“Unadzakhala na Ine M’Paraizu”

1. Pikhali Yezu dhuzi na kufa, alonganji kuna phanga akhali n’khundu mwace? (Luka 23:39-43)

YEZU na mapanga mawiri akhali n’khundu mwace akhabva kupha kakamwe mu ndzidzi ukhali iwo dhuzi na kufa. (Luka 23:​32, 33) Pisaoneka kuti mapanga mawiri ene nee akhali anyakupfundza a Yezu, thangwi iwo akhansingirira. (Mat. 27:44; Marko 15:32) Mbwenye m’bodzi acinja maonero ace. Iye alonga: “Yezu, ndikumbukireni mungapita mu Umambo wanu.” Yezu antawira: “Mwandimomwene ine ndiri kukupanga lero kuti, unadzakhala na ine m’Paraizu.” (Lerini Luka 23:39-43.) Bhibhlya nee isapangiza kuti phanga unoyu akhakhulupira mphangwa zikhamwaza Yezu zakuti “Umambo wakudzulu uli cifupi.” Pontho Yezu nee alonga kuti mamuna unoyu mbadakhala mu Umambo unoyu kudzulu. (Mat. 4:17) Yezu akhalonga pya Paraizu ya pa dziko yapantsi. Thangwi yanji tisalonga tenepo?

2. Ninji pinapangiza kuti phanga wakutcunyuka akhali Muyuda?

² Pisaoneka kuti phanga unoyu akhali Muyuda. Thangwi iye abvundza ndzace kuti: “Kodi iwe nkhabe kugopa Mulungu thangwi ukutcunyuswa munjira ibodzi ene na iye?” (Luka 23:​40) Ayuda akhalambira Mulungu m’bodzi basi, mbwenye madzindza anango akhakhulupira alungu azinji. (Eks. 20:2, 3; 1 Akor. 8:5, 6) Natenepa, mapanga anewa mbadakhala a madzindza anango, panango phanga m’bodzi mbadabvundza tenepa: “Kodi iwe nkhabe kugopa alungu?” Kusiyapo pyenepi, Yezu nee akhadatumwa kuna anthu onsene, mbwenye basi ene “kuna mabira akutayika a dzindza ya Izraeli.” (Mat. 15:24) Mulungu akhadadziwisa Aizraeli kuti mbadalamusa anthu muli akufa. Pisaoneka kuti phanga unoyu wakutcunyuka akhadziwa pyenepi, pontho mafalace asapangiza kuti akhakhulupira kuti Yahova mbadalamusa Yezu muli akufa toera kutonga mu Umambo wa Mulungu. Pisaoneka kuti mamuna unoyu akhali na cidikhiro cakuti Mulungu mbadamulamusambo muli akufa.

3. Ndi pinthu pipi pyakuti panango phanga apinyerezera pidalonga Yezu thangwi ya Paraizu? Fokotozani. (Genesi 2:15)

³ Nakuti panga unoyu wakutcunyuka akhali Muyuda, iye akhadziwa thangwi ya Adhamu na Eva na Paraizu ikhadaapasa Yahova. Natenepa, panango phanga unoyu anyerezera kuti Paraizu idalonga Yezu mbidakhala mbuto yakubalika kakamwe pa dziko yapantsi.​—Lerini Genesi 2:15.

4. Mafala adalonga Yezu kuna phanga asaticitisa kunyerezeranji?

⁴ Mafala adalonga Yezu kuna phanga asaticitisa kunyerezera umaso unafuna kudzakhala na ife m’Paraizu. Pontho ife tinakwanisa kupfundza pinthu thangwi ya Paraizu kubulukira mu utongi wantendere wa Mambo Salomoni. Bhibhlya isalonga kuti Yezu ndi wankulu kakamwe kupiringana Salomoni. Natenepa ife tinakwanisa kukhala na cinyindiro cakuti Yezu anadzaphata basa pabodzi na anyakudzodzwa toera kucitisa dziko kukhala Paraizu yadidi kakamwe. (Mat. 12:42) Natenepa “mabira anango” asafunika kudziwa pinafunika iwo kucita toera akhale akuthema kukhala kwenda na kwenda m’Paraizu.​—Juwau 10:16.

