BHIBHLIYOTEKA MU INTERNETI ya Torre de Vigia
Ncenjezi
ya Torre de Vigia
Cisena
  • BHIBHLYA
  • MABUKHU
  • MISONKHANO
  • w25 Agosto ya matsa. 2-7
  • Yahova Asatiphedza Tani Toera Kupirira Nyatwa?

Nkhabe kugumanika vidhyu pa khundu ino.

Munatilekerera, paoneka madodo pakupangiza vidhyu.

  • Yahova Asatiphedza Tani Toera Kupirira Nyatwa?
  • Ncenjezi Wakudziwisa Umambo Wa Yahova (Wa Pfundziro)—2025
  • Misolo Ming'ono
  • Mphangwa Zakulandana
  • PHEMBERO
  • BHIBHLYA
  • ABALE NA ALONGO ATHU
  • CIDIKHIRO CATHU
  • Kumbukani Kuti Yahova “Ndi Mulungu wa m’Maso”
    Ncenjezi Wakudziwisa Umambo Wa Yahova (Wa Pfundziro)—2024
  • Mwakucepeseka, Tawirani Kuti Nee Musadziwa Pyonsene
    Ncenjezi Wakudziwisa Umambo Wa Yahova (Wa Pfundziro)—2025
  • Tsamba Yakuti Inatiphedza Toera Kukhala Akukhulupirika Mpaka Kunkhomo
    Ncenjezi Wakudziwisa Umambo Wa Yahova (Wa Pfundziro)—2024
  • Yahova ‘Asawangisa Anthu Akutsukwala’
    Ncenjezi Wakudziwisa Umambo Wa Yahova (Wa Pfundziro)—2024
Onani Mphangwa Zinango
Ncenjezi Wakudziwisa Umambo Wa Yahova (Wa Pfundziro)—2025
w25 Agosto ya matsa. 2-7

NSOLO WA PFUNDZIRO 32

NYIMBO 38 Mulungu Anadzakupasani Mphambvu

Yahova Asatiphedza Tani Toera Kupirira Nyatwa?

“Mulungu wakuti asapangiza kukoma ntima kukulu munjira zonsene . . . anadzakuwangisani, iye anadzakupasani mphambvu, pontho anadzakuikhani pa mbuto yakuwanga.”—1 PED. 5:10.

PINAFUNA IFE KUPFUNDZA

Tinaona pinthu pinai pinatipasa Yahova toera kupirira, pontho tinaona kuti tinacitanji toera kuphedzeka na pinthu pyenepi.

1. Thangwi yanji tisafunika kupirira, pontho mbani anafuna kutiphedza? (1 Pedhru 5:10)

NAKUTI umaso ndi wakunentsa kakamwe ntsiku zino zakumalisa, ife tonsene tisafunika kupirira. Anango ali kuthabuka na utenda wakugopswa, anango ali akutsukwala thangwi ya kuferwa na munthu anafuna iwo, pontho anango asatcingwa na acibale peno na mautongi. (Mat. 10:18, 36, 37) Mbwenye khalani na cinyindiro cakuti mwakukhonda tsalakana nyatwa zinathimbana na imwe, Yahova anakuphedzani toera kupirira.—Lerini 1 Pedhru 5:10.

2. Thangwi yanji tisakwanisa kupirira?

2 Kupirira kusabveka kupitiriza kukhala akuwanga mbatikhonda kuluza cidikhiro, maseze tithimbane na pinentso, titcingwe peno tiyeserwe toera kucita madawo. Mbwenye nee tinakwanisa kupirira basi ene na mphambvu zathu. Pyenepi pinakwanisika na ciphedzo ca Yahova; iye asatipasa “mphambvu yakupiringana yacibaliro.” (2 Akor. 4:7) Mu nsolo uno tinapfundza pinthu pinai pinatipasa Yahova toera kupirira. Kusiyapo pyenepi, tinapfundzambo kuti tinacitanji toera tiphedzeke na pinthu pyenepi.

