NSOLO WA REVISTA | KODI UMAMBO WA MULUNGU​—USABVEKANJI KWA IMWE?

Kodi Umambo Wa Mulungu​—Usabvekanji Kuna Yezu?

Mu utumiki wace pa dziko yapantsi, Yezu apfundzisa pinthu pizinji. Mwacitsandzo, iye apfundzisa atowereri ace kuti anaphembera tani, anakomeresa tani Mulungu, na anagumana tani kutsandzaya kwandimomwene. (Mateo 6:5-13; Marko 12:17; Luka 11:28) Mbwenye cinthu cakuti Yezu acilonga kakamwe​—cinthu cikhafuna iye kakamwe kupanga anango ndi Umambo wa Mulungu.​—Luka 6:45.

Ninga pidaona ife mu nsolo udamala, cinthu cakufunika kakamwe mu umaso wa Yezu cikhali ‘kumwaza mphangwa zadidi za Umambo.’ (Luka 8:1) Iye awangisira mbafamba makilometru mazinji mu dziko yonsene ya Israele toera kupfundzisa anthu pya Umambo wa Mulungu. Utumiki wa Yezu walembwa m’Maevanjelyu manai, mwenemu fala yakuti Umambo isagumanika m’maulendo akukwana 100. Mazinji mwa iwo asagumanika m’mafala adalonga Yezu, mbwenye iwo asapangiza basi ene mafala akucepa mwa mazinji adalonga iye thangwi ya Umambo wa Mulungu!​—Jwau 21:25.

Thangwi yanji Umambo ukhali wakufunika kakamwe kwa Yezu pikhakhala iye pa dziko yapantsi? Thangwi Yezu akhadziwa kuti akhadasankhulwa na Mulungu toera kukhala Ntongi wa Umambo. (Izaiya 9:6; Luka 22:28-30) Mbwenye Yezu nee akhadzudzumika kakamwe na kufuna utongi peno mbiri. (Mateo 11:29; Marko 10:17, 18) Yezu nee agomezera kakamwe Umambo toera kukwanirisa maphindu ace. Cinthu cikulu kakamwe cidakulumiza Yezu toera kugomezera kakamwe Umambo wa Mulungua ndi thangwi ya pinafuna kudzakwanirisa iwo kwa ule anafuna iye​—Babace wakudzulu na atowereri ace akukhulupirika.

UMAMBO UNADZACITANJI KUNA BABA WA YEZU

Yezu asafuna kakamwe Babace wakudzulu. (Misangani 8:30; Jwau 14:31) Iye asakomerwa kakamwe na makhaliro adidi a Babace, ninga ufuni Wace, ntsisi Zace, na cilungamo Cace. (Deuteronomyo 32:4; Izaiya 49:15; 1 Jwau 4:8) Natenepa, mwakukhonda penula Yezu asaida uthambi unamwazwa thangwi ya Babace wakuti Mulungu nkhabe kutsalakana kuthabuka kwa anthu, peno kuti Mulungu asafuna kuti ife tithabuke. Ineyi ndi thangwi ibodzi idacitisa Yezu kuwangisira kakamwe toera kumwaza ‘mphangwa zadidi za Umambo’​—Yezu akhadziwa kuti mukupita kwa ndzidzi, Umambo mbudacenesa dzina ya Babace. (Mateo 4:23; 6:9, 10) Kodi Umambo unadzacita tani pyenepi?

Kubulukira mu Umambo, Yahova anadzacita macinjo makulu akuti anadzaphindulisa anthu onsene. ‘Iye anadzapukuta misozi yonsene’ m’maso mwa anthu akukhulupirika. Yahova anadzamalisa mathangwi anacitisa anthu kulira, munjira yakuti “kufa hakunadzakhalapo pontho tayu, nee kutsukwala, nee kulira, nee nyatwa.” (Apokalipse 21:3, 4) Mu kuphatisira Umambo, Mulungu anadzamalisa nyatwa zonsene za anthu.b

Si pyakudzumisa tayu kuti Yezu akhafuna kakamwe kulonga na anthu thangwi ya Umambo! Iye akhadziwa kuti Umambo mbudapangiza kuti Babace ndi wamphambvu kakamwe na wantsisi. (Tyago 5:11) Yezu akhadziwambo kuti Umambo unadzaphindulisa anthu akukhulupirika akuti iye asaafuna kakamwe.

KODI UMAMBO UNADZACITANJI KWA ANTHU AKUKHULUPIRIKA?

Kale kakamwe mbadzati kubwera pa dziko yapantsi, Yezu akhali kudzulu pabodzi na Babace. Baba aphatisira Mwanace toera kucita pinthu pyonsene​—kutomera pinthu pyakudzumisa piri kudzulu, nyenyezi zakukhonda lengeseka na magalasya kuphatanizambo dziko yapantsi yakubalika na pinyama pyonsene piri mwenemu. (Akolose 1:15, 16) Mbwenye mwa pyonsene, Yezu akhakomerwa kakamwe na “ana a anthu.”​—Misangani 8:31.

