NSOLO WA PFUNDZIRO 14
NYIMBO 8 Yahova Ndi Pakuthawira Pathu
“Sankhulani . . . Anafuna Imwe Kutumikira”
“Ine na anthu a panyumba panga, tinatumikira Yahova.”—YOS. 24:15.
PINAFUNA IFE KUPFUNDZA
Mu nsolo uno tinapfundza mathangwi adaticitisa kusankhula kutumikira Yahova.
1. Tisafunika kucitanji toera tikhale na kutsandzaya kwandimomwene, pontho thangwi yanji? (Izaiya 48:17, 18)
BABATHU wakudzulu asatifuna kakamwe, pontho asafuna kuti tikhale na umaso wakutsandzaya cincino na ntsogolo. (Ekle. 3:12, 13) Iye aticita na maluso adidi kakamwe, mbwenye nee aticita na maluso akutongeka tekhene peno akusankhula tekhene pyadidi na pyakuipa. (Ekle. 8:9; Yer. 10:23) Iye asadziwa kuti toera tikhale na kutsandzaya kwandimomwene, tisafunika kuntumikira na kubvera mitemo yace.—Lerini Izaiya 48:17, 18.
2. Sathani asafuna kuti tinyerezerenji, pontho Yahova acitanji?
2 Sathani asafuna kuti tinyerezere kuti tinakhala akutsandzaya tingakhonda kulambira Yahova, pontho kuti tinakwanisa kutongeka tekhene. (Gen. 3:4, 5) Toera kupangiza kuti Sathani ndi nyauthambi, Yahova atawirisa kuti anthu atongeke okhene mu ndzidzi ungasi. Ndi pyakukhonda nentsa kuona kuti anthu nee asakwanisa kutongeka okhene. Mbwenye Bhibhlya isalonga amuna na akazi azinji adakhala akutsandzaya thangwi yakutumikira Yahova. M’bodzi wa iwo ndi Yezu Kristu. Mu nsolo uno, tinapfundza kuti thangwi yanji Yezu asankhula kutumikira Yahova. Buluka penepo, tinaona kuti thangwi yanji tisafunika kulambira Babathu wakudzulu. Pakumalisa, tinaona mathangwi mangasi anaticitisa kusankhula kutumikira Yahova.
THANGWI YANJI YEZU ASANKHULA KUTUMIKIRA YAHOVA?
3. Sathani alonga kuti mbadapasanji Yezu, pontho Yezu asankhula kucitanji?
3 Pikhali Yezu pa dziko yapantsi, iye akhafunika kusankhula kuti mbani akhafuna iye kutumikira. Pidamala kwene Yezu kubatizwa, Sathani ampanga kuti mbadampasa maumambo onsene a pa dziko yapantsi angamulambira. Yezu antawira: “Coka Sathani! Thangwi pyalembwa kuti: ‘Ndi Yahova Mulungu wako anafunika iwe kulambira, pontho ndiye basi anafunika iwe kutumikira.’” (Mat. 4:8-10) Thangwi yanji Yezu acita cisankhulo ceneci? Onani mathangwi mangasi.
4-5. Ndi mathangwi api anango adacitisa Yezu kusankhula kutumikira Yahova?
4 Thangwi yakutoma idacitisa Yezu kusankhula kutumikira Yahova ndi yakuti iye asafuna kakamwe Babace. (Juw. 14:31) Kusiyapo pyenepi, Yezu asatumikira Yahova thangwi ndi pyadidi kucita pyenepi. (Juw. 8:28, 29; Apok. 4:11) Iye asadziwa kuti Yahova ndi Mwanaciro umaso, pontho asatipasa pinthu pizinji pyadidi. (Mas. 33:4; 36:9; Tiya. 1:17) Ndzidzi onsene Yahova akhalonga undimomwene na Yezu, pontho ampasa pinthu pyonsene pikhali na iye. (Juw. 1:14) Mbwenye Sathani ndi wakusiyana kakamwe na Yahova, thangwi iye acitisa anthu kudawa na kufa. Kusiyapo pyenepi, iye ndi nyauthambi wakuti asafuna pinthu pyonsene, pontho asanyerezera basi ene pinafuna iye. (Juw. 8:44) Yezu akhadziwa pyenepi pyonsene, natenepa iye nee akhafuna kutowezera Sathani mbakhonda kubvera Yahova.—Afil. 2:5-8.
5 Thangwi inango idacitisa Yezu kusankhula kutumikira Yahova ndi pinthu pyadidi pikhafuna kucitika thangwi ya kukhulupirika kwace. (Aheb. 12:2) Iye akhadziwa kuti angapitiriza kukhala wakukhulupirika mbadacenesa dzina ya Yahova na kucitisa kuti madawo na kufa pikhonde kuoneka pontho ntsogolo.