PHEMBERO

3. Thangwi yanji ndi pyakudzumatirisa kakamwe kulonga na Yahova m’phembero?

3 Yahova atipasa cinthu cadidi kakamwe toera kutiphedza kupirira. Maseze ndife anthu akudawa, iye atipasa mwai wakulonga na iye. (Aheb. 4:16) Nyerezerani basi: Ife tinakwanisa kucita phembero kuna Yahova pa ndzidzi unafuna ife mbatilonga pinthu pinafuna ife, pontho tinakwanisa kulonga mu cilongero cinafuna ife na mbuto inafuna ife maseze tikhale tekhene peno tikhale nkaidi. (Yona 2:1, 2; Mabasa 16:25, 26) Pontho tingakhala akudzudzumika kakamwe mbatikhonda kwanisa kulonga mafala akuthema, Yahova asakwanisa kubvesesa pikhafuna ife kulonga. (Aroma 8:26, 27) Mwakukhonda penula, ndi pyakudzumatirisa kakamwe kulonga na Yahova m’phembero.

4. Tisadziwa tani kuti kuphemba Yahova toera atiphedze kupirira kusabverana na pinafuna iye?

4 M’Bhibhlya, Yahova asatipasa cinyindiro cakuti “tingaphemba cinthu mwakubverana na pinafuna iye, iye asatibvesera.” (1 Juw. 5:14) Ife tinakwanisa kuphemba Yahova toera atiphedze kupirira. Pyenepi pisabverana na pinafuna iye. Tisadziwa tani pyenepi? Tingapirira mayesero tisaphedza Yahova toera kutawira ule ananxola, Sathani Dyabo. (Mis. 27:11) Kusiyapo pyenepi, Bhibhlya isalonga kuti Yahova asafuna kakamwe “kupangiza mphambvu zace kuna anthu akukhulupirika kuna iye.” (2 Kro. 16:9) Natenepa tinakwanisa kukhala na cinyindiro cakuti Yahova ali na mphambvu toera kutiphedza kupirira, pontho iye asafuna kucita pyenepi.—Iza. 30:18; 41:10; Luka 11:13.

5. Phembero inatiphedza tani toera kukhala akukhurudzika? (Izaiya 26:3)

5 Bhibhlya isalonga kuti tingapanga Yahova pyonsene pinatidzudzumisa, ‘ntendere wa Mulungu wakuti usapiringana kubvesesa konsene unatsidzikiza mitima yathu na manyerezero athu.’ (Afil. 4:7) Unoyu ndi mwai ukulu kakamwe. Anthu akuti nee asatumikira Yahova asathimbanambo na nyatwa, pontho azinji asayesera kugumana ntendere munjira zakusiyana-siyana. Anango asayesera kuduwala manyerezero onsene, kuphatanizambo manyerezero onsene anaacitisa kukhala akudzudzumika. Mbwenye anthu angacita pyenepi, panango anapasa madimonyo mwai wakukhuya manyerezero awo. (Onani Mateu 12:43-45.) Ntendere unatipasa Yahova tingacita phembero ndi ukulu kakamwe kupiringana ntendere unakhala na munthu anaduwala manyerezero onsene. Tingacita phembero tisapangiza kuti tisanyindira Yahova na ntima onsene, pontho thangwi ya pyenepi, iye anatipasa “ntendere wakukhonda mala.” (Lerini Izaiya 26:3.) Kodi iye asacita tani pyenepi? Cibodzi mwa pinthu pinacita iye ndi kutiphedza toera kukumbuka malemba anatipasa cinyindiro cakuti iye asatifuna, pontho asafuna kuti pinthu pitifambire mwadidi. Kukumbuka malemba anewa kusatiphedza toera kukhala akukhurudzika.—Mas. 62:1, 2.

