NSOLO WA PFUNDZIRO 20
Tinacita Tani Mwadidi Maphembero Athu?
“Fungulani mitima yanu kuna iye.”—Mas. 62:8.
NYIMBO 45 Ndinanyerezera Mwacidikhodikho
PINAFUNA IFE KUPFUNDZAa
Ife tinakwanisa kucita phembero kuna Yahova ndzidzi onsene mbatiphemba citsogolero cace m’makhundu onsene a umaso wathu (Onani ndima 1))
1. Yahova asapanga alambiri ace toera acitenji? (Onanimbo foto.)
MBANI anafunika ife kuphemba cibalangazo na citsogolero? Ife tisadziwa ntawiro wa mbvundzo unoyu. Ife tinakwanisa kuphemba Yahova Mulungu. Iye asatipanga toera ticite pyenepi. Yahova asafuna kuti ticite phembero “ndzidzi onsene.” (1 Ates. 5:17) Ife tinakwanisa kulonga naye m’phembero mwakusudzuka toera kuphemba citsogolero mu pinthu pyonsene. (Mis. 3:5, 6) Nakuti Yahova ndi Mulungu anapasa mwakudzala manja, iye nee asakhazikisa madire a maulendo anafunika ife kucita phembero.
2. Tinapfundzanji mu nsolo uno?
2 Ife tisapereka takhuta kuna Yahova thangwi ya muoni wa phembero. Ngakhale tenepo, midzidzi inango pisanentsa kugumana ndzidzi wakucita phembero thangwi yakukhala na pinthu pizinji pyakucita. Kusiyapo pyenepi, panango tinaona kuti tisafunika kucinja njira inacita ife maphembero athu. Pyakutsandzayisa ndi pyakuti m’Bhibhlya ife tinakwanisa kugumana ciwangiso na citsogolero. Mu nsolo uno, tinapfundza kuti pinthu pidacita Yezu pinatiphedza tani toera kugumana ndzidzi wakucita phembero. Kusiyapo pyenepi, tinapfundzambo kuti tinacita tani mwadidi maphembero athu mukuphataniza pinthu pixanu pyakufunika kakamwe.
YEZU AKHASAKA NDZIDZI TOERA KUCITA PHEMBERO
3. Ndi pinthu pipi pikhadziwa Yezu thangwi ya phembero?
3 Yezu akhadziwa kuti maphembero athu ndi akufunika kakamwe kuna Yahova. Mbadzati kubwera pa dziko yapantsi, iye akhaona Babace mbakatawira maphembero a anthu akukhulupirika. Mwacitsandzo, iye akhali pabodzi na Babace mu ndzidzi udatawira iye maphembero a Yana, Dhavidhi, Eliya na anango azinji. (1 Sam. 1:10, 11, 20; 1 Ama. 19:4-6; Mas. 32:5) Na thangwi ineyi, Yezu apfundzisa atowereri ace toera ndzidzi onsene acite phembero na cinyindiro.—Mat. 7:7-11.
4. Tisapfundzanji na maphembero a Yezu?
4 Kubulukira m’maphembero ace kuna Yahova, Yezu apangiza citsandzo toera anyakupfundzace acitowezere. Mu utumiki wace pa dziko yapantsi, Yezu akhacita phembero kazinji kene. Iye akhafunika kusaka ndzidzi toera kucita phembero thangwi kazinji kene akakhala na pinthu pizinji pyakucita, pontho anthu azinji akhantowera. (Marko 6:31, 45, 46) Iye akhalamuka nakweru toera akhale na ndzidzi wakucita phembero paekha. (Marko 1:35) Paulendo unango, iye aphuphudza na kucita phembero mbadzati kucita cisankhulo cakufunika. (Luka 6:12, 13) Pontho namasiku a ntsiku idaphiwa iye, Yezu acita phembero mwakubwereza-bwereza mbadzati kumalisa khundu yakunentsa kakamwe ya basa yace pa dziko yapantsi.—Mat. 26:39, 42, 44.
