“Ipi Pichiteni Towera Mundikumbukire” Kufa Kwa Yezu Kunakumbukirwa Pa Ntsiku 2 Za Nthanda Ya Bwinja
1 Pa ntsiku 2 za nthanda ya Bwinja ya caka ca 2007, pikwi pya anthu kuzungulira dziko yonsene yapantsi pinadzagumanyikana towera kukumbukira ntsembe ya kufa kwa Yezu. Yezu afa thangwi iye akhali citsidzikizo ca utongi ukulu wa Babace wakudzulu, mbapasa cipangizo cakuti Sathani Diyabu mwaunthawatawa asapambizira anthu kuti asatumikira Mulungu na cikulumizo cakucenama basi. (Yobe 2:1-5) Phwando Yancidodo Ya Mbuya isatikumbusambo kuti kubulukira mu kufa kwace ninga munthu wakucena, wakusowa madawo, Yezu ‘apereka moyo wace towera kuombola anthu azinji.’ (Mat. 20:28) Natenepa, Yezu apanga anyakupfunzace kuti: “Ipi pichiteni towera mundikumbukire.” (Luka 22:19) Kodi kupereka takhuta ku muoni wakufunika unoyu wa Mulungu kusakukulumizani kutoma kucita masasanyiro towera kukumbukira n’citiro wakufuna unoyu wakukhonda landanisika?—Jwau 3:16.
2 Khunganyani Ntima Wanu: Mu kudinga pidacitika pa ntsiku zakumalisa za umaso waunyama wa Yezu, tinakwanisa kukhunganya ntima wathu ku Cikumbuso ceneci. Towera kutiphedza kucita pyenepi, ndandanda wakupambulika wa kuleri Biblya unakwanisa kugumanwa mu Examine as Escrituras—2007 na mu Calendário wa 2007. Ndandanda unoyu wa kuleri usabverana kakamwe na ntsiku zidacitika pyakucitika pyakuphatana na kufa kwa Yezu kudacitika mwakubverana na kalendariu anaphatisira ife lero. Ntsiku na ntsiku za nthanda zinalongwa mu pyakulembwa pya Biblya zabuluswa mu kalendariu Waciyuda, zakuti zikhalengeswa pa kubira kwa dzuwa mpaka kubira kwa dzuwa. Kusiyana kweneku kwaphatanizwa na kusapangizwa mu ndandanda wa kuleri Biblya wa Cikumbuso. Kubwerezera mphangwa zenezi na kunyerezera na phembero kufuna kukulu kwa Mulungu kunadzatiphedza kuphindula kakamwe na Cikumbuso.
3 Cemererani Anango Towera Agumanike Pa Cikumbuso: N’thimiziro wa Utumiki Wathu Wa Umambo wa nthanda ya Madzalo wadziwisa kugawira kwakupambulika towera kucemerera anthu ku cakucitika ceneci cakufunika. Kodi mwacita masasanyiro towera kucita khundu mwakukwana pa kugawira kwakupambulika? Kodi mwalemba madzina a anthu anafuna imwe kucemerera, na mwatoma kupita n’cibverano na iwo? Citani masasanyiro towera mufike nakweru pa mbuto ya Cikumbuso towera kupasa bweraniko anthu adacemera imwe pabodzi na anango adapangiza kufuna. Khala musafuna kukhala nawo pabodzi, citani pyonsene kuti iwo akhale na Biblya pabodzi na bukhu ya nyimbo. Apangizeni kwa anango m’mpingo. Nsonkhano ungamala wangisirani kutawira mabvunzo awo. Acemerereni towera kugumanika pa nkhani yapakweca yakupambulika inafuna kudzacitwa pa ntsiku 15 za nthanda ya Bwinja. Makamaka akulu a mpingo anadzafuna kucita pyonsene towera ale akhagumanyikana na mpingo mbwenye alimira kumwaza mphangwa atambire ncemerero wa Cikumbuso na wa nkhani yapakweca.
4 Phedzani Anthu Apswa Akufuna Na Adalimira Kumwaza Mphangwa Kuenda Kutsogolo: Nyakukamba nkhani ya Cikumbuso anadzafokotoza mwacigwagwa masasanyiro athu akucitisa pfunziro ya Biblya yakukhonda lipa na kuwangisa anthu apswa akufuna towera apitirize kupfunza pya Yahova. Imwe munakwanisa kuphatisira mifokotozo yace ninga phata ya kupasa ciphedzo cauzimu cakuthimizirika kwa ale adacemerera imwe. Khala mu nzidzi unoyu iwo nkhabe kupfunza Biblya, citani pyonsene towera kuacitira ulendo mwakukhonda dembuka pakumala Cikumbuso na apangizeni masasanyiro a pfunziro ya Biblya yakukhonda lipa. Towera kuenda kutsogolo mwauzimu, iwo anadzafunikambo kugumanika pa misonkhano ya mpingo. (Aheb. 10:24, 25, Mphangwa Zadidi) Towera kufikira pyenepi, awangiseni kutoma kugumanika mwakukhonda phonya pa misonkhano. Akulu a mpingo anadzafunika kucezera Akristu adalimira kumwaza mphangwa adagumanika pa Cikumbuso na kuaphedza kunyerezera mwadidi pidalongwa mu nkhani. Pyenepi pinakwanisa kuawangisa kutoma pontho mabasa awo mu mpingo.
5 Cikumbuso cisatipasa mwai towera kunyerezera mwacidikhodikho pidacita Yezu na Yahova kwa ife. Kunyerezera kweneku kusakulisa kufuna kwathu Yezu na Yahova na kusakhuya makhaliro athu. (2 Akor. 5:14, 15; 1 Jwau 4:11) Uno ndi nzidzi towera kutoma kukhunganyika tekhene na anthu akufuna ku cakucitika cakufunika kakamwe mu nzidzi ‘unadziwisa ife anthu kufa kwa Mbuya.’— 1 Akor. 11:26.
[Study Questions]
1. Thangwi yanji ntsiku 2 za nthanda ya Bwinja ya caka ca 2007 ndi zakufunika kakamwe?
2. Kodi tinakwanisa tani kukhunganya ntima wathu ku Cikumbuso?
3. Kodi tinakwanisa tani kuphedza anthu akufuna na adalimira kumwaza mphangwa kuti aphindule na Cikumbuso?
4. Kodi tinakwanisa tani kuphedza anthu towera kupitiriza kuenda kutsogolo mwauzimu pakumala Cikumbuso?
5. Kodi kugumanika pa Cikumbuso kusakwanisa kutiphindulisa tani?