NSOLO WA PFUNDZIRO 49
Kodi Yahova Anatawira Maphembero Anga?
“Imwe munadzandicemera mbamubwera mpaka kuna ine mu phembero, pontho ine ndinadzakubveserani.”—YER. 29:12.
NYIMBO 41 Bveserani Phembero Yanga
PINAFUNA IFE KUPFUNDZAa
1-2. Thangwi yanji panango tinanyerezera kuti Yahova nee ali kutawira maphembero athu?
“TSANDZAYA kakamwe pakulambira Yahova, iye anadzakupasa pinafuna ntima wako.” (Mas. 37:4) Pikiro ineyi ndi yakutsandzayisa kakamwe! Mphapo tisafunika kudikhira kuti Yahova anatipasa pyonsene pinaphemba ife mu ndzidzi ubodzi ene? Thangwi yanji mbvundzo unoyu ndi wakufunika kakamwe? Onani pitsandzo ipi: Mulongo unango wakukhonda manga banja acita phembero toera aende kakurusari Xikola ya Amwazi Mphangwa a Umambo. Mbwenye papita pyaka pizinji iye nee kucemerwa. M’bale aphemba Yahova toera awangise utenda wace kuti akwanise kucita pizinji mu mpingo. Mbwenye iye nee awanga. Anyakubala Acikristu acita phembero toera mwanawo apitirize mu undimomwene. Mbwenye mwanawo asiya kutumikira Yahova.
2 Panango imwe mwaphembambo cinthu kuna Yahova, mbwenye nee mwapaswa. Natenepa panango munanyerezera kuti Yahova asatawira maphembero a anthu anango, mbwenye nee asatawira maphembero anu. Peno panango munanyerezera kuti mwacita cinthu cakuipa. Mulongo Janiceb anyerezerambo tenepo. Iye na mamunace acita phembero kuna Yahova toera atumikire ku Bheteli. Iye alonga: “Ine ndikhali na cinyindiro cakuti mbatidaenda katumikira ku Bheteli mwakukhonda dembuka.” Mbwenye papita pyaka nee kucemerwa: Janice alonga: “Ine ndatsukwala, pontho ndadzudzumika. Ine ndabvundzika khala ndacita cinthu cidatsukwalisa Yahova. Ine ndaphemba kakamwe toera kuenda ku Bheteli. Mphapo thangwi yanji iye nee atawira phembero yanga?”
3. Ndi mibvundzo ipi inafuna ife kutawira mu nsolo uno?
3 Midzidzi inango panango tinabvundzika khala Yahova asabvesera maphembero athu. Ngakhale atumiki anango akukhulupirika akale abvundzikambo tenepo. (Yobe 30:20; Mas. 22:2; Abha. 1:2) Ninji pinafuna kukupasani cinyindiro cakuti Yahova anatawira maphembero anu? (Mas. 65:2) Toera kutiphedza kutawira mbvundzo unoyu, pakutoma tisafunika kutawira mibvundzo iyi: (1) Kodi Yahova anacitanji? (2) Kodi Yahova asafuna kuti ticitenji? (3) Thangwi yanji panango tinafunika kucinja pinthu pinaphemba ife?
KODI YAHOVA ANACITANJI?
4. Mwakubverana na Yeremiya 29:12, Yahova apikiranji?
4 Yahova apikira kuti anabvesera maphembero athu. (Lerini Yeremiya 29:12.) Mulungu wathu asafuna kakamwe atumiki ace akukhulupirika, natenepa iye nee anasiya kubvesera maphembero awo. (Mas. 10:17; 37:28) Mbwenye pyenepi nee pisabveka kuti iye anatipasa pinthu pyonsene pinaphemba ife. Panango tinafunika kudikhira mpaka mu dziko ipswa toera tipaswe pinthu pinango pinaphemba ife.
