Bokosi Ya Mabvunzo

◼ Kodi nyimbo yakutomesa Xikola Ya Utumiki Wa Mulungu, Nsonkhano Wa Basa, Nkhani Yapakweca, na Pfunziro ya A Sentinela, zisafunika kutomeswa tani, na mbani anafuna kuzitomesa?

Nyimbo zakusankhulwa zakutomesa Xikola Ya Utumiki Wa Mulungu ya sumana na sumana ziri mu Programa da Escola do Ministério Teocrático inagumanika mu nthimiziro wa Utumiki Wathu Wa Umambo wa Malandalupya. Nyimbo zakutomesa na zakumalisa za Nsonkhano Wa Basa wa sumana na sumana zisagumanika pa tsamba 2 ya Utumiki Wathu Wa Umambo. Munjira ibodzibodzi, numero za nyimbo za Pfunziro ya A Sentinela ya sumana na sumana zisagumanika pa tsamba 2 ya revista ibodzi na ibodzi ya A Sentinela. Nyimbo zakusankhulwa zisaoniwa ninga khundu ya misonkhano yonsene na thangwi ineyi zisafunika kutomeswa na m’bale anafuna kucitisa nsonkhano unoyu mbuto mwa muimiriri wa nsonkhano udamala.

Mwacitsanzo, muyang’aniri wa Xikola Ya Utumiki Wa Mulungu anadzacita bweraniko kwa anyakubvesera, mbatomesa nyimbo yakutoma, mbacitisa xikola, na buluka penepo mbacemera nyakukamba wakutoma wa Nsonkhano Wa Basa ku platifomu. M’bale wakuti ali na nkhani yakutoma ya Nsonkhano Wa Basa ndiye anafuna kutomesa nyimbo ya Nsonkhano Wa Basa.

Munjira ibodzibodzi, Nkhani Yapakweca inadzatomeswa na muimiriri. Iye anacita bweraniko anyakubvesera onsene na anadzaaphemba kuti aimbe pabodzi nyimbo idasankhulwa na nyakukamba nkhani. Muimiriri (peno m’bale unango wakuthema adasankhulwa mwanyapantsi) anadzacita phembero yakutomesa misonkhano. Iye anadzalonga anafuna kamba nkhani na kudziwisa nsolo wa nkhani yace. Nkhani ingamala, muimiriri nkhabe funika kubwerezera pidalonga nyakukamba nkhani tayu, iye anadzapereka basi takhuta mwacigwagwa thangwi ya cipfunziso. Iye anadzadziwisa nsolo wa nkhani yapakweca ya sumana inafuna kudza na buluka penepo anadzaphemba anyakubvesera onsene kuti adikhire Pfunziro ya A Sentinela. Nkhabe funika kuti muimiriri abvunze khala anyakubvesera asafuna kupereka ufuni na mwanyikiro ku mpingo wa nyakukamba nkhani wamulendo tayu. Buluka penepo, muimiriri anadzacemera ku platifomu ncitisi wa Pfunziro ya A Sentinela.

Ncitisi wa Pfunziro ya A Sentinela anadzatomesa nyimbo yakutoma yakuti inadzaphatisirwa mwakubverana na pfunziro. Iye anadzacitisa pfunziro mwakubverana na pitsogolero pidaperekwa na buluka penepo anadzadziwisa nyimbo yakumalisa. Kazinji kene ncitisi wa Pfunziro ya A Sentinela asacemera m’bale adacita nkhani yapakweca towera acite phembero yakumalisa.

Kutoweza pitsogolero pyenepi kunadzatiphedza kuona khala misonkhano yathu ya mpingo isacitwa munjira yakulinganira.