Yahova Asatawira Tani Maphembero Athu?

1-2. Ndi pinthu pipi pyakuti panango tinabvundzika thangwi ya maphembero athu?

KODI imwe mwabvundzika kale khala Yahova asatawira maphembero anu? Khala ndi tenepo, nee muli mwekha. Abale na alongo azinji alonga kuti abvundzikambo tenepo makamaka m’midzidzi ikhathimbana iwo na nyatwa. Khala tikuthimbana na nyatwa, panango pinakhalambo pyakunentsa kuna ife toera kuona njira inatawira Yahova maphembero athu.

² Mu nsolo uno tinaona mathangwi anaticitisa kunyindira kuti Yahova asatawira maphembero a atumiki ace. (1 Juwau 5:15) Kusiyapo pyenepi, ife tinatawirambo mibvundzo iyi: Thangwi yanji midzidzi inango panango pinaoneka ninga Yahova nee akutawira maphembero athu? Yahova asatawira tani maphembero athu lero?

YAHOVA PANANGO NEE ANATAWIRA MAPHEMBERO ATHU MUNJIRA INADIKHIRA IFE

3. Thangwi yanji Yahova asafuna kuti ticite phembero kuna iye?

³ Malemba asatipasa cinyindiro cakuti Yahova asatifuna kakamwe, pontho kuti ife ndife akufunika kakamwe kuna iye. (Ajeu 2:7; 1 Juwau 4:10) Na thangwi ineyi, iye asatipanga toera ticite phembero kuna iye. (1 Ped. 5:6, 7) Yahova asafuna kutiphedza toera tikhale na uxamwali wakuwanga na iye mbatipirira nyatwa zinathimbana na ife.

4. Tisadziwa tani kuti Yahova asatawira maphembero a atumiki ace? (Onanimbo foto.)

⁴ M’Bhibhlya, kazinji kene ife tisaleri kuti Yahova akhatawira maphembero a atumiki ace. Citsandzo cibodzi ndi ca Mambo Dhavidhi. Iye akhali na anyamalwa akugopswa kakamwe mu umaso wace, pontho kazinji kene akhaphemba ciphedzo ca Yahova kubulukira m’phembero. Paulendo unango iye adembetera Yahova kuti: “Yahova, bveserani phembero yanga; bveserani kudembetera kwanga toera kuphemba ciphedzo. Nditawireni mwakubverana na kukhulupirika kwanu na ulungami wanu.” (Mas. 143:1) Yahova atawira maphembero a Dhavidhi. (1 Sam. 19:10, 18-20; 2 Sam. 5:17-25) Na thangwi ineyi, Dhavidhi alonga na cinyindiro kuti: “Yahova ali dhuzi na onsene anancemera.” Ife tinakwanisambo kukhala na cinyindiro cibodzi cene.—Mas. 145:18.

5. Ndzidzi onsene atumiki a Yahova akale akhatawirwa maphembero awo munjira ikhadikhira iwo? Perekani citsandzo. (Onanimbo foto.)

⁵ Yahova panango nee anatawira maphembero athu munjira inadikhira ife. Ndi pyenepi pidacitikira mpostolo Paulu. Iye aphemba Mulungu toera abuluse “munga m’manungo” mwace. M’maulendo matatu, Paulu aphemba Yahova toera am’phedze mu nyatwa ineyi. Kodi Yahova atawira maphembero anewa? Inde, mbwenye nee atawira munjira ikhadikhira Paulu. M’mbuto mwakumalisa nyatwa yace, Yahova ampasa mphambvu toera apitirize kuntumikira mwakukhulupirika.—2 Akor. 12:7-10.

6. Thangwi yanji midzidzi inango tinaona kuti Yahova nee akutawira maphembero athu?

⁶ Midzidzi inango, panango Yahova anatawira maphembero athu munjira yakuti nee tikhaidikhira. Ife tinakwanisa kukhala na cinyindiro cakuti Yahova asadziwa njira yadidi toera kutiphedza. Iye anakwanisa “kucita pizinji kakamwe kupiringana pinthu pyonsene pinaphemba ife peno pinanyerezera ife.” (Aef. 3:20) Na thangwi ineyi, iye anatawira maphembero athu mu ndzidzi peno munjira yakuti nee tikhaidikhira.

