NSOLO WA PFUNDZIRO 29
NYIMBO 121 Tisafunika Kukhala Akudzitonga
Citani Mphole-Mphole na Mayesero
“Pitirizani kukhala akuyang’anira, pontho ndzidzi onsene citani phembero toera mukhonde kugwa m’mayesero.”—MAT. 26:41.
PINAFUNA IFE KUPFUNDZA
Tinabvesesa kuti thangwi yanji ndi pyakufunika kucalira madawo na pinthu pinacitisa munthu kudawa.
1-2. (a) Ndi cenjezo ipi idapereka Yezu kuna anyakupfundzace? (b) Thangwi yanji Yezu akhondwa na anyakupfundzace? (Onanimbo mafoto.)
YEZU alonga: “Ntima usafuna, mbwenye manungo mbakufewa.”a (Mat. 26:41b) Mafala anewa asapangiza kuti Yezu akhadziwa kuti ndife akusowa ungwiro, pontho tisadawa. Kusiyapo pyenepi, iwo asaticenjeza toera ticite mphole-mphole kuti tikhonde kudzinyindira. Yezu mbadzati kulonga mafala anewa, ntsiku ibodzi ene namasiku anyakupfundzace akhadampanga kuti cipo mbadankhonda. (Mat. 26:35) Iwo akhali na cifuno cadidi, mbwenye nee akhadziwa kuti mbadagwa m’mayesero. Iwo aluza cifuno cakucita pinthu pyadidi. Na thangwi ineyi, Yezu aacenjeza: “Pitirizani kukhala akuyang’anira, pontho ndzidzi onsene citani phembero toera mukhonde kugwa m’mayesero.”—Mat. 26:41a.
2 Mwakutsukwalisa, anyakupfundza a Yezu nee akhala m’maso. Mu ndzidzi udamangwa Yezu, kodi iwo akhala pabodzi na iye peno athawa thangwi yakugopa? Thangwi yakukhonda kukhala m’maso, anyakupfundza acita pinthu pidalonga iwo kuti nee mbadapicita. Iwo asiya Yezu mbathawa.—Mat. 26:56.
Yezu apanga anyakupfundzace kuti apitirize kukhala m’maso toera akhonde kugwa m’mayesero. Mbwenye iwo ansiya mbathawa (Onani ndima 1-2)
3. (a) Toera tipitirize kukhala akukhulupirika kuna Yahova, thangwi yanji tisafunika kucita mphole-mphole na kudzinyindira? (b) Tinapfundzanji mu nsolo uno?
3 Ife nee tisafunika kukhala akudzinyindira. Ndimomwene kuti tisafuna kucita pyonsene pinakwanisa ife toera tikhonde kutsukwalisa Yahova, mbwenye ndife anthu akusowa ungwiro, pontho mwakukhonda nentsa tinakwanisa kuyeserwa toera kucita pinthu pyakuipa. (Aroma 5:12; 7:21-23) Mwakukhonda dikhira, panango tinayeserwa toera kucita pinthu pyakuipa. Toera tipitirize kukhala akukhulupirika kuna Yahova na Mwanace, ife tisafunika kubvera uphungu wa Yezu wakukhala m’maso tingayeserwa. Nsolo uno unatiphedza toera kucita pyenepi. Pakutoma, tinapfundza kuti ndi pinthu pipi pinafunika ife kucita mphole-mphole kakamwe. Buluka penepo, tinaona kuti tinatsidzikizika tani toera tikhonde kugwa m’mayesero. Pakumalisa, tinaona kuti tinapitiriza tani kukhala m’maso.
CITANI MPHOLE-MPHOLE NA PINTHU PINAKUYESERANI KAKAMWE
4-5. Thangwi yanji tisafunika kucita mphole-mphole na madawo mang’ono?
4 Ngakhale madawo mang’ono anakwanisa kufewesa uxamwali wathu na Yahova. Iwo anakwanisambo kuticitisa kucita madawo makulu.
