NSOLO WA PFUNDZIRO 15
NYIMBO 30 Baba Wanga, Mulungu Wanga na Xamwali Wanga
“Kufendedzera Mulungu Ndi Cinthu Cadidi Kakamwe” Kuna Ife!
“Kwa ine, kufendedzera Mulungu ndi cinthu cadidi kakamwe.”—MAS. 73:28.
PINAFUNA IFE KUPFUNDZA
Mu nsolo uno tinaona kuti tinafendedzera tani Yahova, pontho pyenepi pisatiphedza tani.
1-2. (a) Tisafunika kucitanji toera kukhala na uxamwali wa ponda ndi pondembo na munthu? (b) Tinapfundzanji mu nsolo uno?
KODI imwe muli na xamwali wa ponda ndipondembo? Mwacitanji toera mukhale axamwali? Panango mwacedza ndzidzi uzinji pabodzi, mwadziwa pinthu pidancitikira, pontho mwadziwa pinthu pinakomerwa na iye na pinaida iye. Imwe mwaona makhaliro ace adidi akuti musafuna kuatowezera. Natenepa mwasankhula kuti iye akhale xamwali wanu.
2 Toera kukhala na uxamwali wa ponda ndi pondembo na munthu, pasafunika ndzidzi na kuwangisira. Munjira ibodzi ene, pasafunikambo ndzidzi na kuwangisira toera kukhala na uxamwali wakuwanga na Yahova Mulungu. Mu nsolo uno, tinapfundza kuti tinakwanisa tani kufendedzera Mulungu, pontho kucita pyenepi kunatiphedza tani. Pakutoma, tendeni tione kuti thangwi yanji ndi pyakufunika kufendedzera Yahova, wakuti ndi xamwali wathu wa ponda ndi pondembo.
3. Thangwi yanji ndi pyadidi kunyerezera kufunika kwa kufendedzera Yahova? Perekani citsandzo.
3 Mwakukhonda penula, imwe musatawira kuti ndi pyadidi kufendedzera Yahova. Mbwenye kunyerezera kufunika kwa kucita pyenepi kunatiphedza toera tipitirize kufendedzera Mulungu. (Mas. 63:6-8) Mwacitsandzo, ife tisadziwa kuti ndi pyadidi kudya mwadidi, kuthamula manungo, kugona mwakukwana na kumwa kakamwe madzi. Mbwenye azinji nee asanyerezera kufunika kwa pyenepi, pontho asapwaza ungumi wawo. Ngakhale tenepo, tinganyerezera kuti pinthu pyenepi pinatiphedza tani, tinafuna kakamwe kupicita. Munjira ibodzi ene, tinganyerezera kuti thangwi yanji ndi pyadidi kufendedzera Yahova, tinakhala na cifuno ca kupitiriza kucita pyenepi.—Mas. 119:27-30.
4. Mwakubverana na Masalmo 73:28, ninji pikhadziwa Azafe?
4 Lerini Masalmo 73:28. Nyakulemba Masalmo kapitulu 73 akhali Mulevi adasankhulwa toera kutumikira ninga nyakuimba pa templo ya Yahova. Panango iye akhadalambira Yahova mwakukhulupirika mu pyaka pizinji. Ngakhale tenepo, iye akhadziwa kuti ndi pyadidi kukumbuka kufunika kwa “kufendedzera Mulungu,” pontho akhafuna kuti anango acitembo pibodzi pyene. Mphapo kucita pyenepi kunatiphedza tani?
“KUFENDEDZERA MULUNGU” KUSATITSANDZAYISA
5. (a) Thangwi yanji kufendedzera Yahova kusatitsandzayisa? (b) Mwakubverana na Misangani 2:6-16, longani pitsandzo pinapangiza kuti kubvera uphungu unagumanika m’Bhibhlya kunakuphedzani.
5 Tingafendedzera Yahova, ife tinakhala akutsandzaya. (Mas. 65:4) Thangwi yanji? Ife tisaphedzeka tingaphatisira uphungu unagumanika m’Bhibhlya. Uphungu unoyu usatiphedza kucalira pinthu pyakuti pinaikha umaso wathu pangozwi na kucita madawo. (Lerini Misangani 2:6-16.) Bhibhlya isalonga: “Nyakutsandzaya ndi munthu anagumana udziwisi, na munthu anagumana luso yakubvesesa.”—Mis. 3:13.
