Aphale, Mukusaka Mabasa M’mpingo?
1. Ndi ndzidzi upi aphale asafunika kutoma kuphatisira pitsogolero pinagumanika pa 1 Timoti 3:1?
1 Khala mamuna asasaka mabasa m’mpingo, ‘asasirira mabasa adidi.’ (1 Tim. 3:1) Mafala anewa akupumirwa asawangisa abale toera kusaka miyai yakutumikira m’mpingo. Musafunika kukhala wathunga toera kucita pyenepi? Mwandimomwene, mphyadidi kusaka mabasa m’mpingo mbumuciri mphale. Mu njira ineyi munakwanisa kupfundziswa mbamukhala wakuthema toera kukhala ntumiki wakutumikira mungakula. (1 Tim. 3:10) Khala ndimwe mphale wakubatizwa, munakwanisa tani mabasa m’mpingo?
2. Pinakwanisika tani kupangiza na kukulisa nzimu wakudzimana?
2 Kudzimana: Kumbukani kuti mukusaka basa yadidi, tayu ya mbiri. Natenepa, kulisani cifuno toera kuphedza abale anu na alongo. Njira yakucita pyenepi ndi kunyerezera citsandzo cadidi ca Yezu. (Mat. 20:28; Jwau 4:6, 7; 13:4, 5) Phembani Yahova toera akuphedzeni kupangiza cifuno kwa anango. (1 Akor. 10:24) Kodi munakwanisa kuphedza akukalamba panango atenda m’mpingo? Kodi musaperekeka toera kugwanda maudzu, kutaya khuku na kutsalakana mabasa anango akusasanyira Nyumba ya Umambo? Kodi munakwanisa kuperekeka toera kucita nkhani pa Xikola ya Utumiki wa Mulungu khala mwanaciro nkhabepo? Munadzaona kuti kuperekeka kwanu toera kuphedza anango kunadzakucitisani kukhala wakutsandzaya.—Mach. 20:35.
3. Thangwi yanji kukola mwauzimu ndi kwakufunika, mphapo kunakwanisika tani?
3 Kukola Mwauzimu: Mphyakufunika kakamwe kuna ntumiki wa m’mpingo kukhala wakukola mwauzimu kusiyapo kukhala na udziwisi wakupambulika peno maluso acibaliro. Munthu wakukola mwauzimu asayesera kucita pinthu m’maonero a Yahova na a Yezu. (1 Akor. 2:15, 16) Iye asapangiza makhaliro a ‘nsapo wa nzimu.’ (Agal. 5:22, 23) Asakhala m’mwazi mphangwa waphinga wakuti asaikha pifuno pya Umambo pa mbuto yakutoma. (Mat. 6:33) Munakwanisa kukulisa makhaliro auzimu mu kukhala na ndandanda yanu ya pfundziro. Pyenepi pisaphataniza kuleri Bhibhlya ntsiku zonsene, kuleri revista ibodzi na ibodzi A Sentinela na Despertai!, na kukhunganyika toera kugumanika pa misonkhano ya mpingo. (Sal. 1:1, 2; Aheb. 10:24, 25) Pa kuwangisa mphale Timoti toera kuthambaruka mwauzimu, Paulu alemba: ‘Cita mphole na mapfundzisiro ako.’ (1 Tim. 4:15, 16) Natenepa, khunganyikani mwadidi mungapaswa nkhani pa Xikola ya Utumiki wa Mulungu. Khunganyikani toera kuenda mu utumiki ndzidzi onsene. Khalani na pifuno pyauzimu ninga upainiya, kutumikira ku Beteli peno kuenda ku Xikola ya Bhibhlya kwa Abale Akukhonda Kumanga Banja. Kukola mwauzimu kunadzakuphedzani ‘kuthawa pinasirira aphale.’—2 Tim. 2:22.
4. Thangwi yanji kunyindirika na kukhulupirika ndi kwakufunika?
4 Kunyindirika na Kukhulupirika: Abale adasankhulwa toera kugawa cakudya kwa Akristu mu pyaka dzana yakutoma akhali na mbiri yadidi, mwandimomwene akhadziwika thangwi ya kunyindirika na kukhulupirika kwawo, natenepa apostolo nee akhadzudzumika kuti basa mbidacitwa tani. Pyenepi pyaacitisa toera kucita mabasa anango akufunika. (Mach. 6:1-4) Natenepa, mungapaswa basa m’mpingo iciteni na maluso anu onsene. Sangizirani Nowa, wakuti mwacidikhodikho atowezera pitsogolero pidapaswa iye toera kumanga cimwadiya. (Gen. 6:22) Kukhulupirika na kukola mwauzimu ndi kwakufunika kwa Yahova.—1 Akor. 4:2; onani bokosi “Maphindu Akupfundzisa Anango.”
5. Thangwi yanji aphale Acikristu asafunika kusaka mabasa m’mpingo?
5 Ninga pyalongwa m’maprofesiya, Yahova akucimbizisa kugumanya anthu. (Iza. 60:22) Medya ya anthu 250.000 asabatizwa pa caka cibodzi na cibodzi. Nakuti anthu apswa azinji asabwera mu undimomwene, pasafunika amuna akuthema toera kutsalakana mabasa a m’mpingo. Mwakusiyana na kale, cincino kuna pizinji pyakucita m’basa ya Yahova. (1 Akor. 15:58) Aphale, mukusaka mabasa m’mpingo? Khala nditenepo mukufuna basa yadidi!
[Ntsonga ikulu pa tsamba 2]
Nakuti anthu apswa azinji asabwera mu undimomwene, pasafunika amuna akuthema toera kutsalakana mabasa a m’mpingo
[Bokosi pa tsamba 3]
Maphindu Akupfundzisa Anango
Aphale Acikristu asaphindula akulu a mpingo angaapasa mabasa na kuapfundzisa. Pakumala mapfundziro, muyang’aniri wa cisa akhali nawa pa platifomu mbakapereka ciwangiso kuna m’mwazi mphangwa. Muyang’aniri wa cisa aona mphale m’bodzi akhali dzololo cifupi na iwo, natenepa, muyang’aniri wa cisa abvundza mphale unoyu, khala akhadikhira toera kulonga na iye. Mphale atawira kuti apaswa basa toera kupswaira platifomu pakumala kwa misonkhano. Anyakubalace akhadakhunganyika toera kuenda, mbwenye iye nee akhafuna kuenda mbadzati kucita basa yace. Mwakutsandzaya muyang’aniri wa cisa abuluka pa platifomu, mbasimba: “Akulu a mpingo unoyu akhali dzololo toera kupfundzisa aphale Acikristu mu kuapasa mabasa m’mpingo. Ninga maphindu, kukhali kwakudzolowereka kwa iwo kusankhula a mphale Acikristu toera kukhala atumiki akutumikira mu ndzidzi ukhacedzera ine mpingo.”