5 Ife tonsene tisayeserwa toera kucita madawo. Mbwenye m’bodzi na m’bodzi wa ife ali na pinthu pinamuyesera kakamwe toera kucita madawo makulu peno kucita pinthu pyakuipa na kukhala na manyerezero a anthu a dziko. Panango anango ali kuwangisira kakamwe toera akhonde kugwa m’mayesero akucita ulukwali. Anangombo panango ali kuthimbana na mayesero akucita pinthu pyakuipa ninga kusendzeka na kumaso peno kuona ucipezipezi. Pontho anango panango asathimbana na mayesero akugopa anthu, kukhala akudzikuza, kuipirwa mwakucimbiza peno pinthu pinango. Ninga pidalonga Tiyago, “m’bodzi na m’bodzi asayeserwa thangwi yakukwatika mbapeuswa na kusirira kwace.”—Tiya. 1:14.
6. Tonsene tisafunika kudzindikiranji?
6 Kodi imwe musadziwa pinthu pinakuyeserani kakamwe? Ndi pyakugopswa kunyerezera kuti nkhabe pinthu pinatiyesera kakamwe peno kunyerezera kuti ndife akuwanga kakamwe, pontho nee tinagwa m’mayesero. (1 Juw. 1:8) Kumbukani kuti Paulu alonga kuti ngakhale ‘anthu akukola mwauzimu’ anakwanisa kucita madawo angakhonda kukhala m’maso. (Agal. 6:1) Natenepa tisafunika kudzindikira kuti tonsene tiri na pinthu pinatiyesera kakamwe.—2 Akor. 13:5.
7. Tisafunika kucita mphole-mphole nanji? Perekani citsandzo.
7 Tisafunika kucitanji tingadziwa pinthu pinatiyesera kakamwe? Tisafunika kuwangisira toera kuwangisa cifuno cathu cakukhonda kugwa m’mayesero. Mwacitsandzo, mu ndzidzi wakale khundu yakufewa kakamwe ya mpanda wa nzinda ikhali misuwo. Na thangwi ineyi, m’misuwo mukhaikhwa anyakuonera azinji. Munjira ibodzi ene, ife tisafunika kucita mphole-mphole na pinthu pinatiyesera kakamwe toera tikhonde kugwa m’mayesero akucita madawo.—1 Akor. 9:27.
TINATSIDZIKIZIKA TANI TOERA TIKHONDE KUCITA MADAWO?
8-9. M’phale analongwa pa Misangani kapitulu 7 akhafunika kucitanji toera acalire kugwa m’madawo makulu? (Misangani 7:8, 9, 13, 14, 21)
8 Tinatsidzikizika tani toera tikhonde kucita madawo? Ife tinakwanisa kupfundza na pinthu pidacitikira m’phale analongwa m’bukhu ya Misangani kapitulu 7. Iye acita ulukwali na nkazi waulukwali. Vesi 22 isalonga kuti iye atowera nkazi unoyu “mwakukhonda dembuka.” Mbwenye mavesi anango asapangiza kuti m’phale unoyu acita pyenepi mwapang’ono-pang’ono mpaka kugwa m’madawo makulu.
9 Ninji pidacitisa m’phale unoyu kugwa m’madawo? Mu ndzidzi ukhadoka dzuwa, m’phale unoyu “apita na nseu, dhuzi na mphambano yakuenda kuna nkazi unoyu.” Buluka penepo, iye aenda kunyumba kwa nkazi unoyu. (Lerini Misangani 7:8, 9.) Pidaona iye nkazi unoyu, nee ancalira. M’mbuto mwace, iye atawira kumpswompswonwa na iye mbabvesera pikhalonga iye. Nkazi unoyu alonga kuti akhafuna kupereka ntsembe toera kupereka takhuta. Panango iye alonga pyenepi toera m’phale anyerezere kuti iye nee ndi munthu wakuipa. (Lerini Misangani 7:13, 14, 21.) M’phale unoyu mbadakhonda kuenda kwa nkazi unoyu, iye nee mbadagwa m’mayesero akucita madawo makulu.