6. Ndi pinthu pipi pyakuti munakwanisa kupilonga m’phembero? (Onanimbo foto.)

6 Musafunika kucitanji? Mungathimbana na mayesero “siyirani Yahova nyatwa zanu zonsene,” pontho citani phembero toera akuphedzeni kukhala wakukhurudzika. (Mas. 55:22) Phembanimbo udziwisi toera mukwanise kukunda mayesero anewa. (Mis. 2:10, 11) Kusiyapo pyenepi, lekani kuduwala kupereka takhuta kuna Yahova m’phembero. (Afil. 4:6) Onesesani mwadidi pinthu pinapangiza kuti Yahova ali kukuphedzani ntsiku zonsene, pontho perekani takhuta thangwi ya pyenepi. Lekani kutawirisa kuti nyatwa zikucitiseni kukhonda kuona nkhombo zinakupasani Yahova.—Mas. 16:5, 6.

M’bale wakukalamba ali panyumba pace, pontho ali kucita phembero mu ndzidzi wakutonthola. Iye afungula Bhibhlya iri pa miyendo yace, pontho pameza yace pali na ntete wa mitombwe.

Mungacita phembero musalonga na Yahova, mbwenye mungaleri Bhibhlya Yahova asalonga na imwe (Onani ndima 6)b


BHIBHLYA

7. Thangwi yanji kupfundza Bhibhlya kunatiphedza toera kupirira?

7 Yahova atipasa Bhibhlya toera kutiphedza kupirira. Tingapfundza Bhibhlya tisagumana mavesi mazinji anatipasa cinyindiro cakuti Yahova anatiphedza. Mwacitsandzo, lemba ya Mateu 6:8 isalonga: “Babanu wakudzulu asadziwa kale pinafuna imwe mbamudzati kumphemba.” Adalonga mafala anewa ndi Yezu. Iye asadziwa mwadidi kakamwe Yahova kupiringana onsene. Natenepa tinakwanisa kukhala na cinyindiro cakuti tingathimbana na nyatwa Yahova asadziwa pinafuna ife, pontho anatitsalakana. Bhibhlya iri na mavesi mazinji ninga anewa akuti anakwanisa kutipasa mphambvu toera kupirira.—Mas. 94:19.

8. (a) Ndi uphungu upi unatipasa Bhibhlya wakuti unatiphedza toera kupirira? (b) Ninji pinafuna kutiphedza toera kukumbuka uphungu wa m’Bhibhlya mu ndzidzi unaufuna ife?

8 Bhibhlya isatipasa uphungu wakuti unakwanisa kutiphedza toera kupirira. Uphungu unoyu unakwanisa kutipasa udziwisi toera kucita pisankhulo pyadidi. (Mis. 2:6, 7) Mwacitsandzo, Bhibhlya isalonga kuti tisafunika kunyindira Yahova mbatikhonda kudzudzumika na pinthu pya ntsogolo. (Mat. 6:34) Tingaleri Bhibhlya ntsiku zonsene na kunyerezera mwadidi pinaleri ife pinakhala pyakukhonda nentsa kukumbuka uphungu wa m’Bhibhlya, mu ndzidzi unaufuna ife.

9. Pinthu pidacitikira atumiki a Yahova analongwa m’Bhibhlya pinatiphedza tani?

9 Bhibhlya isalongambo pya anthu ninga ife adanyindira Yahova, pontho aphedzwa na iye. (Aheb. 11:32-34; Tiya. 5:17) Kunyerezera mwadidi pinthu pidacitikira anthu anewa kusatiphedza toera kunyindira kakamwe kuti Yahova ndi “pakuthawira pathu na mphambvu yathu, ndzidzi onsene iye ali dzololo toera kutiphedza tingakhala pa nyatwa.” (Mas. 46:1) Kuona pinthu pyadidi pidacita atumiki anewa akukhulupirika kusatiphedza toera kutowezera cikhulupiro cawo na kupirira kwawo.—Tiya. 5:10, 11.