6. Ninji pidacitisa nyamasalmo kukhala wakutsukwala?
6 Ngakhale axamwali a Yahova, midzidzi inango asakhalambo akutsukwala. Nyakulemba Masalmo 73 atsukwala ndzidzi udanyerezera iye kuti pinthu pikhancitikira pikhali pyakusowa ulungami. Iye atoma kucitira bibvu anthu akuti maseze nee akhabvera Yahova akhali na umaso wadidi. Iye anyerezera kuti anthu auphanga na akudzikuza akhali akupfuma, akhali na ungumi wadidi, pontho nee akhathabuka. (Mas. 73:3-7, 12) Thangwi yakuona pyenepi, iye anyerezera kuti ndi pyakusowa basa kutumikira Yahova. Natenepa atsukwala mbalonga: “Mwandimomwene, kuwangisira kwanga toera kukhala na ntima wakucena kukhali kwapezi, pontho kusamba manja kudacita ine toera ndikhale wakusowa mulando kukhali kwakusowa basa.”—Mas. 73:13.
7. Tisafunika kucitanji tingatsukwala? (Onanimbo foto )
7 Nyamasalmo unoyu acita pinthu toera kucinja manyerezero ace. Iye ‘apita m’mbuto yakucena ya Mulungu,’ pontho mwenemo Yahova ancinja manyerezero ace. (Mas. 73:17-19) Mu ndzidzi unakhala ife akutsukwala, tinakwanisa kuphemba Yahova toera atiphedze kudziwa pinafunika ife kucita. Uphungu unagumanika m’Mafalace na ciwangiso ca abale na alongo pinatiphedza toera kukhala na mphambvu mbatipitiriza kutumikira Yahova. Mu ndzidzi unathimbana ife na pinentso pizinji mbatisowa cakucita, Yahova anatiphedza toera kukhala akukhurudzika.—Mas. 94:19.a
Mulevi adalemba Masalmo 73 ali dzololo ‘pa mbuto yakucena ya Mulungu.’ (Onani ndima 7)
“KUFENDEDZERA MULUNGU” KUSATIPHEDZA TOERA KUKHALA NA UMASO WADIDI NA CIDIKHIRO
8. Ndi njira zipi zinango zinaphedzeka ife thangwi yakufendedzera Mulungu?
8 Kufendedzera Mulungu kusatiphedzambo munjira zinango ziwiri. Yakutoma, ife tisakhala na umaso wadidi tingakhala na uxamwali wakuwanga na Mulungu. Yaciwiri, ife tisakhala na cidikhiro ca ntsogolo. (Yer. 29:11) Tendeni tione pinthu pyenepi.
9. Kufendedzera Yahova kusatiphedza tani toera kukhala na umaso wadidi?
9 Kufendedzera Mulungu kusatiphedza toera kukhala na umaso wadidi. Anthu azinji lero nee asatawira kuti Mulungu alipo. Natenepa iwo nee asadziwa kuti thangwi yanji tiri pa dziko yapantsi, pontho asakhulupira kuti ntsogolo anthu onsene anadzafudzwa. Thangwi yakupfundza Mafala a Mulungu, ife tisakhulupira kuti Mulungu alipo, “pontho asapasa nkhombo ale anansaka na ntima onsene.” (Aheb. 11:6) Yahova aticita toera tintumikire, natenepa tingantumikira tisakhala na kutsandzaya kwandimomwene.—Dheu. 10:12, 13.
10. Yahova apikiranji kuna ale anan’nyindira? (Masalmo 37:29)
10 Anthu azinji nee ali na cidikhiro ca ntsogolo. Iwo basi ene asaphata basa, kumanga banja, kubala ana, pontho asakoya kobiri toera kuiphatisira mu ndzidzi wakuti nee anakwanisabve kuphata basa. Iwo nee asadziwa pinthu pinafuna cita Mulungu ntsogolo. Mbwenye ife tisadziwa kuti Yahova asatsalakana atumiki ace. (Mas. 25:3-5; 1 Tim. 6:17) Tisanyindira Mulungu wathu na xamwali wathu kuti anacita pidapikira iye. Ife tisadikhira pinthu pizinji pyadidi, makamaka kumulambira kwenda na kwenda m’Paraizu.—Lerini Masalmo 37:29.
