Khalani Maso Mwakubverana Na Phembero Yacitsandzo​—Khundu 2

‘Baba wanu asadziwa kale pinafuna imwe.’​—MAT. 6:8.

MUSAKUMBUKA?

Ninji cinaphatanizwa mu phembo ya cakudya cathu ca lero?

Tisafunika kucitanji toera kulekererwa madawo athu?

Kodi Yahova asatawira tani phembo yathu yakuti tikhonde kugwa m’mayesero?

1-3. Thangwi yanji mulongo unango aona kuti Yahova asadziwa pinafuna ife?

LANA cipo anadzaduwala pidancitikira ku Alemanya mu ndzidzi wa malimwe mu caka 2012. Aona kuti maphembero mawiri adacita iye atawirwa. Phembero yakutoma aicita pikhali iye mu xitima yakuti ikhaenda ku thando ya ndeka. Iye aphemba Yahova toera kumpasa mwai wakupereka umboni. Pidafika iye pa thando ya ndeka apangwa kuti ndeka ikhafuna iye kwira mbidaenda mangwana mwace. Iye acita phembero yaciwiri thangwi akhadaphatisira kobiri yonsene ya ku Europa ikhali na iye, natenepa nee akhali na mbuto toera kugona pa ntsiku ineyi.

² Pakumala kucita phembero yaciwiri, Lana abva munthu mbakam’mwanyika, “Uli tani Lana, ukucitanji pano?” Akhalonga akhali mphale akhadapfundza na iye pa xikola ibodzi ene. Mphale akhali na mai wace pabodzi na mbuyace wankazi akuti akhamperekera ku thando ya ndeka toera aende ku Afrika Wakubangwe. Pidadziwa iwo pya nyatwa ya Lana, Elke mai wace mphale unoyu aphemba Lana toera kuenda naye pabodzi kunyumba kwawo. Elke na mai wace atsalakana mwadidi Lana mbapitiriza kuncita mibvundzo thangwi ya pikhulupiro pyace na basa yace ninga m’mwazi mphangwa wa ndzidzi onsene.

³ Mangwana mwace namacibese, pidamala iwo kudya mwadidi, Lana atawira mibvundzo mizinji inalonga pya Bhibhlya. Iye akwata numero na mphangwa zinango toera kupita nawo ncibverano kuti akwanise kukulisa cifuno cawo. Lana abwerera kunyumba mwakutsidzikizika mbapitiriza m’basa yace ya upainiya wa ndzidzi onsene. Iye aona kuti Yahova abvesera maphembero ace mbamphedza.​—Sal. 65:2.

4. Ndi pinthu pipi pyakufunika pinafuna ife kudinga?

⁴ Tingagwerwa na nyatwa mwakukhonda dikhira, panango tisacita phembero mwakucimbiza. Yahova asakomerwa kakamwe kubva maphembero anewa a atumiki ace akukhulupirika. (Sal. 34:15; Mis. 15:8) Mbwenye tinganyerezera mwacidikhodikho phembero yacitsandzo, tinaona kuti pana pinthu pinango pyakufunika kakamwe pyakuti midzidzi inango nee tisapilonga. Mwacitsandzo, nyerezerani kuti pyakufuna pyathu pyauzimu pisapangizwa tani m’maphembo matatu akumalisa mu phembero yacitsandzo. Kodi pana pinango pisafunika ife kucita toera kukhala maso mwakubverana na phembo yacinai inalonga pya cakudya cathu ca lero?​—Lerini Mateo 6:11-13.

‘TIPASENI CAKUDYA CATHU CA LERO’

5, 6. Thangwi yanji phembo yathu ya cakudya ca lero ndi yakufunika kakamwe ngakhale kuti tiri na cakudya cakukwana?

⁵ Yezu atipfundzisa kuphemba cakudya ‘cathu’ ca lero, tayu cakudya ‘canga’ ca lero. Victor, muyang’aniri wa cisa wa ku Afrika alonga: “Kazinji kene ndisapereka takhuta na ntima onsene kwa Yahova thangwi ine na nkazanga nee tisadzudzumika kakamwe kuti cakudya cathu ca mangwana cinabuluka kupi. Pontho nee tisadzudzumika kuti mbani anafuna kulipa mbuto inafuna ife kugona. Abale athu asatitsalakana mwaufuni ntsiku zonsene. Mbwenye ndisaphemba Yahova kuti aphedze ale anapereka ciphedzo ceneci toera akwanise kuthimbana na mikakamizo yakusowa kobiri.”