10. Kuleri Bhibhlya ntsiku zonsene kunakuphedzani tani?

10 Musafunika kucitanji? Lerini Bhibhlya ntsiku zonsene, pontho lembani mavesi akuti asakuphedzani. Azinji asaona kuti ndi pyadidi kutoma leri lemba ya ntsiku namacibese, thangwi pyenepi pisaaphedza toera kukumbuka pidaleri iwo pa ntsiku ineyi. Ndi pyenepi pidacita Marie,a mu ndzidzi udadzindikirwa anyakubalace kuti ali na utenda wa kankro. Ninji pidamphedza kupirira mu ndzidzi ukhatsalakana iye anyakubalace pikhali iwo dhuzi na kufa? Iye alonga: “Ntsiku zonsene ndikhaleri lemba ya ntsiku, pontho ndikhanyerezera thangwi ya lemba ineyi. Kucita pyenepi kukhandiphedza toera kukhala na manyerezero adidi mbandicalira kunyerezera kakamwe pya nyatwa zanga.”—Mas. 61:2.

ABALE NA ALONGO ATHU

11. Kudziwa kuti abale na alongo athu asapirira nyatwa, kusatiphedza tani?

11 Yahova asaphatisira abale na alongo athu toera kutiphedza kupirira. Basi ene kudziwa kuti ‘abale athu onsene pa dziko yapantsi asathimbanambo na nyatwa zibodzi zene’ kusatipasa cinyindiro cakuti nee tiri tekhene. (1 Ped. 5:9) Pa dziko yonsene yapantsi abale athu asatamba nyatwa zibodzi zene na zathu, pontho iwo asapirira. Pyenepi pisapangiza kuti tinakwanisambo kupirira nyatwa zinathimbana na ife.—Mabasa 14:22.

12. Abale na alongo athu anatiphedza tani, pontho ife tinaaphedzambo tani? (2 Akorinto 1:3, 4)

12 Abale na alongo athu, anakwanisa kulonga na kucita pinthu pyakuti pinatiphedza toera kupirira. Mpostolo Paulu acitikirwa na pyenepi. Mwakubwereza-bwereza, m’matsamba ace, iye apereka takhuta thangwi ya kuphedzwa na abale mu ndzidzi ukhali iye nkaidi, pontho aalonga madzina awo. Abale am’balangaza, amuwangisa, pontho acita pinthu toera kumphedza. (Afil. 2:25, 29, 30; Akol. 4:10, 11) Lero tisacitikirwambo na pinthu pibodzi pyene. Tingatamba nyatwa, abale na alongo athu asatiphedza toera kupirira. Pontho iwo angatamba nyatwa tisaaphedzambo toera kupirira.—Lerini 2 Akorinto 1:3, 4.

13. Ninji pidaphedza Maya toera kupirira?

13 Mu caka ca 2020, apolixa a ku Rusya aenda kasaka pinthu n’nyumba ya mulongo Maya. Buluka penepo iye aendeswa ku thando yakutongera miseru, basi ene thangwi yakupanga anango pinthu pinakhulupira iye. Mu ndzidzi unoyu, abale na alongo awangisa kakamwe mulongo Maya. Iye alonga: “Midzidzi inango ndikhali wakuneta, wakudzudzumika na wakutsukwala. Mbwenye abale na alongo akhandiligariri na kundilembera mphangwa mbandipanga kuti asandifuna. Kutomera kale ndikhadziwa kuti ndiri na abale na alongo azinji aufuni. Mbwenye kutomera mu caka ca 2020, ine ndisanyindira kakamwe kuti ndiri na abale na alongo azinji aufuni.”