UMASO UNADZAKHALA TANI M’PARAIZU?

5. Musanyerezera kuti umaso unadzakhala tani m’Paraizu?

⁵ Musanyerezera kuti umaso unadzakhala tani m’Paraizu? Panango musanyerezera mbuto yakubalika kakamwe ninga munda wa Edheni. (Gen. 2:7-9) Panango musanyerezera profesiya ya Mikeya inalonga kuti m’bodzi na m’bodzi wa atumiki a Mulungu ‘anadzakhala pantsi pa muti wace wa mauva, pontho pantsi pa muti wace wa nsambvu.’ (Mik. 4:3, 4) Kusiyapo pyenepi, panango musanyerezera mavesi a m’Bhibhlya analonga kuti pa dziko yapantsi panadzakhala na cakudya cizinji kakamwe. (Masal. 72:16; Iza. 65:21, 22) Natenepa, panango musanyerezera kuti muli pa mbuto yakubalika kakamwe, pontho muli pa meza yakuti iri na cakudya cizinji cakukoma. Kusiyapo pyenepi, panango munanyerezera kuti muli kubva khwema yadidi kakamwe ya miti na maluwa. Peno panango munanyerezera kuti muli kubva abale anu na axamwali anu ali kuseka mwakutsandzaya pabodzi na ale adalamuswa muli akufa. Mwandimomwene, pinthu pyenepi pinadzacitika pa dziko yapantsi. Ngakhale tenepo, m’Paraizu ife tinadzakhalambo na mabasa akutsandzayisa.

6. Ndi mabasa api anafuna kudzacita ife m’Paraizu? (Onani foto.)

⁶ Yahova aticita munjira yakuti tinakwanisa kutsandzaya na mabasa athu. (Koel. 2:24) Ife tinadzakhala na mabasa mazinji kakamwe mu Utongi wa Kristu wa Pyaka Cikwi. Thangwi anthu anafuna kudzapulumuka pa nyatwa ikulu na anthu azinji kakamwe anafuna ­kudzalamuswa muli akufa anadzafuna pyakubvala, pyakudya na pakukhala. Natenepa toera kuapasa pinthu pyenepi ife tinadzafunika kuphata mabasa mazinji akutsandzayisa. Ninga Adhamu na Eva akuti akhafunika kulima m’munda wa Edheni, ife tinadzakhalambo na mwai wakulima m’Paraizu pa dziko yapantsi. Kusiyapo pyenepi, ife tinadzakhala na basa yakutsandzayisa kakamwe yakupfundzisa anthu azinji kakamwe anafuna kudzalamuswa muli akufa akuti nee akhadziwa pizinji thangwi ya Yahova na cifuniro cace. Pontho tinadzaphedza anthu akukhulupirika adafa Yezu mbadzati kubalwa toera apfundze pinthu pidacitika kutomera mu ndzidzi udafa iwo.

7. Ndi cinyindiro cipi ciri na ife, pontho thangwi yanji?

⁷ Ife tiri na cinyindiro cakuti m’Paraizu, pinthu pinadzafamba mwadidi, tinadzakhala muntendere, pontho tinadzakhala na pinthu pyonsene pinafuna ife. Thangwi yanji? Thangwi Yahova atipangiza kale kuti umaso unadzakhala tani mu ndzidzi unafuna kudzatonga Mwanace. Ife tinakwanisa kuona pyenepi kubulukira mu pinthu pidacitika mu ndzidzi ukhatonga Mambo Salomoni.

PINTHU PIDACITIKA MU UTONGI WA MAMBO SALOMONI PISAPANGIZA KUTI UMASO UNADZAKHALA TANI M’PARAIZU

8. Kodi mafala anagumanika pa Masalmo 37:10, 11, 29, akwanirisika tani? (Onani “Mibvundzo Inacitwa na Anyakuleri” inagumanika revista ino.)

