Tinapangiza Tani Kuti Tisafuna Yahova?

‘Ife tisafuna Mulungu, thangwi ndiye adatoma kutifuna.’​—1 JWAU 4:19.

NYIMBO: 6, 138

UFUNI WANU USATHIMIZIRIKA TANI MUNAONA IMWE YAHOVA MBAKAPANGIZA UFUNI WACE MU . . .

kutsalakana pifuno pyathu pyakumanungo?

kutipasa cakudya cauzimu?

kutilanga na kutisandika?

1, 2. Kodi lemba ya 1 Jwau 4:19 isatiphedza tani toera kufuna Yahova?

KAZINJI kene, anthu asatawira kuti baba asapfundzisa mwadidi anace angapangiza citsandzo cadidi. Mpostolo Jwau alemba kuti ‘ife tisafuna Mulungu, thangwi ndiye adatoma kutifuna.’ (1 Jwau 4:19) Natenepa, pisaoneka pakweca kuti Yahova asapangiza citsandzo cakukhonda landanisika ca baba waufuni cakuti cinatiphedza toera kunfuna.

² Ndi munjira ipi Mulungu ndiye ‘adatoma kutifuna’? Mpostolo Paulu alonga: ‘Mulungu apangiza kutifuna kwace, thangwi pa ndzidzi ukhali ife anyakudawa, Kristu atifera.’ (Arom. 5:8) Mukupereka Mwanace ninga ntsembe ikulu ya ciomboli kwa anthu akukhulupirika, Yahova apangiza ufuni wandimomwene. Ufuni usapangizwa munjira yakupasa mwakudzala manja, mwakukhonda kuumirwa, na kuikha pifuno pya anango pa mbuto yakutoma mu umaso wathu. Udidi wa Mulungu usatiphedza toera kukhala na uxamwali na iye mbatiphindula na ufuni wace, na kupangizambo ufuni wathu kwa iye.​—1 Jwau 4:10.

3, 4. Kodi kufuna Mulungu kusaphatanizanji?

³ Ufuni ndi n’khaliro ukulu kakamwe wa Yahova. Natenepa, tisabvesesa kuti thangwi yanji Yezu apereka ntawiro uyu pidabvundzwa iye thangwi ya matongero a Mulungu akutoma: ‘Funa Yahova, Mulungu wako na ntima wako onsene, na umaso wako onsene, na ndzeru zako zonsene, na mphambvu zako zonsene.’ (Marko 12:30) Kubulukira m’mafala a Yezu, tisapfundza kuti cakutoma tisafunika kufuna Mulungu na ntima wathu onsene. Mbwenye Yahova nkhabe komerwa na munthu anantumikira na mitima miwiri. Kusiyapo pyenepi, taona kuti kufuna Mulungu kusaphatanizambo umaso wathu onsene, ndzeru na mphambvu zathu zonsene. Pyenepi pisabveka kuti kufuna Mulungu mwandimomwene nee ndi mabvero a muntima basi, mbwenye kusaphatanizambo manyerezero anthu auzimu na mphambvu zathu. Mwakubverana na mprofeta Mikeya, ndi pyenepi pinafuna Yahova kwa ife.​—Lerini Mikeya 6:8.

⁴ Mphapo tinapangiza tani kuti mwandimomwene tisafuna Babathu wakudzulu? Ninga mudalonga Yezu, tisafunika kunfuna na ntima onsene, na mphambvu zathu zonsene, ndzeru zathu zonsene na manyerezero auzimu. Mu nsolo udamala, tadinga njira zinai zinapangiza Yahova ufuni wace ukulu kuna anace. Mbwenye cincino tendeni tidinge kuti tinapangiza tani ufuni wathu kuna Yahova na kuukulisa mu njira yakutawirika kwa iye.