Ufuni wa Yezu kwa anthu wapangizika kakamwe mu utumiki wace. Kubulukira pakutoma, iye alongeratu kuti akhadadza pa dziko yapantsi toera kumwaza “mphangwa zadidi” kwa ale akhafuna ciphedzo. (Luka 4:18) Mbwenye Yezu acita pizinji kupiringana kulonga kuti asafuna kuphedza anthu. Mwakubwereza-bwereza, iye acita pinthu pidapangiza ufuni wace kwa anthu. Mwacitsandzo, pa ndzidzi udagumanyikana mwinji wa anthu toera kubva pikhafuna iye kulonga, Yezu “aabvera ntsisi mbawangisa atenda awo.” (Mateo 14:14) Mamuna unango akhali na utenda wakugopswa kakamwe, mudapangiza iye cikhulupiro cakuti Yezu mbadakwanisa kumuwangisa khala akhafuna, Yezu akulumizwa na ufuni. Iye awangisa mamuna unoyu. Yezu alonga: “Ndinafuna, uwange mphapo.” (Luka 5:12, 13) Mudaona iye Mariya mbakalira thangwi ya kufa kwa m’bale wace, Lazaro, Yezu ‘atsukwala,’ ‘anentseka’ ‘mbalirambo.’ (Jwau 11:32-36) Buluka penepo, Yezu acita cinthu cakudzumisa kakamwe​—iye alamusa Lazaro wakuti pakhadapita ntsiku zinai mbadamala kale kufa!​—Jwau 11:38-44.

Yezu akhadziwa kuti ciphedzo cidapereka iye pa ndzidzi unoyu cikhali ca ndzidzi wakucepa. Yezu akhadziwambo kuti mukupita kwa ndzidzi anthu onsene adawangisa iye mbadaduwala pontho, onsenembo adalamusa iye mbadafa pontho. Mbwenye Yezu akhadziwa kuti Umambo wa Mulungu mbudadzamalisa nyatwa zenezi kwenda na kwenda. Na thangwi ineyi, Yezu nee acita pirengo basi, mwaphinga, iye amwaza ‘mphangwa zadidi za Umambo.’ (Mateo 9:35) Pirengo pidacita iye pyapangiza pang’ono pinthu pikulu pyakuti mwakukhonda dembuka Umambo wa Mulungu unadzapicita pa dziko yonsene yapantsi. Onani pinapikira Bhibhlya thangwi ya ndzidzi unoyu.

Nkhabe kudzaonekabve nyatwa za ungumi.

‘Pa ndzidzi unoyu, maboliboli anadzaona pontho, madrodombo anadzabva na makutu awo. Anyampfutete anadzafamba mbanumpha ninga mbawala, alembo anacimwana kulonga anadzakhuwa na kusekera.’ Kusiyapo pyenepi, “nee munthu m’bodzi anakhala pa dziko anadzalonga kuti: ‘Ndikuduwala.’”​—Izaiya 33:24; 35:5, 6.

Kufa kunadzamala.

‘Anyakulungama anatambira dziko yapantsi, mbakhala mwenemu kwenda na kwenda.’​—Masalmo 37:29.

“Iye anadzafudza kufa kwenda na kwenda! Mbuya Yahova Wamphambvu Zonsene anadzapukuta misozi ya m’maso mwa anthu onsene.”​—Izaiya 25:8, Tradução do Novo Mundo.

Ale adafa anadzalamuswa.

‘Anthu onsene anagona mu nthumbi anadzabva mafala ace. Penepo iwo anadzalamuka.’​—Jwau 5:28, 29.

“Kunadzaoneka kulamuka muli akufa.”​—Machitiro 24:15.

Nkhabe anafuna kudzasowa pakukhala peno basa.

‘Munthu onsene, nyumba inamanga iye njace ene kwenda na kwenda, munda wa mawuva unatceka iye, vinyu yace inadzamwiwa na iye. Ande, anthu anga, anadzakomerwambo na pinthu pyonsene pidaona iwo na mabasa a manja awo.’​—Izaiya 65:21, 22.

Nkhabe kudzaonekabve nkhondo.

“Ndiye anamalisa nkhondo pantsi ponsene.”​—Masalmo 46:9.

‘Madziko hanacitiranabve nkhondo tayu, mbakhonda kupfundza pontho pya nkhondo.’​—Izaiya 2:4.

Nkhabe kudzaoneka pontho njala.

‘Pantsi pano panadzabala misapo yace; Mulungu, Mulungu wathu anadzatipasa nkhombo.’​—Masalmo 67:6.

‘Pa dziko yonsene panadzaoneka utende, utende wa mapira na pa mapiri ene.’​—Masalmo 72:16.

Nkhabe kudzaonekabve utcerengi.

“Nyakutcerenga nee anadzaduwaliwa ndzidzi onsene.”​—Masalmo 9:18, NM.

‘Anadzapulumusa nyakutcerenga anakhuwa mbaphemba ciphedzo, pontho anaphedza amphawi akusowa mbvunuliri. Anabvera ntsisi anthu akucepeseka, mbakoya moyo wa ale anatcerenga.’​—Masalmo 72:12, 13.

Munadinga imwe mapikiro anewa analonga pinafuna kudzacita Umambo wa Mulungu, kodi musakwanisa kuona thangwi yanji Umambo ukhali wakufunika kakamwe kwa Yezu? Pikhakhala iye pa dziko yapantsi, Yezu akhafuna kakamwe kulonga pya Umambo wa Mulungu kwa munthu onsene akhafuna kubva. Iye acita pyenepi thangwi akhadziwa kuti Umambo mbudamalisa nyatwa zonsene zinaona ife lero.

Kodi mapikiro a Bhibhlya analonga pya Umambo asakutundusani? Khala asakutundusani, munakwanisa tani kupfundza pizinji thangwi ya Umambo? Pontho munacitanji toera mukwanise kutambira nkhombo za Umambo? Nsolo wakumalisa wa khundu ino unadzatawira mibvundzo ineyi.

[Pidzindikiro pyapantsi]