NSOLO WA PFUNDZIRO 47
Tinapitiriza Tani Kufunana Kakamwe Unango na Ndzace?
“Tendeni tipitirize kufunana unango na ndzace, thangwi ufuni usabuluka kuna Mulungu.”—1 JUW. 4:7.
NYIMBO 109 Tifunane na Ntima Onsene
PINAFUNA IFE KUPFUNDZAa
1-2. (a) Thangwi yanji mpostolo Paulu alonga kuti ufuni ndi “cinthu cikulu kakamwe”? (b) Ndi mibvundzo ipi inafuna kutawira ife mu nsolo uno?
PIDALONGA mpostolo Paulu pya cikhulupiro, cidikhiro na ufuni, iye amalisa na mafala akuti: ‘Cikulu kakamwe m’makhaliro anewa ndi ufuni.’ (1 Akor. 13:13) Thangwi yanji Paulu alonga pyenepi? Ntsogolo, ife nee tinadzafunikabve kukhulupira mapikiro a Mulungu a dziko ipswa peno kudikhira mapikiro anewa toera akwanirisike, thangwi mu ndzidzi unoyu iwo anadzakwanirisika. Mbwenye ndzidzi onsene tinadzafunika kufuna Yahova na anthu. Mwandimomwene, ufuni wathu unapitiriza kuthimizirika kwenda na kwenda.
2 Nakuti tisafunika kufunana ndzidzi onsene, mu nsolo uno tinatawira mibvundzo mitatu. Wakutoma, thangwi yanji tisafunika kufunana unango na ndzace? Waciwiri, tinapangiza tani kuti tisafunana unango na ndzace? Wacitatu, tinapitiriza tani kufunana kakamwe unango na ndzace?
THANGWI YANJI TISAFUNIKA KUFUNANA UNANGO NA NDZACE?
3. Thangwi yanji tisafunika kufunana unango na ndzace?
3 Thangwi yanji ndi pyakufunika kuna ife kufunana unango na ndzace? Thangwi tingafuna abale na alongo athu, tinapangiza kuti ndife Akristu andimomwene. Yezu apanga apostolo ace kuti: “Mungafunana unango na ndzace, anthu onsene anadzindikira kuti ndimwe anyakupfundza anga.” (Juw. 13:35) Kusiyapo pyenepi, kufunana unango na ndzace kusaticitisa kukhala akuphatana. Paulu alonga kuti ufuni “usaphedza anthu toera kukhala akuphatana kakamwe.” (Akol. 3:14) Mbwenye pana thangwi inango yakufunika kakamwe inaticitisa kufunana unango na ndzace. Mpostolo Juwau alemba: “Ule anafuna Mulungu, asafunikambo kufuna m’bale wace.” (1 Juw. 4:21) Tingafunana unango na ndzace, tinapangiza kuti tisafuna Mulungu.
4-5. Perekani citsandzo cinapangiza kuti kufuna Mulungu kusabverana tani na kufunana kwathu unango na ndzace.
4 Kufuna Mulungu kusabverana tani na kufuna abale na alongo athu? Mwacitsandzo, nyerezerani kubverana kwa ntima wathu na makhundu anango a manungo athu. Dotoro angaphata nkono wathu toera kuona khala uli na mphambvu peno nkhabe, panango iye anakwanisa kudziwa khala ntima wathu uli mwadidi peno nkhabe. Tisapfundzanji na citsandzo ceneci?
5 Nakuti dotoro angaphata nkono wathu asakwanisa kudziwa khala ntima wathu uli mwadidi peno nkhabe, munjira ibodzi ene, ife tinakwanisa kuona khala tisafuna kakamwe Mulungu peno nkhabe tingadinga ufuni wathu kuna anango. Tingadzindikira kuti ufuni wathu kuna abale na alongo uli kuthowa, ndi cipangizo cakuti ufuni wathu kuna Mulungu uli kuthowambo. Mbwenye tingafuna abale na alongo athu ndzidzi onsene, tinadziwa kuti tisafuna kakamwe Mulungu.
6. Thangwi yanji tisafunika kudzudzumika tingaona kuti ufuni wathu kuna abale na alongo uli kuthowa? (1 Juw. 4:7-9, 11)
6 Ife tisafunika kudzudzumika tingaona kuti ufuni wathu kuna abale na alongo athu uli kuthowa. Thangwi yanji? Thangwi pyenepi pisapangiza kuti uxamwali wathu na Yahova uli kufewa. Mpostolo Juwau apangiza pyenepi mu ndzidzi udalonga iye kuti: “Ule anakhonda kufuna m’bale wace anaona iye, anacimwana kufuna Mulungu, wakuti iye nkhabe kumuona.” (1 Juw. 4:20) Mafala anewa asatipfundzisanji? Yahova anakomerwa na ife basi ene khala ‘tisafunana unango na ndzace.’—Lerini 1 Juwau 4:7-9, 11.
