Ezekiyeli
17 Yahova alonga pontho na ine, mbandipanga: 2 “Iwe mwana wa munthu, longa nsangani ubodzi wakunentsa, pontho longa munjira yakuphipirisa thangwi ya mbumba ya Izraeli.+ 3 Apange kuti: ‘Ipi ndi pidalonga Yahova, Mbuya Wankulu Kakamwe: “Capungu cikulu+ cakuti ciri na maphapido makulu, ciri na manthenga makulu, pontho manungo ace ali na makore akusiyana-siyana, cafika ku Libhano+ mbacigwanda ntsonga ya muti wa sedhro.+ 4 Capungu ceneci cagwanda nthawi itete ya kuntsonga kakamwe mbaenda nayo ku dziko ya anyamalonda,* pontho ico caitceka mu nzinda wa anyamalonda.+ 5 Buluka penepo, cakwata mbeu ya dziko+ ineyi mbaibzwala mʼmunda wa ndimu. Ico caibzwala ninga muti* unatcekwa nʼkhundu mwa madzi mazinji. 6 Mbeu ineyi yamera, mbidzakhala muti wakubvira wa mauva,+ wakuvata kakamwe, masamba ace akhakotamira pantsi, pontho mitcitci yace ikhakula pantsi pa mataka. Natenepa, iwo wadzakhala muti wa mauva, iwo waphukira mbubulusa nthawi zipswa.+
7 “‘“Caoneka capungu cinango cikulu,+ ico cikhali na maphapido makulu na manthenga akulapha.+ Buluka penepo, na cifuno cikulu, muti wa mauva watawisa mitcitci yace kuna ico, kutali na mbuto idatcekwa iwo, iwo wanfuthulira masamba ace toera ico ciuthirire.+ 8 Iwo ukhadabzwalwa kale mʼmunda wadidi cifupi na madzi mazinji, toera ubuluse nthawi, ubale misapo, pontho toera ukhale muti ukulu wa mauva.”’+
9 “Longa kuti: ‘Ipi ndi pidalonga Yahova, Mbuya Wankulu Kakamwe: “Kodi muti unoyu unathambaruka? Kodi iwo nee unadulwa na mitcitci ene,+ nthawi zace mbazibunyala?+ Iwo unadzauma kakamwe kwakuti nkhabe kudzafunika mphambvu peno anthu azinji toera kuudula na mitcitci ene. 10 Maseze muti unoyu wadulwa mbutcekwa pa mbuto inango, kodi iwo unakula? Kodi iwo nee unadzaumiratu ungamenywa na mphepo yakumabulukiro a dzuwa? Iwo unadzauma pa mbuto idatcekwa iwo.”’”
11 Yahova alonga pontho na ine, mbandipanga: 12 “Ndaphata miyendo, panga mbumba yakukhonda bvera kuti: ‘Kodi imwe nee musabvesesa kuti pinthu pyenepi pisabvekanji?’ Apange kuti: ‘Onani! Mambo wa ku Bhabhilonya aenda ku Yerusalemu, iye akwata mambo wa kweneko pabodzi na akulu-akulu ace, mbabwerera nawo ku Bhabhilonya.+ 13 Kusiyapo pyenepi, asankhula munthu mʼbodzi wa dzindza ya mambo,+ acita naye cibverano mbanʼdumbirisa.+ Buluka penepo, iye akwata akulu-akulu a dziko ineyi,+ 14 toera umambo ufewe, ukhonde kukhala pontho wakuwanga, pontho iwo mbudapitiriza kuoneka basi ene mbadabvera cibverano cidacita iye.+ 15 Mbwenye pakumalisa, mambo wa ku Yuda asandukira mambo wa ku Bhabhilonya+ pidatuma iye anthu mbaenda ku Ejitu toera apaswe makavalo+ na anyankhondo azinji kakamwe.+ Kodi pinthu pinanfambira mwadidi? Kodi ule anacita pyenepi anasiyiwa tenepo mbakhonda kutcunyuswa? Kodi iye anakhonda kubvera cibverano mbakhonda kutcunyuswa?’+
16 “‘“Ine ndiri kudumbira mu dzina yanga,” alonga Yahova, Mbuya Wankulu Kakamwe, “iye* anadzafera ku Bhabhilonya, kunakhala mambo* adansankhula toera akhale mambo, thangwi iye apwaza dumbiro yace mbakhonda kutoweza cibverano cace.+ 17 Nsoka ukulu wa anyankhondo onsene a Farau, nee anadzamʼphedza pa nkhondo,+ angadzacita nthunda zakumenyera nkhondo na kumanga mpanda wakumenyera nkhondo toera kupha anthu azinji. 18 Iye apwaza dumbiro mbakhonda kubvera cibverano. Iye acita pinthu pyenepi pyonsene maseze akhadapikira, na thangwi ineyi, iye nee anadzapulumuka.”’
19 “‘Natenepa, ipi ndi pidalonga Yahova, Mbuya Wankulu Kakamwe: “Ine ndiri kudumbira mu dzina yanga kuti: Ine ndinadzantcunyusa thangwi iye apwaza dumbiro+ idacita iye mu dzina yanga, mbakhonda kutoweza cibverano cidacita iye pamaso panga.* 20 Ine ndinadzanteyera nsampha, iye mbamangwa na nsampha wanga.+ Ine ndinadzamʼbweresa ku Bhabhilonya, kweneko ine ndinadzantonga thangwi yakukhonda kwace kukhala wakukhulupirika kuna ine.+ 21 Anyankhondo ace onsene anafuna kuthawa anadzaphiwa na supada, mbwenye ale anafuna kusalikira anabalaliswa konsene kwene.+ Penepo imwe munadzadziwa kuti ine Yahova, ndine adapilonga.”’+
22 “‘Ipi ndi pidalonga Yahova, Mbuya Wankulu Kakamwe: “Ine ndinadzabulusa nthawi iri kuntsonga kwa muti wa sedhro+ mbandiitceka; pakati pa nthawi zace za kuntsonga, ine ndinadzabulusa nthawi itete,+ pontho ndinadzaitceka ndekhene paphiri yakulapha kakamwe.+ 23 Ine ndinadzaitceka padzulu paphiri yakulapha ya Izraeli; iyo inadzakhala muti ukulu wa sedhro, nthawi zace zinadzakula, pontho muti unoyu unadzabala misapo. Mbalame za mitundu yonsene zinadzakhala pantsi pamuti unoyu na pa nʼthundzi wa masamba ace. 24 Penepo miti yonsene ya ntsanga inadzadziwa kuti ine Yahova, ndine adapasa manyadzo muti wakulapha, mbandikuza muti wakupwazika;+ ndaumisa muti uwisi, mbandicitisa muti wakuuma kukhala pontho uwisi.+ Ine Yahova ndine adapilonga, mbandipicita.”’”