PEREKANI TAKHUTA THANGWI YA MASASANYIRO A YAHOVA

5. Ninji pisafunika ife kucita tinganyerezera pyonsene pinaticitira Yahova?

⁵ Musacitanji mungatambira muoni? Mwakukhonda penula, musapereka takhuta. Kusiyapo pyenepi, imwe munaupasa ntengo mbamuphatisira mwadidi. Mpostolo Tyago alemba: ‘Miyoni yonsene yaungwiro isabuluka kudzulu kuna Baba, adacita cedza consene, pontho iye nkhabe kucinja ninga kufamba kwa nthunzi.’ (Tgo. 1:17) Yahova asatipasa pinafuna ife toera tikhale maso na kutsandzaya. Kodi pyenepi nee pisatikulumiza toera kunfuna?

6. Kodi Aisraele akhafunika kucitanji toera apitirize kutambira nkhombo za Yahova?

⁶ Yahova atsalakana mwaufuni Aisraele mu pyaka pizinji, pontho iwo atsandzaya kakamwe na nkhombo zace zakumanungo na zauzimu. (Deut. 4:7, 8) Mbwenye toera kupitiriza kutambira nkhombo zenezi, Aisraele akhafunika kubvera mitemo ya Yahova, yakuti ikhaphataniza kupereka mwakukhonda phonya ntsembe ya ‘misapo yadidi yakutoma kutokota’ ya dziko yawo. (Eks. 23:19) Natenepa, Aisraele mbadapangiza kuti akhapasa ntengo ufuni wa Yahova na nkhombo zace.​—Lerini Deuteronomyo 8:7-11.

7. Tinaphatisira tani ‘pinthu pyathu pyakufunika’ toera kupangiza ufuni wathu kuna Yahova?

⁷ Ndiye tani kwa ife? Maseze nee tisaphembwa toera kupereka ntsembe zandimomwene lero, mphyakuthema kakamwe kupangiza ufuni wathu kuna Mulungu mu kumulemedza na ‘pinthu pyathu pyakufunika.’ (Mis. 3:9) Ndi njira zipi zingasi zakucita pyenepi? Mwandimomwene, tinakwanisa kuphatisira pinthu pyathu pyakumanungo toera kuphedzera basa ya Umambo ya pacisa na ya pa dziko yonsene. Ineyi ndi njira yadidi kakamwe toera kupangiza ufuni wathu kuna Yahova, mwakukhonda tsalakana khala tiri na pizinji peno pyakucepa. (2 Akor. 8:12) Mbwenye ziripo njira zinango toera kupangiza kuti tisafuna Yahova.

8, 9. (a) Kodi kunyindira mapikiro a Yahova kusabverana tani na ufuni wathu kwa iye? (b) Kodi Mike apangiza tani ufuni na cinyindiro cace kuna Yahova?

⁸ Kumbukani mafala a Yezu kuna atowereri ace kuti aleke kudzudzumika thangwi ya cakudya na cakubvala, mbwenye aikhe Umambo pa mbuto yakutoma. Iye alongambo kuti Baba asadziwa pyonsene pinafunika kwa ife. (Mat. 6:31-33) Kunyindira kwathu kakamwe pikiro ineyi ndi cipangizo ca ufuni wathu ukulu kuna Yahova, thangwi ufuni na cinyindiro pisafamba pabodzi. Mphyakunentsa kufuna munthu anakhonda ife kunyindira. (Sal. 143:8) Natenepa, tinakwanisa kubvundzika: ‘Kodi pifuno na makhaliro a umaso wanga pisapangiza kuti mwandimomwene ndisafuna Yahova? Kodi macitiro anga a ntsiku zonsene asapangiza kuti ndisanyindira kuti Yahova anakwanisa kutsalakana pifuno pyanga?

