NSOLO WA PFUNDZIRO 37
NYIMBO 118 ‘Thimizirani Cikhulupiro Cathu’
Tsamba Yakuti Inatiphedza Toera Kukhala Akukhulupirika Mpaka Kunkhomo
‘Cinyindiro cikhali na ife pakutoma ticiphatisise na manja mawiri mpaka kunkhomo.’—AHEB. 3:14.
PINAFUNA IFE KUPFUNDZA
Mu tsamba idalembera Paulu Ahebheri, tinapfundza pinthu pyakuti pinatiphedza toera tipitirize kukhala akukhulupirika mpaka kunkhomo kwa dziko ino.
1-2. (a) Ninji pikhacitika ku Yudeya mu ndzidzi udalemba mpostolo Paulu tsamba kuna Ahebheri? (b) Thangwi yanji tinakwanisa kulonga kuti tsamba ineyi ikhadafika pa ndzidzi wakuthema?
AKRISTU Acihebheri akakhala ku Yerusalemu na Yudeya athimbana na pinentso pakumala kufa kwa Yezu. Pidamala kukhazikiswa mpingo, iwo atoma kutcingwa kakamwe. (Mabasa 8:1) Buluka penepo, pidapita pyaka 20, Akristu anewa atoma kuthimbana na nkandzo wakusowa kobiri, panango thangwi ya njala. (Mabasa 11:27-30) Natenepa, cifupi na caka 61 P.K.K., Akristu akhala muntendere mu ndzidzi wakucepa tingalandanisa na pikhafuna kucitika. Mu ndzidzi unoyu, iwo atambira tsamba idalembwa na mpostolo Paulu, pontho tsamba ineyi yaaphedza toera kukhala akukhunganyika thangwi ya pinthu pikhafuna kucitika.
2 Tsamba idalemba Paulu kuna Akristu Acihebheri yafika pa ndzidzi wakuthema, thangwi ntendere ukhali na iwo ukhali wa ndzidzi wakucepa. Paulu apereka uphungu wakuti mbudaphedza Akristu toera kupirira nyatwa zikhafuna kuthimbana na iwo. Ndzidzi wakufudzwa kwa utongi Waciyuda udalonga Yezu ukhali dhuzi. (Luka 21:20) Ndimomwene kuti Paulu na Akristu a ku Yudeya nee akhadziwa ndzidzi ukhafuna kufudzwa utongi unoyu. Mbwenye Akristu anewa mbadaphatisira ndzidzi udasala toera kukhunganyika mu kukulisa makhaliro ninga cikhulupiro na kupirira.—Aheb. 10:25; 12:1, 2.
3. Thangwi yanji tsamba idalemba Paulu kuna Ahebheri ndi yakufunikambo kuna Akristu lero?
3 Thimize pano, tinathimbana na nyatwa ikulu kakamwe kupiringana idathimbana na Akristu Acihebheri. (Mat. 24:21; Apok. 16:14, 16) Natenepa tinapfundza uphungu udapereka Yahova kuna Akristu anewa wakuti unakwanisa kutiphedzambo.
“TENDENI TIWANGISIRE TOERA TIKHALE AKUKOLA”
4. Ndi pinentso pipi pidathimbana na Akristu Aciyuda? (Onanimbo foto.)
4 Ayuda akhadamala kwene kukhala Akristu akhafunika kucita macinjo makulu, pontho pyenepi pikhali pyakunentsa kakamwe. Kale, Ayuda akhali mbumba yakusankhulwa na Yahova. Mu pyaka pizinji, Yerusalemu ikhali mbuto yakupambulika kakamwe. Thangwi mambo akhaimirira Yahova akakhala mwenemo. Pontho anthu akhafuna kulambira Yahova akhacita pyenepi mu templo ya mu Yerusalemu. Ayuda onsene akukhulupirika akhabvera Mwambo wa Mose na mitemo ikhapereka atsogoleri a mauphemberi. Iwo akhapfundziswa mitemo thangwi ya cakudya, kusidzwa, pontho akhapfundziswa kuti anatsalakana tani anthu a madzindza anango. Mbwenye pakumala kufa kwa Yezu, Yahova nee akhatawirabve ntsembe zikhapereka Ayuda. Pyenepi pikhali pyakunentsa kuna Ayuda Acikristu akuti akhadadzolowera kubvera Mwambo wa Mose. (Aheb. 10:1, 4, 10) Ngakhale Akristu akukola ninga mpostolo Pedhru, anentsekambo toera kubvera macinjo anewa. (Mabasa 10:9-14; Agal. 2:11-14) Thangwi ya pipfundziso pyawo pipswa, Akristu anewa akhatcingwa na atsogoleri auphemberi Waciyuda.
