Tinapereka Tani Umboni Mukuphatisira Meza Peno Karinya
Kupereka umboni mukuphatisira meza peno karinya ndi njira yadidi toera kukwewera anthu a mitima yadidi ku undimomwene. (Jwau 6:44) Natenepa, akulu a mpingo asawangiswa toera kukhazikisa masasanyiro a kupereka umboni wapakweca m’mbuto za cisa ca mpingo zakuti zisapita anthu azinji. Nakuti meza peno karinya pisabuluswa mbuto zinaikhwa ipyo, nkhabe funika kuphemba mbuto zenezi kwa akulu a mautongi. Mphapo, mbani athema kucita khundu m’basa ineyi? Amwazi mphangwa a makhaliro akulinganira, a mabvaliro akuthema na a maluso akucedza mwadidi. Ntsonga zinatowerera zisapangiza pinafuna kucitwa na kukhonda kucitwa pyakuti pinadzaphedza amwazi mphangwa kukhala akupembera.
Pinafuna Imwe Kucita:
• Khalani auxamwali, citani bweraniko na phedzani anthu anapita na pa mbuto ineyi. Amwazi mphangwa anango asakhala akugalamuka, akumwetulira mwandimomwene na akumwanyika mwauxamwali. Khala munthu unango asayang’ana pa meza peno karinya mu ndzidzi unapita iye, longani mafala ninga awa, “Munakwanisa kukwata inafuna imwe.”
• Lekani kulimira cifupi kakamwe na meza peno karinya. M’mbuto zinango amwazi mphangwa aluso asapembera angathaukira pang’ono meza peno karinya. Anango aona kuti kucita pyenepi kusacitisa anthu anapita na pa mbuto ineyi kunyinyirika kulimira, natenepa asalimira kutali pang’ono mpaka munthu wakupita na pa mbuto ineyi angalimira. Munthu angafendedzera meza peno karinya, yeserani kucedza naye, panango kumbvundza, “Kodi mwanyerezera kale thangwi ya mbvundzo unoyu?”
• Phatisirani Bhibhlya kazinji kene pingakwanisika.
• Fokotozani masasanyiro a kupfundza Bhibhlya na munthu onsene anakwata ibodzi mwa mabukhu athu a pfundziro, ninga bukhu Biblya Isapfundzisanji. Pangizani vidyu Thangwi Yanji Tisafunika Kupfundza Bhibhlya? mu ntcini wanu wandzeru peno ntokodzi wa m’manja.
• Pingakwanisika, phembani numero ya ntokodzi kuna munthu adapangiza cifuno. Khala munthu unoyu nee asakhala n’cisa canu, lembani pa formularyo Queira Visitar (S-43) na kuipereka mwakucimbiza kuna mulembi wa mpingo.
Pinafuna Kukhonda Imwe Kucita:
• Kukhala waukali, wakukakamiza, peno kulimira cifupi kakamwe na meza peno karinya ninga nsupayi.
• Kuona masasanyiro anewa a maperekero aumboni ninga njira yakugawira mabukhu basi. Tingakhala mu utumiki, tisafunika kucita pyonsene pinakwanisa ife toera kucedza na munthu onsene anafika pa mbuto ineyi, thangwi cifuno cathu ndi kutomesa mapfundziro a Bhibhlya.
• Kukhala kutsogolo kwa meza peno kwa karinya peno kucedza kakamwe na m’mwazi mphangwa ndzanu. Khala mwamenyerwa ntokodzi, mphyadidi kubuluka pang’ono pa mbuto iri na meza peno karinya.
• Kuketesana na anyakupokanya. Khala anyakupokanya asalonga mwakupwaza, mphyadidi kubuluka pa mbuto ineyi kwenda mbuto inango.