NSOLO WA REVISTA

Kodi Mulungu Acitanji Kwa Imwe?

“Mulungu afuna pikulu pyene dziko yapantsi, mbapereka Mwanace m’bodzi ekha toera munthu onsene anankhulupira, akhonde kufudzwa, mbwenye aone umaso wakukhaliratu.”​—Jwau 3:16, Tradução do Novo Mundo.

Ineyi ndi ibodzi mwa malemba akudziwika kakamwe m’Bhibhlya, akuti asaphatisirwa kazinji kene. Pisalongwa kuti nkhabebve vesi inango “inapangiza mwacigwagwa uxamwali wa Mulungu na anthu, na njira yacipulumuso.” Na thangwi ineyi, m’madziko anango, mafala anewa, peno lemba ya “Jwau 3:16,” isapangizwa kazinji kene m’mbuto zinagumanyikana anthu, kulembwa m’miotokala, na mbuto zinango.

Pisaoneka kuti ale anapangiza lemba ineyi asatawira kuti ufuni wa Mulungu usaapasa cinyindiro cakukhala na umaso wakukhonda mala. Ndiye tanimbo imwe? Ufuni wa Mulungu usabvekanji kwa imwe? Musanyerezera kuti Mulungu acitanji toera kupangiza ufuni wace kwa imwe?

“MULUNGU AFUNA PIKULU PYENE DZIKO YAPANTSI”

Anthu azinji asatawira kuti Mulungu alipo thangwi yakucitwa kwa kudzulu na pantsi, pinthu pyacibaliro, na anthu. Pinthu pyaumaso ndi pyakudzumisa, pontho pyacitwa mwadidi, pyakuti pisapangiza kuti mwandimomwene alipo munthu waudziwisi kakamwe adapicita. Anthu azinji asapereka takhuta kuna Mulungu ntsiku zonsene thangwi ya umaso uli na iwo. Iwo asadzindikirambo kuti asanyindira Mulungu toera kuapasa pyonsene pinafuna iwo mu umaso wawo​—ninga muya, madzi, cakudya, na makhaliro anango acibaliro a dziko​—toera akwanise kupitiriza na umaso mbaphatisira pinacita iwo.

Mphyadidi kupereka takhuta kuna Mulungu thangwi ya pinthu pyenepi, thangwi mwandimomwene, iye ndi Nciti wathu na Nyakutitsalakana. (Masalmo 104:10-28; 145:15, 16; Machitiro 4:24) Tinakwanisa kuona ufuni wa Mulungu kwa ife tinganyerezera pyonsene pinacita iye toera tikhale na umaso. Mpostolo Paulu alonga: “[Mulungu] ndiye ene anapasa moyo, muya na pyonsene. Mwa iye tiri na moyo, tinafamba, mbatikhala.”​—Machitiro 17:25, 28.

Mbwenye ufuni wa Mulungu usapangizika mu njira zizinji kupiringana kutsalakana kwace pinafuna ife. Iye aticitambo mwakusiyana kakamwe na pinyama, atipasa cifuno cauzimu, pontho asatiphedza toera kukwanirisa cifuno ceneci. (Mateo 5:3, NM) Natenepa, anthu akubvera ali na cidikhiro cakucita khundu ya banja ya Mulungu, ninga ‘anace.’​—Aroma 8:19-21.

Ninga pinalonga Jwau 3:16, Mulungu apangiza ufuni wace kwa ife mu kutumiza Mwanace, Yezu, pa dziko yapantsi toera kutipfundzisa pya Mulungu wace na Babace, pontho toera kutifera. Mbwenye anthu azinji nee asabvesesa mwadidi thangwi yanji Yezu akhafunika afere anthu, na kufa kwace kusapangiza tani ufuni wa Mulungu kwa ife. Tendeni tione kuti Bhibhlya isafokotoza tani thangwi ya kufa kwa Yezu na ntengo wa kufa kwace.

‘APEREKA MWANACE M’BODZI EKHA’

Anthu onsene asafa, asathimbana na nyatwa ya utenda, kugwesera, na kufa. Mbwenye ceneci nee cikhali cifuniro cakutoma ca Yahova Mulungu. Iye apasa anthu akutoma cidikhiro cakukhala kwenda na kwenda mu paradizu pa dziko yapantsi. Toera kukwanisa pyenepi: Iwo akhafunika kubvera Mulungu. Mulungu aapanga kuti angakhonda kubvera, mbadafa. (Genesi 2:17) Mamuna wakutoma apandukira utongi wa Mulungu, mbabweresa kufa kwa iye na anace. Mpostolo Paulu afokotoza: ‘Ninga mudapita madawo pantsi pano, thangwi ya munthu m’bodzi basi, mbakupitambo kufa thangwi ya madawo, natenepa kufa kwapita mwa anthu onsene thangwi anthu onsene acitambo madawo.’​—Aroma 5:12.