TINAPANGIZA TANI KUTI TISAFUNANA UNANGO NA NDZACE?
7-8. Tinapangiza tani kuti tisafunana unango na ndzace?
7 Mwakubwereza-bwereza Mafala a Mulungu asatikulumiza toera “kufunana unango na ndzace.” (Juw. 15:12, 17; Aroma 13:8; 1 Ates. 4:9; 1 Ped. 1:22; 1 Juw. 4:11) Mbwenye Ufuni ndi n’khaliro wa muntima mwathu, pontho nkhabe munthu anakwanisa kuuona. Mphapo tinapangiza tani kuti tisafuna abale na alongo athu? Kubulukira m’mafala na m’macitiro athu.
8 Pana njira zizinji zakupangiza kuti tisafuna abale na alongo athu. Onani pitsandzo pingasi: “Longani undimomwene kuna unango na ndzace.” (Zak. 8:16) “Pitirizani kukhala muntendere unango na ndzace.” (Marko 9:50) “Khalani akutoma pakupangiza cilemedzo kuna unango na ndzace.” (Aroma 12:10) “Tambiranani unango na ndzace.” (Aroma 15:7) ‘Pitirizani kulekererana unango na ndzace.’ (Akol. 3:13) “Pitirizani kuthukulirana mitolo ya unango na ndzace.” (Agal. 6:2) ‘Pitirizani kubalangazana unango na ndzace.’ (1 Ates. 4:18) ‘Pitirizani kuwangisana unango na ndzace.’ (1 Ates. 5:11) ‘Citiranani phembero unango na ndzace.’—Tiya. 5:16.
Tinaphedza tani m’bale peno mulongo anathimbana na nyatwa? (Onani ndima 7-9)
9. Thangwi yanji kubalangaza anango ndi ibodzi mwa njira zakupangiza ufuni? (Onanimbo foto.)
9 Tendeni tione ibodzi mwa njira zakupangiza ufuni kuna anango. Paulu alonga: ‘Pitirizani kubalangazana unango na ndzace.’ Thangwi yanji kubalangaza anango ndi kwakufunika kakamwe toera kupangiza ufuni? Mwakubverana na bukhu inango, fala idaphatisira Paulu yakuti “kubalangaza” isabveka “kukhala cifupi na munthu unango toera kumuwangisa mu ndzidzi unathimbana iye na nyatwa zizinji.” Natenepa tingabalangaza m’bale peno mulongo anathimbana na nyatwa, tinamphedza toera apitirize kutumikira Yahova mwakukhulupirika. Pontho ndzidzi onsene unabalangaza ife m’bale peno mulongo, tisapangiza kuti tisanfuna.—2 Akor. 7:6, 7, 13.
10. Kubvera ntsisi kusabverana tani na kubalangaza anango?
10 Kubvera ntsisi anango kusabverana na kubalangaza anango. Munjira ipi? Ule anabvera ntsisi munthu anathimbana na nyatwa, iye asafuna kum’balangaza na kucita pinthu toera kumphedza. Natenepa, kubvera ntsisi anango kusatiphedza toera kuabalangaza. Paulu afokotoza kuti njira inabvera ntsisi Yahova anthu, isankulumiza toera kuabalangaza. Iye alonga kuti Yahova ndi ‘Baba wantsisi zikulu na Mulungu wacibalangazo.’ (2 Akor. 1:3) Pa lemba ineyi, Paulu aphatisira mafala akuti “wantsisi zikulu” toera kupangiza mabvero asakhala na munthu anabvera ntsisi anango. Natenepa, Mulungu asacemerwa Baba peno Mwanaciro wa ntsisi zikulu thangwi iye asabvera ntsisi kakamwe anthu. Pontho ntsisi zenezi zisankulumiza toera kutibalangaza “mu nyatwa zathu zonsene.” (2 Akor. 1:4) Ninga madzi adidi akuti asapha nyota, Yahova asabalangaza ale anatsukwala. Tinabverambo tani ntsisi anango mbatiabalangaza ninga pinacita Yahova? Njira ibodzi yakucita pyenepi ndi kukulisa makhaliro akuti anatiphedza toera kubvera ntsisi anango mbatiabalangaza. Ndi api mangasi mwa makhaliro anewa?
