na pikwi pya anthu akupereka takhuta kuzungulira dziko yonsene yapantsi pinadzagumanyikana N’sabudu 22 ya nthanda ya Murope, dzuwa ingabira, towera kucita Cikumbuso ca kufa kwa Kristu. Tisafunika kucemerera na kuphedza anthu onsene a ntima wadidi towera agumanike pa cakucitika ceneci cakufunika cakuti cisacitira umboni udidi wakukhonda kutithema wa Yahova kwa anthu.
12 Citani ndandanda wa ale anafuna imwe kucemera. Mwakukhonda kupenula ndandanda wanu unadzaphataniza acibale, anyakuendekana, anadziwa imwe kubasa peno ku xikola, anyakupfunza a Biblya akale na acincino, na anango onsene anacedzera imwe mwakukhonda phonya. Khala anango adacemera imwe ali na mabvunzo thangwi ya Cikumbuso, mungakwanise kugumana ciphedzo mu kuphatisira nsolo unalonga pya Cakudya Cancidodo ca Mbuya mu n’thimiziro wa bukhu yakuti Biblya Isapfunzisanji tsamba 206-8. Pyenepi pingakwanise kufungula njira ya kutomesa pfunziro ya Biblya, nakuti pinadzakupasani mwai wakupangiza bukhu inaphatisira ife towera kucitisa mapfunziro a Biblya.
13 Mulongo unango acita ndandanda towera kucemera mabanja akukwana 48. Mukhaacemera iye, akhafudza madzina awo na akhalemba ntsiku idaacemera iye. Akhala wakutsanzaya tani pakuona kuti anthu akukwana 26 adacemera iye abwera pa Cikumbuso! M’bale wakuti ali na loja yace ene acemerera nyabasa wace wakuti kalene akhali nyantsembe. Mamuna abwera pa Cikumbuso na pidamala iye alonga: “Ndapfunza pizinji pya Biblya mu ndzidzi ubodzi basi kupiringana pidapfunza ine m’piaka 30 pidabvunga ine mu Gereja ya Katolika.” Pakupita ndzidzi pang’ono pakumala Cikumbuso, iye atawira pfunziro m’bukhu yakuti Biblya Isapfunzisanji.
14 Basa Ya Kugawira: Kutomera Sabudu 1 ya nthanda ya Murope, mpaka 22 ya nthanda ya Murope, ncemerero wakupambulika wa Cikumbuso unadzagawirwa pa dziko yonsene yapantsi. Onsene anadzafuna kucita khundu mwakukwana m’basa ineyi yakufunika kakamwe. Ndi pyadidi kusiya ncemerero na mwanaciro nyumba mbuto mwa kuusiya pa nsuwo. Mbwenye, khala imwe muli na cisa cikulu, akulu a mpingo angakwanise kutonga kuti micemerero isiyiwe mwanzeru pa nyumba zakusowa anthu. M’masabudu na m’madimingu tinadzagawirambo marevista apswa.
15 Nakuti tiri na ndzidzi wakucepa towera kugawira micemerero, ndi pyadidi kukhonda kubvunga ndzidzi uzinji pakugawira. Longani mu njira yauxamwali na yakugalamuka. Mungakwanise kulonga mafala ninga awa: “Takubwereserani ncemerero uyu towera tikhulupire kuti imwe, piwalo pya banja yanu na axamwali anu mwacemerwa kuti mugumanike pa cakucitika cakufunika kakamwe cinafuna kucitwa 22 ya nthanda ya Murope. Ncemerero uyu ndi wanu. Ntsonga zinango ziri pa ncemerero unoyu.” Mwanaciro nyumba angakwanise kukhala na mabvunzo. Peno angakwanise kutawira ncemerero na kulonga kuti anadzagumanika pa Cikumbuso. Lembani ale adapangiza cifuno na citani masasanyiro a ulendo wakubwereza.
16 Caka cidamala nyankhondo unango agumana ncemerero wa Cikumbuso pa nsuwo wace. Iye atonga kuenda ku Cikumbuso mbwenye nee akhadaphemba kwa nkadamu wace tayu. Mudapangiza iye nkadamu wace ncemerero unoyu, nkadamu amatama na buluka penepo alonga kuti anyakubalace ndi Mboni za Yahova na kuti iye asaenda ku misonkhano na iwo. Iye hadatawirisa basi nyankhondo kuti aende tayu mbwenye nkadamu wa anyankhondo aendambo ku Cikumbuso!