5. Yahova asanyerezeranji mu ndzidzi unabvesera iye maphembero athu? Fokotozani.
5 Yahova asanyerezera cifuniro cace mu ndzidzi unabvesera iye maphembero athu. (Iza. 55:8, 9) Cibodzi mwa cifuniro cace ndi cakuti dziko yapantsi idzale na anthu akuti asambvera mwakutsandzaya ninga ntongi wawo. Mbwenye Sathani alonga kuti anthu mbadakhala akutsandzaya angatongana okhene. (Gen. 3:1-5) Toera kupangiza kuti pidalonga Sathani ndi uthambi, Yahova atawirisa anthu kuti atongane okhene. Mbwenye utongi wa anthu usabweresa nyatwa zizinji kakamwe lero. (Ekle. 8:9) Ife tisadziwa kuti Yahova nee anamalisa nyatwa zenezi zonsene cincino. Thangwi iye angacita pyenepi, panango anthu anango ananyerezera kuti utongi wa anthu ndi wadidi, pontho unakwanisa kumalisa nyatwa za anthu.
6. Thangwi yanji tisafunika kukhala na cinyindiro cakuti ndzidzi onsene Yahova asacita pinthu mwaufuni na mwakulungama?
6 Panango Yahova anatawira maphembero athu munjira zakusiyana. Mwacitsandzo, pikhaduwala Mambo Ezekiya, iye adembetera Yahova toera amuwangise. Yahova atawira phembero yace mbamuwangisa. (2 Ama. 20:1-6) Citsandzo cinango ndi ca mpostolo Paulu. Iye aphemba Yahova toera abuluse ‘munga m’manungo mwace,’ pontho panango munga unoyu ukhali utenda, mbwenye Yahova nee amalisa nyatwa zace. (2 Akor. 12:7-9) Onanimbo citsandzo ca mpostolo Pedhru na Tiyago. Mambo Herodhi akhafuna kuapha. Mpingo ukhacita phembero toera Pedhru akhonde kuphiwa. Pontho panango iwo acitambo phembero ibodzi ene toera Tiyago akhonde kuphiwa. Ngakhale tenepo, Tiyago aphiwa, mbwenye Pedhru apulumuswa mwacirengo. (Mabasa 12:1-11) Panango tinabvundzika: ‘Thangwi yanji Yahova apulumusa Pedhru mbakhonda kupulumusa Tiyago?’ Bhibhlya nee isalonga.c Mbwenye ife tinakwanisa kukhala na cinyindiro cakuti Yahova “cipo asacita pinthu pyakukhonda kulungama.” (Dheu. 32:4) Pontho ife tisadziwa kuti Pedhru na Tiyago akhali akutawirika kuna Yahova. (Apok. 21:14) Midzidzi inango, panango Yahova nee anatawira maphembero athu munjira ikhadikhira ife. Mbwenye nakuti tisanyindira kuti ndzidzi onsene Yahova asacita pinthu mwaufuni na mwakulungama, ife nee tinadungunya na njira inatawira iye maphembero athu.—Yobe 33:13.
7. Ndi pinthu pipi pinafunika ife kucalira, pontho thangwi yanji?
7 Ife tisafunika kucalira kulandanisa pinthu pinaticitikira na pinacitikira anango. Mwacitsandzo, panango tinaphemba Yahova cinthu cinafuna ife, iye mbakhonda kucita cinthu cidaphemba ife. Mbwenye mukupita kwa ndzidzi mbationa kuti munthu unango aphemba cinthu cibodzi cene, pontho Yahova acita pidaphemba iye. Ndi pyenepi pidacitika kuna mulongo anacemerwa Anna. Iye acita phembero toera mamunace anacemerwa Mateu awange utenda wa kankro. Mu ndzidzi ubodzi ene, alongo awiri akugwesera akhathimbanambo na utenda ubodzi ene. Natenepa, mulongo Anna acita phembero kuna Yahova toera awangise mamunace pabodzi na alongo anewa. Alongo anewa awanga, mbwenye mamunace alowa. Na thangwi ineyi, Anna akhabvundzika khala alongo anewa awanga thangwi ya ciphedzo ca Yahova. Khala ndi Yahova adaaphedza, thangwi yanji iye nee atawira phembero yace mbawangisambo mamunace? Mwandimomwene, ife nee tisadziwa kuti thangwi yanji alongo anewa awanga. Pinadziwa ife ndi pyakuti Yahova anadzamalisa nyatwa zonsene zinathimbana na ife, pontho iye asafuna kakamwe kulamusa muli akufa axamwali ace adafa.—Yobe 14:15.