7. Thangwi yanji panango ife tinafunika kucinja maphembero athu? Perekani citsandzo.

⁷ Panango tinafunika kucinja maphembero athu tingabvesesa mwadidi cifuno ca Yahova. Onani citsandzo ca m’bale Martin Poetzinger. Pidamala iye kwene kumanga banja, aikhwa nkaidi ku mazunde a Nazi. Pakutoma, iye akhaphemba Yahova toera am’buluse ku mazunde a Nazi kuti akwanise kutsalakana nkazace na kucita pontho basa yakumwaza mphangwa. Mbwenye pidapita masumana mawiri, iye aona kuti nee mbapidakwanisika kuti Yahova am’buluse ku mbuto ineyi idafungirwa iye nkaidi. Natenepa iye atoma kuphembera: “Yahova, ndaphata miyendo ndipangizeni pinthu pinafuna imwe kuti ndicite.” Buluka penepo, iye atoma kunyerezera pya abale anango akhalimbo nkaidi ku mazunde anewa a Nazi. Azinji mwa abale anewa akhadzudzumika kakamwe thangwi ya akazi awo na anawo. Buluka penepo m’bale Poetzinger aphembera: “Yahova, ndisapereka takhuta thangwi ya kundipasa basa ipswa. Ndiphedzeni toera ndikwanise kuwangisa na kubalangaza abale anga.” Mu pyaka pipfemba pidatowera, m’bale Poetzinger acita pidaphemba iye ku mazunde anewa.

8. Ndi cinthu cipi cakufunika kakamwe cinafunika ife kukumbuka tingacita phembero?

⁸ Ife tisafunika kukumbuka kuti Yahova ali na cifuniro, pontho anadzacikwanirisa pa ndzidzi udakhazikisa iye. Cifuniro ceneci cisaphataniza kumalisa nyatwa zonsene zinacitisa anthu kuthabuka lero, ninga pidengwa pyacibaliro, mautenda na kufa. Yahova anadzakwanirisa cifuniro cace mukuphatisira Umambo wace. (Dhan. 2:44; Apok. 21:3, 4) Mbwenye mbudzati kufika ndzidzi unoyu, Yahova asatawirisa kuti Sathani atonge dziko ino.b (Juwau 12:31; Apok. 12:9) Yahova mbadamalisa nyatwa za anthu cincino, panango pyenepi mbapidapangiza kuti Sathani akutonga dziko ino munjira yadidi. Mbwenye Yahova anapitiriza kutiphedza mpaka pa ndzidzi unafuna iye kukwanirisa mapikiro ace. Tendeni tione pinthu pingasi pinacita Yahova toera kutiphedza.

NJIRA ZINATAWIRA YAHOVA MAPHEMBERO ATHU

9. Yahova anatiphedza tani tingafuna kucita pisankhulo pyadidi? Perekani citsandzo.

⁹ Iye asatipasa udziwisi. Yahova apikira kutipasa udziwisi toera tikwanise kucita pisankhulo pyadidi. Ife tisafuna udziwisi wa Yahova makamaka tingafuna kucita pisankhulo pyakuti pinakhuya umaso wathu onsene, ninga cisankhulo cakukhonda kumanga banja peno kumanga banja. (Tiya. 1:5) Onani citsandzo ca mulongo wakukhonda manga banja anacemerwa Maria.c Iye adziwana na m’bale unango mu ndzidzi ukhatumikira iye ninga mpainiya wa ndzidzi onsene. Maria alonga: “Mu ndzidzi ukhacedza ife kazinji kene, tatoma kusirirana. Ine ndaona kuti ndikhafunika kucita cisankhulo. Ine ndacita phembero kazinji kene thangwi ya pyenepi. Ine ndikhafuna citsogolero ca Yahova, mbwenye ndikhadziwambo kuti Yahova nee mbadandicitira cisankhulo.” Iye aona kuti Yahova atawira maphembero ace akuphemba udziwisi. Munjira ipi? Pidafufudza iye m’mabukhu athu, akwanisa kugumana misolo yakuti yam’phedza kutawira mibvundzo yace. Iye aphatisirambo uphungu wandzeru udampasa mai wace wakukhulupirika. Uphungu unoyu waphedza Maria toera kusankhula pikhafunika iye kucita. Natenepa iye akwanisa kucita cisankhulo cadidi.