THANGWI YANJI YAHOVA ATHEMA KULAMBIRWA?
6-7. Thangwi yanji anthu azinji lero nee asatumikira Yahova, pontho thangwi yanji iye athema kulambirwa?
6 Anthu azinji lero nee asatumikira Yahova, thangwi nee asadziwa makhaliro ace adidi kakamwe na pinthu pyonsene pyadidi pidacitirwa iwo na Yahova. Iwo akhala ninga anthu adamwazirwa mphangwa na mpostolo Paulu ku Atena. Thangwi anthu anewa nee akhadziwa Mulungu.—Mabasa 17:19, 20, 30, 34.
7 Paulu apfundzisa anthu a ku Atena kuti Mulungu wandimomwene “asapasa anthu onsene umaso, muya na pinthu pyonsene.” Iye athimiza: “Thangwi ya iye, ife tiri na umaso, tisafamba, pontho tiripo.” Kubulukira kwa munthu m’bodzi basi, “Mulungu acita anthu a madzindza onsene,” natenepa iye athema kulambirwa.—Mabasa 17:25, 26, 28.
8. Ndi pinthu pipi pyakuti Yahova nee anapicita? Fokotozani.
8 Nakuti Yahova ndi Nciti, pontho ndi Ntongi Wankulu Kakamwe, iye mbadakwanisa kutikakamiza toera kuntumikira. Mbwenye Yahova nee asacita pyenepi. M’mbuto mwace, iye asatipasa pinthu pizinji pinapangiza kuti alipo, pontho asafuna kakamwe m’bodzi na m’bodzi wa ife. Iye asafuna kuti anthu azinji kakamwe akhale axamwali ace kwenda na kwenda. (1 Tim. 2:3, 4) Toera pyenepi pikwanisike, Yahova asatipfundzisa toera tikwanisembo kupfundzisa anango thangwi ya pinthu pyadidi pinafuna kudzacita iye kuna anthu. (Mat. 10:11-13; 28:19, 20) Kusiyapo pyenepi, iye acita masasanyiro a mipingo, pontho akhazikisa akulu a mpingo toera atitsalakane.—Mabasa 20:28.
9. Yahova asapangiza tani kuti asafuna anthu onsene?
9 Yahova asapangiza ufuni wace thangwi yakupasa pinthu pyadidi anthu onsene, ngakhale ale akuti nee asakhulupira kuti iye alipo. Mwacitsandzo, mu pyaka pizinji kakamwe, anthu azinji asasankhula kucita pinthu pinanyerezera iwo kuti ndi pyadidi na pyakuipa m’mbuto mwakubvera Yahova. Ngakhale tenepo, Yahova asapitiriza kuapasa pinthu toera akhale na umaso mbakhala akutsandzaya. (Mat. 5:44, 45; Mabasa 14:16, 17) Iye aapasa muoni wakukhala na axamwali akuti asaafuna, kubala ana, kuphata basa na kutsandzaya na umaso wawo. (Mas. 127:3; Ekle. 2:24) Pinthu pyenepi pisapangiza pakweca kuti Babathu wakudzulu asafuna anthu onsene. (Eks. 34:6) Cincino tinaona mathangwi mangasi anaticitisa kusankhula kutumikira Yahova, pontho tinaona kuti iye asatipasa tani nkhombo thangwi yakucita pyenepi.
THANGWI YANJI TISASANKHULA KUTUMIKIRA YAHOVA?
10. (a) Ndi thangwi ipi yakutoma inaticitisa kutumikira Yahova? (Mateu 22:37) (b) Kulekerera kwa Yahova kusakuphedzani tani? (Masalmo 103:13, 14)
10 Ninga Yezu, thangwi yakutoma inaticitisa kusankhula kutumikira Yahova ndi yakuti tisanfuna kakamwe. (Lerini Mateu 22:37.) Ife tisafuna kukhala na uxamwali wakuwanga na Yahova tingadziwa makhaliro ace. Mwacitsandzo, Yahova asafuna kutilekerera. Mu ndzidzi wakuti Aizraeli nee akhabvera Yahova, iye aadembetera: “Ndaphata miyendo, siyani njira zanu zakuipa.” (Yer. 18:11) Yahova asadziwa kuti ndife akusowa ungwiro, pontho ndife pfumbi. (Lerini Masalmo 103:13, 14.) Munganyerezera makhaliro adidi a Yahova na kulekerera kwace, pyenepi nee pisakucitisani kufuna kuntumikira kwenda na kwenda?
11. Ndi mathangwi api anango anaticitisa kusankhula kutumikira Yahova?
11 Ife tisafunambo kutumikira Yahova thangwi ndi pyadidi kucita pyenepi. (Mat. 4:10) Ife tisadziwa kuti tingakhala akukhulupirika kuna Yahova, tinacitikirwa na pinthu pizinji pyadidi. Tingatumikira Yahova mwakukhulupirika, tinacenesa dzina yace, tinapangiza kuti Sathani ndi nyauthambi, pontho tinatsandzayisa Yahova. Kusiyapo pyenepi, tinakhala na cidikhiro ca kuntumikira kwenda na kwenda!—Juw. 17:3.