14. Tisafunika kucitanji toera kuphedzwa na abale na alongo athu? (Onanimbo foto.)

14 Musafunika kucitanji? Mungatamba nyatwa, khalani dhuzi na abale na alongo, pontho cedzani na iwo. Lekani kukhala na manyadzo a kuphemba ciphedzo ca akulu a mpingo. Iwo anakwanisa kukhala ninga “mbuto yakuthawira mphepo, mbuto yakubisalira mu ndzidzi wa condzi.” (Iza. 32:2.) Kusiyapo pyenepi, kumbukani kuti abale na alongo athu asatambambo nyatwa ninga zinatamba ife. Mungaphedza m’bale anafuna ciphedzo, imwe munakwanisa kukhala na maonero adidi, pontho pyenepi pinakuphedzani toera kupirira.—Mabasa 20:35.

M’bale wakukalamba adaona ife pa foto inango ali nawa panyumba pace mu ndzidzi wakupisa, pontho ali kucedza na banja ibodzi pabodzi na anawo awiri atsikana. Dhuzi na iye pali na ndodo, pontho pameza pace pali na mitete ya mitombwe. M’bodzi wa atsikana ali kupangiza m’bale wakukalamba mafoto a Paraizu.

Mungatamba nyatwa khalani dhuzi na abale na alongo, pontho cedzani nawo (Onani ndima 14)c


CIDIKHIRO CATHU

15. Cidikhiro caphedza tani Yezu, pontho cisatiphedzambo tani? (Ahebheri 12:2)

15 Cidikhiro cinatipasa Yahova ndi cakunyindirika kakamwe cakuti cisatiphedza toera kupirira. (Aroma 15:13) Cidikhiro caphedzambo Yezu. Iye akhadziwa kuti angapitiriza kukhala wakukhulupirika mbadacenesa dzina ya Yahova. Yezu akhadziwambo kuti mwakukhonda dembuka mbadakhala pabodzi na Babace kudzulu, pontho mukupita kwa ndzidzi mbadatonga pabodzi na abale ace. Cidikhiro ceneci cam’phedza toera kupirira ntsiku yakunentsa kakamwe ya umaso wace pa dziko yapantsi. (Lerini Ahebheri 12:2.) Munjira ibodzi ene, cidikhiro cathu cakukhala m’maso kwenda na kwenda mu dziko ipswa cisatiphedza toera kupirira nyatwa zonsene zinatamba ife mu dziko ino ya Sathani.

16. Cidikhiro caphedza tani mulongo Alla toera kupirira, pontho imwe mwapfundzanji na mafala adalonga iye?

16 Onani kuti cidikhiro cakukhala mu dziko ipswa caphedza tani mulongo Alla wa ku Rusya. Mamunace afungirwa nkaidi mu ndzidzi ukhadikhira iye kutongwa. Mu ndzidzi udacitika pyenepi, mulongo Alla alonga: “Kucita phembero thangwi ya cidikhiro cathu ca ntsogolo na kunyerezera mwadidi cidikhiro ceneci pisandiphedza toera ndikhonde kutsukwala kakamwe. Ndisadziwa kuti mwakukhonda dembuka mayesero anewa anadzamala. Yahova anawina, pontho ife tinawinambo.”

17. Tisafunika kucitanji toera kuphedzeka na cidikhiro cinatipasa Yahova? (Onanimbo foto.)

17 Musafunika kucitanji? Khalani na ndzidzi wakunyerezera mapikiro akutsandzayisa a Yahova. Yeserani kunyerezera kuti muli mu dziko ipswa, pontho nyerezerani mathangwi onsene ali na imwe toera kutsandzaya. Mungacita pyenepi, nyatwa zonsene zinathimbana na imwe cincino zinaoneka ninga “ndi za ndzidzi wakucepa na zakululupa.” (2 Akor. 4:17) Kusiyapo pyenepi, citani pyonsene pinakwanisa imwe toera kupanga anango thangwi ya cidikhiro ceneci. Kumbukani kuti kuna anthu akuti nee ali na cidikhiro ndi pyakunentsa kakamwe kupirira nyatwa za dziko ino ya Sathani. Basi ene kucedza nawo mu ndzidzi wakucepa panango kunaaphedza toera akhale na cifuno cakudziwa thangwi ya cidikhiro ceneci.