11. Mwakubverana na Akolose 3:12 na 1 Pedhru 3:8, ndi makhaliro api anango anafuna kutiphedza toera kufuna anango na kuabalangaza?
11 Ninji pinafuna kutiphedza toera tipitirize kufunana na “kubalangazana unango na ndzace” ntsiku zonsene? Tisafunika kukulisa n’khaliro wakubvera ntsisi anango, kufuna abale na kukhala akukoma ntima. (Lerini Akolose 3:12; 1 Pedhru 3:8.) Kodi makhaliro anewa anatiphedza tani? Tingabvera ntsisi abale na alongo athu na kuatsalakana mwaufuni, tinafuna kakamwe kuabalangaza m’midzidzi inathimbana iwo na nyatwa. Yezu alonga: “Mulomo usalonga pire pidadzala muntima. Munthu wadidi asalonga pinthu pyadidi, thangwi muntima mwace mwadzala na pinthu pyadidi.” (Mat. 12:34, 35) Kubalangaza abale na alongo athu ndi njira yakufunika kakamwe yakupangiza ufuni wathu kuna iwo.
TINAPITIRIZA TANI KUFUNANA KAKAMWE UNANGO NA NDZACE?
12. (a) Thangwi yanji tisafunika kucita mphole-mphole toera ufuni wathu ukhonde kuthowa? (b) Ndi mbvundzo upi unafuna kutawira ife cincino?
12 Tonsene tisafuna “tipitirize kufunana unango na ndzace.” (1 Juw. 4:7) Mbwenye ndi pyakufunika kakamwe kuna ife kukumbuka mafala adalonga Yezu kuti: “Ufuni wa anthu azinji unadzathowa.” (Mat. 24:12) Yezu nee alonga kuti anyakupfundzace azinji mbadasiya kufunana unango na ndzace. Mbwenye ife tisafunika kucita mphole-mphole toera tikhonde kutawirisa kuti makhaliro akusowa ufuni a anthu a dziko akhonde kuticitisa kutsalakana anango mwakusowa ufuni. Natenepa tendeni tidinge mbvundzo wakufunika kakamwe wakuti: Ninji pinafuna kutiphedza toera kudziwa khala ufuni wathu kuna abale na alongo nee uli kuthowa?
13. Ninji pinafuna kutiphedza toera kudziwa khala ufuni wathu uli kuthowa peno nkhabe?
13 Njira ibodzi toera kudziwa khala ufuni wathu uli kuthowa peno nkhabe ndi kuona njira inatsalakana ife pinthu mu umaso wathu. (2 Akor. 8:8) Cibodzi mwa pinthu pyenepi ndi cidalonga mpostolo Pedhru. Iye alonga: “Kupiringana pyonsene, funanani kakamwe unango na ndzace, thangwi ufuni usaphimbira madawo mazinji kakamwe.” (1 Ped. 4:8) Natenepa, pinthu pinafuna kucita ife m’bale peno mulongo angacita madodo peno angatitsukwalisa, pinatiphedza toera kudziwa khala ufuni wathu uli kuthowa peno nkhabe.
14. Mwakubverana na 1 Pedhru 4:8, tisafunika kufuna tani anango? Perekani citsandzo.
14 Kodi mafala adalonga Pedhru asabvekanji? Khundu yakutoma ya vesi 8 isalonga kuti tisafunika ‘kufuna kakamwe.’ Fala yakuti “kakamwe” idaphatisira Pedhru isabveka “kufuthula.” Khundu yaciwiri ya vesi ineyi isalonga pinthu pinafuna ife kucita tingafuna kakamwe anango. Kufuna kakamwe anango kunatiphedza toera kuphimbira madawo a abale na alongo athu. Nyerezerani meza yakuti yapswipa kakamwe makhundu anango. Ndi pyakukwanisika kufuthula nguwo toera kuphimbira makhundu mazinji adapswipa. Munjira ibodzi ene, tingafuna kakamwe abale na alongo athu tinakwanisa kuphimbira peno kulekerera ‘madawo awo mazinji kakamwe.’
15. Khala tisafuna kakamwe abale na alongo athu, pyenepi pinatiphedza toera kucitanji? (Akolose 3:13)
15 Ufuni wathu kuna anango usafunika kukhala wakuwanga kakamwe toera tikwanise kulekerera madodo a abale na alongo athu, maseze pyenepi pikhale pyakunentsa kakamwe. (Lerini Akolose 3:13.) Tingalekerera anango, tinapangiza kuti tisaafuna kakamwe, pontho tisafuna kukomeresa Yahova. Ndi cinthu cipi cinango cinafuna kutiphedza toera kulekerera madodo a anango mbatikhonda kuipirwa mwakucimbiza na pinthu pinacita iwo?