10. Mwakubvera na Afilipi 4:13, Yahova asaphedza tani atumiki ace? Perekani citsandzo. (Onanimbo foto.)

¹⁰ Iye asatipasa mphambvu toera tikwanise kupirira. Ninga pidacita iye kuna mpostolo Paulu, Yahova anatipasa mphambvu toera tikwanise kupirira mayesero athu. (Lerini Afilipi 4:13.) Onani kuti Yahova aphedza tani m’bale Benjamin toera apirire mayesero akunentsa. Pikhali iye m’phale, Benjamin, pai wace, mai wace na abale ace atatu akakhala ku mbuto inakhala anthu adathawa nkhondo mu Afrika. Benjamin alonga: “Ine ndaphembera kuna Yahova kazinji kene toera andipase mphambvu kuti ndikwanise kucita pinthu pinakomerwa na iye. Yahova atawira maphembero anga mukundipasa ntendere wa m’manyerezero, cipapo toera ndipitirize kumwaza mphangwa na mabukhu toera ndikhale wakuwanga mwauzimu.” Iye athimiza: “Kuleri pitsandzo pya abale na alongo na kuona njira ikhaaphedza Yahova toera kupirira pyandiphedza toera ndipitirize kukhala wakukhulupirika.”

11-12. Yahova anaphatisira tani abale na alongo athu toera kutawira maphembero athu? (Onanimbo foto.)

¹¹ Iye asaphatisira abale na alongo athu. Namasiku mbadzati kufa, Yezu aphembera kakamwe. Iye adembetera Yahova toera anthu akhonde kunyerezera kuti iye akhapswipisa dzina ya Yahova. M’mbuto mwakucita pyenepi, Yahova aphedza Yezu mukutuma aanju toera amuwangise. (Luka 22:42, 43) Yahova anatiwangisambo tingacedzerwa na abale na alongo athu peno angatimenyera ntokodzi. Tonsene tinakwanisa kusaka miyai toera kulonga “mafala adidi” kuna abale na alongo athu.—Mis. 12:25.

¹² Onani citsandzo ca mulongo Miriam. Masumana mangasi mamunace mbadzati kufa, Miriam akhali ekhene panyumba, pontho akhali wakutsukwala kakamwe. Iye alira kakamwe, pontho akhafuna munthu toera kucedza naye. Iye alonga: “Ine nee ndikhali na mphambvu toera kumenyera munthu ntokodzi, natenepa ndacita phembero kuna Yahova. Mu ndzidzi ukhalira ine na kucita phembero, ndamenyerwa ntokodzi na nkulu wa mpingo.” Miriam abalangazwa na nkulu wa mpingo unoyu pabodzi na nkazace. Iye akhala na cinyindiro cakuti Yahova ndi adakulumiza nkulu wa mpingo unoyu toera kum’menyera ntokodzi.

13. Perekani citsandzo cinapangiza kuti Yahova anakwanisa kuphatisira ale akuti nee asantumikira toera kutawira maphembero athu.

¹³ Iye panango anaphatisira anthu akuti nee asamulambira. (Mis. 21:1) Midzidzi inango, Yahova asatawira maphembero a atumiki ace mukukulumiza anthu akuti nee asantumikira toera kuaphedza. Mwacitsandzo, iye akulumiza Mambo Artaxerxe toera kutawira phembo ya Neemiya kuti abwerere ku Yerusalemu toera akamange pontho nzinda. (Nee. 2:3-6) Lero, Yahova anakwanisambo kukulumiza ale akuti nee asantumikira toera kutiphedza tingafuna ciphedzo.

14. Mwaphedzeka tani na pinthu pidacitikira Soo Hing? (Onanimbo foto.)

¹⁴ Mulongo anacemerwa Soo Hing aona kuti Yahova am’phedza mukuphatisira dotoro wace. Mwanace asathimbana na utenda wa m’manyerezero. Pidacita iye cidengwa, mulongo Soo Hing na mamunace asiya kuphata basa toera kuntsalakana. Na thangwi ineyi, iwo athimbana na nyatwa yakusowa kobiri. Mulongo Soo Hing alonga kuti akhapibva ninga nee mbadakwanisa kupirira nyatwa ineyi. Iye aphembera kuna Yahova toera kuphemba ciphedzo. Dotoro akhatsalakana mwanawo asaka njira toera kuphedza iye pabodzi na banjace. Na thangwi ineyi, iwo atambira ciphedzo ca atongi, pontho akhali na nyumba toera kukhala. Buluka penepo Soo Hing alonga: “Ife taona kuti ndi Yahova akhatiphedza. Mwandimomwene iye ndi ‘Nyakubva phembero.’”—Mas. 65:2.

