KUKHALA MASO NINGA AKRISTU
Phedzerani Midida ya Makhaliro Adidi ya Yahova
Yahova Mulungu akhazikisa midida ya makhaliro adidi kwa anthu. Mwacitsandzo, iye asafuna kuti mamuna na nkazi angamanga banja akhale pabodzi kwenda na kwenda. (Mat. 19:4-6, 9) Iye asakhondesa ntundu onsene wa ulukwali. (1 Akor. 6:9, 10) Pontho iye asatipasa midida inalonga thangwi ya mabvaliro na makhunganyikiro yakuti isasiyanisa anthu ace na anthu a dziko.—Deut. 22:5; 1 Tim. 2:9, 10.
Mu dziko inakhala ife, anthu azinji asapwaza midida ya Yahova. (Arom. 1:18-32) Iwo asaphatisira maonero a anthu azinji toera kuapfundzisa mabvaliro, makhunganyikiro na makhaliro awo. Azinji asagaya thangwi ya pyakuipa pinacita iwo mbasumula ale anakhala maso mwakusiyana na makhaliro awo.—1 Ped. 4:3, 4.
Ninga Mboni za Yahova, tisafunika kuphedzera mwacipapo midida ya makhaliro adidi ya Mulungu. (Arom. 12:9) Munjira ipi? Mwacilemedzo tisafunika kupanga anthu anango pya makhaliro akutawirika kwa Yahova. Pontho, tisafunika kukhala maso mwakubverana na midida ineyi. Mwacitsandzo, pakusankhula nguwo na makhunganyikiro, tisafunika kubvundzika: ‘Kodi pisankhulo pyanga pisapangiza kuti ndisaphedzera midida ya Yahova peno ya dziko? Mabvaliro na makhunganyikiro anga asapangiza kuti ndine ntumiki wa Mulungu?’ Pontho, pakusankhula programu ya televizau peno filimu, tisafunika kubvundzika: ‘Kodi Yahova anakomerwa na programu ineyi? Kodi programu ineyi isaphedzera midida ya Mulungu peno ya Sathani? Ubalangazi unasankhula ine, kodi unafudza makhaliro anga adidi? (Masal. 101:3) Kodi ubalangazi unoyu unagwegwedusa anthu a m’banja yanga peno anango?’—1 Akor. 10:31-33.
Thangwi yanji ndi pyakufunika kakamwe kwa ife kuphedzera midida ya makhaliro adidi ya Yahova? Thangwi thimize pano, Kristu Yezu anadzafudza uipi na onsene anacita pyakuipa. (Ezek. 9:4-7) Basi ene ale anacita cifuno ca Mulungu ndi anafuna kupulumuka. (1 Jwau 2:15-17) Natenepa, tendeni tonsene tiphedzere midida ya makhaliro adidi ya Yahova. Tingacita pyenepi, anthu anango anaona makhaliro athu adidi mbasimba Mulungu.—1 Ped. 2:11, 12.
Kodi nguwo zanga zisalonganji thangwi ya ine, pontho zisalonganji thangwi ya pinakhulupira ine?
ONANI VIDYU KHALANI XAMWALI WA YAHOVA—MAMUNA M’BODZI NA NKAZI M’BODZI, BULUKA PENEPO TAWIRANI MIBVUNDZO IYI:
Thangwi yanji ndi pyandzeru kukhala maso mwakubverana na midida ya makhaliro adidi ya Yahova?
Thangwi yanji anyakubala asafunika kupfundzisa anawo pya midida ya makhaliro adidi ya Yahova kutomera uwana wawo?
Ife tonsene kuphataniza anapiana tinaphedza tani anango toera kuphindula na udidi wa Mulungu?