⁸ Mambo Dhavidhi alemba kuti umaso mbudakhala tani mu ndzidzi wakuti mambo wakukhulupirika na waudziwisi angatonga. (Lerini Masalmo 37:10, 11, 29.) Kazinji kene, tingaleri lemba ya Masalmo 37:11 kuna anango tisalonga pinthu pinafuna kucitika m’Paraizu. Ife tiri na mathangwi adidi toera kucita pyenepi. Thangwi Yezu aphatisira mafala anagumanika pa vesi ineyi mu nkhani yace ya Paphiri toera kupangiza kuti pinthu pyenepi pinadzacitika ntsogolo. (Mat. 5:5) Mbwenye mafala adalemba Dhavidhi apangizambo kuti umaso mbudakhala tani mu utongi wa Mambo Salomoni. Mu ndzidzi ukhatonga Salomoni Izraeli, atumiki a Mulungu akhali muntendere, pontho akhali mu ‘dziko ya nkaka na uci.’ Thangwi Mulungu akhadalonga kuti: ‘Mungapitiriza kubvera mitemo yanga ndinadzacitisa kuti dziko yanu ikhale muntendere, imwe munadzagona mbamukhonda kugopa cinthu.’ (Lev. 20:24; 26:3, 6) Pyenepi pyacitikadi mu ndzidzi ukhatonga Salomoni. (1 Pya dziko. 22:9; 29:26-28) Yahova apikirambo kuti anthu akuipa ‘nee mbadaonekabve.’ (Masal. 37:10) Natenepa mafala anagumanika pa Masalmo 37:10, 11, 29 akwanirisika nduli, pontho anadzakwanirisikambo ntsogolo.

9. Mambo wa nkazi wa ku Sebha alonganji thangwi ya utongi wa Mambo Salomoni?

⁹ Mambo wa nkazi wa ku Sebha abva thangwi ya ntendere ukhali na Aizraeli mu ndzidzi ukhatonga mambo Salomoni. Natenepa iye acita ulendo wa nsindzo wakulapha kakamwe kuenda ku Yerusalemu kaona pinthu pyenepi ekhene. (1 Ama. 10:1) Pidamala iye kuona pinthu pyenepi, iye alonga: ‘Pidapangwa ine thangwi ya imwe ndi pang’ono basi. Anyakutsandzaya ndi anthu anu, pontho anyakutsandzaya ndi atumiki anu anakhala na imwe ntsiku zonsene, mbakabvesera udziwisi wanu!’ (1 Ama. 10:6-8) Mbwenye pinthu pidacitika mu ndzidzi ukhatonga Salomoni, basi ene ndi cipangizo ca pinthu pinafuna kudzacita Yahova kuna anthu mu ndzidzi unafuna kudzatonga Mwanace, Yezu.

10. Ndi munjira zipi Yezu ndi wankulu kupiringana Salomoni?

¹⁰ Yezu akhali wankulu kupiringana Salomoni munjira zizinji. Salomoni akhali munthu wakusowa ungwiro, pontho akhacita madawo makulu akuti midzidzi inango akhabweresera nyatwa atumiki a Mulungu. Mbwenye Yezu ndi Ntongi waungwiro. (Luka 1:32; Aheb. 4:14, 15) Yezu apitiriza kukhala wakukhulupirika kuna Mulungu maseze Sathani amuyesera kakamwe. Natenepa Kristu apangiza kuti cipo anadawa peno kucita pinthu pyakuti pinabweresera nyatwa anthu akukhulupirika anafuna kudzatonga iye. Mwandimomwene iye ndi Ntongi wadidi kakamwe.

11. Mbani anafuna kudzatonga pabodzi na Yezu?

¹¹ Yezu anadzatonga pabodzi na anyakudzodzwa akukwana 144.000 toera kutsalakana anthu na kukwanirisa cifuniro ca Yahova pa dziko yapantsi. (Apok. 14:1-3) Akristu anewa apirira mayesero mazinji, pontho athimbana na nyatwa zizinji pikhali iwo pa dziko yapantsi. Natenepa iwo anadzabvesesa mwadidi nyatwa zinathimbana na anthu. Mphapo ndi mabasa api anafuna kudzacita iwo?

NDI MABASA API ANAFUNA KUDZACITA ANYAKUDZODZWA?

