Kodi Muli “Dzololo Toera Kubvera”?

1. Thangwi yanji panango pinakhala pyakunentsa kuna ife toera kubvera?

KODI imwe musanentseka toera kubvera? Dhavidhi akhanentsekambo, na thangwi ineyi, iye aphemba Mulungu: “Ndicitiseni kukhala na cifuno cakukubverani.” (Mas. 51:12) Dhavidhi akhafuna Yahova. Ngakhale tenepo, midzidzi inango akhanentseka toera kubvera; ife tisanentsekambo. Thangwi yanji? Thangwi yakutoma, tabalwa na cipendamiro cakukhonda bvera. Yaciwiri, Sathani ndzidzi onsene asatiyesera toera tikhale akukhonda bvera ninga iye. (2 Akor. 11:3) Yacitatu, tiri kukhala mu dziko yakudzala na anthu a makhaliro akukhonda bvera yakuti iri na “nzimu unaphata basa cincino muna ana akukhonda bvera.” (Aef. 2:2) Ife nee tisafunika basi ene kuwangisira toera kucalira cipendamiro cakudawa, mbwenye tisafunikambo kucalira mayesero a Sathani pabodzi na dziko ino akuti anaticitisa kukhala anthu akukhonda bvera. Kusiyapo pyenepi, tisafunikambo kubvera Yahova pabodzi na ale anaphatisira iye toera kutitsogolera.

2. Pisabvekanji kukhala “dzololo toera kubvera”? (Tiyago 3:17)

² Lerini Tiyago 3:17. Tiyago alonga kuti anthu audziwisi asakhala “dzololo toera kubvera.” Pyenepi pisabvekanji? Ife tisafunika kuwangisira toera kubvera ale anaphatisira Yahova toera kutitsogolera. Ngakhale tenepo, Yahova nee asafuna kuti tibvere munthu anatiphemba kuti ticite pinthu pyakuti nee pisabverana na mitemo Yace.—Mabasa 4:18-20.

3. Thangwi yanji Yahova asafuna kuti tibvere ale anatitsogolera?

³ Panango tinaona kuti ndi pyakukhonda nentsa kubvera Yahova kupiringana kubvera anthu. Thangwi mwakusiyana na anthu, Yahova ndzidzi onsene asatipasa pitsogolero pyakulungama. (Mas. 19:7) Mbwenye anthu anatitsogolera ndi akusowa ungwiro. Ngakhale tenepo, Babathu Wakudzulu apasa basa yakutsogolera anyakubala, mautongi na akulu a mpingo. (Mis. 6:20; 1 Ates. 5:12; 1 Ped. 2:13, 14) Ife tingaabvera tiri kubvera Yahova. Tendeni tione kuti tinakwanisa tani kubvera anthu anaphatisira Yahova toera kutitsogolera, maseze midzidzi inango pikhale pyakunentsa kubvera pitsogolero pyawo.

BVERANI ANYAKUBALANU

4. Thangwi yanji ana azinji nee asabvera anyakubalawo?

⁴ Aphale na atsikana asakhala mu dziko idadzala na anthu “akukhonda bvera anyakubala.” (2 Tim. 3:1, 2) Thangwi yanji ana azinji nee asabvera anyakubalawo? Thangwi anyakubala anango nee asacita pinthu pinapanga iwo anawo toera apicite. Natenepa anawo asanyerezera kuti pyenepi ndi pyaumpfakafaka. Ana anango asaona kuti uphungu wa anyakubalawo ndi wakale kakamwe, nee usaphatabve basa, pontho ndi wakusowa ufuni. Khala ndimwe m’phale peno ntsikana, mwanyerezera kale tenepo? Azinji asaona kuti ndi pyakunentsa kubvera ntemo wa Yahova wakuti: “Bverani anyakubalanu ninga munafunira Mbuya, thangwi pyenepi mphyakulungama.” (Aef. 6:1) Ninji pinafuna kukuphedzani toera kucita pyenepi?

