“Kuthimizira Maluso Athu Mu Utumiki​—Kutomesa Pfundziro Ya Bhibhlya Paulendo Wakutoma Mukuphatisira Bruxura Mphangwa Zadidi za Mulungu!”

Thangwi Yanji Mphyakufunika: Toera kucita anyakupfundza, tisafunika kukhala apfundzisi a Mafala a Mulungu. (Mat. 28:18,19) Tonsene tinakwanisa kupfundzisa undimomwene mwakuphata ntima mukuphatisira maferamentu anapaswa ife. Bruxura Mphangwa Zadidi za Mulungu! yacitwa makamaka toera kutiphedza kupfundzisa undimomwene kwa anango. Inde, tisafunika kuiphatisira toera kutomesa pfundziro ya Bhibhlya na mwanaciro nyumba paulendo wakutoma.

Tinacita Tani Pyenepi:

• Dingani maperekero aumboni ali m’bokosi.​—Pontho onani Utumiki Wathu Wa Umambo wa Murope 2013.

• Ikhani bruxura yanu mpasta ya m’basa ya m’munda. Ikhanimbo mazinji a ntundu ubodzi ene toera kuagawira.

• Dingani ndima ibodzi peno ziwiri, m’mphindi khumi peno zakucepa.

Yeserani Kucita Ipi Nkati Mwa Nthanda:

• Phemberani toera kukhala na cifuno cakutomesa pfundziro. Pontho, phembani ciphedzo ca Yahova toera kutomesa pfundziro ya Bhibhlya na kukhala mpfundzisi wadidi wa undimomwene.​—Afil. 2:13.

• Nkati mwa kulambira kwa banja peno pfundziro ya munthu paekha, khalani na ndzidzi wakupfundza maperekero aumboni. Mungacita pyenepi, munakwanisa kulonga na cinyindiro na kutomesa pfundziro ya Bhibhlya paulendo wakutoma mu utumiki.

[Bokosi pa tsamba 1]

Pa Kuenda Nyumba Na Nyumba:

“Anthu azinji asabvundza kuti ninji pinafuna kucitika na dziko ino. Musanyerezera kuti makhaliro anadzakhala adidi? [Dikhirani ntawiro.] Anthu azinji asadzuma angapfundza kuti Bhibhlya iri na mphangwa zadidi zakuti zisatipasa cidikhiro. Iyi ndi mibvundzo mingasi yakuti isatawirwa m’Bhibhlya.” Pasani mwanaciro nyumba bruxura na mphembeni toera asankhule mbvundzo ubodzi pa tsamba yakumalisa wakuti asafunisisa kudziwa ntawiro wace. Buluka penepo fungulani nsolo unoyu, pontho pangizani pfundziro. Citani masasanyiro akubwerera toera kudinga mbvundzo unango wa nsolo unoyu.