17 Pangizani Kupereka Takhuta: Munafika ndzidzi wa Cikumbuso ca 2008, m’bodzi na m’bodzi wa ife asafuna kupangiza udidi wakukhonda kutithema wa Yahova towera kutiphedza. Mpostolo Paulu alemba: ‘Tinakupangani kuti lekani kutambira pezi nkhombo peno udidi wakukhonda kutithema wa Mulungu’ na kukhonda kukwanirisa cifuniro cawo tayu. (2 Akor. 6:1) Kodi tinapangiza tani kuti hatidatambira pezi tayu cifuniro ca udidi wakukhonda kutithema wa Mulungu? Paulu alemba: “Pa mabasa athu onsene tioneke ninga adzakazi a Mulungu.” (2 Akor. 6:4) Natenepa, tisapangiza kupereka kwathu takhuta kwa muoni wa Yahova na makhaliro athu adidi pabodzi na phinga yathu ya kumwaza mphangwa zadidi. Mu ndzidzi unoyu wa Cikumbuso ife tinadzakhala na mwai wadidi kakamwe wakuthimizira utumiki wathu, wakucita mwakukwana umboni wa mphangwa zadidi.
[Study Questions]
1. Kodi ndi mphangwa zipi zadidi zinafunika ife kugawana na anango?
2. Thangwi yanji ndzidzi wa Cikumbuso usapasa miyai yadidi kakamwe towera kucitira umboni mphangwa zadidi?
3. Kodi ndi ninji pinafuna kutiphedza kuthimizira basa yathu ninga banja?
4. Kodi tinakwanisa tani kusasanyira ndandanda wathu towera kutumikira ninga mpainiya wakuphedza khala tiri na basa ya ndzidzi onsene?
5. Kodi munakwanisa tani kuphedza nyakugwesera peno nyakuduwala towera atumikire ninga mpainiya wakuphedza?
6. Kodi pisakwanisika tani kwa aphale na atsikana akubatizwa akuti aciri ku xikola kutumikira ninga apainiya akuphedza?
7. Kodi akulu a mpingo angakwanise kucitanji towera kukulisa phinga mu utumiki nkati mwa ndzidzi wa Cikumbuso?
8. Kodi tisapfunzanji kubulukira ku citsanzo ca mpingo unango?
9. Thangwi yanji ndzidzi wa Cikumbuso ndi wadidi kakamwe kwa ale anathema kutoma kumwaza mphangwa zadidi?
10. Kodi akulu a mpingo angakwanise kucitanji towera kuphedza ale adalimira kumwaza mphangwa?
11. Kodi ndi cipi cipangizo cikulu kakamwe ca ‘udidi wakukhonda kutithema wa Mulungu?’
12. Kodi mbani anafunika ife kucemerera ku Cikumbuso?
13. Kodi Yahova apasa tani nkhombo kuwangisira kwa amwazi mphangwa awiri adatonga kucemerera anango ku Cikumbuso?
14. Kodi ndi basa ipi inafuna kudzacitwa pa dziko yonsene yapantsi kutomera 1 ya nthanda ya Murope?
15. Kodi tingakwanise kulonganji pakugawira ncemerero wa Cikumbuso?
16. Kodi ndi cakucitika cipi cinapangiza kufunika kwa basa ya kucemerera anthu mu cisa towera agumanike pa Cikumbuso?
17. Kodi tisapangiza tani kuti hatidatambira pezi tayu cifuniro ca udidi wakukhonda kutithema wa Mulungu?
[Caption on page 3]
Kodi Mbani Anafunika Kuphatanizwa Pakati Pa Ale Anafuna Kucita Upainiya Wakuphedza?
◼ Mabanja
◼ Ale anaphata basa ya ndzidzi onsene
◼ Anyakugwesera na anyakuduwala
◼ Ale ali ku xikola
[Caption on page 4]
Pakugawira Micemerero Ya Cikumbuso:
◼ Lekani bvunga ndzidzi uzinji na longani mwakugalamuka
◼ Lembani ale adapangiza cifuno na citani ulendo wakubwereza
◼ Gawirani marevista m’masabudu na m’madimingu