⁶ Panango ife tiri na pyakudya pyakunjipa, mbwenye abale athu azinji ndi a akutcerenga, peno agwerwa na pidengwa pyacibaliro. Tisafunika kucita phembero thangwi ya iwo, mbwenye tisafunikambo kucita pinthu mwakubverana na maphembero athu. Mwacitsandzo, tinakwanisa kugawana pinthu pyathu na alambiri andzathu akuti asafuna ciphedzo. Tinakwanisambo kucita pyakupereka toera kuphedzera basa ya dziko yonsene, mbatidziwa kuti kobiri ineyi isaphatisirwa munjira yadidi.​—1 Jwau 3:17.

7. Kodi Yezu apfundzisa tani uphungu wakuti nee tisafunika ‘kudzudzumika na pya ntsiku ya mangwana’?

⁷ Pidalonga iye pya cakudya cathu ca lero, Yezu akhafuna kubvekesa pinthu pinafuna ife cincino. Buluka penepo iye abvundza khala Yahova asatsalakana maluwa a ntsanga, ‘anadzakhonda tani kubvazika imwe anthu akucepa cikhulupiro? Lekani mphapo kudzudzumika mbamulonga, ‘tinadzabvalanji?’’ Pakumalisa iye apereka uphungu wakufunika kakamwe: ‘Lekani kudzudzumika na pya ntsiku ya mangwana.’ (Mat. 6:30-34) Pyenepi pisapangiza kuti mbuto mwakufuna kakamwe pinthu pyampfuma, tisafunika kukomerwa na pinthu pyakufunika pya ntsiku ya lero. Pinthu pyenepi pisaphataniza nyumba yakuthema, basa toera kutsalakana banja yathu na cidziwiso toera kuthimbana na nyatwa za ungumi. Mbwenye tingalonga pyenepi basi pakucita phembero, tinapangiza kuti nee tiri na maonero akulinganira. Pana pinthu pyauzimu pyakuti ndi pyakufunika kakamwe kwa ife.

8. Kodi phembo idalonga Yezu thangwi ya cakudya cathu ca lero, isafunika kutikumbusanji? (Onani cithundzithundzi cakutoma.)

⁸ Pidalonga Yezu thangwi ya cakudya cathu ca lero, pisatikumbusa cinthu cinango cidalonga iye kuti: ‘Munthu nkhabe khala maso na nkate basi tayu, mbwenye na mafala onsene anabuluka nkanwa mwa Yahova.’ (Mat. 4:4) Natenepa, tisafunika kupitiriza kuphembera toera Yahova apitirize kutipasa cakudya cauzimu pa ndzidzi wakuthema.

‘TILEKERERENI MANGAWA ATHU’

9. Ndi munjira ipi madawo athu ndi ninga “mangawa”?

⁹ Thangwi yanji Yezu alonga kuti ‘tilekerereni mangawa athu,’ pa ndzidzi unango mbalonga ‘tilekerereni madawo athu?’ (Mat. 6:12; Luka 11:4) Iye alonga pyenepi thangwi madawo athu ndi ninga mangawa. Mu pyaka pyakupiringana 60 nduli, revista ya Ncenjezi yalonga: “Madawo akuswa mwambo wa Mulungu asaticitisa kukhala na mangawa na iye . . . Thangwi ya madawo athu Mulungu mbadatikakamiza toera timbvere. . . . Iye mbadamalisa ntendere wace na ife na kufudza uxamwali wathu na iye. . . . Ife tiri na mangawa akupangiza ufuni kwa iye akuti tisaalipa kubulukira mu kumbvera; tingadawa tisacimwana kulipa mangawa athu akupangiza ufuni kuna iye, thangwi madawo ndi kukhonda funa Mulungu.”​—1 Jwau 5:3.

10. Ndi munjira ipi Yahova anakwanisa kutilekerera madawo athu na tisafunika kubva tani?

¹⁰ Ife tisafuna kulekererwa ntsiku zonsene. Njira ibodzi basi yakuti Mulungu anakwanisa kufudza madawo athu ndi ciomboli ca ntsembe ya Yezu. Maseze ciomboli ceneci calipwa mu pyaka cifupi na 2.000 nduli, tisafunika kucipasa ntengo ninga muoni wakuti taupaswa lero. ‘Ntengo wa ciomboli’ toera kupulumusa umaso wathu ‘ndi ukulu kakamwe’ wakuti nee munthu m’bodzi wakusowa ungwiro mbadakwanisa kuulipa. (Lerini Masalmo 49:7-9; 1 Pedro 1:18, 19.) Natenepa, ndzidzi onsene tisafunika kupereka takhuta kuna Yahova thangwi ya muoni unoyu wakufunika kakamwe. Fala yakuti tilekerereni ‘madawo athu’ tayu “madawo anga” isatikumbusa kuti tonsene mu ubale wathu wauzimu tisafuna masasanyiro anewa antsisi. Inde, Yahova asafuna kuti tinyerezere pyakufuna pyauzimu pya anango, kuphatanizambo ale akuti panango atidawira. Kazinji kene madawo anewa ndi mang’ono, mbwenye tingalekerera abale athu tisapangiza kuti mwandimomwene tisaafuna. Tisapangizambo kuti tisapereka takhuta thangwi ya kutilekerera kunacita Mulungu.​—Akol. 3:13.