5. Tinatowezera tani Yezu pakucita maphembero athu?
5 Citsandzo ca Yezu cisatipfundzisa kuti mwakukhonda tsalakana khala tiri na pinthu pizinji pyakucita, ife tisafunika kusaka ndzidzi toera kucita phembero. Ninga Yezu, ife tisafunika kupambula ndzidzi toera kucita phembero. Panango midzidzi inango tinafunika kulamuka nakweru peno kudikhira ndzidzi wakuti kunja nee kuli na dzumbi kakamwe namasiku. Tingacita pyenepi, tinapangiza kuna Yahova kuti tisapereka takhuta kakamwe thangwi ya mwai wakucita phembero. Mulongo unango anacemerwa Lynne asakumbuka kuti apereka takhuta kakamwe pidapfundza iye kuti ali na mwai wakucita phembero. Iye alonga: “Mu ndzidzi udapfundza ine kuti mbandidakwanisa kulonga na Yahova ndzidzi onsene, pyenepi pyandiphedza kumuona ninga xamwali wanga, pontho pyandicitisa kufuna kucita mwadidi maphembero anga.” Mwakukhonda penula, azinji a ife ali na mabvero mabodzi ene. Natenepa, tendeni tione pinthu pixanu pyakufunika pyakuti tinakwanisa kupiphataniza m’maphembero athu.
PINTHU PIXANU PYAKUFUNIKA TOERA KUPILONGA M’MAPHEMBERO
6. Mwakubverana na Apokalipse 4:10, 11, Yahova athema kutambiranji?
6 Simbani Yahova. M’masomphenya, mpostolo Juwau aona akulu a mpingo 24 kudzulu mbakalambira Yahova. Iwo asimba Mulungu, pontho alonga kuti iye athema kutambira “mbiri, cilemedzo na mphambvu.” (Lerini Apokalipse 4:10, 11.) Aanju akukhulupirika alimbo na mathangwi mazinji toera kusimba na kulemedza Yahova. Iwo ali kudzulu pabodzi na iye, pontho asandziwa mwadidi. Iwo asaona makhaliro ace kubulukira mu pinthu pinacita iye. Mu ndzidzi unaona iwo pinacita Yahova, iwo asakulumizika toera kunsimba.—Yobe 38:4-7.
7. Ndi mathangwi api anaticitisa kusimba Yahova?
7 Ife tisafunambo kusimba Yahova m’maphembero athu, mbatilonga pinthu pinakomerwa na ife thangwi ya iye. Mu ndzidzi unaleri imwe na kupfundza Bhibhlya, yeserani kuona makhaliro a Yahova akuti musakomerwa nawo kakamwe. (Yobe 37:23; Aroma 11:33) Buluka penepo, pangani Yahova mabvero anu thangwi ya makhaliro anewa. Ife tinakwanisambo kusimba Yahova thangwi yakutiphedza pabodzi na abale na alongo athu pa dziko yonsene. Ndzidzi onsene iye asatitsalakana na kutitsidzikiza.—1 Sam. 1:27; 2:1, 2.
8. Ndi mathangwi api mangasi anaticitisa kupereka takhuta kuna Yahova? (1 Atesalonika 5:18)
8 Perekani takhuta kuna Yahova. Ife tiri na mathangwi mazinji toera kupereka takhuta kuna Yahova pakucita phembero. (Lerini 1 Atesalonika 5:18.) Nakuti miyoni yonsene yadidi isabuluka kuna Yahova, ife tinakwanisa kupereka takhuta kuna iye thangwi ya pinthu pyonsene pyadidi piri na ife. (Tiya. 1:17) Mwacitsandzo, ife tinakwanisa kupereka takhuta thangwi ya kubalika kwa dziko yapantsi na pinthu pinango pidacita Yahova. Ife tinakwanisambo kupereka takhuta thangwi ya umaso wathu, banja yathu, axamwali athu na cidikhiro cathu. Pontho tinakwanisa kupereka takhuta kuna Yahova thangwi ya kutitawirisa kukhala axamwali ace.