Akristu akhafunika kupfundza mwakukwana Mafala a Mulungu na kucalira pipfundziso pyauthambi pya Ayuda pyakuti nee pikhabverana na undimomwene (Onani ndima 4-5)
5. Akristu Acihebheri akhafunika kutsidzikizika ku pinthu pipi?
5 Akristu a ku Yudeya akhatcingwa na misoka miwiri ya anthu. Iwo akhatcingwa na atsogoleri auphemberi Waciyuda akuti akhaaona ninga anthu akupanduka adasiya uphemberi Waciyuda. Kusiyapo pyenepi, anthu anango akhalonga kuti ndi Akristu, akhakakamiza Akristu toera apitirize kubvera Mwambo wa Mose. Panango iwo akhacita pyenepi thangwi akhagopa kutcingwa. (Agal. 6:12) Ninji pikhafuna kuphedza Akristu toera apitirize kukhala akukhulupirika kuna Yahova?
6. Paulu akulumiza abale na alongo ace toera acitenji? (Ahebheri 5:14–6:1)
6 Mu tsamba idalembera iye Ahebheri, Paulu akulumiza abale na alongo ace toera apfundze mwakukwana Mafala a Mulungu. (Lerini Ahebheri 5:14–6:1.) Paulu aphatisira Malemba Acihebheri mbafokotoza kuti thangwi yanji njira ikhaphatisira Akristu toera kulambira Yahova ikhali yadidi kakamwe kupiringana ikhaphatisira Ayuda.a Paulu akhadziwa kuti Akristu angapfundza na kubvesesa mwadidi undimomwene, iwo mbadakwanisa kudzindikira pipfundziso pyauthambi mbapicalira.
7. Ndi pinentso pipi pinathimbana na ife lero?
7 Ninga Akristu Acihebheri, lero tisathimbanambo na anthu anamwaza mphangwa zakuti nkhabe kulemedza mitemo ya Yahova inalonga thangwi ya pinthu pyadidi na pyakuipa. Anthu anango asalonga kuti atumiki a Yahova ndi akuphonyeka, thangwi iwo asabvera mitemo ya m’Bhibhlya inalonga pyakupita m’mabonde. Kusiyapo pyenepi, anango asalonga kuti ndife akuuma mitima thangwi anthu anasiya kubvera mitemo ya Yahova asabuluswa mu mpingo. Njira inanyerezera anthu a dziko ndi yakusiyana kakamwe na inanyerezera Yahova. (Mis. 17:15) Natenepa, ndi pyakufunika kakamwe kudzindikira manyerezero akuipa na kuacalira. Nee tisafunika kutawirisa kuti anthu anewa aticitise kuluza cipapo mbatisiya kutumikira Yahova.—Aheb. 13:9.
8. Tisafunika kucitanji toera tipitirize kukola mwauzimu?
8 Paulu akulumiza Akristu Acihebheri toera akhale Akristu akukola, pontho ife tisafunikambo kubvera uphungu unoyu. Pyenepi pisaphataniza kupfundza mwadidi Bhibhlya toera tidziwe kakamwe Yahova na njira inanyerezera iye. Ife tisafunika kucita pyenepi ngakhale tamala kuperekeka na kubatizwa. Mwakukhonda tsalakana pyaka pinatumikira ife Yahova, tonsene tisafunika kuleri na kupfundza Mafala a Mulungu ndzidzi onsene. (Mas. 1:2) Kucita pfundziro ya munthu paekha mwakukhonda phonya kunatiphedza toera kukulisa cikhulupiro, n’khaliro udalonga Paulu mu tsamba idalembera iye Ahebheri.—Aheb. 11:1, 6.
