Bukhu ya Yobe Inakwanisa Kukuphedzani Midzidzi Ya Nyatwa

1-2. Thangwi yanji ndi pyadidi kuleri bukhu ya Yobe?

KODI imwe mwaleri bukhu ya Yobe cincino? Maseze bukhu ineyi yalembwa pyaka 3.500 nduli, anthu azinji asapitiriza kuiona kukhala ibodzi mwa mabukhu mazinji adidi kakamwe. Anthu azinji asasimba nyakulemba bukhu ineyi thangwi aphatisira mafala akukhonda nentsa kubvesesa, akubalika na akuwangisa. Mose ndiye adalemba bukhu ineyi, mbwenye pikhalemba iye pikhabuluka kuna Yahova.—2 Tim. 3:16.

² Bukhu ya Yobe ndi khundu yakufunika kakamwe ya Bhibhlya. Thangwi yanji? Thangwi isatiphedza kubvesesa kuti aanju na ife anthu tisafunika kutumikira Yahova thangwi ya kunfuna na kufuna kucenesa dzina yace. Pontho isatiphedza kudziwa makhaliro akudzumisa a Yahova ninga ufuni, udziwisi, ulungami, pontho na mphambvu zace. Mwacitsandzo, bukhu ya Yobe isalonga kuti Mulungu ndi “Wamphambvu Zonsene” maulendo 31. Bukhu ya Yobe isatawira mibvundzo mizinji yakufunika mu umaso kuphatanizambo mbvundzo wakuti anthu azinji asaucita wakuti: thangwi yanji Mulungu asatawirisa anthu kuthabuka?

3. Ndi maphindu api anafuna kukhala na ife tingapfundza bukhu ya Yobe?

³ Kuleri bukhu ya Yobe ndi ninga kukwira paphiri. Munthu angakwira paphiri anakwanisa kuona pinthu piri n’khundu-khundu mwace. Munjira ibodzi ene, tingaleri bukhu ya Yobe tinakwanisa kudziwa pinanyerezera Yahova thangwi ya nyatwa zathu. Tinapfundza kuti Aizraeli mbadaphedzeka tani na mbiri ineyi, pontho ifembo tinaphedzeka nayo tani lero. Tinapfundzambo kuti tinaphatisira tani mbiri ineyi ya Yobe toera kuphedza anango.

YAHOVA ATAWIRISA KUTI YOBE ATHABUKE

4. Yobe akhadasiyana tani na Aizraeli ?

⁴ Yobe akakhala ku Uzi mu ndzidzi wakuti Aizraeli akhala mu ubitcu ku Ejitu. Pisaoneka kuti dziko ineyi ikhali dhuzi na dziko yakupikirwa, pontho ikhalimbo dhuzi na dziko ya Arabia. Mwakusiyana na Aizraeli akuti akhadatoma kulambira madzimunthu ku Ejitu, Yobe apitiriza kutumikira Yahova mwakukhulupirika. (Yos. 24:14; Ezek. 20:8) Yahova apanga Yobe: ‘Nkhabepo munthu unango ninga iwe pa dziko yapantsi.’a (Yobe 1:8) Yobe akhali wakupfuma, pontho akhalemedzwa kakamwe mu dziko ineyi. (Yobe 1:3) Sathani aipirwa kakamwe na kuona mamuna unoyu wakupfuma na wakulemedzwa kakamwe mbatumikira Yahova mwakukhulupirika!

5. Thangwi yanji Yahova atawirisa Yobe kuthabuka? (Yobe 1:20-22; 2:9, 10)

⁵ Sathani alonga kuti Yobe anasiya kutumikira Yahova angathabuka. (Yobe 1:7-11; 2:2-5) Maseze Yahova akhafuna kakamwe Yobe, pinthu pidalonga Sathani pyacitisa kuti Yahova antawirise kuti amuyesere. (Yobe 1:12-19; 2:6-8) Sathani apha pifuyo pya Yobe, anace, pontho anthabusa na utenda. Maseze Sathani anthabusa munjira ineyi, Yobe apitiriza kutumikira Yahova mwakukhulupirika. (Lerini Yobe 1:20-22; 2:9, 10.) Mukupita kwa ndzidzi, Yahova aphedza Yobe mbakhala pontho wakupfuma, na makhaliro adidi, pontho akhala na ana anango khumi. Kusiyapo pyenepi, Yahova apasa nkhombo Yobe mbakhala m’maso mu pyaka pizinji. Iye akhala m’maso mu pyaka pyakupiringana 140. Natenepa iye aona adzukulu a adzukulu ace. (Yobe 42:10-13, 16) Pyenepi mbapidaphedza tani atumiki a Mulungu nduli, pontho pinatiphedzambo tani lero?