9. Thangwi yanji tisafunika kukulisa n’khaliro wakupereka takhuta kuna Yahova?
9 Panango tinafunika kuwangisira toera kunyerezera mathangwi anaticitisa kupereka takhuta kuna Yahova. Thangwi anthu azinji lero nee asapereka takhuta. Iwo basi ene asanyerezera kuti anakwanisa tani pinthu pinafuna iwo, m’mbuto mwakupereka takhuta thangwi ya pinthu piri na iwo. Tingakhala na manyerezero ninga ali na anthu anewa, m’maphembero athu basi ene tinaphemba pinthu. Toera pyenepi pikhonde kucitika, tisafunika kupitiriza kukulisa n’khaliro wakupereka takhuta thangwi ya pinthu pyonsene pinaticitira Yahova.—Luka 6:45.
Kupereka takhuta kuna Yahova kunatiphedza toera kupirira (Onani ndima 10)
10. N’khaliro wakupereka takhuta waphedza tani mulongo Kyung-sook toera kupirira? (Onanimbo foto.)
10 N’khaliro wakupereka takhuta unatiphedza toera kupirira pinentso. Onani citsandzo ca mulongo Kyung-sook, cinagumanika mu Ncenjezi wa 15 ya Janeiro ya 2015. Iye adzindikirwa kuti akhali na utenda ukulu wa cancro do pulmão. Iye alonga: “Utenda unoyu wandigopesa kakamwe, ndikhabva ninga ndaluza pinthu pyonsene, pontho ndikhagopa kakamwe.” Ninji pidam’phedza toera kupirira? Iye alonga kuti ntsiku zonsene namasiku mbadzati kuenda kagona, akhaenda pa terraço ya nyumba yace mbacita phembero mwakugaluza thangwi ya pinthu pixanu pikhancitisa kupereka takhuta pa ntsiku ineyi. Pyenepi pikham’phedza toera akhonde kukhala wakudzudzumika, pontho pikhankulumiza toera apangize ufuni wace kuna Yahova. Iye akwanisa kuona kuti Yahova asaphedza atumiki ace akukhulupirika angathimbana na nyatwa, pontho abvesesa kuti ife tisapaswa nkhombo zizinji kupiringana nyatwa zinathimbana na ife. Ninga Kyung-sook, ife tiri na mathangwi mazinji toera kupereka takhuta kuna Yahova, ngakhale m’midzidzi ya nyatwa. Kupereka takhuta kuna Yahova m’phembero kunatiphedza toera kupirira nyatwa na kupitiriza kukhala akukhurudzika.
11. Thangwi yanji anyakupfundza a Yezu akhafunika kukhala na cipapo pidabwerera Yezu kudzulu?
11 Phembani Yahova toera mukhale na cipapo cakumwaza mphangwa. Mbadzati kubwerera kudzulu, Yezu akumbusa anyakupfundzace thangwi ya basa ikhali na iwo yakupereka umboni “mu Yerusalemu, ku Yudeya konsene na ku Samariya, mpaka kunkhomo kwa dziko yapantsi.” (Mabasa 1:8; Luka 24:46-48) Pidapita ndzidzi ungasi, atsogoleri Aciyuda amanga mpostolo Pedhru na Juwau mbaaendesa ku Thando Ikulu Yakutongera Miseru ya Ayuda, pontho aathusa mbaapanga toera asiye kumwaza mphangwa. (Mabasa 4:18, 21) Mphapo ninji pidacita Pedhru na Juwau?
12. Mwakubverana na Mabasa 4:29, 31, ninji pidacita anyakupfundza?
12 Pidathuswa iwo na atsogoleri Aciyuda, Pedhru na Juwau alonga: “Longani ndimwe khala mphyakuthema pamaso pa Mulungu kubvera imwe mbatikhonda kubvera Mulungu. Mbwenye ife nee tinasiya kulonga pinthu pidaona ife na pidabva ife.” (Mabasa 4:19, 20) Pidasudzulwa Pedhru na Juwau, anyakupfundza acita phembero kuna Yahova toera apitirize kucita cifuno cace. Iwo aphemba: “Phedzani atumiki anu toera apitirize kulonga mafalanu na cipapo consene.” Yahova atawira phembero ineyi.—Lerini Mabasa 4:29, 31.
