Munakhunganyika Tani Mafala Akutoma
1. Thangwi yanji mphyakufunika kakamwe kuphatisira mafala adidi akutoma?
1 Ninga kugwadira kwa cakudya kusaticitisa kudikhira na cifuno ku cakudya cinafuna ife kudya, mafala adidi akutoma asafungula njira toera kudinga Malemba mu njira yakuphindulisa. Mafala akutoma akuphindulisa ndi akusiyana mu kulapha kwawo na pinalonga iwo, mbwenye ninga cakudya cakukoma, ndzidzi onsene mafala adidi akutoma asaphemba kukhunganyika mwadidi mwanyapantsi. (Mis. 15:28) Ninji pinacitisa mafala akutoma kukhala akuphindulisa?
2. Tinakhunganyika tani mafala akutoma akuphindulisa?
2 Sankhulani Mafala Akucitisa Cifuno: Mafala athu akutoma angakhonda kucitisa munthu kupangiza cifuno, mwanaciro nyumba anamalisa makani. Natenepa, pakukhunganyika, nyerezerani pinthu pinadzudzumisa anthu pacisa. Kodi anthu pacisa asafuna utongi wadidi, umaso wakutsandzaya m’banja, peno kumala kwa nkhondo? Kazinji kene anthu asafuna kakamwe kulonga maonero awo, natenepa, khunganyikani mibvundzo yakuti inacitisa anthu kunyerezera na kulonga maonero awo. Munakwanisa kuphatisira njira zinapangizwa mu Utumiki Wathu Wa Umambo mbamuzisasanyira mwakubverana na cisa canu? Ndiye tani midzidzi inango kukhunganyika mafala akutoma mangasi pa Kulambira kwanu kwa Banja namaulo?
3. Tinakwanisa tani kusasanyira mafala athu akutoma mwakubverana na makhaliro na makuziro a anthu a cisa cathu?
3 Nyerezerani Makhaliro na Makuziro: M’mbuto zinango, anthu asadikhira kuti tilongeretu thangwi ya ulendo wathu. M’mbuto zinango, pisaoniwa ninga kusowa cilemedzo mulendo angakhonda kubvundzisa khala anaciro nyumba ali mwadidi, panango kulonga mafala mangasi a citsalakano. Mu pisa pinango, makhaliro auphemberi a anthu asatitawirisa kulonga pya Bhibhlya mwakusudzuka. (Mach. 2:14-17) Mbwenye mu pisa pyakuti anthu nee ndi a uphemberi Wacikristu, peno nee ndi a uphemberi, panango mphyadidi kakamwe kulonga pya Bhibhlya paulendo wakubwereza, mbuto mwakucita pyenepi paulendo wakutoma.—Mach. 17:22-31.
4. Tisafunika kutsalakana tani mafala athu akutoma?
4 Mafala Akutoma: Khunganyikani mwadidi mafala anu akutoma. Ndzidzi onsene, mafala acigwagwa, akukhonda nentsa kubvesesa ndi adidi kakamwe. Njira inalonga ife mafala athu akutoma ndi yakufunikambo kakamwe. Longani mwakugalamuka. Pangizani citsalakano, mwetulirani mwauxamwali, pyenepi pinapangiza kutsalakana kwanu mwanaciro nyumba. Kutowezera pitsogolero ipi kunadzatiphedza kukhunganyika mafala adidi akutoma akuti anadzacitisa anthu a mu cisa cathu ‘kudya pa meza ya Yahova.’—1 Akor. 10:21, Tradução do Novo Mundo.