NSOLO WA REVISTA | KODI MULUNGU ACITANJI KWA IMWE?

Ndzidzi Wakuti Nee Musafunika Kuuluza

Camasiku mbadzati kupereka umaso wace, Yezu apfundzisa atowereri ace akukhulupirika toera kukumbukira ntsembe ya kufa kwace. Mu kuphatisira nkate wakusowa cakutupisa na vinyu yakufuwira pamaso pawo, iye akhazikisa Siyali Yakumalisa peno Cakudya Cancidodo ca Mbuya, mbalonga: ‘Ipi piciteni toera mundikumbukire.’​—Luka 22:19.

Pyaka pyonsene, Mboni za Yahova pa dziko yonsene zisagumanyikana toera kukumbukira ntsiku ya kufa kwa Yezu. Caka cino, Cikumbuso ca kufa kwa Yezu cinadzacitwa n’Ciposi, ntsiku 14 ya Bwinja, dzuwa ingabira.

Imwe musacemerwa na ntima onsene toera kugumanika pa nsonkhano unoyu. Nkati mwa nsonkhano kunadzaperekwa mphangwa zakuthimizirika za ntsembe ya kufa kwa Yezu. Nkhabe kulipwa kobiri toera kugumanika. Pontho nkhabe kudzacitwa nsonkhonsonkho. Munthu adakupasani revista ino anakwanisa kukupangani ndzidzi na mbuto inafuna kudzacitirwa Cikumbuso ceneci mu cisa canu, peno muone mu Web site yathu, jw.org. Taphata miyendo lekani kuduwala ntsiku ineyi, yakuti tisadikhira kugumanyikana pabodzi na imwe.