12. Ndi basa ipi inafuna kudzapaswa anyakudzodzwa?

¹² Basa idapaswa Yezu pabodzi na ale anafuna kudzatonga na iye ndi ikulu kakamwe kupiringana idapaswa Salomoni. Mambo Salomoni akhafunika kutsalakana anthu azinji mu dziko ikhatonga iye. Mbwenye ale anafuna kudzatonga mu Umambo wa Mulungu anadzatsalakana anthu azinji kakamwe pa dziko yonsene yapantsi. Mwandimomwene Yahova apasa anyakudzodzwa basa yakupambulika kakamwe.

13. Ndi basa ipi yakupambulika inafuna kudzacita Akristu akudzodzwa?

¹³ Ninga Yezu, Akristu akudzodzwa anadzatumikira ninga amambo na anyantsembe. (Apok. 5:10) Mu ndzidzi ukhabvera Aizraeli Mwambo wa Mose, anyantsembe akhaphedza anthu toera apitirize na ungumi wadidi mbakhala na uxamwali wakuwanga na Yahova. Nakuti Mwambo ukhali “cipangizo ca pinthu pyadidi pinafuna kudza,” ife tinakwanisa kulonga kuti Akristu akudzodzwa anafuna kudzatonga pabodzi na Yezu anadzaphedza atumiki a Mulungu toera apitirize na ungumi wadidi mbakhala na uxamwali wakuwanga na Yahova. (Aheb. 10:1) Ife nee tisadziwa kuti amambo anewa na anyantsembe anadzalonga tani na atumiki a Mulungu pa dziko yapantsi. Mbwenye mwakukhonda tsalakana masasanyiro anafuna kudzacita Yahova, ife tiri na cinyindiro cakuti m’Paraizu, anthu onsene pa dziko yapantsi anadzatambira pitsogolero.​—Apok. 21:3, 4.

“MABIRA ANANGO” ASAFUNIKA KUCITANJI TOERA AKHALE AKUTHEMA KUKHALA M’PARAIZU?

14. Ale anacita khundu ya “nkumbi ung’ono” na “mabira anango” alandana tani?

¹⁴ Yezu alonga kuti ale anafuna kudzatonga pabodzi na iye ndi “nkumbi ung’ono.” (Luka 12:32) Iye alongambo kuti nsoka waciwiri ndi “mabira anango.” Mbwenye misoka ineyi miwiri ndi nkumbi ubodzi. (Juwau 10:16) Misoka ineyi miwiri isaphata basa pabodzi, pontho inapitiriza kuphata basa pabodzi mu ndzidzi unafuna kudzakhala dziko yapantsi Paraizu. Pa ndzidzi unoyu, ale anacita khundu ya “nkumbi ung’ono” anadzakhala kudzulu. Pontho ale anacita khundu ya “mabira anango” anadzakhala na cidikhiro cakukhala pa dziko yapantsi kwenda na kwenda. Mbwenye pana pinthu pyakuti “mabira anango” asafunika kupicita cincino toera akhale akuthema kukhala m’Paraizu.

15. (a) “Mabira anango” anaphedzera tani abale a Kristu? (b) Munatowezera tani citsandzo ca m’bale ali n’nyumba inaguliswa mitombwe? (Onani foto.)

¹⁵ Phanga wakutcunyuka afa mbadzati kukhala na mwai wakupangiza kuti akhapereka takhuta thangwi ya pinthu pidancitira Kristu. Mbwenye “mabira anango” ali na miyai mizinji toera kupangiza kuti asapereka takhuta thangwi ya pinthu pidacita Yezu. Mwacitsandzo, ife tinapangiza kuti tisafuna Yezu munjira inatsalakana ife Akristu akudzodzwa. Yezu alonga kuti anatonga anthu mwakubverana na njira inatsalakana iwo abale ace. (Mat. 25:31-40) Ife tinaphedzera abale a Kristu, tingacita mwaphinga basa yakumwaza mphangwa na basa yakucita anyakupfundza. (Mat. 28:18-20) Na thangwi ineyi, ife tisafunika kuphatisira mwadidi mabukhu anatambira ife toera kucitisa nawo pfundziro ya Bhibhlya, ninga bukhu yakuti Seja Feliz Para Sempre! Khala imwe nee muli kucitisa pfundziro ya Bhibhlya, munakwanisa kukhazikisa cifuno ca kutomesa pfundziro na anthu azinji.

