Tinapitiriza Tani Kukhala Na Maonero Akulinganira?

‘Munthu angakhala maso mu pyaka pizinji, mbakomerwe napyo pyonsene.’​—Koel. 11:8, Tradução do Novo Mundo.

MUNATAWIRA TANI?

Ninji pinafuna kucitisa kukhala kwakunentsa kupitiriza kukhala na maonero akulinganira?

Tinakwanisa tani kuphatisira Bhibhlya toera kupitiriza na maonero akulinganira?

Pitsandzo pya nkazi wanzice wakutcerenga, Eliya, na nyakulemba wa Masalmo 102 pinatiphedza tani toera kukulisa maonero akulinganira?

1. Ndi nkhombo zipi zinatipasa Yahova zakuti zinatiphedza toera kukhala akutsandzaya?

YAHOVA asafuna kuti tikhale akutsandzaya, pontho iye asatipasa nkhombo zizinji zakuti zinatiphedza toera kukhala akutsandzaya. Ibodzi mwa izo ndi umaso. Natenepa, tinakwanisa kuphatisira umaso wathu toera kusimba Mulungu, thangwi iye atikwewera mu ulambiri wandimomwene. (Sal. 144:15; Jwau 6:44) Yahova asatipasa cinyindiro ca ufuni wace, na asatiphedza kupirira mu kuntumikira kwathu. (Yer. 31:3; 2 Akor. 4:16) Ife tisakomerwa na paradizu yauzimu, munatambira ife cakudya cauzimu cakunjipa na ubale waufuni. Kusiyapo pyenepi, ife tiri na cidikhiro cadidi kakamwe kutsogolo.

2. Kodi atumiki anango akukhulupirika a Mulungu asathimbana nanji?

² Maseze tiri na mathangwi anewa akutsandzayisa, anango mwa atumiki akukhulupirika a Mulungu asathimbana na manyerezero akuphonyeka thangwi ya iwo ene. Iwo asanyerezera kuti iwo na basa yawo nkhabe ntengo kwa Yahova. Kwa ale anapitiriza kuthimbana na manyerezero akuphonyeka, maonero akukomerwa na umaso wa “pyaka pizinji” asaaona ninga ndoto. Umaso usakhala ninga wadzala na cidima cikulu.​—Koel. 11:8.

3. Ninji pinacitisa anthu kukhala na maonero akuphonyeka?

³ Kwa abale na alongo anewa, kazinji kene maonero akuphonyeka asaoneka thangwi ya kuphatiswa mwala, mautenda, peno kucimwana kucita pizinji thangwi ya kugwesera. (Sal. 71:9; Mis. 13:12; Koel. 7:7) Mbwenye Nkristu onsene asafunika kudziwa kuti ntima ndi wakunyengeza, pontho unakwanisa kutikonwesa ngakhale kuti Mulungu asakomerwa na ife. (Yer. 17:9 NM; 1 Jwau 3:20) Mwauthambi, Dyabo asapambizira atumiki a Mulungu. Pontho ale akuti ali na manyerezero a Sathani anakwanisa kuyesera kutithaphulisa na maonero akusowa cikhulupiro ninga a Elifaze​—akuti ife nkhabe ntengo kuna Mulungu. Unoyu ukhali uthambi mu ntsiku za Yobe sawasawa ninga lero.​—Yobe 4:18, 19.

4. Tinadzadinganji mu nsolo uno?

⁴ Malemba asapangiza pakweca kuti Yahova anadzakhala na ale anafamba “n’gowa ya chidima.” (Sal. 23:4) Njira ibodzi inakhala iye na ife ndi kubulukira m’Mafalace. Bhibhlya iri na mphambvu, ‘anaipasa mphambvu ndiye Mulungu, toera kufudza nayo malinga onsene.’ (2 Akor. 10:4, 5) Natenepa, tendeni tidinge kuti Bhibhlya inatiphedza tani toera kukulisa na kupitiriza kukhala na maonero akutsandzaya. Pyenepi pinadzakuphedzani, na kugumana njira toera kuwangisambo anango.