‘KHALANI NA CIKHULUPIRO TOERA KUPULUMUSA UMASO WANU’
9. Thangwi yanji Akristu Acihebheri akhafunika kukhala na cikhulupiro cakuwanga?
9 Akristu Acihebheri akhafunika kukhala na cikhulupiro cakuwanga, thangwi pyenepi mbapidaaphedza toera kupulumuka pa nyatwa ikhafuna kuoneka mu Yudeya. (Aheb. 10:37-39) Yezu akhadacenjeza atowereri ace kuti angaona Yerusalemu mbazungulirwa na anyankhondo, iwo akhafunika kuthawira ku mapiri. Akristu akakhala mu nzinda wa Yerusalemu na ale akakhala m’mbuto zinango akhafunika kubvera uphungu unoyu. (Luka 21:20-24) Mu ndzidzi unoyu, anthu angabva kuti anyankhondo ali kubwera, iwo akhathawira mu nzinda toera kutsidzikizika, thangwi nzinda ukhazungulirwa na mpanda. Natenepa, pikhaoneka ninga pyakusowa ndzeru kuthawira ku mapiri. Na thangwi ineyi, Akristu akhafunika kukhala na cikhulupiro cakuwanga.
10. Akristu Acihebheri mbadacitanji mbadakhala na cikhulupiro cakuwanga? (Ahebheri 13:17)
10 Akristu Acihebheri akhafunikambo kunyindira ale akhaphatisirwa na Yezu toera kutsogolera mpingo. Akristu anewa akhatsogolera, panango akhapereka pitsogolero pyakuti mbapidaphedza abale na alongo toera kudziwa kuti mbadathawa tani, pontho lini. (Lerini Ahebheri 13:17.) Fala Yacigerego idaphatisirwa pa Ahebheri 13:17 yakuti “bverani” isapangiza kuti munthu asabvera thangwi yakunyindira ule anapereka pitsogolero. Iye nee asabvera basi ene thangwi munthu anampasa pitsogolero ali na cidzo. Na thangwi ineyi, Akristu Acihebheri akhafunika kupfundza kunyindira ale akhatsogolera, nyatwa mbidzati kutoma. Iwo mbadabvera Akristu akhatsogolera mu ndzidzi wakuti pinthu pikhali mwadidi, mbapidakhala pyakukhonda nentsa kuna iwo toera kubvera m’midzidzi yakunentsa.
11. Thangwi yanji Akristu asafunika kukhala na cikhulupiro cakuwanga lero?
11 Ninga Akristu Acihebheri, ife tisafunikambo kukhala na cikhulupiro. Ife tiri kukhala mu ndzidzi wakuti anthu azinji nee asakhulupira kuti kumala kwa dziko ino kuli cifupi. Iwo asatisingirira thangwi yakukhulupira kwathu pyenepi. (2 Ped. 3:3, 4) Kusiyapo pyenepi, maseze Bhibhlya isatipanga mphangwa zinango thangwi ya pinthu pinafuna kucitika mu ndzidzi wa nyatwa ikulu, pana pinthu pizinji pyakuti ife nee tisapidziwa. Ife tisafunika kukhala na cinyindiro cakuti kumala kwa dziko ino kunafika pa ndzidzi wakuthema, pontho kuti pyenepi pingacitika Yahova anatitsalakana.—Abha. 2:3.
12. Ninji pinafuna kutiphedza toera kudzapulumuka pa nyatwa ikulu?
12 Lero, ife tisafunikambo kukhulupira kakamwe kuti Yahova asaphatisira “m’bandazi wakukhulupirika na wandzeru” toera kutitsogolera. (Mat. 24:45) Nyatwa ikulu ingatoma, panango tinadzatambira pitsogolero pyakuti pinapulumusa umaso wathu ninga pidacitika kuna Akristu Acihebheri mu ndzidzi udazungulirwa nzinda wa Yerusalemu na anyankhondo Aciroma. Natenepa, uno ndi ndzidzi toera kupfundza kunyindira amuna anewa anaphatisirwa na Yahova toera kutitsogolera. Tingaanyindira na kubvera pitsogolero pyawo cincino, mwakukhonda penula, pinadzakhala pyakukhonda nentsa toera kubvera pitsogolero pinafuna kudzatambira ife mu ndzidzi wa nyatwa ikulu.