11. Kufendedzera Mulungu kunatiphedza tani?
11 Kufendedzera Mulungu kuna ife ndi kwadidi munjira zizinji. Mwacitsandzo, Yahova apikira kutilekerera madawo athu tingatcunyuka. (Iza. 1:18) Natenepa, nee tisafunikabve kudzudzumika na madawo adacita ife nduli. (Mas. 32:1-5) Ife tisakhala akutsandzaya thangwi yakutsandzayisa Yahova. (Mis. 23:15) Mwandimomwene, imwe munakwanisa kunyerezera nkhombo zinango zinakhala na ife thangwi yakukhala axamwali a Mulungu. Cincino onani kuti munapitiriza tani kufendedzera Mulungu.
MUNAPITIRIZA TANI “KUFENDEDZERA MULUNGU”?
12. Ndi pinthu pipi pidacita ife toera kukhala na uxamwali wakuwanga na Mulungu?
12 Mbatidzati kubatizwa ninga Mboni za Yahova, ife tacita pizinji toera tikhale axamwali a Yahova. Ife tapfundza undimomwene thangwi ya Yahova Mulungu na Yezu Kristu, tatcunyuka madawo athu, takhulupira Mulungu, pontho tawangisira toera kucita pinafuna iye. Mbwenye toera tikhale na uxamwali wakuwanga na Mulungu, tisafunika kupitiriza kucita pyenepi.—Akol. 2:6.
13. Ndi pinthu pipi pitatu pinafunika ife kucita toera tipitirize kukhala na uxamwali wakuwanga na Yahova?
13 Ndi pinthu pipi pinafunika ife kupitiriza kucita toera kukhala na uxamwali wakuwanga na Yahova? (1) Tisafunika kupitiriza kuleri na kupfundza Bhibhlya. Mu ndzidzi unacita ife pyenepi, tisafunika kucita pizinji kupiringana basi ene kupfundza thangwi ya Mulungu. Tisafunika kuwangisira toera kubvesesa pinafuna Mulungu kuna ife na kupiphatisira. (Aef. 5:15-17) (2) Tisafunika kuwangisa cikhulupiro cathu mukunyerezera mwadidi njira zinapangiza Yahova ufuni wace kuna ife. (3) Tisafunika kupitiriza kuida pinthu pinatsukwalisa Yahova na kucalira kucita uxamwali na anthu anacita pinthu pyenepi.—Mas. 1:1; 101:3.
14. Tisafunika kucitanji ntsiku zonsene toera tikomerese Yahova? (1 Akorinto 10:31) (Onanimbo mafoto.)
14 Lerini 1 Akorinto 10:31. Ndi pyakufunika kakamwe kuna ife kucita pinthu pinakomeresa Yahova. Mbwenye tisafunika kucita pizinji kupiringana basi ene kumwaza mphangwa na kugumanika pa misonkhano. Thangwi pinthu pinacita ife ntsiku na ntsiku pisafunika kutsandzayisa Yahova. Mwacitsandzo, tingacita pinthu pyonsene mwakulungama na kupasa anango pinthu piri na ife, tisatsandzayisa Yahova. (2 Akor. 8:21; 9:7) Yahova asafunambo kuti tipereke takhuta kuna iye thangwi yakutipasa umaso. Natenepa tisafunika kucita mphole-mphole na pinthu pinadya ife, pinamwa ife, pontho tisafunika kucita pinthu pinango pyakuti pinatiphedza toera kukhala na ungumi wadidi. Yahova angaona kuti tiri kuwangisira toera kuntsandzayisa, iye anatifuna kakamwe.—Luka 16:10.
Njira zinango zakutsandzayisa Yahova ndi kutekenya mwadidi karu, kutsalakana mwadidi ungumi wathu mu kuthamula manungo, kudya mwadidi na kupasa anango piri na ife (Onani ndima 14)
15. Yahova asafuna kuti titsalakane tani anango?
15 Yahova ndi wakukoma ntima kuna anthu akulungama na akukhonda kulungama. (Mat. 5:45) Iye asafuna kuti titsalakanembo anango mwakukoma ntima. Mwacitsandzo, lemba ya Tito 3:2 isalonga kuti anthu akulungama “akhonde kulonga munthu mwakuipa, akhonde kukhala anyanthonga, mbwenye akhale anthu a manyerezero akulinganira, mbapangiza kukhala akukhurudzika kuna anthu onsene.” Kukumbuka pyenepi kunatiphedza toera tikhonde kupwaza anango maseze akhonde kutumikira Yahova. (2 Tim. 2:23-25) Ife tinakhala na uxamwali wakuwanga na Yahova tingatsalakana anthu onsene mwaufuni na mwakukoma ntima.