PHATISIRANI BHIBHLYA TOERA KUKULISA MAONERO AKULINGANIRA

5. Ndi kudingika kupi kunafuna kutiphedza toera kukhala na maonero akulinganira?

⁵ Mpostolo Paulu alonga pinthu pingasi pyakuti pinatiphedza toera kukulisa maonero akulinganira. Iye akulumiza mpingo wa ku Korinto: ‘Pitirizani kubvundzika mwekha khala muciri akuwanga mu cikhulupiro peno nkhabe.’ (2 Akor. 13:5, NM) “Cikhulupiro” ndi pfuli ya pipfundziso Pyacikristu pinapangizwa m’Bhibhlya. Khala mafala athu na macitiro athu ndi akubverana na pipfundziso pyenepi, tinakwanisa kulonga kuti tapembera, pontho tisapangiza kuti tiri “mu cikhulupiro.” Mbwenye tisafunikambo kubveranisa umaso wathu na pipfundziso pyonsene Pyacikristu. Nee tisafunika kusankhula kuti ndi pipi pinafuna ife kutowezera.​—Tgo. 2:10, 11.

6. Thangwi yanji tisafunika kudingika toera kuona khala ‘ticiri akuwanga mu cikhulupiro’? (Onani cithundzithundzi cakutoma.)

⁶ Panango musanyinyirika toera kudingika mu njira ineyi, makamaka khala musabva kuti nee munapembera. Mbwenye maonero a Yahova kwa ife ndi akufunika kakamwe kupita athu, pontho manyerezero ace ndi apadzulu kakamwe kupiringana athu. (Iza. 55:8, 9) Iye asadinga alambiri ace, tayu toera kuona madodo, mbwenye toera kuona makhaliro awo adidi na kuaphedza. Mungadingika mwekhene mu kuphatisira Mafala a Mulungu toera kuona khala ‘muciri wakuwanga mu cikhulupiro,’ munadzaoneka mwekhene ninga munakuonerani Mulungu. Pyenepi pinakuphedzani kubulusa maonero onsene akuphonyeka akuti nee muli na ntengo kuna Mulungu, mbamuikha maonero akunyindirika a Bhibhlya: Imwe ndimwe wakufunika kakamwe pamaso pa Yahova. Pyenepi pinadzakhala ninga kufungula janela toera ceza cipite mu kwartu yakuti iri na cidima.

7. Tinaphindula tani na pitsandzo pya anthu akukhulupirika a m’Bhibhlya?

⁷ Njira yadidi kakamwe toera kudingika ndi kunyerezera mwacidikhodikho pitsandzo pya anthu akukhulupirika analongwa m’Bhibhlya. Landanisani makhaliro peno mabvero awo na anu, na onani kuti mbamudacitanji khala ndimwe. Tendeni tidinge pitsandzo pitatu pinapangiza kuti tinaphatisira tani Bhibhlya toera kuona khala muli mu cikhulupiro, na kukuphedzani kukulisa maonero akulinganira thangwi ya imwe ene.

NKAZI WANZICE WAKUTCERENGA

8, 9. (a) Kodi nkazi wanzice akhali m’makhaliro api? (b) Ndi mabvero api akuphonyeka akuti panango nkazi wanzice athimbana nawo?

⁸ Mu templo ku Yerusalemu, Yezu aona nkazi wanzice wakutcerenga kakamwe. Citsandzo cace cinatiphedza toera kupitiriza kukhala na maonero akulinganira mwakukhonda tsalakana kucimwana kwathu kucita pizinji. (Lerini Luka 21:1-4.) Nyerezerani makhaliro a nzice unoyu: Iye akhathimbana na kutsukwala thangwi yakuferwa na mamunace, kuphatanizambo makhaliro akuipa a atsogoleri a mauphemberi, akuti ‘akhadyera nyumba za akazi azice,’ mbuto mwakuphedza anthu anewa akutcerenga. (Luka 20:47) Iye akhali wakutcerenga kakamwe kwakuti mbadakwanisa kupereka mu templo kobiri yakuti nyabasa mbadaiwina m’mphindi zakucepa.