13. Thangwi yanji uphungu wa Paulu unagumanika pa Ahebheri 13:5 ukhali wakufunika kakamwe kuna Akristu Acihebheri?
13 Akristu Acihebheri pikhadikhira iwo ndzidzi wakuthawa, akhafunika kukhala na umaso wakukhonda funa pizinji mbacalira “kufuna kakamwe kobiri.” (Lerini Ahebheri 13:5.) Anango a iwo akhadathabuka na njala, pontho na utcerengi. (Aheb. 10:32-34) Maseze akhadatawira kupirira nyatwa zenezi mwakutsandzaya thangwi ya mphangwa zadidi, panango anango akhanyerezera kusaka kobiri izinji toera akhale akutsidzikizika. Mbwenye kobiri nee mbidaapulumusa mu ndzidzi ukhafuna kufudzwa Yerusalemu. (Tiya. 5:3) Mwandimomwene, onsene akhafuna pinthu pyakumanungo panango anentseka toera kuthawa mbasiya nyumba zawo na mpfuma zawo.
14. Cikhulupiro cakuwanga cinatiphedza tani toera kucita pisankhulo thangwi ya pinthu pyakumanungo?
14 Tingakhala na cinyindiro cakuti Yahova anafudza dziko ino mwakukhonda dembuka, ife nee tinaona kuti ndi pyakufunika kakamwe kukoya kobiri izinji peno pinthu pinango. Mu ndzidzi wa nyatwa ikulu, kobiri nee inadzaphedza cinthu. Bhibhlya isalonga kuti anthu “anadzataya parata yawo m’miseu” thangwi iwo anadzadzindikira kuti “nee parata yawo, nee ouro yawo inadzaapulumusa pa ntsiku ya ukali wa Yahova.” (Ezek. 7:19) M’mbuto mwakuwangisira toera kukhala na kobiri izinji, tisafunika kucita pisankhulo pyakuti pinatiphedza toera kutsalakana ife na mabanja athu mbatipitiriza kutumikira Yahova. Nee tisafunika kukwata mangawa mazinji peno kubvunga ndzidzi uzinji toera kutsalakana pinthu pyathu pyakumanungo. Pontho tisafunika kucita mphole-mphole toera pinthu pyathu pyakumanungo pikhonde kukhala pyakufunika kakamwe mu umaso wathu. (Mat. 6:19, 24) Mu ndzidzi unadikhira ife kumala kwa dziko ino, tisafunika kupangiza khala tisanyindira Yahova peno pinthu pyathu pyakumanungo.
“IMWE MUSAFUNIKA KUPIRIRA”
15. Thangwi yanji Akristu Acihebheri akhafunika kupirira?
15 Akristu Acihebheri akhafunika kupirira mu ndzidzi wakuti cikhulupiro cawo mbacidayeserwa. (Aheb. 10:36) Maseze anango a iwo akhadatcingwa nduli, azinji akhala Akristu mu ndzidzi wakuti nee akhatcingwa kakamwe. Natenepa, Paulu aakumbusa kuti akhafunika kukhala akukhunganyika toera kupirira kutcingwa mbakhala akukhulupirika mpaka kufa, ninga pidacita Yezu. (Aheb. 12:4) Ayuda azinji akhaipirwa kakamwe thangwi anthu azinji akhasankhula kukhala Akristu. Pyaka pingasi nduli pyenepi mbapidzati kucitika, mwinji wa anthu wapomokera Paulu thangwi iye akhamwaza mphangwa mu Yerusalemu. Ayuda akupiringana 40 ‘adumbira kupasika dzedze okhene, mbalonga kuti iwo nee anadya cinthu nee kumwa madzi mbadzati kupha Paulu.’ (Mabasa 22:22; 23:12-14) Mwakukhonda tsalakana kuidiwa na kutcingwa, Akristu anewa akhafunika kupitiriza kusonkhana toera kulambira Yahova, kumwaza mphangwa zadidi na kupitiriza kuwangisa cikhulupiro cawo.
16. Tsamba idalemba Paulu kuna Ahebheri inatiphedza tani toera kuona nkhombo zakupirira kutcingwa? (Ahebheri 12:7)
16 Ninji pikhafuna kuphedza Akristu Acihebheri toera kupirira mwakukhonda tsalakana kutcingwa? Paulu akhafuna kuaphedza toera aone nkhombo zakupirira kutcingwa. Natenepa, iye afokotoza kuti Akristu angathimbana na mayesero acikhulupiro, Mulungu anakwanisa kuphatisira mayesero anewa toera kuapfundzisa. (Lerini Ahebheri 12:7.) Kupfundziswa kweneku mbukudaaphedza toera kukulisa makhaliro Acikristu akuti ndi akufunika kakamwe. Akristu Acihebheri mbadanyerezera pinthu pikhafuna kucitika thangwi yakupirira kwawo mayesero, mbapidakhala pyakukhonda nentsa kuna iwo toera kupirira.—Aheb. 12:11.