11. Thangwi yanji tisafunika kulekerera anango?

¹¹ Mwakutsukwalisa, ife ninga anthu akusowa ungwiro, midzidzi inango tisanentseka kulekerera madodo a anango. (Lev. 19:18) Tingalonga madodo adacitirwa ife na anthu anango, iwo anakwanisa kukhala ku khundu yathu mbapidzudzumisa ntendere wa m’mpingo. Tingapitiriza na makhaliro anewa, tinapangiza kuti tisapwaza masasanyiro a Mulungu a ntsembe ya ciomboli ya Yezu. Natenepa, Baba wathu anadzasiya kuphatisira ciomboli ceneci kuna ife toera kulekerera madawo athu. (Mat. 18:35) Yezu alonga pyenepi pakumala kupereka phembero yacitsandzo. (Lerini Mateo 6:14, 15.) Natenepa, toera tilekererwe madawo athu na Mulungu, tisafunika kuwangisira toera ticalire kucita madawo makulu. Pontho cifuno cathu ca kucalira kucita madawo cinadzatitsogolera ku phembo inatowerera.​—1 Jwau 3:4, 6.

‘LEKANI KUTISIYA MBATIYESERWA’

12, 13. (a) Ninji pidacitikira Yezu pidamala iye kwene kubatizwa? (b) Thangwi yanji nee tisafunika kupasa mulando anango tingagwa m’mayesero? (c) Ninji pidapangiza Yezu mu kupitiriza kukhala wakukhulupirika mpaka kufa?

¹² Kudinga pidacitikirwa na Yezu pidamala iye kwene kubatizwa, kunatiphedza toera kubvesesa kufunika kwa phembo: ‘Lekani kutisiya mbatiyeserwa.’ Yezu atsogolerwa na nzimu wa Mulungu toera kuenda nthando. Thangwi yanji? ‘Toera ayeserwe na Dyabo.’ (Mat. 4:1; 6:13) Thangwi yanji Yahova alekerera pyenepi picitike? Ndi thangwi yakuti Adamu na Eva akhonda utongi wa Yahova. Natenepa, Sathani acita mibvundzo yakuti pakhafunika ndzidzi toera kuitawira. Mwacitsandzo, ciripo cidadawika munjira idacita Yahova anthu? Kodi mphyakukwanisika munthu waungwiro kukhala wakukhulupirika kwa Yahova pakuyeserwa na ‘nyakuipa’? Kodi anthu mbadakhala mwadidi mwakusowa utongi wa Mulungu ninga mudalongera Sathani? (Gen. 3:4, 5) Natenepa, mbapadafunika ndzidzi toera kutawira mibvundzo ineyi, mbwenye mbapidapangiza anthu onsene kuti Yahova asatonga munjira yakuphindulisa.

¹³ Yahova ndi wakucena, na thangwi ineyi iye nkhabe kuyesera munthu toera kucita pinthu pyakuipa. Mbuto mwace, ndi Sathani wakuti asacemerwa ‘Nyakuyesera.’ (Mat. 4:3) Sathani anakwanisa kutiyesera munjira zizinji. Mbwenye pisanyindira m’bodzi na m’bodzi wa ife khala anatawirisa kuyeserwa peno nkhabe. (Lerini Tyago 1:13-15.) Pidayeserwa iye na Sathani, Yezu mwakukhonda dembuka akhonda mayesero onsene mukuphatisira Malemba. Natenepa, Yezu akwanisa kutsidzikiza kuthema kwa utongi ukulu wa Mulungu. Mbwenye Sathani nee ansiya. Iye ‘amuleka mpaka ndzidzi unango.’ (Luka 4:13) Yezu apitiriza kuthimbana na mayesero onsene a Sathani akuti mbadancitisa kuswa umumphu wace. Kristu apitiriza kutsidzikiza ulungami wa utongi ukulu wa Yahova mbapangiza kuti munthu waungwiro anakwanisa kukhala wakukhulupirika maseze athimbane na mayesero makulu kakamwe. Mbwenye Sathani asayeserambo atowereri a Yezu kuphatanizambo imwe toera kupandukira Yahova.

