Kuthimizira Maluso Athu Mu Utumiki—Kupfundzisa Amwazi Mphangwa Apswa
Thangwi Yanji Mphyakufunika: Anyakupfundza apswa a Yezu apfundza kukoya “pyonsene” pidaapanga iye, pyakuti pisaphataniza kupfundzisa anango undimomwene. (Mat. 28:18, 19) Amwazi mphangwa apswa azinji athema kucita khundu mu Xikola Ya Utumiki Wa Mulungu, pontho panango amwaza mphangwa mwantsusukano kuna piwalo pya banja yawo peno axamwali. Natenepa, munathambaruka iwo mbadziwa kuti Yahova asafuna kuti anthu onsene abve mphangwa zadidi, panango analonga cifuno cawo cakucita khundu mu utumiki wa m’munda. (Arom. 10:13, 14) Angatawiriswa kukhala amwazi mphangwa akukhonda batizwa, cipfundziso cadidi cinadzaaphedza kukhala na cinyindiro munakwanirisa iwo thanyo ineyi ya kuthambaruka kwawo kwauzimu.—Luka 6:40.
Tinacita Tani Pyenepi:
• Phedzani m’mwazi mphangwa mupswa kugumana mabukhu anafuna phatisira iye pakumwaza mphangwa na pakupfundzisa. Mpangizeni kuti musakhunganya tani pasta yanu ya m’munda na fokotozani cifuniro ca bukhu ibodzi na ibodzi idakwata imwe.
• Sankhulani na yeserani pabodzi maperekero aumboni anagumanika mu Utumiki Wathu wa Umambo. Muwangiseni toera kuphatisira mafala ace ene pakupereka umboni. Yeserani njira zakubverana na cisa canu zinagumanika m’bukhu Escola do Ministério Teocrático, tsamba 82. Gomezerani kufunika kwa kubvala nguwo zakupangiza cilemedzo.—2 Akor. 6:3, 4.
• Apfundziseni toera kuthambaruka. Pangizani m’mwazi mphangwa mupswa mapa a cisa na mpfundziseni kuti anaphatisira tani formularyo ya nyumba na nyumba. Mpangizeni kuti analemba tani anthu adapangiza cifuno. Mpfundziseni kuti anaphatisira tani jw.org mu utumiki na kabukhu Boas Novas para Pessoas de Todas as Nações. M’phedzeni toera acite maulendo akubwereza kuna anthu adapangiza cifuno.—1 Akor. 3:6.
• Khalani wakupirira, pontho nsimbeni. (Mis. 25:11) Pangizani kukhala wa citsandzo cadidi. Phinga na cifuno cinapangiza imwe pinadzabweresa maphindu kutsogolo.
Yeserani Kucita Ipi Nkati Mwa Nthanda:
• Phatani pabodzi na nyakupfundza wanu mu utumiki wa nyumba na nyumba, ulendo wakubwereza peno ku pfundziro ya Bhibhlya. Khala imwe nkhabe nyakupfundza, phatani pabodzi na m’mwazi mphangwa wa maluso akucepa.