CIKHULUPIRO CINATIPHEDZA TOERA KUONA NA KUKOMERWA NA NJIRA INATITAWIRA YAHOVA

15. Ninji pidaphedza mulongo Yoko toera kudzindikira kuti Yahova akhatawira maphembero ace?

¹⁵ Kazinji kene maphembero athu nee asatawirwa munjira yakudzumatirisa. Mbwenye iwo asatawirwa munjira yakufunika kuna ife toera tipitirize kukhala akukhulupirika kuna Babathu wakudzulu. Natenepa onani mwadidi njira inatawira Yahova maphembero anu. Mulongo unango anacemerwa Yoko akhanyerezera kuti Yahova nee akhatawira maphembero ace, mbwenye buluka penepo, iye atoma kulemba n’kadhernu pinthu pikhaphemba iye kuna Yahova. Mukupita kwa ndzidzi, iye aona n’kadhernu mwace, pontho adzindikira kuti Yahova atawira mazinji mwa maphembero adacita iye, ngakhale maphembero akuti iye aduwala kuti akhadaacita. Midzidzi inango ife tisafunika kunyerezera kuti Yahova akutawira tani maphembero athu.—Mas. 66:19, 20.

16. Tinapangiza tani cikhulupiro pakucita maphembero? (Ahebheri 11:6)

¹⁶ Ife tisapangiza cikhulupiro kuna Yahova tingacita phembero kuna iye na kutawira njira inatawira iye maphembero athu. (Lerini Ahebheri 11:6.) Onani citsandzo ca Mike na nkazace, Chrissy. Iwo akhali na cifuno cakutumikira ku Bheteli. Mike alonga: “Ife taprenxeri petisau mu pyaka pizinji, pontho mwakubwereza-bwereza tacita phembero thangwi ya pyenepi, mbwenye nee tacemerwa.” Mike na Chrissy apitiriza kunyindira kuti Yahova akhadziwa njira yadidi yakuaphatisira m’basa yace. Iwo apitiriza kucita pyonsene pikhakwanisa iwo mukutumikira ninga apainiya a ndzidzi onsene m’mbuto zikhali na amwazi mphangwa akucepa na kuphedzera mabasa akumanga nyumba zinaphatisira gulu ya Yahova. Cincino Mike asatumikira ninga muyang’aniri wa cisa. Iye alonga: “Midzidzi inango Yahova nee asatawira maphembero athu munjira inadikhira ife, mbwenye iye asaatawira munjira yadidi kakamwe kupiringana pikhanyerezera ife.”

17-18. Mwakubverana na Masalmo 86:6, 7, ndi cinyindiro cipi cakuti tinakwanisa kukhala naco?

¹⁷ Lerini Masalmo 86:6, 7. Dhavidhi akhali na cinyindiro cakuti Yahova akhabvesera na kutawira maphembero ace. Imwe munakwanisambo kukhala na cinyindiro cibodzi cene. Pitsandzo pidaona ife mu nsolo uno pisatipasa cinyindiro cakuti Yahova anakwanisa kutipasa udziwisi na mphambvu toera kupirira. Yahova panango anaphatisira abale na alongo athu peno anthu akuti nee asantumikira toera kutiphedza.

¹⁸ Maseze midzidzi inango Yahova nee anatawira maphembero athu munjira inadikhira ife, mbwenye tisadziwa kuti iye anaatawira. Iye anatipasa pinthu pinafuna ife, pontho anatipasa pinthu pyenepi mu ndzidzi unafuna ife. Natenepa pitirizani kucita maphembero na cikhulupiro cakuti Yahova anakutsalakanani cincino, pontho mu dziko ipswa iye ‘anadzakwanirisa cifuno ca pinthu pyonsene piri na umaso.’—Mas. 145:16.