⁹ Nkristu unango anacemerwa Mike apangiza ntundu unoyu wa ufuni na cinyindiro. Pikhali iye mphale, Mike akulisa cifuno cakutumikira Yahova ku dziko yakunja. Iye asemba mbakhala na ana awiri, mbwenye cifuno cace nee cafewa. Mukuwangiswa na misolo mizinji na pyakugumana napyo pinalonga pya kutumikira m’mbuto zakuti zisafunika kakamwe amwazi mphangwa, Mike na banjace atonga kululupisa umaso wawo. Iwo agulisa nyumba yawo mbaenda kakhala mu nyumba ing’ono kakamwe. Buluka penepo, Mike apungula anyakugula malonda ace, mbapfundza kuti anatsalakana tani malonda ace mukuphatisira interneti mu ndzidzi ukhafuna iye kukhala ku dziko yakunja. Iwo akwanisa kufuluka, pontho pakumala pyaka piwiri pyakutsandzayisa mbakatumikira mu dziko ineyi, Mike alonga: “Ife taona undimomwene wa mafala a Yezu anagumanika pa Mateo 6:33.”

NYEREZERANI MWACIDIKHODIKHO UNDIMOMWENE WA MULUNGU

10. Mwakubverana na pidacitikira Mambo Dhavidhi, ninji pinafuna kucitika tinganyerezera mwacidikhodikho undimomwene unalonga pya Yahova?

¹⁰ Mu pyaka 3.000 nduli, thangwi ya pinthu pidaona iye kudzulu, Mambo Dhavidhi akulumizika toera kulemba: ‘Kudzulu kuli kubvekesa mbiri ya Mulungu, thambo iri kupangiza basa ya manjace.’ Mu kukhuyiwa na udziwisi wa matongero a Mulungu iye alonga: ‘Mwambo wa Yahova ndi wakulungama, usawangisa ntima wakufewa. Pikumbuso pya Yahova ndi pyakunyindirika, pisapasa udziwisi ule anausowa.’ Kodi kuyang’ana kwace mwacidikhodikho kwamphindulisa tani? Dhavidhi apitiriza kulonga: ‘Pinalonga ine na mulomo wanga na pinanyerezera ntima wanga, pikome pamaso panu, Yahova, linga yanga na muomboli wanga.’ Mwandimomwene, pyenepi pyawangisa uxamwali wa Dhavidhi na Mulungu wace.​—Sal. 19:1, 7, 14.

11. Kodi kufuna kwathu Mulungu kusatikulumiza toera kucitanji na cidziwiso cakunjipa ca undimomwene wa Bhibhlya cinatipasa iye lero? (Onani cithundzithundzi cakutoma.)

¹¹ Lero, Yahova asatipfundzisa pizinji thangwi ya iye na kukwanirisika kwa cifuniro cace. Dziko isakulumiza anthu toera kuenda ku universidade na kupfundza kakamwe. Mbwenye pyakugumana napyo pya anthu azinji pisapangiza kuti kutowerera mapfundziro anewa, pisacitisa munthu kuluza cikhulupiro na ufuni wace kuna Mulungu. Bhibhlya isatikulumiza toera kukhala na cidziwiso, udziwisi na luso yakubvesesa. Pyenepi pisabveka kupfundza kuphatisira cidziwiso cidatipasa Yahova toera tikwanise kuphindula na kuphedza anango. (Mis. 4:5-7) Mulungu ‘asafuna kuti anthu onsene apulumuke, mbakhala na cidziwiso candimomwene.’ (1 Tim. 2:4) Ife tisapangiza ufuni wathu kuna Yahova tingamwaza mphangwa zadidi mwaphinga kwa anthu onsene na kuaphedza toera kubvesesa cifuniro cikulu ca Mulungu kuna anthu.​—Lerini Masalmo 66:16, 17.