5. Mwakubverana na Luka 2:46-52, thangwi yanji Yezu ndi citsandzo cadidi cakubvera anyakubala?

⁵ Imwe munakwanisa kukhala wakubvera mungatowezera citsandzo cadidi ca Yezu. (1 Ped. 2:21-24) Yezu akhali waungwiro, mbwenye anyakubalace akhali akusowa ungwiro. Ngakhale tenepo, Yezu akhalemedza anyakubalace maseze iwo midzidzi inango akhacita madodo, pontho nee akhambvesesa. (Eks. 20:12) Onani basi pidacitika pikhali Yezu na pyaka 12 pyakubalwa. (Lerini Luka 2:46-52.) Anyakubalace mwakukhonda dziwa akhadansiya ku Yerusalemu. Zuze na Mariya akhafunika kucita pyonsene toera kuonesesa mwadidi khala anawo ali pabodzi na mwinji wa anthu ukhacita ulendo wakubwerera kunyumba pakumala kwa phwando. Zuze na Mariya pidagumana iwo Yezu, Mariya ampasa mulando thangwi yakusala mu Yerusalemu! Yezu panango mbadalonga kuti pyenepi pikhali pyakusowa ulungami. Mbwenye iye atawira anyakubalace munjira yadidi na mwacilemedzo. Ngakhale tenepo, Zuze na Mariya “nee abvesesa pidalonga iye kuna iwo.” Mwakukhonda tsalakana pyenepi, Yezu ‘apitiriza kuabvera.’

6-7. Ninji pinafuna kuphedza aphale na atsikana toera kubvera anyakubalawo?

⁶ Aphale na atsikana, kodi imwe musaona kuti ndi pyakunentsa kubvera anyakubalanu angacita madodo peno angakhonda kukubvesesani? Ninji pinafuna kukuphedzani? Cakutoma, nyerezerani mabvero a Yahova. Bhibhlya isalonga kuti mungabvera anyakubalanu “pyenepi mphyadidi kakamwe pamaso pa Mbuya.” (Akol. 3:20) Yahova asadziwa kuti midzidzi inango anyakubalanu nee anakubvesesani peno anakhazikisa mitemo yakuti ndi yakunentsa kuna imwe toera kuibvera. Mbwenye mungaabvera, imwe munatsandzayisa Yahova.

⁷ Caciwiri, nyerezerani mabvero anafuna kukhala na anyakubalanu. Mungabvera anyakubalanu, iwo anakhala akutsandzaya, pontho anakunyindirani. (Mis. 23:22-25) Kusiyapo pyenepi, imwe munakhalambo na uxamwali wakuwanga kakamwe na iwo. M’bale unango wa ku Bhelgika anacemerwa Alexandre alonga: “Pidatoma ine kucita pinthu pikhandiphemba anyakubalanga kazinji kene, uxamwali wanga na iwo wakhala wakuwanga kakamwe kupiringana kale, pontho takhala akutsandzaya kakamwe.”b Cacitatu, nyerezerani kuti kukhala wakubvera cincino kunakuphedzani tani ntsogolo. Paulo anakhala ku Bhrazil alonga: “Kubvera anyakubalanga kwandiphedza toera kubvera Yahova na kubvera anthu anaphatisira iye toera kutsogolera.” Bhibhlya isapangiza thangwi yakufunika kakamwe yakubvera anyakubalanu. Iyo isalonga: “Toera pinthu pikufambire mwadidi, pontho ukhale na umaso mu ndzidzi uzinji pa dziko yapantsi.”—Aef. 6:2, 3.

8. Thangwi yanji aphale na atsikana azinji asasankhula kubvera anyakubalawo?

⁸ Aphale na atsikana azinji asaona kuti angabvera pinthu pisaafambira mwadidi. Luiza wa ku Bhrazil nee akhabvesesa kuti thangwi yanji nee akhatawiriswa kukhala na ntokodzi. Thangwi anthu azinji a thunga yace akhali na ntokodzi. Mbwenye mukupita kwa ndzidzi, iye adzindikira kuti anyakubalace acita pyenepi toera kuntsidzikiza. Iye alonga: “Cincino ndisaona kuti kubvera anyakubalanga nee kusandipingiza pinthu, mbwenye kusanditsidzikiza.” Mulongo Elizabeth wa ku Estados Unidos, midzidzi inango asapitiriza kunentseka toera kubvera anyakubalace. Iye alonga: “Ndinganentseka toera kubvesesa mitemo inango inakhazikisa anyakubalanga, ndisakumbuka midzidzi idakhala ine wakutsidzikizika thangwi yakubvera mitemo yawo.” Monica wa ku Armeniya alonga kuti ndzidzi onsene unabvera iye anyakubalace pinthu pisanfambira mwadidi.

