Bokosi Ya Mabvunzo
◼ Kodi tisafunika kubvala nguwo za ntundu wanji munaenda ife kaona nyumba zinacitirwa basa ya Yahova?
Kuzungulira dziko yonsene yapantsi, Nyumba za Misonkhano, nyumba za Beteli na maofesi a filiali ndi mbuto zakupambulika zinacitirwa basa ya Yahova. Izo ndi zakucepeseka, zakucena na zakusasanywa mwadidi, mbizikhala na maonekero akulemedzeka. Pyenepi ndi pyakusiyana kakamwe na pinaoneka kazinji kene m’makhaliro a pinthu a Sathani. Tingaenda kaona mbuto zinacitirwa basa ya Yahova tisafunikambo kudzindikirwa ninga mbumba ya Yahova, yakuti isacita cifuno cace.
Ninga Akristu, tendeni “tioneke ninga adzakazi a Mulungu” mu njira zonsene, kuphataniza mabvaliro na makhunganyikiro athu adidi. (2 Akor. 6:3, 4) Pontho tisafunika kukhala na makhaliro adidi. M’midzidzi yonsene nguwo na makhunganyikiro athu asafunika kupangiza kucepeseka na cilemedzo pyakuti ndi pyakuthema kwa anzakazi a Yahova Mulungu. Makamaka pyenepi ndi pyakufunika munaenda ife kaona ofesi ikulu ku Nova York na mafiliali kuzungulira dziko yonsene yapantsi.
Mu kulonga pya mabvaliro na makhunganyikiro adidi, n’thimiziro wa Utumiki Wathu Wa Umambo wa nthanda ya Thongwe ya 2008, wafokotoza kufunika kwa unyai wakumanungo, mabvaliro akulinganira na makhunganyikiro adidi munaenda ife mu utumiki wa m’munda na munaenda ife ku misonkhano Yacikristu. Buluka penepo, pa tsamba 8, ndima 7, isalonga: “Kumbukani, dzina yakuti Beteli nkhubveka ‘Nyumba ya Mulungu.’ Natenepa, nguwo zathu, mabvaliro na makhaliro athu asafunika [kukhala] mabodzibodzi na ale anadikhirwa ife kuti tikhale nawo munaenda ife ku misonkhano towera kalambira pa Nyumba ya Umambo.” N’dida unoyu wapadzulu usafunikambo kutsogolera amwazi mphangwa a Umambo munaenda iwo kaona Beteli, peno abuluke kutali peno paduzi. Mu njira ineyi, mulendo asapangiza kupereka takhuta na cilemedzo.—Sal. 29:2.
Nguwo zathu zisafunika kutidzindikirisa ninga ale ‘analemedza Mulungu.’ (1 Tim. 2:10) Mabvaliro na makhunganyikiro adidi asacitisa anthu anango kulemedza alambiri andimomwene a Yahova. Mbwenye, pisaoneka kuti pa kuenda kaona nyumba zinacitirwa basa ya Yahova, abale na alongo anango asabvala mwaphwazo, mwakukhonda kutsalakanika mwadidi peno kubvala nguwo zakupangiza manungo. Nguwo zenezi si zakuthema tayu kwa Akristu mu ndzidzi onsene. Pa ntsonga ineyi, ninga m’makhundu anango onsene a umaso wathu Wacikristu, ife tisafunika kukhala na cifuno ca kukoya midida yapadzulu yakuti isadzindikirisa mbumba ya Mulungu na anthu adziko, mbiticita pyonsene towera kusimba Mulungu.—Arom. 12:2; 1 Akor. 10:31.
Natenepa, pa kuenda kaona ofesi ikulu na filiali ku Nova York peno maofesi anango a filiali, khala mwacita ulendo wa kuenda kaona mbuto zenezi peno muli pa ferya m’mbuto za maturista, bvunzikani: ‘Kodi nguwo zanga na makhunganyikiro anga asapangiza kucepeseka, unyai na cilemedzo ca mbuto inafuna ine kaona? Kodi izo zisalemedza mwadidi Mulungu analambira ine? Kodi anango anadzudzumika peno anaipirwa na maonekero anga?’ Na nguwo zathu pabodzi na makhunganyikiro athu, tendeni ndzidzi onsene ‘tilemedze mafala a Mulungu, mpulumusi wathu’!—Tito 2:10.