Kupfundza Kubulukira Kwa Amwazi Mphangwa Aluso

Mwandimomwene ndi mwai kukhala na amwazi mphangwa aluso m’mpingo. Anango akutumikira Yahova mwakukhulupirika mu pyaka pizinji. Panango, anango agumana maluso a mu utumiki cincino. Amwazi mphangwa anewa asaona kuti Yezu asatsogolera tani mpingo Wacikristu mu ntsiku zino zakumalisa mukuthimizira basa yakumwaza mphangwa na kucita anyakupfundza. (Mat. 28:18,19) Mukucita khundu mu utumiki unoyu, iwo atambira ‘mphambvu kupiringana zacibaliro’ munathimbana iwo na nyatwa. (2 Akor. 4:7) Pana pizinji toera kupfundza kubulukira kwa amwazi mphangwa aluso. Angapaswa mwai, iwo asakhala akutsandzaya kupfundzisa anango pidapfundza iwo. (Sal. 71:18) Natenepa, tisafunika kusaka miyai toera kupfundza kwa iwo. Tinacita tani pyenepi?

Mu Utumiki. Toera kukhala apfundzisi akuphata ntima mu utumiki, amwazi mphangwa apswa peno a maluso akucepa asafunika kupfundziswa. Tinakwanisa kukhala na pfundziro ikulu mukuona kuti amwazi mphangwa aluso asacita tani utumiki wawo. (Onani nsolo wakuti “Pitirizani Kukhala Waphinga Mu Utumiki” mu Ncenjezi ya 15 ya Madzalo 2015 ndima yacitatu pantsi pa nsolo ung’ono wakuti “Phedzani Amwazi Mphangwa a Maluso Akucepa.”) Kodi mwaphindula tani mukuphata basa na amwazi mphangwa anewa aluso mu utumiki?

Munakwanisa kuphemba m’mwazi mphangwa waluso toera kuphata naye basa mu utumiki? Khala m’mwazi mphangwa akuduwala, m’midzidzi inango munakwanisa kucitisa ibodzi mwa mapfundziro anu a Bhibhlya panyumba pace. Pakumala kucitisa pfundziro, phembani m’mwazi mphangwa waluso toera akupaseni maonero na uphungu.

Khalani Na Ndzidzi Toera Kucedza Nawo: Sakani kudziwa amwazi mphangwa aluso mu kukhala na ndzidzi toera kucedza nawo. Cemerani m’bodzi wa iwo pa kulambira kwanu kwa banja na nciteni mibvundzo. Khala m’mwazi mphangwa akuduwala, mbamudacita masasanyiro toera kacita kulambira kwa banja panyumba pace? Sakani kudziwa kuti adziwa tani undimomwene. Ndi nkhombo zanji zidakhala na iye? Ndi kuthambaruka kwanji kwa utumiki kunaona iye pacisa? Ndi kutsandzaya kwanji kunakhala na iye mukutumikira Yahova?

Khalani na maonero akulinganira kwa pire pinadikhira imwe. Ninga pinacitika kwa ife tonsene, amwazi mphangwa akale akhala na nkhombo zakusiyanasiyana mu utumiki. (Arom. 12:6-8) Anango ndi akugwesera, panango pyenepi pinaacitisa kukhala na ndzidzi wakucepa toera kucedza na ife. Ngakhale tenepo, tinakwanisa kupfundza pizinji kubulukira kwa iwo thangwi ya maluso awo mukutumikira Yahova mwakukhulupirika.