10. Munthu anakwanisa tani kucita madawo mabodzi ene ninga adacita m’phale analongwa pa Misangani kapitulu 7?
10 Pidacitikira m’phale unoyu pinakwanisambo kucitika kuna ife. Panango tinacita madawo makulu mbatinyerezera kuti pyonsene pyacitika ‘mwakucimbiza.’ Panango anango analonga kuti “basi ene pyacitika.” Mbwenye tinganyerezera mwadidi, panango tinadzindikira kuti tagwa m’madawo anewa thangwi ya pisankhulo pizinji pyakuipa. Panango pyatoma thangwi yakukhonda kusankhula mwadidi axamwali, ubalangazi unakomerwa na anthu a dziko peno kuenda m’mbuto zakuti nee ndi zadidi kuna Akristu na kupita m’masaiti akuipa. Panango ndi thangwi yakuti munthu unoyu asiya kucita phembero, kuleri Bhibhlya, kugumanika pa misonkhano na kumwaza mphangwa. Ninga pidacitikira m’phale analongwa m’bukhu ya Misangani, panango madawo anewa nee acitika ‘mwakucimbiza.’
11. Tisafunika kucaliranji toera tikhonde kucita madawo?
11 Tisapfundzanji? Nee tisafunika kucalira basi ene madawo, mbwenye tisafunikambo kucalira pinthu pinacitisa munthu kudawa. Ndi pyenepi pidalonga Salomoni pidamala iye kulonga pidacitikira m’phale na nkazi waulukwali. Iye acenjeza tenepa thangwi ya nkazi waulukwali: “Leka kutayika mbuenda munjira zace.” (Mis. 7:2) Iye athimiza: “Khala kutali na iye; leka kufendedzera dhuzi nsuwo wa nyumba yace.” (Mis. 5:3, 8) Mwandimomwene, toera tikhonde kucita madawo, tisafunika kucalira pinthu pyakuti pinaticitisa kutsukwalisa Yahova.b Pinthu Pyenepi pisaphataniza pinaona ife kuti nee ndi pyakuipa kuna Akristu, mbwenye pinakwanisa kuticitisa kucita madawo.—Mat. 5:29, 30.
12. Yobe akhali dzololo toera kucitanji, pontho pyenepi pyamphedza tani toera akhonde kucita madawo? (Yobe 31:1)
12 Toera kucalira pinthu pyakuti pinaticitisa kudawa, tisafunika kukhala dzololo toera kucita pinthu pyadidi. Ndi pyenepi pidacita Yobe. Iye acita ‘cibverano na maso ace’ toera akhonde kusirira akazi anango. (Lerini Yobe 31:1.) Thangwi yakucita pyenepi, Yobe akwanisa kucalira ulukwali. Ife tinakwanisambo kukhala dzololo toera kucalira pinthu pyonsene pyakuti panango pinaticitisa kugwa m’mayesero.
13. Thangwi yanji tisafunika kutsidzikiza manyerezero athu? (Onanimbo mafoto.)
13 Tisafunikambo kutsidzikiza manyerezero athu. (Eks. 20:17) Anango asaona kuti nee ndi pyakuipa kunyerezera kuti ali kucita madawo, khala nee aacitadi. Mbwenye manyerezero anewa ndi akugopswa. Munthu ananyerezera kucita madawo, basi ene asathimizira cifuno ca kuacita. Munjira inango, munthu unoyu ali kuikhika pa mayesero akucita madawo. Ndimomwene kuti midzidzi inango tinanyerezera pinthu pyakuipa. Mbwenye tisafunika kusiya kunyerezera pinthu pyenepi mwakucimbiza mbatinyerezera pinthu pyadidi. Tingacita pyenepi, manyerezero akuipa nee anakula muntima mwathu mpaka kucita madawo.—Afil. 4:8; Akol. 3:2; Tiya. 1:13-15.
Tisafunika kucalira pinthu pyonsene pinaticitisa kugwa m’mayesero (Onani ndima 13)
14. Ndi pinthu pipi pinango pyakuti pinatiphedza toera kucalira kucita madawo?
14 Ndi pinthu pipi pinango pinafunika ife kucita toera ticalire mayesero akucita madawo? Tisafunika kukhala na cinyindiro cakuti kubvera mitemo ya Yahova ndzidzi onsene ndi kwadidi kuna ife. Midzidzi inango panango pinanentsa kuti manyerezero athu na pifuno pyathu pibverane na pinafuna Yahova. Mbwenye tingawangisira kucita pyenepi, tinakhala na cikumbuntima cakucena.