Mbwenye ‘Mulungu asafuna cilungamo.’ (Masalmo 37:28) Maseze nee mbadapwaza kudawa cakhomo kwa mamuna wakutoma, Mulungu nee atonga kuti anthu onsene athabuke, mbafa kwenda na kwenda thangwi yakukhonda bvera kwa munthu m’bodzi. Mbuto mwace, mu kuphatisira ntemo wakubwerezera ‘umaso na umaso,’ iye akhazikisa cilungamo, mbacitisa kuti anthu akubvera akwanise pontho kukhala na umaso wakukhonda mala. (Eksodo 21:23) Mbvundzo ndi uyu: Mbapidakwanisika tani kuombola pontho umaso waungwiro udaluza Adhamu? Ntawiro: Pikhafunika kuti munthu aperekeke, peno apereke ntsembe ya umaso wa ntengo ubodzi ene na wa Adhamu​—umaso wa munthu wakusowa madawo.

Mwandimomwene, nee m’bodzi mwa ana akusowa ungwiro a Adhamu mbadakwanisa kupereka ntsembe ineyi, mbwenye Yezu mbadakwanisa. (Masalmo 49:6-9) Mu kubaliwa mwakusowa madawo, Yezu akhali waungwiro, ninga Adhamu. Natenepa, mu kupereka umaso wace, Yezu aombola anthu ku ubitcu wa madawo. Mu kucita pyenepi, iye apasa ana a banja yakutoma, mwai wakukhala na umaso waungwiro ninga ukhali na Adhamu na Eva. (Aroma 3:23, 24; 6:23) Tisafunika kucitanji toera kuphindula na cipangizo ceneci ca ufuni ukulu kakamwe?

“MUNTHU ONSENE ANANKHULUPIRA”

Tingabwerera pa Jwau 3:16, tisaleri mafala akuti “munthu onsene anakhulupira [Yezu] akhonde kufudzwa, mbwenye aone umaso wakukhaliratu.” Pyenepi pisabveka kuti tisafunika kucita pinthu toera kuwina umaso wakukhonda mala. Khala tisafuna ‘umaso wakukhonda mala,’ tisafunika kukhulupira Yezu na kumbvera.

Panango munasaka kudziwa: ‘Thangwi yanji tisafunika kubvera? Yezu nee alonga kuti “munthu onsene anankhulupira anadzakhala na umaso wakukhonda mala?”’ Inde, kukhulupira, peno cikhulupiro ndi cakufunika. Mbwenye mphyadidi kukumbukira kuti m’Bhibhlya, cikhulupiro cisaphataniza pizinji kupiringana kutawira basi kuti Yezu alipo. Mwakubverana na Dicionário Expositivo de Palavras do Novo Testamento, fala idaphatisira Jwau, isabveka kunyindira, tayu basi kutawira. Toera kutawirwa na Mulungu, munthu asafunika acite pizinji kupiringana kutawira kuti Yezu ndi Mpulumusi. Nyakukhulupira asafunikambo kuwangisira toera kuphatisira pidapfundzisa Yezu. Angakhonda kupangiza na mabasa, cikhulupiro cace ntcapezi. Bhibhlya isalonga: “Kutawira kwakusowa machitiro nkhwakufa.” (Tyago 2:26) Mu njira inango, nyakukhulupira asafunika kukhulupira Yezu, pisabveka kuti iye asafunika akhale maso mwakubverana na pinakhulupira iye.

Paulu afokotoza tenepa: ‘Kufuna kwa Kristu kunatitonga mbatinyerezera kuti munthu m’bodzi [Yezu] afera anthu onsene, . . . munthu adafera anthu onsene ndiye Kristu, toera anthu ali maso akhonde kukhalira pinaoneka na maso okha, mbakhalire Kristu adaafera mbalamuka muli akufa.’ (2 Akorinto 5:14, 15) Kupereka takhuta na ntima onsene ku ntsembe ya Yezu kusafunika kutikulumiza toera kucita macinjo mu umaso wathu​—kusiya kukhala maso toera kucita pinafuna ife, mbaticita pinafuna Yezu, ule adatifera. Pyenepi pisabveka kuti pakutoma tisafunika kubvera pipfundziso pya Yezu mu umaso wathu. Kucinja kweneku kunadzakhuya umaso wathu, pisankhulo pyathu, na pyonsene pinacita ife. Ndi nkhombo zanji zinafuna kudzatambira ale anatawira mbakhulupira Yezu?

“AKHONDE KUFUDZWA, MBWENYE AONE UMASO WAKUKHALIRATU”

Khundu yakumalisa ya Jwau 3:16 isapangiza pikiro ya Mulungu kwa ale anakhulupira masasanyiro a ciomboli mbakhala maso mwakubverana na midida ya Mulungu. Mulungu ‘nee asafuna kuti anthu anewa akukhulupirika afudzwe, mbwenye aone umaso wakukhaliratu.’ Mbwenye pana pidikhiro pyakusiyana kwa ale anaphindula na ufuni wa Mulungu.