⁹ Nyerezerani kuti nkazi unoyu akhapibva tani mu ndzidzi ukhapita iye paberere ya templo na kobiri zace ziwiri zing’ono. Kodi iye anyerezera kuti mbadapereka kobiri yakucepa kakamwe mwakulandanisa na ire ikhapereka iye mamunace mbaciri maso? Kodi mbadakhala na manyadzo mu kuona pyakupereka pya ntengo ukulu pikhacitwa na ale akhali patsogolo pace? Peno mbadanyerezera kuti cakupereka cace nee cikhali na ntengo? Ngakhale kuti panango akhali na manyerezero anewa, iye acita pidakwanisa iye toera kuphedzera ulambiri wandimomwene.

10. Kodi Yezu apangiza tani kuti nkazi wanzice akhali wakufunika kakamwe kwa Mulungu?

¹⁰ Yezu apangiza kuti nkazi wanzice akhali wakufunika kakamwe kwa Yahova, pontho cakupereka cace cikhali cakufunikambo. Yezu alonga kuti nkazi ‘aikhamo pya ntengo ukulu kupiringana pya [anyakupfuma] onsene.’ Kobiri yace mbidabvungazwa na ya anango, mbwenye Yezu ansimba kakamwe. Anyakutsalakana pyakupereka adaona kobiri ziwiri zenezi zing’ono, mwandimomwene adzadzindikira kuti zikhali na ntengo ukulu, pontho mwanaciro akhali wakufunika pamaso pa Yahova. Andedi, maonero a Mulungu akhali akufunika kakamwe kupiringana pikhanyerezera anango peno manyerezero a nkazi wanzice thangwi ya iye ene. Munakwanisa kuphatisira cakucitika ceneci toera kuona khala muli mu cikhulupiro?

11. Munapfundzanji kubulukira ku citsandzo ca nkazi wanzice?

¹¹ Makhaliro anu asakhuya pinakwanisa imwe kupereka kwa Yahova. Na thangwi ya kugwesera peno kuduwala, anango nkhabe kwanisa kuphatisira ndzidzi uzinji m’basa yakumwaza mphangwa zadidi. Kodi iwo asafunika kupenula kulemba lipoti ya pidacita iwo? Panango nee musathimbana na mpingizo ukulu, mbwenye musaona kuti midzidzi inapereka imwe ndi yakucepa kakamwe mungailandanisa na yonsene inaphatisira atumiki a Mulungu pacaka mu ulambiri wace. Mbwenye tapfundza ku citsandzo ca nkazi wanzice kuti Yahova asaona, pontho asapasa ntengo cinthu consene cinacitirwa iye, makamaka cingacitwa pakuthimbana na makhaliro akunentsa. Nyerezerani pidacitira imwe Yahova caka cidamala. Ulipo ndzidzi udaphatisira imwe wakuti mukhafunika kuwangisira kakamwe toera kuntumikira? Khala ndi tenepo, dziwani kuti iye asapasa ntengo kakamwe pidancitira imwe pa ndzidzi unoyu. Ninga nkazi wanzice, khala musacita pyonsene pinakwanisa imwe m’basa ya Yahova, khalani na cinyindiro cakuti muli wakuwanga ‘mu cikhulupiro.’

‘BULUSANI UMASO WANGA’

12-14. (a) Kodi maonero akuphonyeka akhuya tani Eliya? (b) Thangwi yanji Eliya aphatwa na mabvero ninga akhali na iye?

¹² Mprofeta Eliya akhali wakukhulupirika kwa Yahova, pontho akhali na cikhulupiro cakuwanga. Mbwenye pa ndzidzi unango, iye atsukwala kakamwe mbaphemba Yahova toera amuphe. Iye alonga: Yahova, ‘cincino pyakwana. Bulusani umaso wanga.’ (1 Am. 19:4) Ale akuti adzati kuthimbana na kutsukwala ninga kweneku, panango ananyerezera kuti phembero ya Eliya ikhali ya mafala ‘akukhonda kubveka.’ (Yobe 6:3) Mbwenye iye alonga pikhabva iye. Onani kuti, mbuto mwa kusandika Eliya thangwi yakuphemba kufa, Yahova amphedza.