14. Tisafunika kucitanji toera tikhonde kugwa m’mayesero?

¹⁴ Mibvundzo idacitwa thangwi yakuthema kwa utongi ukulu wa Mulungu, isapitiriza kufuna ntawiro. Natenepa, Yahova asatawirisa Sathani toera kutiyesera. Mbwenye iye nee asacitisa kuti tiyeserwe, mwandimomwene iye asatinyindira, pontho asafuna kutiphedza. Thangwi ya ufulu wathu wakusankhula, Yahova nee asatikakamiza toera kucita cinthu cadidi. Natenepa iye asatitawirisa toera kusankhula khala tinakhala akukhulupirika kwa iye peno nkhabe. Toera kucalira kugwa m’mayesero tisafunika kucita pinthu piwiri: Kupitiriza kukhala akuwanga mwauzimu na kupitiriza kuphembera. Kodi Yahova asatawira tani maphembero athu?

15, 16. (a) Ndi mayesero api anango akuti tisafunika kuacalira? (b) Kodi munthu angagwa m’mayesero, mbani asafunika kupaswa mulando?

¹⁵ Yahova asatipasa nzimu wace wakucena wakuti unakwanisa kutipasa mphambvu na kutiphedza toera kuthimbana na mayesero. Yahova asaticenjezambo kubulukira m’Mafalace na mpingo thangwi ya pinthu pinafunika ife kucalira ninga kubvunga ndzidzi uzinji, kobiri na mphambvu ku pinthu pyakumanungo pyakukhonda kufunika. Espen na Janne asakhala mu dziko yakuthambaruka ya ku Europa. Mu pyaka pizinji, iwo atumikira ninga apainiya a ndzidzi onsene mu cisa cibodzi ca mu dziko yawo cakuti kukhafunika kakamwe amwazi mphangwa. Pidabalwa mwanawo wakutoma, iwo asiya basa ya upainiya, cincino ali na mwana waciwiri. Espen alonga: “Nakuti cincino nee tisaphatisira ndzidzi uzinji m’mabasa Acikristu ninga pikhacita ife kale, kazinji kene tisaphembera kwa Yahova toera tikhonde kugwa m’mayesero. Tisaphemba ciphedzo ca Yahova toera kupitiriza kukhala akuwanga mwauzimu na aphinga mu utumiki.”

¹⁶ Mayesero anango asafunika ife kucalira mu ntsiku zino ndi kuona ucipezipezi. Tingagwa m’mayesero anewa, nee tisafunika kupasa mulando Sathani. Thangwi yanji? Thangwi Sathani na dziko yace nkhabe kutikakamiza kucita cinthu cakuti nee tisafuna kucicita. Anango asagwa m’mayesero anewa thangwi nee asacalira kunyerezera pinthu pyakuipa. Mbwenye ife tinakwanisa kucalira mayesero anewa ninga pinacita pikwi na pikwi pya abale athu.​—1 Akor. 10:12, 13.

‘TIPULUMUSENI MWA NYAKUIPA’

17. (a) Tinakwanisa tani kukhala maso mwakubverana na phembo yathu yakuti tipulumuseni mwa nyakuipa? (b) Ndi kusudzuka kupi kwakuti kuli cifupi?

¹⁷ Toera kukhala maso mwakubverana na phembo yakuti ‘tipulumuseni mwa nyakuipa’ tisafunika kuwangisira toera kukhonda ‘cita khundu’ ya Sathani. Nee tisafunika ‘kufuna dziko ya Sathani peno pinthu pya dziko.’ (Jwau 15:19; 1 Jwau 2:15-17) Tisafunika kucita pyenepi ntsiku zonsene. Tinadzakhala akusudzuka kakamwe Yahova angadzafudza Sathani na dziko yace yakuipa. Mbwenye tisafunika kukumbuka kuti pidathamangiswa Sathani kudzulu iye akhadziwa kuti ndzidzi wace ndi wakucepa. Mwakuipirwa, iye asacita pyonsene pinakwanisa iye toera kufudza uxamwali wathu na Yahova. Natenepa tisafunika kupitiriza kuphembera toera Yahova atipulumuse m’manja mwace.​—Apok. 12:12, 17.

18. Tisafunika kucitanji Toera kupulumuka pa kufudzwa kwa dziko ya Sathani?

¹⁸ Kodi musafuna kukhala mu dziko yakusowa Sathani? Khala ndi tenepo, pitirizani kuphemba Umambo wa Mulungu toera ucenese dzina ya Mulungu na kucitisa kuti cifuno cace cicitwe pa dziko yapantsi. Nyindirani Yahova ndzidzi onsene toera akupaseni pyakufuna pyanu pyauzimu na pyakumanungo. Inde, khalani wakutonga toera kukhala maso mwakubverana na phembero yacitsandzo.