Miyai Yakuthimizirika Toera Kupereka Takhuta Kuna Yahova

1. Ndi masasanyiro api mapswa akuti anatiphedza toera kupereka ‘takhuta wankulu kuna Yahova’?

¹ Nthanda idamala ya Murope, masasanyiro mapswa atoma phata basa, apasa mwai amwazi mphangwa toera kutumikira ninga apainiya akuphedza mu kupereka midzidzi 30 inaphembwa mu nthanda ya Murope peno Bwinja, pontho mu nthanda ya kucedzerwa na muyang’aniri wa cisa. Khala kucedzesa kwa muyang’aniri wa cisa kusaphataniza kumala kwa nthanda na kutoma kwa nthanda inango, amwazi mphangwa adalembesa toera kupereka midzidzi 30, anakwanisa kusankhula nthanda ibodzi toera kukhala apainiya akuphedza. Apainiya akuphedza onsene anakwanisa kugumanika pa nsonkhano onsene wa apainiya a ndzidzi onsene na akupambulika. Pyenepi pisabveka kuti, khala nee tinakwanisa kupereka midzidzi 50, tinakwanisa kupitiriza kupereka ‘takhuta wankulu kuna Yahova’ mu kutumikira kanai pa caka ninga apainiya akuphedza mbatipereka midzidzi 30!​—Sal. 109:30; 119:171.

2. Ninji pinafuna kutsandzayisa ale anafuna kukhala apainiya akuphedza mu ndzidzi wakucedzesa kwa muyang’aniri wa cisa?

² Mu Ndzidzi Unacedzesa Muyang’aniri wa Cisa: Cincino azinji anakwanisa kukhala apainiya akuphedza mu ndzidzi unacedzesa muyang’aniri wa cisa, pontho anadzatsandzaya na kuwangisana mu kubuluka pabodzi mu utumiki. (Arom. 1:11, 12) Apainiya azinji akuphedza anadzafuna kubulusa ferya pakati pa sumana toera kuphata basa na muyang’aniri wa cisa. Apainiya akuphedza anaphata basa ya dziko pakati pa sumana anakwanisa kuphemba muyang’aniri wa cisa toera kubuluka pabodzi na iwo mu utumiki n’Sabudu peno n’Dimingu. Kusiyapo pyenepi, ndi kuwangiswa kwanji kunadzakhala na apainiya akuphedza mu kugumanika pabodzi pa nsonkhano wa apainiya a ndzidzi onsene na apainiya akupambulika!

3. Thangwi yanji ndzidzi wa Cikumbuso ndi wadidi toera kukhala mpainiya wakuphedza?

³ Mu Nthanda ya Murope na Bwinja: Ale adaphindula na masasanyiro akutoma a kutumikira ninga apainiya akuphedza mu kupereka midzidzi 30 mu nthanda ibodzi ya ndzidzi wa Cikumbuso, cincino anakwanisa kuthimizira ‘ntsembe yawo yakusimba’! (Aheb. 13:15) Nthanda ya Murope na Bwinja ndi zadidi kakamwe toera kuthimizira utumiki wathu ninga apainiya akuphedza. Pyaka pyonsene mu nthanda zenezi, tisacita campanya yakucemera anango toera kugumanika pa Cikumbuso. Kusiyapo pyenepi, nakuti azinji asathimizira utumiki wawo mu ndzidzi wa Cikumbuso, tinakwanisa kuphata basa na amwazi mphangwa akusiyana-siyana. Pakumala kwa Cikumbuso tinakwanisa kuthimizira cifuno ca ale adagumanika na kuawangisa toera agumanike pa nkhani yakupambulika. Kodi ntima wanu unadzakukulumizani toera kuphindula na miyai ineyi yakuthimizirika toera kukhala mpainiya wakuphedza?​—Luka 6:45.