¹³ Thangwi yanji Eliya aphatwa na mabvero anewa? Mu ndzidzi pang’ono nduli, iye akhadatsogolera cipangizo cikulu kakamwe mu Israele cakuti Yahova ndi Mulungu wandimomwene, pyenepi pyacitisa kuti aprofeta akukwana 450 a Baale aphiwe. (1 Am. 18:37-40) Panango Eliya akhadikhira kuti atumiki a Mulungu mbadabwerera mwakucimbiza ku ulambiri wandimomwene, mbwenye nee pyacitika. Yezabele, Nyankhoda wakuipa atumiza mphangwa kuna Eliya kuti iye akhacita masasanyiro toera kumupha. Toera kupulumusa umaso wace, Eliya athawira n’thando kunterero kwa dziko ya Yuda.​—1 Am. 19:2-4.

¹⁴ Pikakhala iye ekhene, Eliya anyerezera kuti basa yace ya uprofeta nee ikhali na basa. Iye apanga Yahova: ‘Sine wadidi kupita makolo anga tayu.’ M’maonero ace, iye akhapibva kuti ndi wakusowa basa ninga pfumbi na magogodo a makolo ace adamala kufa. Mwandimomwene, iye akhadapendeka ekhene mu kuphatisira midida yace mbaona kuti ndi wakusowa basa, na wakusowa ntengo kwa Yahova na kwa anango.

15. Mulungu apasa tani cinyindiro Eliya cakuti akhapitiriza kukhala wakufunika kwa iye?

¹⁵ Mbwenye Mulungu Wamphambvu zonsene akhaona Eliya mu njira yakusiyana. Iye akhali wakufunika pamaso pa Mulungu, pontho Yahova acita pinthu toera kumpasa cinyindiro ca pyenepi. Mulungu atuma anju toera kuwangisa Eliya. Yahova ampasambo cakudya na madzi pyakuti mbapidamphedza paulendo wace wa ntsiku 40 wakuenda ku Phiri ya Horebu. Ngakhale tenepo, mwaufuni Mulungu aphedza Eliya kucinja maonero ace akuphonyeka akuti nkhabebve unango mu Israele akhali wakukhulupirika kwa Yahova. Mwakutsandzayisa, Mulungu apasa Eliya basa ipswa, iye aitawira. Eliya aphindula na ciphedzo ca Yahova, iye abwerera ku basa yace ya uprofeta na mphambvu zipswa.​—1 Am. 19:5-8, 15-19.

16. Ndi njira zipi zingasi zinapangiza kuti Mulungu asakuphedzani?

¹⁶ Citsandzo ca Eliya cinakuphedzani toera kuona kuti muciri wakuwanga mu cikhulupiro na kukucitisani kukhala na maonero akulinganira. Cakutoma, nyerezerani kuti Yahova asakuphedzani tani. Kodi alipo m’bodzi mwa atumiki ace, panango nkulu wa mpingo peno Nkristu wakukola adakuphedzani pa ndzidzi ukhafuna imwe ciphedzo kakamwe? (Agal. 6:2) Mwadyeswa mwauzimu kubulukira m’Bhibhlya, mabukhu athu Acikristu, na misonkhano ya mpingo? Mungaphindula pontho kubulukira mu njira zenezi, kumbukani Mwanaciro ciphedzo ceneci na citani phembero toera kupereka takhuta kuna Iye.​—Sal. 121:1, 2.

17. Ninji pinakomerwa na Yahova mwa atumiki ace?

¹⁷ Caciwiri, dzindikirani kuti maonero akuphonyeka ndi akunyengeza. Maonero a Yahova kwa ife ndi akufunika kakamwe. (Lerini Aroma 14:4.) Yahova asapasa ntengo kuperekeka na kukhulupirika kwathu; iye nkhabe kutipasa ntengo mwakubverana na pinakwanisa ife kucita. Mwandimomwene, ninga Eliya panango musacita pizinji kwa Yahova kupiringana pinanyerezera imwe. Panango m’mpingo musagumanika anthu adaphedza imwe, kuphatanizambo anango a mu cisa canu adabva undimomwene kubulukira mu kuwangisira kwanu.