12. Kodi mulongo Shannon apangiza tani kupereka kwace takhuta thangwi ya cakudya cauzimu cinapereka Yahova?

¹² Anang’ono anakwanisambo kupangiza ufuni wawo kuna Yahova mu kupereka takhuta thangwi ya cakudya cauzimu cinapereka iye. Mwacitsandzo, Shannon alonga kuti pikhali iye na pyaka 11 pyakubalwa, iye na m’bale wace wankazi wa pyaka 10 pabodzi na anyakubalawo, agumanika pa nsonkhano wa gawo wa nsolo, “Devoção Piedosa.” Pa khundu inango ya nsonkhano, anang’ono aphembwa toera akhale pa mbuto idakoyerwa iwo. Iye adzudzumika pang’ono mbwenye aenda kakhala. Buluka peno, iye adzumatirwa kakamwe pidaona iye aphale na atsikana onsene mbakapaswa bukhu yakubalika ya nsolo wakuti, Os Jovens Perguntam​—Respostas Práticas. Kodi pyenepi pyakhuya tani mabvero a Shannon thangwi ya Yahova Mulungu? Iye alonga: “Kubulukira pa ndzidzi unoyu, ndadziwa kuti Yahova ndi wandimomwene, pontho asandifuna kakamwe. Tiri akutsandzaya kakamwe thangwi Yahova, Mulungu wathu wamphambvu zonsene asatipasa miyoni yakubalika kakamwe!”

TAWIRANI KULANGWA NA KUSANDIKWA NA YAHOVA

13, 14. Kodi tisafunika kucitanji Yahova angatipasa uphungu? Thangwi yanji?

¹³ Bhibhlya isalonga: ‘Yahova asasandika ale anafuniwa na Iye, ninga baba asasandikambo mwanace wa pantima.’ (Mis. 3:12) Mphapo tisafunika kutawira tani uphungu wace? Mpostolo Paulu alonga mwandimomwene kuti: ‘Kulangwa nee kusatsandzayisa tayu pa ndzidzi unoyu, mbwenye kusapha.’ Pidalonga iye mafala anewa, Paulu nee abvekesa kuti munthu nkhabe funika kulangwa, thangwi iye apitiriza kulonga: ‘Mbwenye pakumalisa, kusapasa nsapo wa ntendere wa ulungami kuna ale adautawira.’ (Aheb. 12:11) Khala tisafuna Yahova, tisafunika kucalira kupwaza peno kuipirwa tingapaswa uphungu na iye. Kwa anango pisanentsa kutambira uphungu, mbwenye ufuni wathu kwa Yahova unatiphedza kakamwe.

¹⁴ Mu ntsiku za Malakiya, Ayuda azinji nee akhabvera uphungu wa Yahova. Mwakubverana na Mwambo, iwo akhadziwa kuti akhafunika kupereka ntsembe zakuthema, mbwenye akhapwaza mbapereka ntsembe zakukhonda kukomeresa Yahova. Natenepa, Yahova apereka uphungu wakuwanga kakamwe kuna iwo. (Lerini Malakiya 1:12, 13.) Ndi munjira ipi uphungu unoyu ukhali wakuwanga? Onani mafala adalonga Yahova: ‘Ndinadzakupasani dzedze, mbandicinja nkhombo zanu mbazikhala dzedze kuna imwe. Mwandimomwene, ndacinja nkhombo zanu kudza dzedze, thangwi imwe nee musatsalakana mitemo yanga inakupasani ine.’ (Mal. 2:1, 2) Mwandimomwene, kupwaza cakhomo uphungu waufuni wa Yahova kunatibweresera nyatwa.

15. Ndi n’khaliro upi wa anthu azinji lero wakuti tisafunika kuucalira?

¹⁵ Dziko ya Sathani isakulumiza anthu toera kunyerezera pinafuna iwo basi. Anthu ananyerezera tenepo, azinji nkhabe kukomerwa kupaswa uphungu peno kusandikwa, pontho nkhabe kuuphatisira angaupaswa. Ngakhale ale anaoneka ninga asatawira uphungu, asacita pyenepi na ntima onsene tayu. Mbwenye Akristu asacenjezwa: ‘Lekani kusangizira ndzeru zakuipa za anthu a dziko.’ Natenepa, tisafunika kubvesesa na kubvera ‘pinafuna Mulungu.’ (Aroma 12:2) Kubulukira mu gulu yace, Yahova asatipasa uphungu pa ndzidzi wakuthema m’makhundu mazinji a umaso. Mwacitsandzo, macitiro athu na munthu wakuti nee ndi nkazathu peno mamunathu, tinasankhula tani axamwali na ubalangazi. Tingatawira uphungu unoyu mbatiuphatisira na ntima onsene, tinapangiza kuti tisapereka takhuta, pontho tisafuna Yahova na ntima onsene.​—Jwau 14:31; Arom. 6:17.