8. (a) Mwakubverana na Izaiya 43:2, Yahova asatiphedza tani? (b) Phembero inatiphedza tani mu ndzidzi unathimbana ife na nyatwa? (Onani vidhyu ya nsolo wakuti Phembero Isatiphedza Toera Kupirira.)
8 Ndzidzi onsene Yahova anatiphedza. Ninga Babathu waufuni, Yahova nee asakomerwa angationa mbatithabuka. (Iza. 63:9) Ngakhale tenepo, iye nee asacitisa kuti tikhonde kuthabuka na nyatwa zonsene zakuti zisalandaniswa na mikulo peno malirimi a moto. (Lerini Izaiya 43:2.) Mbwenye iye apikira kutiphedza tingathimbana na nyatwa zenezi. Pontho nee anatawirisa kuti nyatwa zenezi zifudze uxamwali wathu na iye. Kusiyapo pyenepi, Yahova asatipasambo nzimu wace wakucena toera kutiphedza kupirira nyatwa zenezi. (Luka 11:13; Afil. 4:13) Na thangwi ineyi, ife tiri na cinyindiro cakuti ndzidzi onsene Yahova anatiphedza toera kupirira nyatwa na kupitiriza kukhala akukhulupirika kuna iye.d
YAHOVA ASAFUNA KUTI TICITENJI?
9. Mwakubverana na Tiyago 1:6, 7, thangwi yanji tisafunika kunyindira kuti Yahova anatiphedza?
9 Yahova asafuna kuti tin’nyindire. (Aheb. 11:6) Midzidzi inango nyatwa zathu zinaoneka ninga ndi zakunentsa kakamwe toera kuzipirira. Panango tinatoma kupenula khala Yahova anatiphedza peno nkhabe. Mbwenye Bhibhlya isatipasa cinyindiro cakuti na mphambvu za Mulungu, ife tinakwanisa “kukwira mpanda.” (Mas. 18:29) Natenepa, m’mbuto mwakupenula khala Yahova anatiphedza peno nkhabe, ife tisafunika kucita phembero na cikhulupiro, mbatinyindira kuti Yahova anatawira maphembero athu.—Lerini Tiyago 1:6, 7.
10. Perekani citsandzo cinapangiza kuti tinacita tani pinthu mwakubverana na maphembero athu?
10 Yahova asafuna kuti ticite pinthu mwakubverana na maphembero athu. Mwacitsandzo, m’bale panango anaphemba Yahova toera am’phedze kugumana ndzidzi kubasa kwace kuti akwanise kuenda ku nsonkhano wa gawo. Yahova anatawira tani phembero ineyi? Panango iye anapasa cipapo m’bale unoyu toera akwanise kuphemba patrau wace. Mbwenye m’bale asafunika kuenda kuna patrau wace mbalonga naye. Panango iye anafunika kucita phembo ineyi mwakubwereza-bwereza. Panango iye anaperekeka toera kuphata basa ntsiku zinango. Pontho khala ndi pyakufunika, panango iye anampanga toera akhonde kulipwa ntsiku zenezi zinafuna iye kuenda ku nsonkhano.
11. Thangwi yanji tisafunika kucita phembero mwakubwereza-bwereza thangwi ya pinthu pinatidzudzumisa?
11 Yahova asafuna kuti ticite phembero mwakubwereza-bwereza thangwi ya pinthu pinatidzudzumisa. (1 Ates. 5:17) Yezu alonga kuti pinthu pinango pinaphemba ife nee tinapipaswa mu ndzidzi ubodzi ene. (Luka 11:9) Mbwenye lekani kusiya kucita phembero. Citani phembero na ntima onsene, pontho mwakubwereza-bwereza. (Luka 18:1-7) Tingapitiriza kucita phembero thangwi ya pinthu pinafuna ife, tinapangiza kuna Yahova kuti mwandimomwene tisafunadi pinthu pinaphemba ife. Kusiyapo pyenepi, tinapangiza kuti tisakhulupira kuti iye anakwanisa kutiphedza.
THANGWI YANJI PANANGO TINAFUNIKA KUCINJA PINTHU PINAPHEMBA IFE?