13. Tisapfundzanji na citsandzo ca m’bale Jin-hyuk?
13 Ife tinakwanisambo kutowezera citsandzo ca anyakupfundza mukupitiriza kumwaza mphangwa, mautongi angatikhondesa kucita pyenepi. Onani citsandzo ca m’bale Jin-hyuk, adafungirwa nkaidi thangwi yakukhonda kucita khundu ya ndale za dziko. Nkaidi, iye apaswa basa yakutsalakana anyakaidi anango, pontho nee akhatawiriswa kulonga mphangwa zinango kuphatanizambo kuamwazira mphangwa za Bhibhlya. Iye acita phembero toera akwanise kuamwazira mphangwa angakhala na mwai. (Mabasa 5:29) Iye alonga: “Yahova atawira maphembero anga mu kundipasa cipapo na udziwisi, toera nditomese mapfundziro a Bhibhlya akuti ndikhaacitisa mu mphindi zixanu pa misuwo ya anyakaidi. Buluka penepo, namasiku ndikhalemba matsamba toera kupasa anyakaidi ntsiku inango.” Ife tisafunikambo kukhala na cinyindiro cakuti Yahova anatiphedza toera kucita basa yakumwaza mphangwa. Ninga Jin-hyuk, ife tinakwanisa kuphemba cipapo na udziwisi.
14. Ninji pinafuna kutiphedza tingathimbana na nyatwa? (Masalmo 37:3, 5)
14 Phembani ciphedzo ca Yahova toera mukwanise kupirira nyatwa. Azinji a ife asathimbana na nyatwa za ungumi, kuferwa na nyakufunika wathu, nyatwa za m’banja, kutcingwa peno nyatwa zinango. Pinthu pinango ninga utenda unathapulisa anthu azinji na nkhondo pisacitisa kuti pikhale pyakunentsa kakamwe kupirira. Natenepa pangani Yahova nyatwa zanu zonsene. Mpangeni nyatwa zinathimbana na imwe ninga muli kupanga xamwali wanu wapantima. Khalani na cinyindiro cakuti Yahova ‘anakuphedzani.’—Lerini Masalmo 37:3, 5.
15. Phembero inatiphedza tani toera ‘kupirira tingathimbana na nyatwa’? Perekani citsandzo.
15 Kucita phembero kunatiphedza toera ‘kupirira tingathimbana na nyatwa.’ (Aroma 12:12) Yahova asadziwa pinthu pinacitikira alambiri ace, pontho “iye asabva n’khuwo wawo wakuphemba ciphedzo.” (Mas. 145:18, 19) Mpainiya unango wa pyaka 29 pyakubalwa anacemerwa Kristie aona kuti mafala anewa ndi andimomwene. Iye atoma kuthimbana na nyatwa zizinji za ungumi, pontho pyenepi pyancitisa kukhala wakutsukwala kakamwe. Mukupita kwa ndzidzi, iye adzindikira kuti mai wace akhali na utenda wakukhonda kuwanga. Kristie alonga: “Ine ndikhaphemba Yahova ntsiku zonsene toera andipase mphambvu kuti ndikwanise kupirira nyatwa zenezi. Kusiyapo pyenepi, ine ndapitiriza kugumanika pa misonkhano na kucita pfundziro ya munthu paekha.” Iye athimiza: “Phembero yandiphedza toera kupirira midzidzi ineyi yakunentsa. Ine ndikhadziwa kuti Yahova ndzidzi onsene akhali na ine, pontho mbadandiphedza toera ndikhale wakukhurudzika. Maseze nyatwa zanga nee zamala mu ndzidzi ubodzi ene, Yahova atawira maphembero anga mu kundipasa ntendere wa m’manyerezero.” Ndzidzi onsene tisafunika kukumbuka kuti “Yahova asadziwa kuti anapulumusa tani mu nyatwa ale akuti ndi akukhulupirika kwa iye.”—2 Ped. 2:9.