17. Ninji pikhadziwa Paulu thangwi yakutcingwa?
17 Paulu akulumiza Akristu Acihebheri toera akhale acipapo, pontho toera akhonde kubwerera nduli angatcingwa. Mpostolo Paulu akhali wakuthema toera kupereka uphungu unoyu. Thangwi nduli iye akhatcinga Akristu, natenepa akhadziwa mwadidi pinthu pikhathimbana na iwo. Kusiyapo pyenepi, pidakhala iye Nkristu atcingwa munjira zakusiyana-siyana. (2 Akor. 11:23-25) Natenepa, Paulu akhadziwa mwadidi pinthu pikhafunika iwo kucita toera apirire. Iye akumbusa Akristu anewa kuti angathimbana na pinentso, akhafunika kunyindira Yahova, tayu mphambvu zawo. Natenepa, Paulu akwanisa kulonga mwacipapo kuti: “Yahova ndiye anandiphedza; nee ndinadzagopa.”—Aheb. 13:6.
18. Ninji pinafuna kutiphedza toera kupirira kutcingwa?
18 Lero, abale na alongo athu anango ali kutcingwa. Ife tinakwanisa kuaphedza mukucita phembero thangwi ya iwo, pontho midzidzi inango tinakwanisa kuapasa pinthu toera kuaphedza. (Aheb. 10:33) Ngakhale tenepo, Bhibhlya isalonga kuti “onsene anafuna kukhala na umaso wakuperekeka kuna Mulungu mwakubverana na Kristu Yezu, anadzatcingwambo.” (2 Tim. 3:12) Na thangwi ineyi, tonsene tisafunika kukhala akukhunganyika toera tidzakwanise kupirira pinafuna kuthimbana na ife ntsogolo. Natenepa, tisafunika kupitiriza kunyindira Yahova na kukhala na cinyindiro cakuti iye anatiphedza toera kupirira nyatwa zonsene. Pa ndzidzi wakuthema, iye anadzamalisa nyatwa zonsene za ale anamulambira mwakukhulupirika.—2 Ates. 1:7, 8.
19. Tisafunika kucitanji toera tikhale akukhunganyika nyatwa ikulu mbidzati kufika? (Onanimbo foto.)
19 Mwakukhonda penula, tsamba idalembera Paulu Ahebheri, yaphedza Akristu a mu ndzidzi unoyu toera kukhunganyika nyatwa zikhafuna iwo kutamba ntsogolo. Paulu aakulumiza toera apfundze mwakukwana Mafala a Mulungu na kuabvesesa mwadidi. Kucita pyenepi mbakudaaphedza toera kudzindikira na kucalira pipfundziso pyakuti mbapidafewesa cikhulupiro cawo. Paulu aapanga toera awangise cikhulupiro cawo kuti akwanise kubvera mwakucimbiza pitsogolero pya Yezu na pya ale akhatsogolera mu mpingo. Paulu aphedza Akristu toera kuona nyatwa zikhathimbana na iwo ninga njira ikhaphatisira Babawo waufuni toera kuapfundzisa, pontho pyenepi pyaaphedza toera kupirira mayesero. Ife tisafunikambo kuphatisira uphungu unoyu. Tingacita pyenepi, tinakwanisa kukhala akukhulupirika mpaka kunkhomo.—Aheb. 3:14.
Akristu akukhulupirika adapirira pinentso apaswa nkhombo. Pidathawa iwo ku Yudeya, iwo apitiriza kusonkhana. Pyenepi pisatipfundzisanji? (Onani ndima 19)
NYIMBO 126 Tikhale Maso, Dzololo na Amphambvu
a Mu kapitulu yakutoma, Paulu alonga kanomwe mafala anagumanika m’Malemba Acihebheri toera kupangiza kuti njira inalambira Akristu ndi yadidi kakamwe kupiringana njira inalambira Ayuda.—Aheb. 1:5-13.