12. (a) Ndi mbvundzo upi wakutoma unafunika ife kucitika, pontho thangwi yanji? (b) Tinakhala tani na cinyindiro cakuti maphembero athu asapangiza cilemedzo kuna Yahova? (Onani bokosi ya nsolo wakuti “Kodi Maphembero Anga Asapangiza Cilemedzo Kuna Yahova?”)
12 Tingakhonda kupaswa cinthu cidaphemba ife m’phembero, tisafunika kucitika mibvundzo mitatu. Wakutoma: ‘Kodi ndiri kuphemba munjira yadidi?’ Kazinji kene tisanyerezera kuti tisadziwa pinthu pyadidi kuna ife. Mbwenye pinthu pinaphemba ife, panango nee pinatiphedza mu ndzidzi uzinji. Khala tiri kucita phembero thangwi ya nyatwa inathimbana na ife, panango pana njira yadidi kakamwe yakumalisa nyatwa ineyi, kupiringana njira inaphemba ife. Pontho pinthu pinango pinaphemba ife panango nee pisabverana na cifuno ca Yahova. (1 Juw. 5:14) Onani citsandzo ca banja idalongwa pa ndima yakutoma. Iwo aphemba Yahova toera mwanawo apitirize mu undimomwene. Phembo ineyi isaoneka ninga ndi yadidi. Mbwenye Yahova nee asatikakamiza toera tintumikire. Iye asafuna kuti tonsene, kuphatanizambo ana asankhule okha kumulambira. (Dheu. 10:12, 13; 30:19, 20) Natenepa anyakubala akhafunika kuphemba Yahova toera aaphedze kupfundzisa mwadidi mwanawo kuti afune Yahova mbakhala xamwali Wace.—Mis. 22:6; Aef. 6:4.
13. Mwakubverana na Ahebheri 4:16, ndi mu ndzidzi upi unafuna kutiphedza Yahova? Fokotozani.
13 Mbvundzo waciwiri: ‘Kodi ndi ndzidzi wakuthema toera Yahova andipase pinthu pidaphemba ine?’ Panango tinanyerezera kuti tisafunika kutawirwa maphembero athu mu ndzidzi ubodzi ene. Mbwenye Yahova asadziwa ndzidzi wakuthema toera kutiphedza. (Lerini Ahebheri 4:16.) Tingakhonda kutambira cinthu cidaphemba ife mu ndzidzi ubodzi ene, panango tinanyerezera kuti Yahova akhonda. Mbwenye panango iye anatawira phembero yathu mu ndzidzi unango. Mwacitsandzo, nyerezerani m’bale adalongwa pa ndima yakutoma kuti aphemba Yahova toera awangiswe utenda wace. Yahova mbadamuwangisa mwacirengo, Sathani panango mbadalonga kuti m’bale unoyu asapitiriza kutumikira Yahova basi ene thangwi awangiswa utenda wace. (Yobe 1:9-11; 2:4) Kusiyapo pyenepi, Yahova akhazikisa kale ndzidzi toera kumalisa mautenda onsene. (Iza. 33:24; Apok. 21:3, 4) Mpaka ndzidzi unoyu, ife nee tisafunika kudikhira kuwangiswa mwacirengo. Natenepa, m’bale unoyu panango mbadaphemba Yahova toera ampase mphambvu na ntendere wa m’manyerezero kuti akwanise kupirira utenda wace mbapitiriza kuntumikira mwakukhulupirika.—Mas. 29:11.
14. Mwapfundzanji na citsandzo ca Janice?
14 Nyerezerani citsandzo ca Janice, adaphemba Yahova toera atumikire ku Bheteli. Pakupita pyaka pixanu iye adzindikira kuti Yahova atawira phembero yace munjira inango. Iye alonga: “Yahova aphatisira ndzidzi unoyu toera kundipfundzisa na kundiphedza toera ndikhale Nkristu wadidi kakamwe. Ine ndikhafunika kunyindira kakamwe Yahova, pontho ndikhafunika kucita pfundziro ya munthu paekha munjira yadidi kakamwe. Kusiyapo pyenepi, ndikhafunika kudzindikira kuti ndinakwanisa kukhala wakutsandzaya mwakukhonda tsalakana kunatumikira ine Yahova.” Mukupita kwa ndzidzi, mamunace Janice acemerwa toera atumikire ninga muyang’aniri wa cisa pabodzi na iye. Thangwi ya pinthu pidancitikira, Janice alonga: “Yahova atawira maphembero anga munjira yakuti nee ndikhaidikhira. Papita ndzidzi toera ndibvesese kuti ntawiro udandipasa Yahova ukhali muoni wadidi kakamwe. Ine ndisapereka takhuta kakamwe thangwi yakukhala na mwai wakuona ufuni wace na kukoma ntima kwace.”
