Khalani ‘Wakupereka Takhuta’
1 Mudawangisa Yezu anyamatanya khumi, m’bodzi basi wa iwo ndi adabwerera kudzapereka takhuta. Yezu abvunza: “Adawangibswa si khumi tayu? Apfembamwe ali kupi?” (Luka 17:11-19) Ndi pyakufunika tani kwa ife kukhala akukomerwa na akupereka takhuta ku muoni onsene wadidi na mitukwa yonsene yadidi inapaswa ife na Babathu wakudzulu wakudzala manja na wakufuna, Yahova Mulungu!—Akol. 3:15; Tgo. 1:17.
2 Kodi tisafunika kupereka takhuta ku pinthu pipi pingasi? Ife tisapereka takhuta ku ciomboli, muoni ukulu kakamwe wa Mulungu kwa anthu. (Jwau 3:16) Tisaperekambo takhuta kwa Yahova thangwi ya kutikwewera kwa iye. (Jwau 6:44) Thangwi inango inaticitisa kupereka takhuta ndi ubodzi wathu Wacikristu. (Sal. 133:1-3) Mwakukhonda penula, imwe mungakwanise kunyerezera pya miyoni inango izinji yakubuluka kwa Yahova. Cipo tisafunika kukhala ninga Aisraele akukhonda kupereka takhuta akuti aduwala mabasa adacita Yahova towera kuaphedza!—Sal. 106:12, 13.
3 Pangizani Kupereka Takhuta: Maseze anyamatanya onsene khumi akomerwa na pidacita Yezu kwa iwo, ndi m’bodzi basi adapangiza kupereka takhuta. (Luka 17:15) Mu njira ibodzibodzi, ife tisapangiza kupereka takhuta mu kucita khundu mwaphinga mu utumiki. Khala tisaperekadi takhuta ku pyonsene pidaticitira Babathu wakudzulu, mitima yathu inadzakulumizika kusangizira kufuna kwace na kupanga anango mwaphinga pya iye. (Luka 6:45) Munapanga ife anango pya mabasa ‘akudzumisa a Yahova na pinanyerezera iye kwa ife,’ kufuna na kupereka kwathu takhuta kwa Yahova kunadzakula.—Sal. 40:5.
4 Citisani Anango Kukhalambo Akupereka Takhuta: Ife tisafunika kusaka njira towera kuphedza anathu na anyakupfunza Biblya kuti akulise kupereka takhuta. Anyakubala ali na miyai mizinji yakucita pyenepi, ninga munaona iwo na anawo pyakucitwa pya Yahova. (Arom. 1:20) Munacitisa ife pfunziro ya Biblya, tingakwanise kubvunza nyakupfunza wathu: “Kodi pyenepi pisatipanga kuti Yahova ndi munthu wa ntundu wanji?” Munathimizirika kupereka takhuta kwa nyakupfunza, kufuna kwace Mulungu na kudzitonga kwace kuti ankomerese kunadzakulambo.
5 Nkati mwa ntsiku zino zakumalisa, anthu azinji asakhala akukhonda kukomerwa na akukhonda kupereka takhuta. (2 Tim. 3:1, 2) Pinadzakhala pyakukomeresa tani kwa Yahova kuona anzakazi ace akuperekeka kukhala akupereka takhuta mu kucita khundu mwaphinga mu utumiki!—Tgo. 1:22-25.