6. Pidacitikira Yobe mbapidaphedza tani Aizraeli? (Onanimbo foto.)

⁶ Aizraeli mbadaphedzeka tani? Aizraeli akhali na umaso wakunentsa ku Ejitu. Mwacitsandzo, Yoswa na Kalebe akhala ndzidzi uzinji ninga mabitcu. Iwo amala pyaka 40 n’thando thangwi Aizraeli anango adawira Yahova. Khala Aizraeli akhadabvesesa pinthu pikhadacitikira Yobe, mwakukhonda penula, pyenepi pyaphedza iwo na anawo kubvesesa kuti nee ndi Mulungu anacitisa nyatwa, mbwenye ndi Sathani. Iwo mbadabvesesambo kuti thangwi yanji Mulungu asatawirisa anthu kuthabuka, pontho kuti Yahova asafuna ale anapitiriza kukhala akukhulupirika ngakhale m’midzidzi ya nyatwa, na kuapasa nkhombo.

7-8. Pidacitikira Yobe pisaphedza tani ale anathabuka? Perekani citsandzo.

⁷ Tinaphedzekambo tani? Mwakutsukwalisa, anthu azinji lero asiya kukhulupira Mulungu thangwi nee asadziwa kuti thangwi yanji anthu adidi asathabuka. Tendeni tione pidacitikira Hazelb anakhala ku Ruwanda. Pikhali iye ntsikana, akhakhulupira Mulungu, mbwenye mukupita kwa ndzidzi pinthu pyadzacinja. Pai wace na mai wace akhondana, pontho pidasembwa mai wace na mamuna unango, mamuna unoyu akhantsalakana mwakuipa. Mukupita kwa ndzidzi, mamuna unango apita naye m’mabonde mwakukakamiza. Iye akhaenda ku gereja mbwenye kweneko nee akhabalangazwa. Mukupita kwa ndzidzi, iye acita phembero mbalonga: “Mulungu, ine ndisacita pinthu pyadidi, mbwenye imwe musandithabusa, cincino ine ndinakusiyani toera ndicite pinthu pinanditsandzayisa.” Ninga Hazel, anthu azinji apangwa uthambi wakuti ndi Mulungu anacitisa anthu kuthabuka. Tisatsukwala kakamwe thangwi yakukhonda kwawo dziwa Mulungu, pontho tisafuna kuaphedza.

⁸ Bukhu ya Yobe isatipfundzisa kuti nee ndi Mulungu anacitisa anthu kuthabuka, mbwenye ndi Sathani. Tisapfundzambo kuti anthu nee asathabuka thangwi ya pinthu pyakuipa pidacita iwo. Thangwi Bhibhlya isalonga kuti “ndzidzi na pinthu pyakukhonda kudikhirwa pisacitika kuna onsene.” (Ekle. 9:11; Yobe 4:1, 8) Pontho tapfundza kuti tingapitiriza kukhala akukhulupirika midzidzi ya nyatwa, tinakhala na mwai wakupangiza kuti Sathani ndi nyauthambi. (Yobe 2:3; Mis. 27:11) Ife tisapereka takhuta thangwi yakupfundza Bhibhlya na kudziwa kuti thangwi yanji anthu asathabuka. Mukupita kwa ndzidzi, Hazel apfundza Bhibhlya na Mboni za Yahova, pontho abvesesa kuti nee ndi Mulungu anacitisa anthu kuthabuka. Iye alonga: “Ine ndacita pontho phembero kuna Yahova mbandilonga pyonsene pikhali muntima mwanga. Ine ndampanga kuti pikhadalonga ine kuti ndinansiya mwandimomwene nee ndikhadziwa pikhalonga ine. Cincino ndisabvesesa kuti Yahova asandifuna, pontho ndiri wakutsandzaya.” Tisapereka takhuta thangwi yakudziwa kuti nee ndi Mulungu anaticitisa kutamba nyatwa. Cincino tinaona kuti pidacitikira Yobe pinaphedza tani m’bodzi na m’bodzi wa ife midzidzi ya nyatwa.