15. Thangwi yanji ndi pyakufunika kukulisa pifuno pyadidi?
15 Ife tisafunika kukulisa pifuno pyadidi. Tingapfundza ‘kuida pinthu pyakuipa na kufuna pinthu pyadidi’ tinawangisa cifuno cathu cakucita pinthu pyadidi, pontho tinacalira pinthu pyakuti pinaticitisa kudawa. (Amosi 5:15) Kukhala na pifuno pyadidi kunatiphedzambo toera tikhonde kucita madawo tingathimbana na mayesero akukhonda dikhira.
16. Kucita mabasa auzimu kunatiphedza tani toera tikhonde kugwa m’mayesero akucita madawo? (Onanimbo mafoto.)
16 Tinakulisa tani pifuno pyadidi? Ife tinacita pyenepi tingaphatisira ndzidzi wathu toera kucita mabasa auzimu. Tingagumanika pa misonkhano na kumwaza mphangwa, tisawangisa cifuno cathu cakukomeresa Yahova, pontho nee tinayeserwa toera kucita pinthu pyakuipa. (Mat. 28:19, 20; Aheb. 10:24, 25) Tingaleri na kupfundza Mafala a Mulungu, mbatinyerezera mwadidi pinapfundza ife, tisafuna kakamwe pinthu pyadidi na kuida pinthu pyakuipa. (Yos. 1:8; Mas. 1:2, 3; 119:97, 101) Kumbukani pidalonga Yezu kuna anyakupfundzace kuti: “Ndzidzi onsene citani phembero toera mukhonde kugwa m’mayesero.” (Mat. 26:41) Tingakhala na ndzidzi wakucita phembero kuna Babathu wakudzulu, tisampasa mwai wakutiphedza, pontho tisawangisa cifuno cathu cakucita pinthu pinankomeresa.—Tiya. 4:8.
Kucita pinthu pyauzimu kunatipasa mphambvu toera kukunda mayesero (Onani ndima 16)c
PITIRIZANI KUKHALA M’MASO
17. Ndi mayesero api akhapitiriza kuthimbana na Pedhru?
17 Panango tinakwanisa kukunda pinthu pinatiyesera kakamwe. Mbwenye panango tinapitiriza kuthimbana na pinthu pinango pinatiyesera. Onani pidacitikira mpostolo Pedhru. Pidakhonda iye Yezu katatu, Pedhru apangiza kuti akhagopa anthu. (Mat. 26:69-75) Mbwenye mukupita kwa ndzidzi, Pedhru apangiza cipapo kakamwe pidapereka iye umboni pa Thando Ikulu Yakutongera Miseru, pontho pisaoneka kuti iye akhadasiya kugopa anthu. (Mabasa 5:27-29) Ngakhale tenepo, mukupita kwa pyaka, Pedhru asiya kukhala pabodzi na Akristu akuti nee akhali Ayuda “thangwi akhagopa anthu akusidzwa.” (Agal. 2:11, 12) Pedhru atoma pontho kugopa anthu. Panango iye nee akhadakunda mwakukwana mayesero anewa.
18. Ndi pinthu pipi pyakuti pinakwanisa kucitika khala tisathimbana na mayesero?
18 Ninga Pedhru, midzidzi inango panango tinathimbana na mayesero akhanyerezera ife kuti taakunda. Mwacitsandzo, m’bale unango alonga: “Mu pyaka khumi, ine ndikhadakwanisa kusiya kuona ucipezipezi, pontho ndikhali na cinyindiro cakuti ndakunda mayesero anewa. Mbwenye midzidzi inango, ine ndikhayeserwa toera kuona pontho ucipezipezi. Mwakutsandzayisa, m’bale unoyu apitiriza kuwangisira toera kukunda mayesero anewa. Iye adzindikira kuti akhafunika kuthimbana na mayesero anewa ntsiku zonsene, panango mu umaso wace onsene mu dziko ino. Na ciphedzo ca nkazace na ca akulu a mpingo, iye ali kukwanisa kucalira kuona ucipezipezi.