BVERANI “MAUTONGI”

9. Anthu azinji asaona tani manyerezero akubvera mautongi?

⁹ Anthu azinji asadziwa kuti ife tisafuna ciphedzo ca mautongi, pontho tisafunika kubvera mitemo inango ya “mautongi.” (Aroma 13:1) Mbwenye panango anthu anewa ananentseka toera kubvera mitemo inaoneka ninga yakusowa ulungami peno yakuti nee asakomerwa nayo. Mwacitsandzo, anango nee asakomerwa na ntemo wakulipa misonkho. Mu dziko inango ya ku Europa, anthu azinji asalonga kuti “nee ndi pyakuipa kukhonda kulipa nsonkho munthu angaona kuti kucita pyenepi ndi pyakusowa ulungami.” Na thangwi ineyi, anthu a mu dziko ineyi nkhabe kulipa misonkho yonsene inaphembwa na mautongi.

10. Thangwi yanji tisabvera mautongi maseze tikhonde kukomerwa na mitemo inango inakhazikisa iwo?

¹⁰ Bhibhlya isapangiza kuti mautongi a anthu asabweresa nyatwa, asatsogolerwa na Sathani, pontho anadzafudzwa mwakukhonda dembuka. (Mas. 110:5, 6; Ekle. 8:9; Luka 4:5, 6) Mbwenye iyo isalongambo kuti “munthu anakhonda kubvera utongi ali kuthimbana na masasanyiro a Mulungu.” Kubvera mautongi ndi masasanyiro a ndzidzi wakucepa a Yahova toera pinthu pifambe mwadidi. Natenepa, ife tisafunika ‘kuapasa pinthu pyawo pyonsene,’ kuphatanizambo misonkho, cilemedzo na kuabvera. (Aroma 13:1-7) Panango tinaona kuti mitemo yawo nee ndi yadidi, ndi yakusowa ulungami, pontho ndi yakunentsa kuibvera. Mbwenye ife tisabvera mautongi anewa thangwi Yahova asatipanga kuti tisafunika kuabvera khala pinatiphemba iwo toera kucita nee pisakhondeswa m’Bhibhlya.—Mabasa 5:29.

11-12. Mwakubverana na Luka 2:1-6, Zuze na Mariya acitanji toera kubvera mautongi maseze pikhali pyakunentsa kuna iwo, pontho ninji pidacitika? (Onanimbo foto.)

¹¹ Ife tinakwanisa kutowezera citsandzo ca Zuze na Mariya adabvera mautongi maseze pikhali pyakunentsa kuna iwo. (Lerini Luka 2:1-6.) Mariya pikhali iye na mimba cifupi na miyezi mipfemba, iye na Zuze aphembwa toera kucita cinthu cakunentsa kakamwe. Ntongi Augustu akhazikisa ntemo toera anthu onsene a mu Utongi Waciroma alemberwe. Zuze na Mariya akhafunika kucita ulendo wa makilometru 150 m’mapiri toera kufika ku Bhetelehemu. Ulendo unoyu mbudakhala wakunentsa kakamwe makamaka kuna Mariya. Panango iwo adzudzumika thangwi ya citsidzikizo cawo na ca mwana akhafuna kubalwa. Panango iwo akhabvundzika kuti mbadacitanji Mariya angabala mwana mu ndzidzi ukhacita iwo ulendo. Nakuti iye akhafuna kubala Mesiya, panango pyenepi mbapidaacitisa kukhonda kubvera mautongi.