PIDACITIKIRA YOBE PINATIPHEDZA TANI TOERA KUPIRIRA NYATWA?

9. Yobe acitanji pikhali iye nawa pa dotha? (Tiyago 5:11)

⁹ Nyerezerani nyatwa ikhatamba Yobe. Manungo ace akhali na pironda, akhali nawa pa dotha, pontho akhabva kupha kakamwe. Iye akhali wakusowa mphambvu, pontho akhapala manungo ace na madzinga a pikalango. Yobe nee akhapitiriza kukhala m’maso basi, mbwenye akhapitirizambo kupirira. (Lerini Tiyago 5:11.) Ninji pidamphedza toera kupirira?

10. Yobe apangiza tani kuti akhali wakukhulupirika kuna Yahova? Fokotozani.

¹⁰ Yobe apanga Yahova mabvero ace. (Yobe 10:1, 2; 16:20) Mwacitsandzo, pa Yobe kapitulu 3, tisapfundza kuti Yobe akhadatsukwala thangwi ya nyatwa zikhatamba iye. Pontho akhanyerezera kuti ndi Mulungu akhacitisa nyatwa zenezi. Natenepa, axamwali atatu a Yobe akhampanga mwakubwereza-bwereza kuti ndi Mulungu akhan’thabusa thangwi ya madawo ace. Mbwenye Yobe aapanga kuti anapitiriza kukhala wakukhulupirika kuna Yahova. Mafala a Yobe asapangiza kuti iye midzidzi inango akhapibva kukhala wadidi kakamwe kupiringana Mulungu. (Yobe 10:1-3; 32:1, 2; 35:1, 2) Yobe alonga kuti midzidzi inango, akhalonga pinthu pyakuphonyeka thangwi yakufuna kupangiza kuti iye apitiriza kukhala wakukhulupirika. (Yobe 6:3, 26) Natenepa, pa kapitulu 31, Yobe akhafuna kuti Yahova antawire kuti iye nee athema kutcunyuswa. (Yobe 31:35) Mbwenye Yobe nee akhafunika kukakamiza Mulungu toera ampange kuti thangwi yanji akhathabuka.

11. Nakuti Yobe apitiriza kukhala wakukhulupirika, ninji pidacita Yahova?

¹¹ Cincino tisabvesesa kuti Yobe akhadalonga munjira ineyi na Yahova thangwi akhali na uxamwali wakuwanga kakamwe, pontho akhanyindira kuti Yahova mbadacita pinthu mwakulungama. Mukupita kwa ndzidzi, Yahova alonga na Yobe, mbwenye nee ampanga kuti thangwi yanji akhathabuka. Yahova nee atcunyusa Yobe thangwi yakulonga kuti nee acita pinthu pyakuipa. M’mbuto mwace, Yahova aphedza Yobe ninga pinacita baba waufuni. Ineyi ikhali njira yadidi kakamwe yakuphedza Yobe. Natenepa, Yobe abvesesa kuti nee akhadziwa pinthu thangwi ya nyatwa zace, pontho asandikika na mafala adalonga iye mwakukhonda nyerezera. (Yobe 31:6; 40:4, 5; 42:1-6) Pinthu pyenepi pidacitikira Yobe mbapidaphedza tani anthu kale, pontho pinatiphedzambo tani lero?