12-13. Tapfundzanji na pidacitikira Jane na Pam?
12 Ife tinakwanisa kufuna kakamwe Yahova mbitiri ang’ono mbatipitiriza kucita pyenepi mu ndzidzi unakula ife. Onani citsandzo ca alongo awiri anacemerwa Jane na Pam.a Jane akhali na pyaka 11, pontho Pam akhali na pyaka 10 pyakubalwa pidatoma iwo kupfundza Bhibhlya. Maseze anyakubalawo nee akhafuna kupfundza Bhibhlya, iwo atawirisa Jane na Pam toera kupfundza Bhibhlya na Mboni za Yahova angapitiriza kuenda ku gereja kwawo. Jane alonga: “Kupfundza Bhibhlya na Mboni za Yahova kwandiphedza toera ndikhonde kumwa mitombwe yakuledzeresa peno kucita ulukwali ninga pikhacita azinji kuxikola.”
13 Pakupita pyaka pingasi, uwiri wawo adzakhala amwazi mphangwa. Mukupita kwa ndzidzi, iwo atoma kutumikira ninga apainiya mu ndzidzi ubodzi ene mbatsalakana anyakubalawo. Jane afokotoza mabvero ace thangwi ya pinthu pyonsene pidaacitira Yahova. Iye alonga: “Ine ndapfundza kuti Yahova asatsalakana mwadidi axamwali ace, pontho ‘iye asadziwa anthu ace’ ninga pinalonga 2 Timoti 2:19.” Mwakukhonda penula, ndzidzi onsene Yahova asatsalakana ale ananfuna na kuntumikira!
14. Tinatsidzikiza tani dzina ya Yahova? (Onanimbo mafoto.)
14 Ife tisafuna kuti anthu adziwe undimomwene thangwi ya Yahova. Mwacitsandzo, nyerezerani kuti muli na xamwali wakukoma ntima, wakupasa mwakudzala manja na wakulekerera. Mbwenye ntsiku inango, imwe mwabva munthu unango mbalonga kuti xamwali wanu ndi nsumankha, pontho nee ndi wakunyindirika. Munacitanji? Imwe munantsidzikiza. Munjira ibodzi ene, Sathani na ale anamphedzera angalonga uthambi thangwi ya Yahova, ife tisafunika kutsidzikiza Yahova mukulonga undimomwene thangwi ya Iye. (Mas. 34:1; Iza. 43:10) Ife tinapangiza kuti tisafuna kutumikira Yahova na ntima onsene kubulukira mu pinthu pinalonga ife na pinacita ife.
Kodi imwe munatsidzikiza dzina ya Yahova? (Onani ndima 14)b
15. Ndi nkhombo zipi zidakhala na mpostolo Paulu thangwi yakusankhula kutumikira Yahova? (Afilipi 3:7, 8)
15 Ife tisafunika kucita macinjo toera tikwanise kukomeresa Yahova na kucita pizinji m’basa yace. Mwacitsandzo, mpostolo Paulu akhali wakudziwika kakamwe mu uphemberi Waciyuda, mbwenye iye asiya uphemberi unoyu toera akhale nyakupfundza wa Kristu mbatumikira Yahova. (Agal. 1:14) Na thangwi ineyi, iye akhala na mwai wakutumikira Yahova munjira zakusiyana-siyana, pontho anadzatonga na Kristu kudzulu. Iye nee atsumbikika thangwi yakusankhula kutumikira Yahova, pontho ife nee tinatsumbikikambo tingacita pibodzi pyene.—Lerini Afilipi 3:7, 8.