¹² Zuze na Mariya nee atawirisa kuti kudzudzumika kweneku kuacitise kukhonda bvera mautongi. Yahova aapasa nkhombo thangwi yakubvera kwawo. Mariya afika mwakutsidzikizika ku Bhetelehemu, abala mwana waungumi wadidi, pontho aphedzera kukwanirisika kwa profesiya ya Bhibhlya!—Mik. 5:2.

13. Kubvera kwathu kunaphedza tani abale na alongo athu?

¹³ Tingabvera mautongi tisaphedzeka, pontho tisaphedzambo anango. Munjira ipi? Ife nee tisatcunyuswa thangwi yakukhonda kubvera mautongi. (Aroma 13:4) Kubvera kwathu kunacitisa mautongi kuona kuti Mboni za Yahova ndi anthu akubvera. Mwacitsandzo, pyaka pingasi nduli, ku Nigerya anyankhondo apita mu Nyumba ya Umambo mu ndzidzi wa misonkhano. Iwo akhasaka anthu anacita uviyaviya thangwi yakukhonda kulipa misonkho. Mbwenye nkulu wa anyankhondo apanga anyankhondo toera abuluke. Iye alonga: “Mboni za Yahova ndzidzi onsene zisalipa misonkho.” Ndzidzi onsene unabvera imwe mautongi, musaphedzera toera atumiki a Yahova aoniwe munjira yadidi, pontho pyenepi pinaphedza toera kutsidzikiza abale na alongo athu.—Mat. 5:16.

14. Ninji pidaphedza mulongo unango toera kubvera mautongi?

¹⁴ Ngakhale tenepo, midzidzi inango panango tinanentseka toera kubvera mautongi. Mulongo Joanna wa ku Estados Unidos alonga: “Pikhali pyakunentsa kakamwe kuna ine toera kubvera mautongi, thangwi anthu anango a pabanja yanga acitirwa pinthu pyakusowa ulungami na mautongi.” Mbwenye Joanna awangisira kakamwe toera kucinja manyerezero ace. Pakutoma, iye asiya kuleri mphangwa zikhancitisa kukhala na manyerezero akuipa thangwi ya mautongi. (Mis. 20:3) Buluka penepo, iye acita phembero toera anyindire Yahova, m’mbuto mwa kunyindira kuti mautongi a anthu anacinja pinthu. (Mas. 9:9, 10) Kusiyapo pyenepi, iye aleri mphangwa m’mabukhu athu zinalonga pya kukhonda kucita khundu ya dziko. (Juw. 17:16) Nakuti Joanna asalemedza, pontho asabvera mautongi, “cincino iye ali wakukhurudzika.”

BVERANI PITSOGOLERO PINAPEREKA GULU YA YAHOVA

15. Thangwi yanji panango tinanentseka toera kubvera pitsogolero pinapereka gulu ya Yahova?

¹⁵ Yahova asatiphemba toera ‘tibvere ale anatsogolera’ mu mpingo. (Aheb. 13:17) Maseze Ntsogoleri wathu Yezu ndi waungwiro, ale anaphatisira iye toera kutitsogolera nee ndi aungwiro. Panango ife tinanentseka toera kuabvera makamaka angatiphemba toera kucita cinthu cakuti nee tisafuna kucicita. Mpostolo Pedhru apaswa pitsogolero pyakuti iye nee akafuna kupibvera pakutoma. Pidapangwa iye na anju toera adye pinyama pyakukhonda cena mwakubverana na Mwambo wa Mose, Pedhru akhonda katatu. (Mabasa 10:9-16) Thangwi yanji? Thangwi pitsogolero pyenepi pipswa nee pikhali pyakubveka mwadidi kuna iye. Iye akhadadzolowera kucita pinthu munjira yakusiyana. Khala Pedhru anentseka toera kubvera pitsogolero pidaperekwa na anju waungwiro, nee ndi pyakudzumisa kuona kuti lero midzidzi inango ife tisanentseka toera kubvera pitsogolero pinaperekwa na anthu akusowa ungwiro.