‘FENDEDZERANI MULUNGU’ MASEZE MUDODOME
16. Ndi manyerezero api adakhala na nyakulemba Masalmo 73?
16 Midzidzi inango panango munanyerezera kuti Yahova nee anatawira kukhala xamwali wanu thangwi ya madodo adacita imwe. Mwacitsandzo, kumbukani pidacitikira nyakulemba Masalmo kapitulu 73. Iye alonga: “Ine ndikhadasala pangʼono toera kutayika; ndikhadasala pangʼono toera kugwa.” (Mas. 73:2) Iye alonga kuti ‘ntima wace ukhamupha, nee akhanyerezera mwadidi, pontho akhali ninga cinyama cakusowa ndzeru’ pamaso pa Yahova. (Mas. 73:21, 22) Kodi iye akhanyerezera kuti thangwi ya madodo ace Yahova nee akhanfunabve, pontho nee mbadamulekerera?
17. (a) Nyamasalmo acitanji mu ndzidzi ukhali iye wakutsukwala? (b) Tisapfundzanji na pinthu pidacita iye? (Onanimbo mafoto.)
17 Khala nyamasalmo unoyu anyerezera kuti Yahova ansiya, iye mbadanyerezera pyenepi basi ene mu ndzidzi wakucepa. Maseze iye akhali wakutsukwala, akhadziwa kuti akhafunika kukhala na uxamwali wakuwanga na Yahova. Iye alonga: “Mbwenye cincino, ndzidzi onsene ine ndiri na imwe; imwe mwaphata nkono wanga wamadyo. Imwe mwanditsogolera na uphungu wanu, buluka penepo munadzandicitisa kuti ndikhale wakutawirika kuna imwe.” (Mas. 73:23, 24) Ife tisafunikambo kuphemba Yahova toera atipase mphambvu tingapibva kuti cikhulupiro cathu ciri kufewa peno tingatsukwala thangwi ya madodo athu. (Mas. 73:26; 94:18) Maseze ticite madawo, ife tinakwanisa kubwerera kuna Yahova na cinyindiro cakuti iye ali “dzololo toera kulekerera.” (Mas. 86:5) Tingatsukwala thangwi ya madawo athu, tisafunika kufendedzera Mulungu wathu.—Mas. 103:13, 14.
Tingaona kuti cikhulupiro cathu ciri kufewa, tisafunika kufendedzera Yahova mukucita phembero kazinji kene na kugumanika pa misonkhano mwakukhonda phonya (Onani ndima 17)
‘FENDEDZERANI MULUNGU’ KWENDA NA KWENDA
18. Thangwi yanji tinakwanisa kufendedzera Yahova kwenda na kwenda?
18 Ife tinakwanisa kufendedzera Mulungu kwenda na kwenda. Nkhabe cinthu cinafuna kutipingiza kupfundza thangwi ya iye. Bhibhlya isalonga kuti njira za Yahova, udziwisi wace na ndzeru zace ‘ndi pikulu kakamwe.’ (Aroma 11:33) Ife tinapitiriza kupfundza thangwi ya Yahova kwenda na kwenda.
19. Bukhu ya Masalmo isatipasa cinyindiro cipi?
19 Lemba ya Masalmo 79:13, yakuti yalembwambo na Azafe peno m’bodzi wa anace isalonga: “Ife mbumba yanu, pontho nkumbi wa mabira unakumbiza imwe, tinadzapereka takhuta kuna imwe kwenda na kwenda; pontho tinadzabvekesa mbiri yanu kuna ubalwi na ubalwi.” Mungapitiriza kufendedzera Mulungu, munakwanisambo kunyindira kuti munatambira nkhombo zakukhonda mala, pontho munalonga na cinyindiro kuti: “Mulungu ndi mwala wa ntima wanga; iye ndi wanga kwenda na kwenda.”—Mas. 73:26.
NYIMBO 32 Khalani Kukhundu ya Yahova!
a Anango akuti asakhala akudzudzumika peno akutsukwala kakamwe, panango anafunika kusaka ciphedzo ca madotoro. Toera kudziwa pizinji, onani Sentinela N.º 1 de 2023.