12. Pinthu pidacitikira Yobe mbapidaphedza tani Aizraeli?

¹² Aizraeli mbadaphedzeka tani na pinthu pidacitikira Yobe? Aizraeli mbadapfundza na pinthu pidacitikira Yobe. Nyerezerani pidacitikira Mose. Mu ndzidzi ukhatsogolera iye dzindza ya Aizraeli, akhathimbana na pinentso pizinji. Mwakusiyana na Aizraeli akukhonda kubvera akuti basi ene akhadungunyira Yahova, Mose akhapanga Yahova pinentso pyace. (Eks. 16:6-8; Num. 11:10-14; 14:1-4, 11; 16:41, 49; 17:5) Mu ndzidzi udasandikwa iye, Mose akhafunikambo kupirira ninga pidacita Yobe. Mwacitsandzo, pikhali iwo dhuzi na kupita mu Dziko Yakupikirwa, Mose ‘alonga mwakuipirwa na mulomo wace.’ Iye nee apasa mbiri Yahova. (Mas. 106:32, 33) Na thangwi ineyi, Yahova nee atawirisa Mose kupita mu Dziko Yakupikirwa. (Dheu. 32:50-52) Kusandikwa kweneku panango kwatsukwalisa Mose. Ngakhale tenepo, iye atawira mwakucepeseka. Pinthu pidacitikira Yobe, mbapidaphedza Aizraeli akhafuna kubalwa toera kupirira mayesero. Kunyerezera pinthu pidacitikira Yobe mbukudaaphedza kudziwa njira yadidi yakulonga mabvero awo kuna Yahova mbacalira kudungunya. Iwo mbadapfundzambo kutawira mwakucepeseka kulangwa na Yahova.

13. Pidacitikira Yobe pinatiphedza tani toera kupirira? (Aheb. 10:36)

¹³ Tinapfundzanji na pidacitikira Yobe? Lero tiri kukhala mu ntsiku zakunentsa kakamwe. Natenepa, tisafunikambo kupirira mwakukhulupirika. (Lerini Ahebheri 10:36.) Anango a ife ali kutamba nyatwa ninga kuduwala, nyatwa za m’banja, kuferwa na munthu wakufunika peno nyatwa zinango. Midzidzi inango, pinthu pinalonga anango pinaticitisa kukhala pyakunentsa kupirira. (Mis. 12:18) Bukhu ya Yobe yatipfundzisa kuti tinakwanisa kulonga mabvero athu kuna Yahova mbatikhala na cinyindiro cakuti iye anatibvesera. (1 Juw. 5:14) Yahova nee anaipirwa tingampanga mabvero athu, maseze midzidzi inango tisalonga mwakukhonda nyerezera. M’mbuto mwace, iye anatipasa mphambvu na udziwisi toera tikwanise kupirira. (2 Kro. 16:9; Tiya. 1:5) Pingakhala pyakufunika iye anatisandikambo ninga pidacita iye na Yobe. Bukhu ya Yobe yatipfundzisambo kuti tinapirira tani tingapaswa uphungu, tingasandikwa kubulukira m’Bhibhlya na gulu ya Yahova peno na axamwali akukola mwauzimu. (Aheb. 12:5-7) Ninga Yobe aphedzeka thangwi ya kutawira kusandikwa mwakucepeseka, ifembo tinaphedzeka tingatawira kusandikwa mwakucepeseka. (2 Akor. 13:11) Tapfundzanji na pidacitikira Yobe? Cincino tendeni tione kuti tinaphatisira tani pinthu pidacitikira Yobe toera kuphedza anango.

PHATISIRANI BUKHU YA YOBE TOERA KUPHEDZA ANANGO

14. Tinaphedza tani anthu m’basa yakumwaza mphangwa toera abvesese kuti thangwi yanji tisathabuka?

¹⁴ Anthu azinji asabvundza kuti thangwi yanji anthu adidi asathabuka. Ife tisakomerwa kuapangiza ntawiro wakubuluka m’Bhibhlya. Kazinji kene, pakuatawira tisaapanga pinthu pidacitika m’munda wa Edheni. Panango imwe musatoma kuapanga kuti Sathani, anju wakuipa apanga banja yakutoma uthambi wakuti waacitisa kukhonda kubvera Yahova. (Gen. 3:1-6) Panango imwe musaapanga kuti pidamala kudawa Adhamu na Eva, anthu asathabuka na kufa. (Aroma 5:12) Kusiyapo pyenepi, musaapanga kuti Mulungu asiya ndzidzi unoyu toera kupangiza kuti pyonsene pidalonga Sathani ndi uthambi, pontho iye ali kuphatisira ndzidzi unoyu toera kupanga anthu kuti anadzamalisa nyatwa zonsene, anthu mbakhala kwenda na kwenda. (Apok. 21:3, 4) Ineyi ndi njira yadidi kakamwe yakuphedza anthu azinji kubvesesa kuti thangwi yanji anthu adidi asathabuka.