Ife tisakoya mafoto adidi mbatifudza ale adakhonda kubuluka mwadidi. Munjira ibodzi ene, tisafunika kukoya m’manyerezero mwathu pinthu pyadidi pidacita abale na alongo athu mbatiduwala pinthu pyakuipa pidacita iwo (Onani ndima 16-17)
16-17. Ndi cinthu cipi cinango cinafuna kutiphedza toera tikhonde kuyang’ana basi ene madodo mang’ono anacita anango? Perekani citsandzo. (Onanimbo foto.)
16 Onani pinthu pyadidi pinacita abale na alongo anu, tayu madodo awo. Mwacitsandzo, nyerezerani kuti imwe muli pa nsoka wa abale na alongo, pontho pakufuna kupangana imwe musabulusa foto. Imwe musabulusa mafoto anango mawiri toera mukhale na anewa yakutoma ingakhonda kubuluka mwadidi. Natenepa imwe musakhala na mafoto matatu. Mbwenye pa ibodzi mwa mafoto anewa, m’bale m’bodzi nee ali kumwetulira. Munacitanji na foto ineyi? Imwe munaifudza mbamusala na mafoto anango mawiri thangwi anthu onsene ali penepo abuluka mwadidi, pontho ali kumwetulira.
17 Ife tinakwanisa kulandanisa mafoto anewa adakoya ife na pinthu pidakoya ife m’manyerezero mwathu. Kazinji kene ife tisakoya m’manyerezero mwathu m’midzidzi yadidi idakhala ife pabodzi na abale na alongo athu. Mphapo nyerezerani kuti ubodzi mwa midzidzi ineyi, m’bale peno mulongo alonga peno acita pinthu pyakuipa? Tinacitanji? Ife tinawangisira toera kuduwala pinthu pyenepi, ninga pinafudza ife foto yakuti nee yabuluka mwadidi. (Mis. 19:11; Aef. 4:32) Ife tinakwanisa kuduwala madodo akucepa adacita m’bale peno mulongo thangwi tisakumbuka midzidzi mizinji yadidi idakhala ife pabodzi na iye. Pyenepi ndi pinthu pinafunika ife kukoya m’manyerezero.
THANGWI YANJI UFUNI NDI WAKUFUNIKA KAKAMWE LERO?
18. Ndi pinthu pipi pidapfundza ife mu nsolo uno thangwi ya ufuni?
18 Thangwi yanji tisafunika kupitiriza kufunana kakamwe unango na ndzace? Ninga pidapfundza ife, tingafuna abale na alongo athu tinapangiza kuti tisafuna Yahova. Mphapo tinapangiza tani kuti tisafuna abale na alongo athu? Njira ibodzi yakucita pyenepi ndi kuabalangaza. Ife tinakwanisa ‘kupitiriza kubalangazana unango na ndzace’ tingabvera ntsisi anango. Mphapo tinapitiriza tani kufunana kakamwe unango na ndzace? Tingalekerera abale na alongo athu maseze pikhale pyakunentsa kucita pyenepi.
19. Thangwi yanji ndi pyakufunika kakamwe kufunana unango na ndzace lero?
19 Thangwi yanji ndi pyakufunika kakamwe kufunana unango na ndzace lero? Pedhru alonga: ‘Kumala kwa pinthu pyonsene kuli cifupi. Natenepa, funanani kakamwe unango na ndzace.’ (1 Ped. 4:7, 8) Ninji pinadikhira ife mu ndzidzi wakuti kumala kwa dziko ino kuli cifupi? Yezu alonga tenepa kuna anyakupfundzace: “Imwe munadzaidiwa na anthu a mitundu yonsene thangwi ya dzina yanga.” (Mat. 24:9) Toera kupirira kuidiwa kweneku tisafunika kukhala akuphatana. Tingafuna abale na alongo athu, Sathani nee anakwanisa kufudza kuphatana kwathu, thangwi ufuni “usaphedza anthu toera kukhala akuphatana kakamwe.”—Akol. 3:14; Afil. 2:1, 2.
NYIMBO 130 Khalani Akulekererana
a Lero, ndi pyakufunika kakamwe kuna ife kufuna abale na alongo athu. Thangwi yanji, pontho tinapangiza tani kuti tisafunana kakamwe unango na ndzace?