M’bale wakukalamba ali nawa panyumba pace, pontho ali kunyerezera foto ya Paraizu idaona iye mu thabhuleti yace. Kukhundu kwace kuli na meza yakuti iri na mitete mizinji ya mitombwe.

Khalani na ndzidzi wakunyerezera mapikiro akutsandzayisa a Yahova thangwi ya ntsogolo (Onani ndima 17)d


18. Thangwi yanji tinakwanisa kunyindira mapikiro a Yahova?

18 Pidamala Yobe kuthimbana na nyatwa zizinji, iye apanga Yahova: “Cincino ndisadziwa kuti musakwanisa kucita pinthu pyonsene, pontho kuti pyonsene pinanyerezera imwe kucita nkhabepo cinafuna kucimwanika kuna imwe.” (Yobe 42:2) Yobe apfundza kuti nkhabepo cinthu cinafuna kupingiza Yahova kucita pinafuna iye. Undimomwene unoyu unakwanisa kutiphedza kupirira. Nyerezerani kuti nkazi unango ali kutsukwala thangwi ali na utenda wakuti nee dotoro m’bodzi akwanisa kumuwangisa. Mwakukhonda dikhira, dotoro unango wa maluso na wakunyindirika adzindikira utenda uli na nkazi unoyu mbampanga ukondzi wa utenda unoyu. Iye asatsandzaya maseze asadziwa kuti pinakwata ndzidzi toera utenda wace uwange. Cidaphedza nkazi unoyu toera kupirira ndi cidikhiro cadidi cakuti iye anawanga. Munjira ibodzi ene, tinganyindira kuti mapikiro a Yahova thangwi ya tsogolo anakwanirisika, pinatiphedza toera kupirira.

19. Tisafunika kucitanji toera tipirire?

19 Ife tapfundza kuti Yahova atipasa mwai wakucita phembero, atipasa Bhibhlya, abale na alongo na cidikhiro toera kutiphedza kupirira. Tingaphatisira mwadidi pinthu pyenepi, tinaona kuti Yahova asatitsalakana mu nyatwa zonsene zinatamba ife. Pontho tinakwanisa kupirira mpaka mu ndzidzi unafuna kumala nyatwa zonsene zinatamba ife mu dziko ino ya Sathani.—Afil. 4:13.

MUNATAWIRA TANI?

  • Yahova asatiphedza tani toera tipirire tingacita phembero na kuleri Bhibhlya?

  • Yahova asaphatisira tani abale na alongo athu toera kutiphedza kupirira?

  • Mapikiro a Yahova thangwi ya tsogolo asatiphedza tani toera kupirira?

NYIMBO 33 Siyani Pinentso Pyanu m’Manja Mwa Yahova

a Madzina anango acinjwa.

b MAFALA ANAFOKOTOZA MAFOTO: M’bale wakukalamba ali kupitiriza kupirira ntsiku zonsene.

c MAFALA ANAFOKOTOZA FOTO: M’bale wakukalamba ali kupitiriza kupirira ntsiku zonsene.

d MAFALA ANAFOKOTOZA FOTO: M’bale wakukalamba ali kupitiriza kupirira ntsiku zonsene.

    Mabukhu Acisena (1982-2025)
    Bulukani
    Fungulani
    • Cisena
    • Tumizirani Anango
    • Sankhulani Pinafuna Imwe
    • Copyright © 2025 Watch Tower Bible and Tract Society of Pennsylvania
    • Pinafunika Imwe Kutowezera
    • Cibisobiso
    • Configurações de Privacidade
    • JW.ORG
    • Fungulani
    Tumizirani Anango