16. Tisapfundzanji na pidacitikira Julia? (Onanimbo mafoto.)
16 Kutumikira Yahova kungakhala cinthu cakufunika kakamwe kuna ife, iye anatipasa nkhombo cincino na ntsogolo. Onani pidacitikira mulongo anacemerwa Julia. Mbadzati kupfundza undimomwene, Julia akhaimba ku gereja kwace kutomera uwana wace. Iye akhaimba mwadidi kakamwe mbatoma kupfundziswa toera athimizire maluso ace akuimba. Mwakukhonda dembuka, Julia adzakhala wakudziwika kakamwe, pontho akhaimba m’mbuto zakudziwika na anthu azinji. Mu ndzidzi ukhapfundza iye xikola yakuimba, ndzace atoma kucedza naye thangwi ya Mulungu mbampanga kuti dzina ya Mulungu ndi Yahova. Mwakukhonda dembuka, Julia atoma kupfundza Bhibhlya kawiri pa sumana. Mukupita kwa ndzidzi, iye asankhula kuphatisira ndzidzi wace na mphambvu zace toera kutumikira Yahova m’mbuto mwakukhala nyakuimba. Pikhali pyakunentsa toera kucita cisankhulo ceneci. Iye alonga: “Anthu azinji akhandipanga kuti ndi pyakusowa ndzeru kusiya kuimba toera kutumikira Yahova, mbwenye ine ndikhafuna kuphatisira umaso wanga onsene toera kutumikira Yahova.” Julia asapibva tani cincino thangwi ya cisankhulo cidacita iye mu pyaka pyakupiringana 30 nduli? Iye alonga: “Ndiri wakutsandzaya thangwi yakusankhula kutumikira Yahova na kudziwa kuti iye anadzakwanirisa pinthu pyonsene pinafuna ntima wanga ntsogolo.”—Mas. 145:16.
Tingaona kuti kutumikira Yahova ndi cinthu cakufunika kakamwe kuna ife, tinakhala akutsandzaya kakamwe (Onani ndima 16)c
PITIRIZANI KUTUMIKIRA YAHOVA
17. Kudziwa kuti tiri kukhala mu ntsiku zakumalisa kusakhuya tani ale akuti nee asatumikira Yahova na ale anantumikira?
17 Ife tiri kukhala mu ntsiku zakumalisa. Mpostolo Paulu alemba: “Thangwi ‘thimize pano,’ pontho ‘ule wakuti ali kubwera anadzafika, iye nee anadembuka.’” (Aheb. 10:37) Pyenepi pisatikhuya tani? Ndzidzi udasala ndi wakucepa kakamwe toera anthu asankhule kutumikira Yahova. (1 Akor. 7:29) Pontho khala ife tasankhula kale kutumikira Yahova, tisadziwa kuti maseze titambe nyatwa, “thimize pano” nyatwa zenezi zinamala.
18. Yahova na Yezu asafuna kuti ticitenji?
18 Yezu apanga anthu toera akhali anyakupfundzace mbapitiriza kuntowera. (Mat. 16:24) Natenepa, khala ife tisatumikira Yahova mu pyaka pizinji, tisafunika kupitiriza kucita pyenepi. Pontho tisafunika kuwangisira kakamwe toera tipitirize kutumikira Yahova. Panango pinakhala pyakunentsa, mbwenye tinakhala akutsandzaya, pontho tinapaswa nkhombo zizinji thangwi yakutumikira Yahova.—Mas. 35:27.
19. Tisapfundzanji na pidacitikira Gene?
19 Anthu anango asanyerezera kuti angatumikira Yahova nee anakhala akutsandzaya. Khala ndimwe m’phale peno ntsikana, musaona kuti kutumikira Yahova ndi kwakunentsa kakamwe? M’bale anacemerwa Gene alonga: “Ine ndikhapibva kuti kukhala m’bodzi wa Mboni za Yahova kukhandicitisa kuluza pinthu pinango. Pikhaoneka ninga andzanga adakula na ine akhatsandzaya na pinthu ninga maphwando, kubanyirana peno kugwa mavidhyu gemi auphanga, mbwenye ine ndikhaphatisira ndzidzi wanga toera kuenda ku misonkhano na kumwaza mphangwa.” Manyerezero anewa akhuya tani Gene? Iye alonga: “Ndatoma kucita pinthu pyakuipa pikhacita andzanga adakula na ine, pontho ndikhakomerwa napyo, mbwenye nee ndikhali na kutsandzaya kwandimomwene. Ndatoma kunyerezera pinthu pyadidi pinacitika thangwi yakubvera pinalonga Bhibhlya mbandisankhula kutumikira Yahova na ntima onsene. Kutomera ndzidzi unoyu, ndisaona kuti Yahova asatawira maphembero anga.”
20. Tisafunika kupitiriza kucitanji?
20 Nyamasalmo alonga tenepa thangwi ya Yahova: “Nyakutsandzaya ndi ule anasankhula imwe mbamum’bweresa dhuzi na imwe toera akhale panyumba panu.” (Mas. 65:4) Natenepa, tendeni tipitirize kutumikira Yahova ninga Yoswa mbatilonga kuti: “Ine na anthu a panyumba panga, tinatumikira Yahova.”—Yos. 24:15.
NYIMBO 28 Mbani Anakhala Xamwali wa Yahova?
a Madzina anango acinjwa.
b MAFALA ANAFOKOTOZA FOTO: Pidamala kuona nkazi pinthu pikhacita anthu anatitcinga, iye afendedzera dhuzi karinya ya mabukhu mbabvesera undimomwene.
c MAFALA ANAFOKOTOZA FOTO: Mafoto anewa asatiphedza toera kubvesesa macinjo adacita Julia toera kutumikira Yahova.