Yezu apikira nsoka ubodzi kuti mbudakhala na umaso wakukhonda mala kudzulu. Iye alonga pakweca kwa anyakupfundzace akukhulupirika kuti iye akhafuna kuenda kaasasanyira mbuto toera iwo atonge pabodzi na iye m’mbiri yace. (Jwau 14:2, 3; Afilipi 3:20, 21) Ale analamuswa toera kukhala na umaso kudzulu ‘anadzakhala anyantsembe a Mulungu na a Kristu, mbadzatonga pabodzi na iye mu pyaka 1.000.’​—Apokalipse 20:6.

Basi ene numero yakucepa ya atowereri a Kristu mbadatambira mwai unoyu. Mwandimomwene Yezu alonga: ‘Leka kugopa, iwe nkumbi ung’ono thangwi Baba wanu akomerwa na kukupasani dziko [peno Umambo].’ (Luka 12:32) Ndi anthu angasi akhafuna kucita khundu ya ‘nkumbi ung’ono’ unoyu? Lemba ya Apokalipse 14:1, 4 isalonga: ‘Ndayang’ana, mbandiona Mwanabira [Yezu Kristu adalamuswa muli akufa] alimira pa phiri ya Syau [kudzulu]. Pabodzi na iye akhali anthu 144.000, mbakhala na dzina yace na dzinambo ya Babace, adalembiwa pa nkhope pawo. . . . Iwo aomboliwa pakati pa anthu toera akhale akutoma a Mulungu na a Mwanabira.’ Tinganyerezera pya pikwi na pikwi pya anthu adakhala maso, anthu 144.000 ndi ‘nkumbi ung’ono.’ Iwo asalongwa kuti ndi amambo, mphapo anadzatonga ani?

Yezu alonga pya nsoka waciwiri wa anthu akukhulupirika anafuna kudzatambira nkhombo za Umambo wakudzulu. Pa Jwau 10:16, Yezu alonga: ‘Ndina mabira anango, si a mu thanga ino tayu. Mbwenye pisafunika kuti ine ndiatsogolere, penepo anadzabvera mafala anga, mbudzakhala nkumbi ubodzi ene na nkumbizi m’bodzi basi.’ “Mabira” anewa asadikhira umaso wakukhonda mala pa dziko yapantsi. Ndi cidikhiro cibodzi cene cikhali na Adhamu na Eva pakutoma. Tisadziwa tani kuti ali na cidikhiro cakukhala pa dziko yapantsi?

Kazinji kene, Bhibhlya isalonga pya makhaliro a Paradizu inafuna kudzaoneka pa dziko yapantsi. Toera kuona pyenepi mwekhene, fungulani Bhibhlya yanu mbamuleri malemba anatowerera: Masalmo 37:9-10; 46:8, 9; 72:7, 8, 16; Izaiya 35:5, 6; 65:21-23; Mateo 5:4; Jwau 5:28, 29; Apokalipse 21:4. Mavesi anewa asapikira kumala kwa nkhondo, njala, mautenda, na kufa. Iwo asalonga pya ndzidzi wakuti anthu adidi anadzakomerwa na kumanga nyumba zawo, kulima maminda awo, na kukuza anawo m’makhaliro a ntendere.a Kodi cidikhiro ceneci ndi cakukomeresa kwa imwe? Tiri na mathangwi adidi toera kukhulupira kuti mwakukhonda dembuka mapikiro anewa anadzakwanirisika.

MULUNGU ACITA PIZINJI

Mungalimira mbamunyerezera pyonsene pidacita Mulungu kwa imwe na kwa anthu onsene, pisaoneka pakweca kuti iye acita pinthu pizinji kakamwe. Ife tiri na umaso, ndzeru, ungumi, na pinthu pyakufunika toera kutsalakana umaso. Kusiyapo pyenepi, ninga pidapfundza ife pa Jwau 3:16, muoni wa Mulungu wa ciomboli kubulukira mwa Yezu, ule adatifera, usaphataniza nkhombo zizinji kakamwe.

Umaso wakukhonda mala m’makhaliro a ntendere, akutsandzayisa, akuti anthu nkhabe kudzathabuka na utenda, nkhondo, njala, peno kufa, mbudafungula nsuwo toera kukhala akutsandzaya na nkhombo zakukhonda mala. Khala munadzatambira nkhombo zenezi peno nkhabe, pyonsene pisanyindira imwe. Mbwenye mbvundzo udasala ndi uyu: Ninji pinacita imwe kuna Mulungu?

[Cidzindikiro capantsi]