19. Tisafunika kucitanji khala tisathimbana na mayesero akuti tidzati kuakunda?
19 Khala tisathimbana na mayesero akuti tidzati kuakunda, tisafunika kucitanji toera tikhonde kucita madawo? Tisafunika kubvera uphungu wa Yezu wakuti: “Pitirizani kukhala akuyang’anira.” Maseze munyerezere kuti ndimwe wakuwanga, calirani pinthu pyakuti pinakucitisani kugwa m’madawo. (1 Akor. 10:12) Kumbukani pinthu pidacita imwe toera kukunda mayesero, pontho pitirizani kucita pyenepi. Lemba ya Misangani 28:14 isalonga: “Nyakutsandzaya ndi munthu wakuti ndzidzi onsene asacita mphole-mphole na macitiro ace.”—2 Ped. 3:14.
MAPHINDU AKUPITIRIZA KUKHALA M’MASO
20-21. (a) Tinaphedzeka tani tingapitiriza kukunda mayesero? (b) Yahova anatiphedza tani tingawangisira toera kukunda mayesero? (2 Akorinto 4:7)
20 Ife tinakwanisa kukhala na cinyindiro cakuti tingawangisira toera tikhonde kugwa m’mayesero akucita madawo, tinaphedzeka kakamwe. Maseze madawo anakwanisa kubweresa ‘kutsandzaya kwa ndzidzi wakucepa,’ ife tisadziwa kuti toera tikhale na kutsandzaya kwandimomwene tisafunika kucita pinthu mwakubverana na midida ya Yahova. (Aheb. 11:25; Mas. 19:8) Ife tisakhala na kutsandzaya kweneku thangwi Yahova aticita toera tibvere mitemo yace. (Gen. 1:27) Tingacita pyenepi, tinakhala na cikumbuntima cakucena, pontho na cidikhiro cakukhala m’maso kwenda na kwenda.—1 Tim. 6:12; 2 Tim. 1:3; Yuda 20, 21.
21 Ndimomwene kuti “manungo mbakufewa.” Mbwenye pyenepi nee pisabveka kuti nee tinakwanisa kukunda mayesero. Yahova ali dzololo toera kutipasa mphambvu. (Lerini 2 Akorinto 4:7.) Mbwenye kumbukani kuti Yahova asapasa mphambvu yakupiringana yacibaliro. Mphambvu yacibaliro ndi kuwangisira kunafunika ife kucita ntsiku zonsene toera kukunda mayesero. Tingacita khundu yathu, tinakwanisa kukhala na cinyindiro cakuti Yahova anatawira maphembero athu toera tithimbane na pinthu pinatiyesera. (1 Akor. 10:13) Na ciphedzo ca Yahova, tinakwanisa kupitiriza kukunda mayesero.
NYIMBO 47 Phemberani Kuna Yahova Ntsiku Zonsene
a MABVEKERO A MAFALA ANANGO: Pidalonga Yezu “manungo” pa Mateu 26:41, iye akhagomezera kuti thangwi yakusowa kwathu ungwiro, kazinji kene tisanyerezera na kucita pinthu pyakuipa. Natenepa, ngakhale midzidzi inango tisafuna kucita pinthu pyadidi, tingakhonda kucita mphole-mphole, ife tinakwanisa kucita pinthu mwakubverana na mabvero athu akusowa ungwiro mbatidawa.
b Munthu adacita madawo makulu anakwanisa kugumana ciphedzo m’bukhu yakuti Tsandzayani na Umaso Kwenda na Kwenda! nsolo 57 khundu 1-3 na mu nsolo wakuti “Yang’anani Ntsogolo” mu Ncenjezi, wa Novembro 2020, tsa. 27-29, ndima 12-17.
c MAFALA ANAFOKOTOZA FOTO: M’bale ali kuleri lemba ya ntsiku namacibese. Iye ali kuleri Bhibhlya mu ndzidzi wakupuma, pontho ali pa misonkhano ya pakati pa sumana namasiku.