16. Tisafunika kucitanji toera tikhale akuthema kukhala m’Paraizu?

¹⁶ Ife nee tisafunika kudikhira kupita m’Paraizu toera tipangize makhaliro anafuna Yahova kuti tikhale nawo. Ife tisafunika kuwangisira cincino toera kulonga undimomwene na kucita pinthu pyadidi. Pontho tisafunika kukhala akukhulupirika kuna Yahova, kuna ndzathu wa m’banja na kuna Akristu andzathu. Tingabvera Yahova mu dziko ino yakuipa, pinadzakhala pyakukhonda nentsa toera kum’bvera m’Paraizu. Ife tisafunikambo kukulisa maluso na makhaliro toera kupangiza kuti tisafuna kudzakhala m’Paraizu. Onani nsolo wakuti “Kodi Imwe Muli Akukhunganyika Toera ‘Kudzakhala pa Dziko Yapantsi’?” unagumanika mu revista ino.

17. Kodi ife tisafunika kupasika mulando thangwi ya madawo adacita ife nduli? Fokotozani.

¹⁷ Ife tisafunikambo kuwangisira toera tikhonde kupasika mulando panango thangwi ya madawo makulu adacita ife nduli. Mwandimomwene, ife nee tisafunika kuona ntsembe ya ciomboli ninga thangwi toera kucita “madawo mwakufuna.” (Aheb. 10:26-31) Mbwenye tinakwanisa kukhala na cinyindiro cakuti khala tatcunyuka na ntima onsene madawo athu, taphemba ciphedzo ca Yahova na ca akulu a mpingo, pontho tasiya pinthu pyakuipa pidacita ife, iye atilekerera na ntima onsene. (Iza. 55:7; Mabasa 3:19) Kumbukani mafala adalonga Yezu kuna Afarisi. Iye alonga: “Ine nee ndadzera anyakulungama, mbwenye ndadzera anyakudawa.” (Mat. 9:13) Ntsembe ya ciomboli ya Yezu inakwanisa kuphimbira madawo athu onsene.

IMWE MUNAKWANISA KUKHALA M’PARAIZU KWENDA NA KWENDA

18. Ndi pinthu pipi pyakuti panango munafuna kupicedza na phanga adafa n’khundu mwa Yezu?

¹⁸ Kodi imwe musakwanisa kunyerezera kuti muli m’Paraizu, pontho muli kucedza na phanga adalonga na Yezu? Mwakukhonda penula, imwe na mamuna unoyu mbamudapereka takhuta kakamwe thangwi ya ntsembe ya Yezu. Panango imwe mbamudam’phemba toera akupangeni pinthu pidacitika mu ndzidzi wakumalisa wa umaso wa Yezu pa dziko yapantsi, pontho kuti iye apibva tani pidatawira Yezu phembo yace. Iye panango mbadakubvundzanimbo kuti umaso ukhali tani mu ntsiku zakumalisa mu dziko yakutongwa na Sathani. Mwandimomwene, unadzakhala mwai ukulu kupfundzisa anthu ninga mamuna unoyu Mafala a Mulungu.​—Aef. 4:22-24.

19. Thangwi yanji umaso nee unadzakhala wakunetesa m’Paraizu? (Onani foto iri patsamba yakutoma.)

¹⁹ Umaso m’Paraizu nee unadzakhala wakunetesa. Ndzidzi onsene ife tinadziwana na anthu azinji, pontho tinadzakhala na mabasa adidi kakamwe toera kucita. Kusiyapo pyenepi, ntsiku zonsene ife tinadzakhala na mwai wakudziwa mwadidi Babathu wakudzulu mbatitsandzaya na pinthu pinatipasa iye. Ndzidzi onsene tinakhala na pizinji toera kupfundza thangwi ya Iye, pontho tinapfundza pizinji thangwi ya pinthu pidacita iye. Mu ndzidzi unapitiriza ife kukhala m’Paraizu, ufuni wathu kuna Mulungu unathimizirika kakamwe. Ife tisapereka takhuta kakamwe kuna Yahova na Yezu thangwi yakutipasa pikiro yakukhala m’maso kwenda na kwenda m’Paraizu.