18. Kodi basa yanu inakupasani Yahova isapangizanji?

¹⁸ Cakumalisa, onani basa yonsene inakupasani Yahova ninga cipangizo cakuti iye ali na imwe. (Yer. 20:11) Ninga Eliya, panango munafewa manungo thangwi musaona kuti basa yanu nkhabe bala misapo, peno kuti pifuno pyanu pinango pyauzimu nkhabe kwanisika. Ngakhale tenepo, imwe muli na mwai ukulu kakamwe wakuti tonsene tiri nawo lero​—kumwaza mphangwa zadidi, na kudziwika na dzina ya Mulungu. Pitirizani kukhala wakukhulupirika. Natenepa, mafala a nsangani ubodzi wa Yezu anakwanisa kulongwa kwa imwe: “Pita mu kutsandzaya kwa mbuya wako.”​—Mat. 25:23.

“PHEMBERO YA MUNTHU WAKUTSUKWALA”

19. Kodi nyakulemba wa Masalmo 102 athimbana na makhaliro anji?

¹⁹ Nyakulemba wa Masalmo 102 nee akhali na cidikhiro. Iye ‘akhanentseka,’ akhathimbana na kutsukwala peno mabvero akunentsa, pontho “akhadaneta” mbasowa mphambvu toera kuthimbana na nyatwa zace. (Sal. 102, NM mafala akutoma) Mafala ace asapangiza kuti iye akhadzudzumika kakamwe na nyatwa zace, kutsoperwa, na mabvero ace. (Sal. 102:3, 4, 6, 11) Mwandimomwene, iye akhanyerezera kuti Yahova akhafuna kumponya kutali.​—Sal. 102:10.

20. Kodi phembero inaphedza tani munthu anathimbana na maonero akuphonyeka?

²⁰ Ngakhale tenepo, nyamasalmo mbadakwanisa kuphatisira umaso wace toera kusimba Yahova. (Lerini Masalmo 102:19-21.) Ninga mudaonera ife pa Masalmo 102, ale akuti ndi akuwanga mu cikhulupiro asanentseka na kuwangisira toera kucalira kuikha manyerezero ku pinthu pyakuphonyeka. Nyamasalmo abva kuti akhali “ninga mbalame idasala yokha pa ntsoi.” (Sal. 102:7) Mungathimbana na mabvero ninga anewa, fungulani ntima wanu kuna Yahova ninga pidacita nyamasalmo. Phembero ya munthu wakutsukwala—​maphembero anu​—anakuphedzani kuthimbana na maonero akuphonyeka. Yahova asapikira kuti ‘anadzabvesera maphembero a nyakutsukwala, mbakhonda kupwaza madembetero ace.’ (Sal. 102:17) Nyindirani pikiro ineyi.

21. Kodi munthu anathimbana na maonero akuphonyeka anakwanisa tani kukhala na maonero akulinganira kakamwe?

²¹ Lemba ya Masalmo 102 isapangizambo kuti munakwanisa tani kukhala na maonero akulinganira kakamwe. Nyamasalmo acita pyenepi mu kuikha manyerezero ace ku uxamwali wace na Yahova. (Sal. 102:12, 27) Iye agumana cibalangazo mu kudziwa kuti Yahova ndzidzi onsene mbadatsalakana mbumba yace mu ndzidzi wa nyatwa. Natenepa, khala musacimwana kucita pizinji ninga munafunira imwe m’basa ya Mulungu thangwi ya mabvero akuphonyeka, phemberani thangwi ya pyenepi. Phembani Mulungu toera abvesere phembero yanu, tayu basi toera kumalisa nyatwa zanu mbwenye toera ‘dzina ya Yahova ibvekeswe.’​—Sal. 102:20, 21.

22. Kodi m’bodzi na m’bodzi wa ife anakwanisa tani kukomeresa Yahova?

²² Inde, tinakwanisa kuphatisira Bhibhlya toera kuona kuti tiri mu cikhulupiro, pontho kuti ndife akufunika kakamwe kwa Yahova. Mbwenye m’makhaliro ano a pinthu, panango nee tinakwanisa kumalisa maonero onsene akuphonyeka peno kufewa manungo. Ngakhale tenepo, m’bodzi na m’bodzi wa ife anakwanisa kukomeresa Yahova na kuwina cipulumuso mu kupitiriza kupirira mwakukhulupirika m’basa yace.​—Mat. 24:13.