Kuwangisira Towera Kucita Pizinji Mu Utumiki Wathu
1 Mpostolo Paulu acenjeza Akristu towera afambe mu njira ya Mulungu na towera apitirize ‘kucita’ pyenepi mwakuthimizirika. (1 Ates. 4:1) Kodi pyenepi pisabvekanji kwa ife? Cinthu cibodzi ndi cakuti ife tisafunika kupitiriza kusaka njira towera kucita pizinji m’mabasa auzimu, mbitiwangisira ndzidzi onsene towera ‘kucita pyonsene pya mabasa’ a utumiki wathu.—2 Tim. 4:5.
2 Cifuno: Kuwangisira towera kucita pizinji mu utumiki wathu kusakulumizwa na cifuno cathu cakutumikira Nciti wathu mu njira yadidi kakamwe. Ife tisafuna kukula mwauzimu na kusaka njira zakuthimizira utumiki wathu. Ndandanda wadidi wakucitwa na cifuno cadidi unadzatiphedza kufikira pifuno pyaumulungu.—Sal. 1:1, 2; Afil. 4:6; Aheb. 10:24, 25.
3 Towera kuthimiza utumiki wathu tisafunika kukulisa nzimu wa kupasa na wakuzimana. Tingakwanise kukulisa nzimu unoyu mu kunyerezera mwacidikhodikho citsanzo cadidi ca Yezu. (Mat. 20:28) Yezu akhali wakukomerwa kakamwe thangwi ya kutumikira anango mu utumiki wace onsene. (Mach. 20:35) Ife tingakwanise kusangizira Yezu mukupangiza citsalakano cathu kwa anthu anango na kubanza miyai yonsene towera kucita pizinji mu utumiki wathu.—Iza. 6:8.
4 Basa Ya Anyakubala: Cifuno ca kutumikira anango na ca kuthimizira utumiki wathu cingakwanise kupfunziswa kwa ana ang’ono. Anapiana anadzaona phinga ya piwalo pya banja na kuphata kwawo basa mwaphinga towera kuthimizira utumiki wawo. M’bale m’bodzi akhala wakukulumizika mu uwana wace towera kucita pizinji thangwi ya kuphata basa pabodzi na mbuyace wamamuna m’mabasa a mpingo. Phinga na citsanzayo ca mbuyace pyankulumiza kusaka miyai towera kutumikira abale ace. Cincino iye ndi ntumiki wakutumikira.
5 Kufunika Kwa Abale: ‘Khala munthu asasirira ukulu, asasirira basa yadidi.’ (1 Tim. 3:1) Mafala anewa asawangisa abale towera acite pizinji kuti akhale akuthema kupaswa miyai inango ya basa mu gulu ya Yahova. Kucita pyenepi nee kusaphemba kukhala munthu wanzeru peno waluso yakupambulika yacibaliro tayu. M’bale anawangisira kucita pizinji anadzaikha pa mbuto yakutoma Umambo na anadzakhala waphinga mu utumiki. (Mat. 6:33; 2 Tim. 4:5) Iye anadzawangisira towera akhale citsanzo cadidi kwa anango.
6 Dziko Yonsene Yapantsi: Yahova asacimbizisa ugumanyi. (Iza. 60:22) Pali kufunika kwakucimbiza kakamwe kwa onsene ale anatowezera citsanzo ca Yezu towera athimizire utumiki wawo. Lipoti ya dziko yonsene yapantsi ya caka ca basa ca 2006, yapangiza kuti anthu akukwana 248.327 abatizwa. Pyenepi pisapangiza medya yakupiringana 680 ya anthu apswa pa ntsiku ibodzi na ibodzi! Tendeni tonsene tipitirize kusaka njira towera kuthimizira utumiki wathu.