Mbani Anafuna Kukomerwa Na Nsolo Unoyu?
1. Tisafunika kunyerezeranji tingaleri A Sentinela na Despertai!, na thangwi yanji?
1 A Sentinela na Despertai! asasanywa mwakubverana na pinacitika mu dziko yonsene yapantsi. Natenepa, A Sentinela na Despertai! isafokotoza misolo mizinji yakusiyana-siyana. Tingaleri nsolo ubodzi na ubodzi mu revista yathu, tisafunika kunyerezera kuti mbani anafuna kukomerwa na misolo ineyi, buluka penepo, gawirani munthu unoyu.
2. Ndi misolo ipi inagumanika m’marevista athu yakuti panango inakomeresa anthu anango?
2 Kodi A Sentinela ipswa isafokotoza pya ntsonga ya m’Bhibhlya yakuti imwe mwailonga kale kwa ndzanu wa kubasa? Kodi musagumanika nsolo unalonga pya umaso wa banja wakuti unaphedza acibale? Kodi alipo anadziwa imwe wakuti akucita masasanyiro toera kuenda ku dziko yakuti isapangizwa mu Despertai!? Kodi ibodzi mwa marevista anewa musagumanika nsolo wakuti unatundusa anyamalonda peno misoka ya utongi mu cisa canu? Mwacitsandzo, revista inafokotoza pya nyatwa zinathimbana na anthu akugwesera, inakwanisa kukhala yakufunika ku mbuto zakutsalakanira akukalamba. Panango, misoka yakuonera mwambo inadzakomerwa na revista yakuti iri na nsolo unalonga pya uphanga peno pya apolixa.
3. Longani cakugumana naco cinapangiza kufunika kugawira marevista kwa ale anaona ife kuti anakomerwa na pya nkati?
3 Maphindu: Pakumala kutambira Despertai! ya Outubro de 2011 ya nsolo wakuti “Como Criar Filhos Responsáveis,” banja ibodzi ya ku Afrika Wakubangwe yamenyera ntokodzi maxikola 25 na maxikola a anapiana mu cisa cawo. Apfundzisi makumawiri na awiri atambira makopya a revista ineyi mbagawira anyakupfundzawo. Banja inango mu dziko ineyi ikhali na maonero mabodzi ene, natenepa agawira makopya ku maxikola a n’cisa cawo. Xikola ibodzi yatonga kuphatisira revista m’mapfundziro awo a sumana na mu ndandanda yawo yakuleri. Banja ineyi yalonga cakugumana naco cawo kuna muyang’aniri wa cisa wakuti awangisa mipingo mu cisa toera kulonga na maxikola a mu pisa pyawo. Ofesi ya filiali yatambira maphembo mazinji a marevista, natenepa, revista ineyi yadhindwa pontho!
4. Thangwi yanji tisafuna kugawira marevista kwa anthu azinji?
4 Marevista athu asafokotoza mabvekero andimomwene a pinthu pinacitika na asatsogolera toera kubva pinalongwa m’Bhibhlya na Umambo wa Mulungu. Marevista anewa ndiwo basi ene ‘anamwaza pya cipulumuso’ pa dziko yapantsi. (Iza. 52:7, Tradução do Novo Mundo) Natenepa, tisafuna kuagawira kwa anthu azinji pingakwanisika. Njira yadidi toera kucita pyenepi ndi kunyerezera kuti ‘mbani anafuna kukomerwa na nsolo unoyu?’