Samweli Wakutoma

5 Afilisti pidakwata iwo Bokosi+ ya Mulungu wandimomwene ku Ebhenezeri aenda nayo ku Asidhodhe. 2 Afilisti akwata Bokosi ya Mulungu wandimomwene, apita nayo mu templo* ya mulungu wawo Dhagoni, mbaiikha dhuzi na Dhagoni.+ 3 Anthu a ku Asidhodhe pidalamuka iwo mangwana mwace namacibese, agumana kuti dzimunthu ya Dhagoni yagwa na pfufu ya mimba dhuzi na Bokosi ya Yahova.+ Penepo iwo akwata dzimunthu ya Dhagoni, mbaiikha pontho pa mbuto payo.+ 4 Pidalamuka iwo mangwana mwace namacibese, agumana kuti dzimunthu ya Dhagoni yagwa na pfufu ya mimba dhuzi na Bokosi ya Yahova. Nsolo na manja a Dhagoni pikhadagwandwa, mbapigwera dhuzi na nsuwo. Khundu idakhonda kugwandwa ndi idalandana na ntsomba.* 5 Na thangwi ineyi, anyantsembe a Dhagoni na onsene anapita mu templo ya Dhagoni ku Asidhodhe nee asaponda pa mbuto idagwa Dhagoni mpaka lero.

6 Yahova atcunyusa anthu a ku Asidhodhe, pontho acitisa anthu a ku Asidhodhe na pisa pyace kuphatwa na utenda wa nkola.+ 7 Anthu a ku Asidhodhe pidaona iwo pyenepi, alonga: “Bokosi ya Mulungu wa Izraeli nee isafunikabve kukhala na ife, thangwi iye atcunyusa ife pabodzi na mulungu wathu Dhagoni.” 8 Natenepa, iwo acemeresa atsogoleri onsene a Afilisti mbaabvundza: “Ticitenji na Bokosi ya Mulungu wa Izraeli?” Iwo atawira: “Bokosi ya Mulungu wa Izraeli isafunika kuendeswa ku Gati.”+ Penepo iwo akwata Bokosi ya Mulungu wa Izraeli, mbaenda nayo kweneko.

9 Pidaikwata iwo mbaenda nayo kweneko, Yahova atcunyusa anthu a mu nzinda unoyu, mbaacitisa kugopa kakamwe. Iye athabusa anthu a mu nzinda na utenda wa nkola, kutomera ana mpaka akulu.+ 10 Natenepa, iwo atumiza Bokosi ya Mulungu wandimomwene ku Ekroni,+ mbwenye pidafika Bokosi ya Mulungu wandimomwene ku Ekroni, anthu a kweneko atoma kukhuwa: “Iwo atibweresera Bokosi ya Mulungu wa Izraeli toera kupha ife pabodzi na mbumba yathu!”+ 11 Buluka penepo, iwo acemeresa atsogoleri onsene a Afilisti, mbaapanga: “Bulusani muno Bokosi ya Mulungu wa Izraeli, ibwezeni kukakhala iyo toera ife na mbumba yathu tikhonde kuphiwa.” Thangwi anthu onsene a mu nzinda akhagopa kufa; pontho Mulungu wandimomwene aatcunyusa.+ 12 Anthu adakhonda kufa, athabuswa na utenda wa nkola. Kukhuwa kukhacita anthu a mu nzinda toera kuphemba ciphedzo kwabveka kudzulu.