Ndandanda Upswa Wa Misonkhano Ya Mpingo
1 Nkati mwa sumana ya 21-27 ya Bwinja ya 2008, cidziwiso cakukomeresa cabviwa na abale pa dziko yonsene yapantsi. “Kutomera ntsiku 1 ya nthanda ya Thongwe ya 2009, Pfunziro ya Bukhu ya Mpingo inadzacitwa pabodzi pene na Xikola Ya Utumiki Wa Mulungu na Nsonkhano Wa Basa. Dzina ya Pfunziro ya Bukhu ya Mpingo inadzacinjwa mbikhala Pfunziro ya Bhibhlya ya Mpingo.”
2 Ndandanda Wa Nsonkhano Unoyu Wa Sumana Na Sumana: N’dzidzi wa nsonkhano unoyu, kuphataniza nyimbo zonsene na maphembero, unadzakhala n’dzidzi 1 na mphindi 45. Nsonkhano unadzatoma na nyimbo pabodzi na phembero (mph. 5), buluka penepo Pfunziro ya Bhibhlya ya Mpingo (mph. 25). Ingamala inadzatowererwa na Xikola Ya Utumiki Wa Mulungu (mph. 30). Buluka penepo, nyimbo (mph. 5) inaimbwa towera kutomesa Nsonkhano Wa Basa (mph. 35). Nsonkhano unadzamaliswa na nyimbo pabodzi na phembero (mph. 5). Towera kukuphedzani kukhunganyikira misonkhano ineyi, ndandanda wa Pfunziro ya Bhibhlya ya Mpingo, wa Xikola Ya Utumiki Wa Mulungu na wa Nsonkhano Wa Basa unadzagumanika nthanda zonsene mu Utumiki Wathu Wa Umambo.
3 Pfunziro Ya Bhibhlya Ya Mpingo: Nsonkhano unoyu unadzacitwa ninga munacitirwa Pfunziro ya A Sentinela. Nkhabe funika kutoma na kubwerezera pire pidapfunzwa pa sumana idamala tayu. Mbuto mwa pyenepi, nsonkhano usafunika kukhala na matomero acigwagwa. Pyenepi pinadzacitisa kuti pakhale n’dzidzi wakukwana towera anyakugumanika onsene apereke matawiro awo acigwagwa. Muyang’aniri wakutsogolera asafunika kudinga mwadidi kusankhulwa kwa akulu a mpingo towera kucitisa nsonkhano unoyu, nkulu wakusiyana-siyana pa sumana.
4 Nsonkhano Wa Basa: Nsonkhano Wa Basa unapitiriza na mphindi zikhali na iwo mbwenye na makhundu akucepa. Kazinji kene pidziwiso pinadzakhala pya mphindi zixanu. Unoyu usafunika kukhala n’dzidzi wakukwana towera kucita pidziwiso pyakufunika na kuleri matsamba anango akubuluka ku filiali. Pidziwiso pya n’dzidzi onsene, ninga pya masasanyiro a utumiki wa m’munda, ndandanda wa kupswaira, lipoti ya kobiri na matsamba anango anatumizwa n’dzidzi onsene na ofesi ya filiali nkhabe funika kulerwi pa platifomu tayu, mbwenye anadzaikhwa pa kwadru ya pidziwiso towera abale na alongo aaleri. Ale anaphembwa kuti acite nkhani asafunika kukhunganyika mwadidi na kukoya n’dzidzi udapaswa iwo mbaphatisira pitsogolero pidaperekwa.
5 Kucedzesa Kwa Muyang’aniri Wa Cisa: Ndandanda wa muyang’aniri wa cisa wa sumana na sumana nee unadzacinjwa tayu. N’cipiri, Xikola Ya Utumiki Wa Mulungu na Nsonkhano Wa Basa ungamala inadzaimbwa nyimbo. Buluka penepo muyang’aniri wa cisa anadzacita nkhani ya mphindi 30. Ninga munacitirwa ipyo cincino nkati mwa sumana ya kucedzesa kwace, ntsiku inango inadzasankhulwa towera kucita Pfunziro ya Bhibhlya ya Mpingo mbitowererwa na nyimbo pabodzi na nkhani ya basa ya muyang’aniri wa cisa. Nsonkhano unadzamaliswa na nyimbo pabodzi na phembero.
6 Misonkhano Ya Utumiki Wa M’munda: Ayang’aniri a nsoka anadzasankhulwa na nsoka wa akulu a mpingo towera atsalakane misoka ya kuenda ku utumiki wa m’munda na kucita basa ya ukumbizi kwa anthu a mu nsoka unoyu. Pingakhala pyakufunika kuti ntumiki wakutumikira acite basa ineyi, iye anadzakhala ninga “ntumiki wa nsoka.”
7 Ninga mudalongwa ipyo pano, ife tinadzakhala na mwai wa kudinga mphangwa zakuphindulisa na zakuwangisa zakuti zinadzatiphedza kukhala na uxamwali wadidi na Yahova. Pyenepi pinadzaticitisa kukhala amwazi mphangwa na apfunzisi adidi, akupfunziswa towera kubala misapo mizinji mu utumiki.—Aef. 4:13, 14; 2 Tim. 3:17.
8 Kupfunza mwanyapantsi pinafuna kulongwa m’misonkhano ineyi kunadzatiphedza kubvesesa ntsonga zikulu zidagomezerwa pa misonkhano yonsene. Ife tonsene tinadzakhala na mwai wakutawira, mbiticitisa kuti tibalangazane mwadidi unango na nzace. (Arom. 1:11, 12; Aheb. 10:24) Cifuno cathu cisafunika kukhala ca kuthambaruka towera ‘makhaliro a mu ntima mwathu aonekere’ mu ‘kudziwa kulonga mwakulungama mafala a udidi peno a undimomwene.’—1 Tim. 4:15; 2 Tim. 2:15.
9 Tiri akutsanzaya kakamwe thangwi ya macinjo anewa a misonkhano yathu ya mpingo. Tendeni tonsene tiphatisire pitsogolero pinatipasa “mbandazi wakukhulupirika na wanzeru” na kukhala paduzi na Nkumbizi wathu Wankulu munatikhunganya iye towera tikwanise kuthimbana na nyatwa “zikulu” zakuti ziri duzi.—Mat. 24:21, 45, Mphangwa Zadidi; Aheb. 13:20, 21; Apok. 7:14.
[Study Questions]
1, 2. Ndi macinjo api a misonkhano anafuna kucitika kutomera nthanda ya Thongwe ya 2009?
3. Inadzacitwa tani Pfunziro ya Bhibhlya ya Mpingo?
4. Nsonkhano Wa Basa unadzacinja mu njira ipi?
5. Nkati mwa sumana ya kucedzesa kwa muyang’aniri wa cisa, unadzacitwa tani ndandanda wa misonkhano ya mpingo?
6. Ndi ipi basa ya muyang’aniri wa nsoka?
7. Ndi ninji pinafuna kudzacitika na ndandanda upswa wa misonkhano ya mpingo?
8. Kukhunganyika mwanyapantsi kunakwanisa tani kuphindulisa ife ene pabodzi na anango?
9. Tiri akudzitonga kucitanji, na thangwi yanji?