Toera kupirira mayesero, (1) phembani ciphedzo ca Yahova, (2) citani pinthu mwakubverana na maphembero anu, pontho (3) wangisani uxamwali wanu na Yahova (Onani ndima 16-17)
16. Thangwi yanji tisafuna ciphedzo ca Yahova toera kupirira mayesero?
16 Phembani Yahova toera mukwanise kupirira mayesero. Ninga anthu akusowa ungwiro, ndzidzi onsene tisathimbana na mayesero toera kucita pinthu pyakuipa. Mbwenye Sathani asacita pyonsene pinakwanisa iye toera ticimwane kupirira pinentso pyenepi. Njira ibodzi inaphatisira iye toera kutiyesera ndi masendzekero aulukwali. Masendzekero anewa asaticitisa kukhala na manyerezero akuipa, pontho manyerezero anewa anakwanisa kutsogolera munthu toera kucita madawo makulu.—Marko 7:21-23; Tiya. 1:14, 15.
17. Tingamala kucita phembero, tisafunika kucitanji toera tikhonde kugwa m’mayesero? (Onanimbo foto.)
17 Khala tisafuna kukunda mayesero akucita pinthu pyakuipa, tisafunika ciphedzo ca Yahova. Yezu aphataniza pyenepi mu phembero yace ya citsandzo: “Lekani kutisiya mbatigwa m’mayesero, mbwenye tipulumuseni m’manja mwa Nyakuipa.” (Mat. 6:13) Yahova asafuna kutiphedza, mbwenye ife tisafunika kuphemba ciphedzo cace. Pontho tisafunika kucita pinthu mwakubverana na maphembero athu. Ife tisafunika kuwangisira toera tikhonde kuleri na kubvesera maonero akuipa a dziko ino ya Sathani. (Mas. 97:10) Ife tinakwanisa kukhala na manyerezero adidi tingaleri na kupfundza Bhibhlya. Kugumanika pa misonkhano na kumwaza mphangwa kunatiphedzambo toera kutsidzikiza manyerezero athu. Tingacita pyenepi, Yahova anakwanirisa pikiro yace yakuti, nee anatawirisa kuti tithimbane na mayesero akuti nee tinakwanisa kuapirira.—1 Akor. 10:12, 13.
18. Kodi tonsene tisafunika tipitirize kucitanji?
18 Ife tisafunika kucita phembero ndzidzi onsene toera tikwanise kupitiriza kukhala akukhulupirika kuna Yahova ntsiku zino zakumalisa, zakuti ndi zakunentsa kakamwe. Khalani na ndzidzi wakucita phembero ntsiku zonsene. Yahova asafuna kuti ‘tifungule mitima yathu kuna iye’ m’phembero. (Mas. 62:8) Simbani Yahova, pontho perekani takhuta thangwi ya pyonsene pinacita iye. Phembani ciphedzo cace toera mukwanise kukhala na cipapo mu utumiki. Pontho phembani ciphedzo cace toera mukwanise kupirira nyatwa na mayesero akuti panango munathimbana nawo. Lekani tawirisa nee cinthu cibodzi cikucitiseni kusiya kucita phembero kuna Yahova ndzidzi onsene. Mphapo Yahova asatawira tani maphembero athu? Tinaona ntawiro wa mbvundzo unoyu mu nsolo unatowera.
NYIMBO 42 Phembero ya Ntumiki wa Mulungu
a Maphembero athu asafunika kukhala ninga tsamba inatumizira ife xamwali wathu wapantima. Mbwenye midzidzi inango pisakhala pyakunentsa kugumana ndzidzi toera kucita phembero. Pontho pisakhala pyakunentsa kudziwa pinthu pinafuna kulonga ife m’phembero. Mu nsolo uno tinaona kuti tinakunda tani pinentso pyenepi.