Mungaona kuti Yahova nee ali kutawira phembero yanu, phembani pinthu pinango (Onani ndima 15)f
15. Thangwi yanji panango tinafunika kuphemba pinthu pizinji m’maphembero athu? (Onanimbo mafoto.)
15 Mbvundzo wacitatu: ‘Kodi ndisafunika kuphemba cinthu cinango?’ Maseze ndi pyadidi kulonga cinthu cinafuna ife m’phembero, midzidzi inango ndi pyadidi kuphemba pinthu pizinji toera tikwanise kuona pinafuna Yahova kuna ife. Onani citsandzo ca mulongo adaphemba Yahova toera aende kakurusari Xikola ya Amwazi Mphangwa a Umambo. Iye akhafuna kuenda ku xikola ineyi toera akwanise kutumikira ku mbuto yakuti iri na amwazi mphangwa akucepa. Natenepa ndzidzi ukhapitiriza iye kuphemba toera kuenda kuxikola ineyi, iye akhafunikambo kuphemba Yahova toera am’phedze kudzindikira miyai inango yakuthimizira utumiki wace. (Mabasa 16:9, 10) Buluka penepo, iye akhafunika kucita pinthu mwakubverana na phembero yace, mbabvundza muyang’aniri wa cisa khala pana mpingo wa padhuzi unafuna ciphedzo ca apainiya. Peno akhafunika kutumiza tsamba ku ofesi ya filiali toera kuphemba cisa cinafunika amwazi mphangwa a Umambo azinji.e
16. Tinakwanisa kukhala na cinyindiro cipi?
16 Ninga pidapfundza ife mu nsolo, ife tinakwanisa kukhala na cinyindiro cakuti Yahova anatawira maphembero athu mwaufuni na mwakulungama. (Mas. 4:3; Iza. 30:18) Midzidzi inango panango nee tinatawirwa munjira ikhadikhira ife. Mbwenye Yahova cipo anasiya kubvesera maphembero athu. Iye asatifuna kakamwe, pontho cipo anatisiya. (Mas. 9:10) Natenepa, pitirizani ‘kun’nyindira ndzidzi onsene,’ mbamufungula ntima wanu kuna iye m’phembero.—Mas. 62:8.
NYIMBO 43 Phembero Yakupereka Takhuta
a Nsolo uno unafokotoza kuti thangwi yanji tinakwanisa kunyindira kuti ndzidzi onsene Yahova anatawira maphembero athu mwaufuni na mwakulungama.
b Madzina anango acinjwa.
c Onani nsolo wakuti “Musanyindira Kuti Yahova Asacita Pinthu Munjira Yadidi?” mu Ncenjezi wa Fevereiro wa 2022 ndima 3-6.
d Toera kudziwa pizinji kuti Yahova asatiphedza tani toera kupirira nyatwa, onani mu jw.org vidhyu ya nsolo wakuti Phembero Isatiphedza Toera Kupirira.
e Toera kudziwa pinafunika imwe kucita kuti mutumikire ku dziko inango, onani bukhu yakuti Organizados Para Fazer a Vontade de Jeová, nsolo 10 ndima 6-9.
f FOTO: Alongo awiri ali kucita phembero mbadzati kuprenxeri petisau toera kuenda ku Xikola ya Amwazi Mphangwa a Umambo. Mukupita kwa ndzidzi, m’bodzi acemerwa toera kuenda ku xikola ineyi, mbwenye unango nkhabe. M’mbuto mwakutsukwala thangwi yakukhonda kucemerwa ku xikola ineyi, iye ali kucita phembero kuna Yahova toera am’phedze kugumana miyai inango yakuthimizira utumiki wace. Buluka penepo, iye ali kulemba tsamba toera kudziwisa ofesi ya Filiali kuti asafuna kuenda katumikira ku mbuto iri na amwazi mphangwa akucepa.