Atongi
10 Pidafa Abhimeleki, Tola mwana wa Puwa, mwana wa Dhodho, wa dzindza ya Isakari, abwera toera kupulumusa Izraeli.+ Iye akakhala ku Samiri kucisa ca mapiri ca ku Efraimu. 2 Iye akhala nyakutonga miseru wa Izraeli mu pyaka 23. Buluka penepo afa mbaikhwa ku Samiri.
3 Pidafa Tola, Yaire wa ku Jiliyadhi akhala nyakutonga miseru wa Izraeli pyaka 22. 4 Iye akhali na ana 30 akuti akhafamba na maburu 30, pontho iwo akhali na mizinda 30, yakuti isacemerwa Avoti-Yaire+ mpaka lero, mizinda ineyi iri mu dziko ya Jiliyadhi. 5 Buluka penepo, Yaire afa mbaikhwa ku Kamoni.
6 Aizraeli atoma pontho kucita pinthu pyakuipa pamaso pa Yahova,+ iwo atoma kutumikira Abhaale,+ madzimunthu a Astoreti, alungu a ku Aramu,* alungu a ku Sidhoni, alungu a ku Moabhe,+ alungu a Aamoni+ na alungu a Afilisti.+ Iwo asiya Yahova, pontho nee antumikira. 7 Natenepa, Yahova aipirwa kakamwe na Aizraeli, mbaapereka mʼmanja mwa Afilisti na mwa Aamoni.+ 8 Iwo athabusa Aizraeli, mbaaponderera kakamwe mu caka ceneci. Mu pyaka 18 iwo aponderera Aizraeli onsene akhali kuntunda unango wa Yordani, mu dziko ya Aamori ku Jiliyadhi. 9 Aamoni akhawambukambo Yordani toera kumenyana na dzindza ya Yuda, ya Bhenjamini na dzindza ya Efraimu; natenepa Aizraeli athabuka kakamwe. 10 Buluka penepo, Aizraeli aphemba ciphedzo+ ca Yahova, mbalonga: “Mulungu wathu, ife takudawirani, thangwi tasiya kukutumikirani mbatitumikira Abhaale.”+
11 Mbwenye Yahova apanga Aizraeli: “Kodi ine nee ndakupulumusani mʼmanja mwa Aejitu,+ Aamori,+ Aamoni, Afilisti,+ 12 Asidhoni, Amaleki na Amidhiyani mu ndzidzi ukhakupondererani iwo? Pidandiphemba imwe ciphedzo, ndakupulumusani mʼmanja mwawo. 13 Mbwenye imwe mwandisiya mbamutumikira alungu anango.+ Na thangwi ineyi, ine nee ndinakupulumusanibve.+ 14 Ndokoni kaphemba ciphedzo+ kuna alungu adasankhula imwe. Iwo anakupulumusani mungagwerwa na nyatwa.”+ 15 Natenepa, Aizraeli alonga kuna Yahova: “Ife tadawa. Citani kuna ife pinaona imwe kukhala pyadidi. Taphata miyendo, basi ene tipulumuseni lero.” 16 Penepo iwo atoma kutaya alungu akhatumikira iwo, mbatumikira Yahova,+ natenepa iye nee akwanisabve kupirira kuona Aizraeli mbakathabuka.+
17 Mukupita kwa ndzidzi, Aamoni+ agumanyiza anyankhondo awo, mbamanga misasa yawo ku Jiliyadhi. Natenepa, Aizraeli agumanyikana mbamanga misasa yawo ku Mispa. 18 Aizraeli a ku Jiliyadhi pabodzi na atsogoleri awo alonga kuna unango na ndzace: “Mbani anafuna kutitsogolera toera kumenyana na Aamoni?+ Munthu unoyu anakhala ntsogoleri wa anthu onsene a ku Jiliyadhi.”