NYINDIRANI YAHOVA TOERA KUTSIDZIKIZWA NA KUPULUMUSWA

16, 17. (a) Thangwi yanji tisafunika kudinga pinafuna Yahova pakucita pisankhulo? (b) Kodi Aisraele apangiza tani kusowa ufuni na cinyindiro kuna Yahova?

¹⁶ Anang’ono angagopa, mwakukhonda dembuka asathamangira kuna anyakubalawo. Munakula iwo, asapfundza kuphatisira luso yawo na kucita okhene pisankhulo pyawo. Pyenepi pisapangiza kuti akukula. Mbwenye ale akuti ali na uxamwali wakuwanga na anyakubala awo asaphemba maonero na uphungu kuna iwo mbadzati kucita cisankhulo. Pyenepi ndi sawasawa mu umaso wathu wauzimu. Yahova asatipasa nzimu wace toera kutikulumiza ‘kufuna na kucita’ pinthu. Mbwenye, tingacita pisankhulo mwakukhonda bverana na cifuno cace, pinapangiza kuti nee tisanfuna, pontho nee tisanyindira Yahova.​—Afil. 2:13.

¹⁷ Mu ntsiku za Samwele, Aisraele akhadakundwa kakamwe na Afilisti. Atumiki anewa a Mulungu akhafuna kakamwe ciphedzo na citsidzikizo. Kodi iwo acitanji? Iwo alonga: ‘Tendeni ku Silo tikakwate bokosi ya cibverano ca Yahova toera ikhale pakati pathu, toera ikwanise kutipulumusa m’manja mwa anyamalwa athu.’ Mphapo, ninji pidacitika? ‘Israele akundwa, adaphiwa penepo akhali anthu pikwi makumatatu. Kusiyapo pyenepi, Bokosi ya cibverano yakwatwa.’ (1 Sam. 4:2-4, 10, 11) Pidakwata Aisraele Bokosi ya cibverano, pisaoneka kuti iwo akhanyindira Yahova toera kuaphedza. Mbwenye Aisraele nee asaka citsogolero ca Yahova, iwo akhatowezera maonero awo, pakumalisira iwo aona nyatwa.​—Lerini Misangani 14:12.

18. Kodi Bhibhlya isatipfundzisanji thangwi yakunyindira Yahova?

¹⁸ Nyamasalmo apangiza n’khaliro wadidi wakubulukira muntima mudalemba iye kuti: ‘Dikhira Mulungu, pontho ndinadzansimba ninga Mpulumusi wanga Wankulu. Ntima wanga watsukwala. Na thangwi ineyi, ndisakukumbukani.’ (Sal. 42:5, 6) Anewa ndi mabvero a ufuni ukulu kakamwe kuna Yahova! Kodi musakulisambo mabvero anewa a ufuni kuna Babathu wakudzulu na kun’nyindira? Khala ntawiro wanu ndi inde, imwe munakwanisa kuthimizira cinyindiro canu kuna iye mwakubverana na pinalonga Bhibhlya kuti: ‘Khulupira Mulungu na ntima wako onsene, mbukhonda kukhulupira ndzeru zako. Nyerezera iye munjira zako zonsene, iye anadzazereza njira zako.’​—Mis. 3:5, 6. 

19. Muli wakutonga toera kupangiza kuti musafuna Yahova munjira zipi?

¹⁹ Pidatoma Yahova kutifuna, iye apangiza njira toera tinfunembo. Natenepa, tendeni ndzidzi onsene tinyerezere citsandzo cace cakukhonda landanisika. Pontho tendeni tipitirize kupangiza ufuni wathu kuna iye na ‘ntima wathu onsene, na umaso wathu onsene, na ndzeru zathu zonsene, na mphambvu zathu zonsene.’​—Marko 12:30.