16. Kodi Paulu acitanji maseze akhaona kuti pinthu pidaphembwa iye toera kucita nee ndi pyakufunika? (Mabasa 21:23, 24, 26)

¹⁶ Mpostolo Paulu akhali “dzololo toera kubvera” pidatambira iye pitsogolero pyakuti akhapiona ninga nee ndi pyakufunika. Akristu Aciyuda akhabva anthu mbakalonga kuti Paulu asamwaza mphangwa toera anthu akhonde kubvera Mwambo wa Mose. (Mabasa 21:21) Akulu a mpingo a mu Yerusalemu apanga Paulu toera akwate amuna anai aende nawo mu templo kuti aceneseke toera apangize kuti asabvera Mwambo. Mbwenye Paulu akhadziwa kuti Akristu nee akhafunikabve kubvera Mwambo. Pontho iye nee akhadacita cinthu cakuipa. Ngakhale tenepo, Paulu acita pidalonga iwo. “Mangwana mwace Paulu akwata amuna anewa mbaenda kaceneseka na iwo mwakubverana na Mwambo.” (Lerini Mabasa 21:23, 24, 26.) Kubvera kwa Paulu kwaphedza Akristu toera akhale akuphatana.—Aroma 14:19, 21.

17. Mwapfundzanji na citsandzo ca Stephanie?

¹⁷ Mulongo unango anacemerwa Stephanie akhanentseka toera kutawira cisankhulo cidacitwa na abale akhatsogolera basa yakumwaza mphangwa mu dziko yace. Iye na mamunace akhaphedzera mwakutsandzaya nsoka wa cilongero ca dziko inango. Buluka penepo, ofesi ya filiali yamalisa nsoka unoyu. Natenepa mulongo unoyu na mamunace abwerera mu mpingo wa cilongero cawo. Stephanie alonga: “Ine ndatsukwala kakamwe. Nee ndikhatawira kuti mpingo wa cilongero cathu ukhafunambo ciphedzo kakamwe.” Ngakhale tenepo, iye aphedzera cisankhulo cidacitwa. Iye alonga: “Mukupita kwa ndzidzi, ndaona kuti cisankhulo ceneci cikhali cadidi kakamwe. Ife tadzakhala ninga anyakubala auzimu kuna anthu azinji mu mpingo mwathu akuti anyakubalawo nee ndi Mboni za Yahova. Cincino ndisacitisa pfundziro ya Bhibhlya mulongo adabwezereswa kwene mu mpingo, pontho ndiri na ndzidzi uzinji wakucita pfundziro ya munthu paekha. Kusiyapo pyenepi, ine ndiri na cikumbuntima cakucena thangwi yakudziwa kuti ndawangisira toera kubvera.”

18. Tisaphedzeka tani tingakhala akubvera?

¹⁸ Ife tinakwanisa kupfundza kubvera. Yezu “apfundza kukhala wakubvera kubulukira mu nyatwa zidaona iye.” (Aheb. 5:8) Ninga Yezu, kazinji kene tisapfundza kukhala anthu akubvera tingaona nyatwa. Mwacitsandzo, pidatoma utenda wa COVID-19 mbatipangwa toera tisiye kusonkhana mu Nyumba za Umambo na kusiya kumwaza mphangwa nyumba na nyumba, panango imwe mwanentseka toera kubvera. Ngakhale tenepo, kubvera kwanu kwaphedza abale na alongo toera akhale akuphatana, pontho kwatsandzayisa Yahova. Cincino tonsene tiri akukhunganyika toera kubvera pitsogolero pinafuna ife kutambira mu ndzidzi wa nyatwa ikulu. Pitsogolero pyenepi pinapulumusa umaso wathu!—Yobe 36:11.

19. Thangwi yanji musafuna kukhala wakubvera?

¹⁹ Ife tapfundza kuti kubvera kusabweresa nkhombo zizinji. Mbwenye ife tisabvera Yahova makamaka thangwi tisanfuna, pontho tisafuna kunkomeresa. (1 Juw. 5:3) Ife nee tinakwanisa kulipa Yahova thangwi ya pinthu pyonsene pinaticitira iye. (Mas. 116:12) Mbwenye tinakwanisa kubvera Yahova na ale anatitsogolera. Tingabvera tinapangiza kuti ndife audziwisi, pontho anthu audziwisi asatsandzayisa ntima wa Yahova.—Mis. 27:11.