15. Tinaphatisira tani bukhu ya Yobe toera kuphedza anthu kudziwa kuti thangwi yanji tisathabuka? (Onanimbo mafoto.)

¹⁵ Njira inango ya kuphedza anthu kubvesesa kuti thangwi yanji tisathabuka ndi kuapanga pinthu pidacitikira Yobe. Imwe panango munatoma kuasimba thangwi yakucita mbvundzo wadidi. Buluka penepo, apangeni kuti Yobe acitambo mbvundzo ubodzi ene. Iye akhanyerezera kuti ndi Mulungu akhan’thabusa. (Yobe 7:17-21) Munthu anacedza na ife panango anadzumatirwa thangwi yakudziwa kuti pakhali na munthu unango adacitambo mbvundzo ubodzi ene. Buluka penepo, imwe panango munakwanisa kumpanga munjira yadidi kuti akhathabusa Yobe nee ndi Yahova, mbwenye ndi Sathani. Sathani acita pyenepi toera kupangiza kuti anthu asatumikira Mulungu thangwi ya pinthu piri na iwo. Maseze nee ndi Mulungu akhathabusa Yobe, iye atawirisa pyenepi kucitika thangwi akhanyindira kuti anthu akukhulupirika anapangiza kuti Sathani ndi nyauthambi. Pakumalisa, imwe munakwanisa kumpanga kuti pakumala kwa pyonsene, Yahova apasa nkhombo Yobe thangwi yakupitiriza kukhala wakukhulupirika. Natenepa, mwakukhonda tsalakana ntundu wa nyatwa, ife tinakwanisa kuphedza anango kudziwa kuti nee ndi Mulungu anacitisa nyatwa.

16. Longani pinthu pinapangiza kuti bukhu ya Yobe inakwanisa kuphedza munthu anathabuka.

¹⁶ Onani kuti bukhu ya Yobe yaphedza tani Mario. Ntsiku inango, mu caka ca 2021, mulongo m’bodzi akhamwaza mphangwa mukuphatisira telefoni. Pa ulendo wakutoma udacedza mulongo unoyu na Mario, mulongo aleri lemba, mbampanga kuti kusiyapo cidikhiro cidatipasa Mulungu, iye asabvambo maphembero athu. Pidabvundza mulongo kuti ndi api maonero ace thangwi ya lemba, Mario alonga kuti mu ndzidzi ukhaligari mulongo, akhalemba tsamba toera kupangana acibale ace thangwi akhafuna kupheka. Iye alonga: “Ine ndisakhulupira Mulungu, mbwenye ndisanyerezera kuti andisiya.” Pa ulendo waciwiri, iwo acedza thangwi ya nyatwa idatamba Yobe. Mario asankhula kuleri bukhu yonsene ya Yobe. Natenepa, mulongo wathu antumizira link ya Bhibhlya ya Dziko Ipswa. Mphapo ninji pidadzacitika? Mario adzatawira kupfundza Bhibhlya, pontho asakomerwa kupfundza pizinji thangwi ya Mulungu waufuni.

17. Thangwi yanji imwe musapereka takhuta kuna Yahova thangwi yakulembesa m’Bhibhlya pinthu pidacitikira Yobe? (Yobe 34:12)

¹⁷ Mwandimomwene, Bhibhlya iri na mphambvu yakucinja umaso wa anthu kuphatanizambo ale anathabuka. (Aheb. 4:12) Natenepa, tisapereka takhuta kuna Yahova thangwi yakulembesa m’Bhibhlya pinthu pidacitikira Yobe. (Yobe 19:23, 24) Bukhu ya Yobe isatipasa cinyindiro cakuti “Mulungu nkhabe kucita pinthu pyakuipa.” (Lerini Yobe 34:12.) Iyo isatipfundzisambo kuti thangwi yanji Mulungu asatawirisa anthu kuthabuka, pontho tinapirira tani nyatwa zenezi. Kusiyapo pyenepi, iyo isatiphedza toera kubalangaza ale anathabuka. Mu nsolo unatowera, bukhu ya Yobe inatiphedza kudziwa kuti tinapereka tani uphungu wadidi.